Karoa 11
Dahaka Dainai Dirava ese Kara Dika la Koua Lasi?
TANOBADA ibounai lalonai kara dika, badu bona hisihisi idia vara. Kerere lasi taudia momo be hisihisi idia ania. Haida idia gwau unai be Dirava ena kerere. Reana idia gwau: ‘Bema Dirava ia noho, dahaka dainai unai gau dikadia ia koua lasi?’
2 Gau tamona, Dirava ese unai dika ia havaraia lasi, to taunimanima ese, ani? Dirava ia gwau unai bamona kara be dika. Bema taunimanima ese iena taravatu idia badinaia, hisihisi momo be tanobada dekenai do ia vara lasi. Iena taravatu be ita lalokau heheni, ita ala-ala lasi, ita henaohenao lasi, ita heudahanai lasi, ita mata-ganigani lasi, ita inuinu kekero lasi bona taunimanima hahisidia karadia dikadia iboudiai ita karaia lasi. (Roma 13:9; Efeso 5:3, 18) Dirava ese Adam bona Eva ia havaradia neganai, edia tau-anina bona edia lalona be idia goevadae dainai mauri idia moalelaia bada. Ia ura lasi idia eiava edia natudia be hisihisi do idia ania.
3 Satana Diabolo ese kara dika ia hamatamaia tanobada dekenai. To Adam bona Eva danu be mai edia kerere. Edia lalona edia goada be hegeregere Satana ena hedibagani do idia dadaraia diba, tau goevadaena Iesu be gabeai ia karaia hegeregerena. (Mataio 4:10) To idia dadaraia lasi dainai goevadae lasi taudia ai idia lao. Edia natudia iboudiai, ita danu, be unai dika ita abia, unai dainai, gorere, lalo-hisihisi bona mase ita davaria. (Roma 5:12) To dahaka dainai Dirava ese hisihisi ia koua lasi?
4 Nega daudau herea lalonai Dirava ese hisihisi ia koua lasi be mai ena badina maorona eiava? Mani inai oi laloa: Bema doketa ta ese gorere merona ta ena tau-anina ia ivaia gwauraia, bena ena be unai mero ena tamana bona sinana ese idia lalokau henia momokani, bona idia diba doketa ese ia ivaia murinai hisihisi be nega kwadogi lalonai do ia ania, to idia koua lasi, badina be unai dala amo ena gorere do ia hanamoa. Vadaeni, Dirava ese kara dika ia koua lasi dainai dahaka namo ia vara?
HENANADAI BADANA TA
5 Eden lalonai Dirava idia gwau-edeede henia neganai, henanadai badana ta ia vara. Namona be unai henanadai ita tahua namonamo, bena do ita diba dahaka dainai Dirava ese kara dika ia koua lasi. Iehova ese Adam ia hagania, au ta ena huahua do ia ania lasi. Ma ia hamaoroa, ia gwau: “Oi ania dinana dekenai do oi mase.” (Genese 2:17) To Satana ena hereva be idau vaitani. Eva ia hamaoroa, unai au ena huahua ia ania be namo, ia gwau: “Dohore umui mase lasi.” Ma ia gwau: “Dirava be inai bamona ia hereva badina ia diba, umui ania dinana dekenai emui matana do idia kehoa, bena Dirava danu do umui hegeregere, namo bona dika do umui diba.”—Genese 3:1-5.
6 Eva ese Dirava ia kamonai henia lasi, to Satana ena hereva ia abiadae dainai unai huahua ia ania. Ia laloa unai kara amo ia bona Adam be Dirava ena siahu bona ena taravatu henudiai do idia noho lasi. Ruaosi sibodia do idia lalohadai, dahaka be “namo” bona dahaka be “dika.” Vadaeni Adam ese Eva ena kara ia abiadae bena ia danu ia ania. The Jerusalem Bible ia gwau: “Siahu ia abia gwauraia, sibona ena lalona do ia hadaia, dahaka be namo bona dahaka be dika, bena ena lalohadai hegeregerena do ia karaia, . . . Iena kara dikana ginigunana be Dirava ena siahu ia dadaraia.” Anina be ia laloa Dirava ese taunimanima ia lohiaia o ia biagua be maoro lasi.
7 Unai dainai, Adam bona Eva ese unai huahua mai taravatuna idia ania neganai, Dirava ena lohia siahuna idia dadaraia. Unai nega amo ia lao, kara “namo” o kara “dika” be sibodia edia lalohadai bamona idia karaia. Unai dainai inai henanadai badana ia vara: Dirava ese taunimanima ia lohiaia be maoro eiava lasi? Dirava ese taravatu taunimanima dekenai ia henia, ia hamaorodia dahaka be kara namo bona dahaka be kara dika, be maoro eiava? Eiava taunimanima be sibodia idia naria be namo a? Daika ena lohia dalana be namo? Bema Iehova ese taunimanima ia hakaudia lasi to Satana ese ia hakaudia, idia kwalimu diba a? Eiava tanobada ia maino hanaihanai totona, kara maoromaoro gavamanina haginia dalana be Dirava sibona ese ia hahedinaraia diba, a? Unai henanadai iboudiai idia vara, Dirava ena lohia siahuna be unai bamona idia dadaraia neganai.
8 Unai kerere ia vara neganai, Iehova ese unai gwau-edeede taudia toi, Satana, Adam bona Eva, ia hamasedia haraga diba, badina be iena goada ese edia goada ia hanaia momokani. To bema ia hamasedia, unai amo do ia hahedinaraia lasi taunimanima be sibodia idia naria diba lasi, Dirava ese ia durudia lasi neganai. Unai dainai Iehova ia naria daudau ela bona unai henanadai ena haere do ia hedinarai goevagoeva.
HENANADAI ENA HAERE IA HEDINARAI
9 Lagani momo herea idia lao vadaeni bona dahaka ia vara? Hanaia lagani 6,000 lalodiai idia vara gaudia ese idia hahedinaraia Dirava ese taunimanima ia hakaudia lasi neganai idia be sibodia idia naria diba lasi, ani? Gavamani namona ta taunimanima iboudiai hanamodia bona hamoaledia totona be idia haginia lasi, ani? Idau nega amo ema bona hari, idia vara gaudia ese Ieremia ena hereva idia hamomokania: “Taunimanima be ena raka ai sibona ia hakaua diba lasi,” ani?—Ieremia 10:23.
10 Idau nega amo ema bona hari, gavamani idauidau idia haginia, to ta ese noho namo bona moale momokani ia havaraia lasi. To reana haida idia gwau taunimanima edia noho ia namo ia lao noho. To ia namo ia lao momokani lasi, badina be guna peva bona diba idia tuarilaia, to hari be bomb badadia idia tuarilaia diba bona tanobada taudia iboudiai idia gari, ma tuari badana ta do ia vara garina. Ena be hua dekenai idia daekau diba, to tanobada dekenai idia maino karaia diba lasi, ani? Ruma namodia idia haginia bena idia noholaia taudia idia parara, ena namo be dahaka? Heatu be taoni lalodiai idia vara, kohu bona taunimanima idia hadikaia bona taravatu utua karadia idia bada idia lao dainai, ita heagi diba a? Lasi vaitani! To unai dika iboudiai idia vara, badina be taunimanima ese Dirava idia dadaraia bona idia be sibodia idia naria toho.—Hereva Lada-isidia 19:3.
11 Ia hedinarai goevagoeva vadaeni, taunimanima be Dirava idia dadaraia bona sibodia idia naria toho dainai, idia lusi vaitani bona hisihisi bada herea idia havaraia. Bible ia gwau: “Taunimanima ese edia bamodia idia lohiadia bona idia hahisidia.” (Kohelete 8:9) Momokani, bema Dirava ese taunimanima ia hakaudia lasi, dika idia davaria. Taunimanima idia noho namo totona idia aniani bona idia inuinu be namo; unai hegeregerena, idia noho namo totona Dirava ena taravatu idia badinaia danu be namo. Bema aniani bona ranu idia dadaraia, dika idia davaria; unai hegeregerena, bema Dirava ena taravatu idia dadaraia, dika idia davaria danu.—Hereva Lada-isidia 3;5, 6.
DAHAKA DAINAI IA NARIA DAUDAU HEREA?
12 To dahaka dainai Dirava ia naria daudau herea, hegeregere lagani 6,000 bamona, inai henanadai ena haere hahedinaraia totona? Idau negai ia hahedinaraia diba ani? Lasi. Bema idau negai taunimanima edia kara ia koua, reana idia gwau ia henidia negana be hegeregere lasi dala namona do idia davaria. To nega daudau ia henidia, gavamani namona ta idia haginia totona, taunimanima durudia momokani totona bona edia aonega amo iboudiai edia noho hanamoa totona. Nega daudau herea lalonai gavamani idauidau idia tohoa. Bona edia aonega idia habadaia momokani. Atom ena siahu bada idia gaukaralaia bona hua dekenai idia daekau. To unai dala amo nega namona idia havaraia lasi taunimanima iboudiai hanamoa totona, ani?
13 Tanobada dekenai lalo-hisihisi bona dika idia bada idia lao. Kara dika, tanobada hamiroa karana, tuari bona ruma bese hapararaia karana idia bada herea dainai, aonega taudia idia gwau reana taunimanima iboudiai do idia mase ore. Oibe, lagani 6,000 bamona lalodiai sibodia idia naria toho bona edia aonega be bada herea, to hari idia be sibodia idia hamasea ore gwauraia! Ia hedinarai goevagoeva, taunimanima be Dirava idia dadaraia neganai idia be sibodia idia naria diba lasi. Bona ta ia gwau diba lasi Dirava ese ia henidia negana be hegeregere lasi.
14 Nega daudau herea lalonai Satana ese taunimanima ia lohiaia bona kara dika idia karaia, to Dirava ese unai kara ia koua lasi be mai ena badina namona. Satana ia gwau-edeede dainai ma henanadai badana ta ia vara bona ena haere ia hedinarai haraga lasi. Bema unai henanadai oi tahua namonamo, Dirava ese kara dika ia koua lasi ena badina ma ta do oi diba. Oi tahua be namo, badina be oi emu kara be mai anina ia dekenai.
[Study Questions]
1. (a) Hari inai negai tanobada be edena bamona? (b) Taunimanima haida be edena bamona idia maumau?
2. (a) Daidia ese kara dikadia idia karaia? (b) Hisihisi momo koua dalana be dahaka?
3. (a) Daidia ese kara dika idia hamatamaia? (b) Dahaka ese ia hahedinaraia Adam bona Eva ese Satana ena hedibagani idia dadaraia diba?
4. Dahaka haheitalai ese ita ia durua, Dirava ese kara dika ia koua haraga lasi ena badina dekenai ita lalo-parara totona?
5. (a) Satana ese Dirava ena hereva edena bamona ia hakoikoia? (b) Satana ese Eva edena bamona ia gwauhamata henia?
6. (a) Dahaka dainai Eva ese Dirava ia kamonai henia lasi? (b) Dirava ese ia taravatua auna ena huahua idia ania ena anina be dahaka?
7. (a) Taunimanima idia gwau-edeede neganai dahaka henanadai ia vara? (b) Edena henanadai ma haida edia haere idia hedinarai be namo?
8. Dahaka dainai Iehova ese unai gwau-edeede taudia ia hamasedia haraga lasi?
9, 10. Taunimanima ese Dirava ena hakaua dalana idia dadaraia bona sibodia idia naria toho, unai dainai dahaka ia vara?
11. Taunimanima be dahaka idia karaia be namo, idia noho namo totona?
12. Dahaka dainai Dirava ia naria daudau herea, inai henanadai ena haere ia hahedinaraia totona?
13. (a) Ena be taunimanima edia aonega ia bada ia lao, to hari inai nega lalonai idia be edena bamona? (b) Unai ese dahaka ia hahedinaraia goevagoeva?
14. Satana ia gwau-edeede dainai ma henanadai badana ta ia vara; dahaka dainai unai henanadai ita tahua namonamo be namo?
[Picture on page 100]
Ena be natu ta be hisihisi do ia ania, to badina namona dainai ena tamana bona sinana ese gwaumaoro idia henidia ena tau-anina do idia ivaia. Unai hegeregerena, Dirava ese taunimanima edia hisihisi ia koua lasi be mai ena badina namona
[Picture on page 101]
Adam bona Eva ese unai huahua idia ania neganai, Dirava ena siahu idia dadaraia bona sibodia edia lalona idia hadaia dahaka be namo bona dahaka be dika
[Pictures on page 103]
Taunimanima idia noho namo totona idia aniani bona idia inuinu be namo; unai hegeregerena, idia noho namo totona Dirava ena sisiba idia abia be namo