Karoa 14
Daika be Guba Dekenai Idia Lao, bona Badina be Dahaka?
TAUNIMANIMA momo idia laloa kara namo taudia iboudiai idia lao guba dekenai. Reana idia gwau Dirava dekenai do idia noho, edia kara namo ena davana bamona. To Bible be dahaka ia gwau?
2 Bible ese ia hahedinaraia Iesu be mase amo ia toreisi lou bena ia lao guba. Ma ia gwau ma taunimanima haida danu do idia lao unuseni. Iesu ese ena kamonai aposetolo taudia ia hamaorodia, ia gwau: “Egu Tamana ena ruma dekenai noho gabudia be momo herea, . . . lau be do lau lao, gabu ta do lau karaia hegaegae umui emui. Bema lau lao, emui gabu ta do lau karaia hegaegae neganai lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.”—Ioane 14:1-3, HM.
3 Momokani, Iesu ese ena aposetolo taudia ia hamaorodia guba dekenai do idia lao bona ia danu do idia noho. Aposetolo Paulo ese unai helaro ia gwauraia momo, Keristen taudia ginigunadia dekenai. Nega ta ia hamaorodia, ia gwau: “To ita eda hanua korikori be guba dekenai.” (Filipi 3:20, 21; Roma 6:5; 2 Korinto 5:1, 2) Unai bamona gwauhamata dainai taunimanima momo herea ese guba maurina idia tahua. To kara namo taudia iboudiai be guba dekenai do idia lao a?
KARA NAMO TAUDIA IBOUDIAI IDIA LAO GUBA, A?
4 Nega daudau lasi Iesu be mase amo ia toreisi lou murinai, aposetolo Petro ia gwau: “Iseda sene tauna Davida . . . ia mase, idia guria, bona hari inai nega iena guria gabuna ia noho ita dekenai. Davida ia daekau lasi guba dekenai.” (Kara 2:29, 34, HM) Ena be David be kara namo tauna, to guba dekenai ia daekau lasi. Vadaeni, kara maoromaoro tauna Iobu be edena bamona?
5 Hisihisi ia ania noho lalonai, Iobu ese Dirava ia guriguri henia, ia gwau: “Mase gabuna lalonai mani lau oi hunia ela bona emu badu ia ore; lau dekenai nega oi gwauraia hidi bena lau oi laloatao!” Iobu ia diba ia mase neganai mase gurina dekenai do ia mahuta. Ia diba do ia lao lasi guba. To ia be mai ena helaro dainai ma ia gwau: “Bema tau ta ia mase, do ia mauri lou diba a? Lau egu hesiai dinadia iboudiai lalodiai [mase gurina lalonai] do lau naria ela bona lau oi ruhaia. Do oi boiboi bena oi do lau haere henia.”—Iobu 14:13-15.
6 Ioane Bapatiso danu be kara namo tauna. To Iesu ia gwau: “Guba Basileia lalonai, tau maragina ese Ioane ia hanaia.” (Mataio 11:11, HM) Badina be Ioane Bapatiso be guba dekenai do ia lao lasi. Lagani 4,000 bamona Adam bona Eva idia gwau-edeede murinai, Iesu ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai.”—Ioane 3:13, HM.
7 Anina be Dirava ese taunimanima ia havaraia negana amo ela bona Iesu ena nega, tau ta be guba dekenai ia daekau lasi. David, Iobu bona Ioane Bapatiso be tanobada dekenai do idia toreisi lou. Iesu do ia mase lasi negana lalonai idia mase kamonai taudia iboudiai edia helaro be tanobada dekenai do idia mauri lou, guba dekenai lasi. Do idia toreisi lou bena tanobada dekenai do idia noho, Dirava ena basileia henunai.—Salamo 72:7, 8; Kara 17:31.
HAIDA BE GUBA IDIA LAO ENA BADINA
8 Dahaka dainai Iesu be guba dekenai ia lao? Dahaka gaukara ia karaia unuseniai? Unai henanadai edia haere be mai anina bada, badina be guba dekenai idia lao taudia be Iesu danu do idia gaukara hebou. Guba dekenai idia lao ena badina unai.
9 Ita diba vadaeni Iesu be Dirava ena guba gavamani ena pavapava ai do ia lao bona tanobada matamatana do ia lohiaia. Iesu be tanobada dekenai ia do mai lasi neganai, Bible buka Daniel ia gwau Dirava ese “lohia siahuna” do ia henia “taunimanima ena natuna” dekenai. Inai “taunimanima ena Natuna” be Iesu. (Mareko 14:41, 62) Daniel be ma ia gwau: “Iena lohia siahuna be noho hanaihanai siahuna, do ia ore lasi gauna, bona ena basileia do idia hadikaia ore diba lasi.”—Daniel 7:13, 14.
10 To Daniel ena buka ese ia hahedinaraia danu ma haida be “taunimanima ena natuna” danu do idia lohia hebou. Ia gwau: “Bena basileia bona lohia siahuna . . . Atai Momokani Diravana ena helaga taudia dekenai idia henia. Edia basileia be noho hanaihanai basileiana.” (Daniel 7:27) Inai hereva “taudia” bona “edia basileia” amo, ita diba ma haida be Keriso danu do idia lohia hebou, Dirava ena gavamani lalonai.
11 Iesu ese ena kamonai aposetolo taudia 11 ia hamaorodia, idia be ia danu do idia lohia, Dirava ena basileia lalonai. Ia gwau: “To umui be lau idia hedibagani henia neganai lau dekenai umui noho auka masemase taudia. Unai dainai, egu Tamana ena Basileia ta ia henia lau dekenai hegeregerena, lau danu Basileia ta lau henia umui dekenai.” (Luka 22:28, 29, HM) Gabeai aposetolo Paulo bona Timoteo danu be unai basileia gwauhamatana lalonai ia abiadae. Unai dainai Paulo ese Timoteo ia tore henia, ia gwau: “Bema ita haheauka noho, ia danu do ita lohia.” (2 Timoteo 2:12) Danu, aposetolo Ioane ia gwau haida be “tanobada dohore idia lohiaia,” Iesu Keriso danu.—Apokalupo 5:9, 10; 20:6.
12 Anina be guba dekenai idia lao taudia be Keriso danu do idia lohia hebou, Dirava ena guba gavamani lalonai. Iesu be gwauhamata “garana” badana, to Dirava ese taunimanima haida ia abiahidi, Iesu danu do idia lohia, basileia lalonai. Idia danu be “garana” ena kahana ai idia lao, Bible ena hereva bamona: “Bema umui be Keriso ena, umui be Abraham ena garana, gwauhamata ena anina abia taudia.”—Galatia 3:16, 29; Iakobo 2:5.
HIDA IDIA LAO GUBA?
13 Keriso idia badinaia taudia, hahetoho lalodiai idia kwalimu vadaeni taudia, sibodia be hegeregere, guba dekenai do idia lao bena tanobada do idia lohiaia. Unai dainai natu maragidia be hegeregere lasi guba dekenai do idia lao. (Mataio 16:24) To bema idia mase, tanobada dekenai do idia toreisi lou. (Ioane 5:28, 29) Basileia henunai tanobada dekenai do idia mauri taudia be momo, guba dekenai idia lao taudia be momo lasi. Iesu ese ena hahediba taudia ia hamaorodia, ia gwau: “Seri maragi e, umui gari lasi, badina emui Tamana ia ura basileia do ia henia umui dekenai.”—Luka 12:32.
14 Unai Basileia lohia taudia be hida? Bible ese ia hahedinaraia aposetolo taudia bona Keristen ginigunadia sibodia lasi, to ma taunimanima haida danu be unai “seri maragi” lalonai do idia noho. Apokalupo 14:1, 3 ia gwau: “Bena Mamoe Natuna [Iesu Keriso] lau itaia, Siona Ororona dekenai ia gini, bona ia danu taunimanima 144,000 . . . tanobada amo ia hoidia [o, abidia] taudia unai?” Taunimanima 144,000 sibodia ia itaia unai, Iesu Keriso danu idia gini guba dekenai. (Heberu 12:22) Anina be, kara namo taudia iboudiai lasi, to taunimanima 144,000 sibodia, hahetoho lalodiai edia kamonai idia hamomokania vadaeni taudia, be guba dekenai do idia lao, Keriso danu idia lohia totona.
TANOBADA AMO IA ABIDIA ENA BADINA
15 To badina be dahaka Dirava ese unai lohia taunimanima bogaragidia amo ia abidiahidi? Badina be dahaka aneru ia abidia lasi Keriso danu idia lohia totona? Badina be tanobada dekenai haida ese Iehova ena lohia siahuna idia dadaraia. Tanobada dekenai Diabolo ese taunimanima edia abidadama Dirava dekenai ia tohoa diba. Tanobada dekenai Iesu be hahetoho lalodiai Dirava ia badinaia momokani bona ena mauri ia henia, taunimanima edia mauri davana bamona. Unai dainai Iehova ese “seri maragi” tanobada amo ia abiahidi, iena Natuna danu do idia lohia, guba basileia lalonai, Dirava idia badinaia bona Diabolo ena samani herevana idia hakoikoia taudia unai. Iehova be sibona ena ladana abia isi totona unai taunimanima be unai bamona ia hagaukaradia be maoro.—Efeso 1:9-12.
16 Unai bamona taudia be iseda lohia ai idia lao be namo herea, badina be tanobada ai idia noho neganai Dirava idia badinaia bona idia momo be sibodia edia mauri idia henia Basileia dainai. (Apokalupo 12:10, 11; 20:4) Aneru ese unai bamona hahetoho bona taunimanima edia hekwakwanai idauidau idia davaria lasi, unai dainai ita kara dika taudia eda lalo-hekwarahi edia mamina idia abia diba lasi. To unai taunimanima 144,000 idia abia diba, badina be idia danu be unai hekwakwanai idia davaria vadaeni. Idia haida be mamina idia abia vadaeni, kara dika rohoroho hadokoa be auka herea. (1 Korinto 6:9-11) Unai dainai, idia ese tanobada taudia idia lohiaia neganai, do idia kara henidia mai edia hebogahisi danu.—Heberu 2:17, 18.
DIRAVA ENA EKALESIA
17 Bible ia gwau Keriso be Dirava ena ekalesia ena kwarana bona unai ekalesia oreana taudia ese Iesu idia kamonai henia. (Efeso 5:23, 24) Ekalesia oreana be Keristen taudia edia orea. (1 Korinto 15:9) Hari inai nega lalonai idia danu ita hebou Keristen taudia edia orea ita gwauraia ekalesia oreana o congregation. Unai hegeregerena, Bible ese “ekalesia oreana Laodikea dekenai” ia gwauraia, bona aposetolo Paulo ese Filemona ia tore henia neganai, “ekalesia oreana [iena] ruma dekenai idia hebou,” ia gwauraia.—Apokalupo 3:14; Filemona 2.
18 To Bible ese “Mauri Diravana ena ekalesia” ia gwauraia neganai, anina be idau. (1 Timoteo 3:15) Anina be “vara guna natudia, edia ladana be guba dekenai idia torea taudia, edia ekalesia.” (Heberu 12:23) Keristen taudia, edia helaro be guba dekenai mauri do idia abia taudia, edia orea idia gwauraia “Dirava ena ekalesia.” Ia lalonai taunimanima 144,000 sibodia do idia noho. Hari inai nega lalonai momo lasi be tanobada dekenai idia do noho. Keristen idaudia, edia helaro be tanobada dekenai do idia mauri hanaihanai taudia, be “Mauri Diravana ena ekalesia” taudia ese lauma dalanai idia hakaudia. Bible ese unai ekalesia mai ena orea taudia 144,000 inai bamona ia gwauraia danu: “headava matamata hahinena, Mamoe Natuna ena adavana,” “Keriso ena tau-anina,” “Dirava ena dubu,” “Dirava ena Israel,” bona “Ierusalem Matamatana.”—Apokalupo 21:9; Efeso 4:12; 1 Korinto 3:17; Galatia 6:16; Apokalupo 21:2.
DIRAVA ESE IA HAVARAIA GAUNA MATAMATANA
19 Adam ese taunimanima iboudiai ia hakereredia murinai, Iehova Dirava ese ena ura tanobada dekenai bona taunimanima dekenai ia haidaua lasi. Bema ia haidaua, anina be ia be hegeregere lasi ena ura ginigunana do ia hamomokania. Matamaia negana amo iena ura be tanobada ibounai be paradaiso ai do ia lao bona moale taudia goevadaedia amo do ia honu, bona iena ura ia boio lasi. Dirava ese ia havaraia gauna matamatana tamona be gavamani matamatana, iena ura hamomokania totona. Unai guba gavamani lalonai Iesu Keriso be lohia badana ai ia lao, bona Dirava ese tanobada amo ia abidia taudia 144,000 be ia danu do idia lohia hebou.—Apokalupo 7:4.
20 Unai lohia taudia guba dekenai be “guba matamatana” ai do idia lao. Tanobada do idia lohiaia mai edia kara maoromaoro danu, anina be tanobada noholaia taudia do idia lohiaia. Bible ese inai taudia ia gwauraidia “tanobada matamatana.” (2 Petro 3:13; Apokalupo 21:1-4) Iobu, David bona Ioane Bapatiso—Keriso be tanobada dekenai ia do mai lasi negana lalonai idia noho kamonai taudia iboudiai danu, be unai “tanobada matamatana” ai do idia lao. To ma taunimanima momo, inai nega dikana amo do idia roho mauri taudia danu, be “tanobada matamatana” ai do idia lao. Oi danu be unai bamona do oi roho mauri a? Oi ura Dirava ena gavamani henunai oi noho a? Bema oi ura, kara haida oi karaia guna be namo.
[Study Questions]
1. Taunimanima momo idia laloa edena taudia be guba dekenai idia lao?
2, 3. (a) Dahaka dainai ita diba momokani taunimanima haida be guba dekenai do idia lao? (b) Dahaka henanadai ena haere ita tahua be namo?
4, 5. Dahaka ese ia hamomokania David bona Iobu be guba dekenai idia lao lasi?
6, 7. (a) Dahaka ese ia hahedinaraia Keriso do ia mase lasi neganai idia mase taudia iboudiai be guba dekenai idia lao lasi? (b) Kamonai taudia, Keriso ia do mase lasi neganai idia mase taudia, be dahaka do ia vara idia iboudiai dekenai?
8. Dahaka henanadai edia haere be mai anina bada, bona badina be dahaka?
9, 10. Daniel ese ia hahedinaraia edena taudia, be Keriso danu do idia lohia, Dirava ena gavamani lalonai?
11. Dahaka ese ia hahedinaraia Keriso idia badinaia taudia ginigunadia be ia danu do idia lohia?
12. Bible ese Abraham ena “garana” edena bamona ia gwauraia dainai ita diba haida be Keriso danu do idia lohia?
13. (a) Dahaka dainai natu maragidia be guba dekenai do idia lao lasi? (b) Iesu ese guba idia abia taudia edia orea edena bamona ia gwauraia?
14. “Seri maragi,” guba dekenai do idia lao taudia, be hida?
15. Dahaka dainai Dirava ese Basileia lohia taudia taunimanima bogaragidia amo ia abiahidi?
16. Basileia lalonai idia lohia taudia be guna tanobada dekenai idia noho; dahaka dainai unai ita moalelaia diba?
17. Inai hereva “ekalesia” anina be dahaka?
18. (a) Edena taudia be “Mauri Diravana ena ekalesia” lalonai? (b) Bible ese inai ekalesia edena bamona ia gwauraia?
19. Dirava ese dahaka gau matamatana ia havaraia, ena ura ginigunana tanobada dekenai ia hagugurua totona?
20. (a) Edena taudia be “guba matamatana” ai idia lao bona edena taudia be “tanobada matamatana” ai idia lao? (b) “Tanobada matamatana” oreana tauna ai oi lao totona, dahaka oi karaia be namo?
[Pictures on page 121]
Inai kara namo taudia idia lao guba a?
King David
Iobu
Ioane Bapatiso
[Picture on page 122]
Iesu ese ena aposetolo taudia ia hamaorodia ia danu do idia lohia, iena Tamana ena basileia lalonai