Karoa 25
Satana ena Tanobada Dikana Eiava Dirava ena Nega Matamatana?
DIRAVA ena kara maoromaoro nega matamatana oi ura henia a? Satana oi inai henia, bona oi ura iena tanobada ia doko a? Reana oi haere, oi gwau, Oibe. To reana unai be hegeregere lasi, ani? Kara ese hereva ia hanaia. Bema Dirava ena nega matamatana oi abidadama henia, oi emu kara amo unai oi hamomokania be namo.—Mataio 7:21-23; 15:7, 8.
2 Biaguna rua idia noho, to tamona sibona oi hamoalea diba. Iehova Dirava ena hesiai gaukara oi karaia eiava Satana ena. Unai dekenai ita lalo-parara totona, Bible ia gwau: “Umui diba lasi a, bema tau ta dekenai sibona umui henia bona hesiai taudia bamona umui kamonai henia, umui be iena hesiai taudia, umui kamonai henia dainai?” (Roma 6:16) Daika oi kamonai henia? Daika ena ura oi karaia? Herevana edena bamona oi haere, bema tanobada ena kara dikadia oi karaia noho, Dirava momokanina, Iehova, ena hesiai gaukara oi karaia diba lasi.
SATANA ENA TANOBADA BE DAHAKA?
3 Iesu ese Satana ia gwauraia “inai tanobada ena lohia.” Bona aposetolo Ioane ia gwau: “Tanobada ibounai be dika tauna ena imana dekenai.” (Ioane 12:31; 1 Ioane 5:19) Iesu ese Dirava ia guriguri henia neganai, ia hahedinaraia iena hahediba taudia be Satana ena tanobada ena lasi, ia gwau: “Idia dainai lau noinoi, tanobada dainai lau noinoi lasi . . . Idia be tanobada ena lasi, lau hegeregerena, lau danu be tanobada ena lasi.” (Ioane 17:9, 16; 15:18, 19) Unai ese ia hahedinaraia goevagoeva namona be Keristen momokanidia be tanobada amo idia siri.
4 To, “tanobada,” Iesu ese ia gwauraia gauna, be dahaka? Bible lalonai inai hereva “tanobada” ena anina be tanobada taudia. Dirava ese ena Natuna ia siaia, inai tanobada taudia hamauridia totona. (Ioane 3:16) To Satana ese tanobada taudia momo ia hakaudia, Dirava idia inai henia totona. Unai dainai Satana ena tanobada ena anina be Dirava ena orea murimurinai idia noho taudia mai edia orea idauidau. Keristen taudia be ia dekena amo idia siri be namo, gauna unai.—Iakobo 1:27.
5 Satana ena tanobada—ia ese ia biagudia taudia unai—edia orea idauidau idia gaukara hebou. Ta be tomadiho koikoi. Bible ese tomadiho koikoi ia gwauraia “ariara hahinena badana,” mai ena ladana “Babulono Badana.” Iena basileia be tanobada ibounai lalonai, badina be “tanobada pavapavadia ia lohiaia.” (Apokalupo 17:1, 5, 18) To dahaka ese ia hamomokania Babulono Badana be tomadiho basileiana ta?
6 Bible ia gwau tanobada pavapavadia be Babulono Badana danu idia “heudahanai,” unai dainai ia be politikol basileiana ta lasi. Bona ia ore neganai, “tanobada ena hoihoi taudia” be gabu daudau dekenai idia gini bona ia dainai idia taitai, unai dainai ia be bisinesi basileiana ta lasi. (Apokalupo 17:2; 18:15) To, Bible ese ia hahedinaraia ia be tomadiho basileiana ta, ia gwau ena “babalau karadia ese bese iboudiai idia koidia.”—Apokalupo 18:23.
7 Ma gau ta ese ia hamomokania Babulono Badana be tomadiho basileiana ta; gauna be inai: ia be “dagedage gauna” ta dekenai ia gui. Bible lalonai unai bamona gaudia ese politikol gavamani idia laulaulaidia. (Daniel 8:20, 21) Bible ia gwau Babulono Badana be “dagedage gauna kakakakana ta latanai ia helai.” Anina be tanobada ibounai ena gavamani ia biagua toho. (Apokalupo 17:3) Bona momokani, idau nega amo ema bona hari, tomadiho be politik danu idia gaukara hebou, bona nega momo gavamani ia biagudia toho. Momokani, ia be “tanobada pavapavadia ia lohiaia.”—Apokalupo 17:18.
8 Inai politikol gavamanidia be Satana ena tanobada ena kahana badana ma ta. Ita diba vadaeni, Bible ese dagedage animal amo ia laulaulaidia. (Daniel 7:1-8, 17, 23) Aposetolo Ioane ena mata-hanai ese ia hahedinaraia edia siahu be Satana ena amo idia abia. Ioane ia gwau: “Dagedage gauna ta lau itaia, davara amo ia daekau, ena doana be 10, ena kwarana be 7 . . . Bona hari huala ese ena goada ia henia unai gau dekenai.” (Apokalupo 13:1, 2; 12:9) Danu, Satana ese Iesu ia dibagania neganai, unai basileia iboudiai ia henia gwauraia; unai danu ese ia hamomokania unai basileia o gavamani be Satana ena tanobada ena kahana ta.—Mataio 4:8, 9.
9 Mata-ganigani bisinesi oreadia be Satana ena tanobada ena kahana ma ta. Apokalupo 18:11 ese ia gwauraidia “hoihoi taudia.” Edia bisinesi karadia amo taunimanima edia lalona idia ania, idia hoihoilaia gaudia idia ura henidia kava totona. Ena be ogogami taudia million momo be hitolo dainai idia mase, to unai mata-ganigani bisinesi oreadia be aniani bada edia ruma lalodiai idia haboua noho. Danu, tuari kohu idauidau, taunimanima iboudiai idia hamasedia diba gaudia, idia karaia bona idia hoihoilaidia, moni abia totona. Unai dala amo Satana ena bisinesi orea mai tomadiho koikoi bona politikol gavamani danu ese mata-ganigani karadia, taravatu utua karadia bona tuari dikadia idia havaraia.
10 Momokani, Satana Diabolo ese ia biagua tanobadana be dika. Dirava ena taravatu maoromaorodia ia dadaraia, bona lebulebu karadia bona kara bodagadia idauidau amo ia honu. Unai dainai aposetolo taudia Paulo bona Petro ruaosi ese Keristen taudia idia sisiba henidia, bese idauidau edia kara dikadia do idia karaia lasi.—Efeso 2:1-3; 4:17-19; 1 Petro 4:3, 4.
11 Aposetolo Ioane danu ia gwau gau badana be Keristen taudia idia naria namonamo, tanobada ena ura dikadia bona ena kara bodagadia na garina. Ia gwau: “Tanobada umui ura henia lasi bona tanobada gaudia danu umui ura henia lasi. tanobada ia ura henia tauna lalonai iseda Tamana ura henia karana ia noho lasi; badina be tanobada gaudia iboudiai, tau-anina ena ura, mata-dika, mauri ena heagi kava, inai be iseda Tamana ena amo lasi, to tanobada ena amo idia mai.” (1 Ioane 2:15, 16) Hahediba tauna Iakobo ia gwau ‘tanobada ia tura henia tauna be sibona Dirava ena inai tauna ai ia halaoa.’—Iakobo 4:4.
TANOBADA AMO GINI SIRI DALANA
12 Keristen taudia be Satana ena tanobada lalonai do idia noho, ela bona ia doko. Iesu ese unai ia hahedinaraia, ena hahediba taudia dainai ena Tamana be inai bamona ia noia neganai: “Lau noinoi lasi tanobada dekena amo idia oi kokia totona.” To ma ia gwau: “Idia be tanobada ena lasi.” (Ioane 17:15, 16, HM) Satana ena tanobada dekenai idia noho neganai, edena dala amo idia be tanobada ena lasi?
13 Vadaeni oi be tanobada taudia edia huanai oi noho. Idia haida be sihari kava taudia, mata-ganigani taudia bona kara dika idaudia karaia taudia. Reana oi be idia danu umui gaukara hebou, o umui sikuli hebou, o ma kara haida umui karaia hebou. (1 Korinto 5:9, 10) Dirava ese ia lalokau henidia bamona oi lalokau henidia be namo. (Ioane 3:16) To Keristen korikorina ese taunimanima edia kara dikadia ia ura henia lasi. Edia lalohadai, kara bona ura ia abiadae lasi. Edia tomadiho kererena bona politik lalodiai ia vareai lasi. Ena be bisinesi lalonai ia gaukara, to bisinesi karadia gagevadia ia karaia lasi; danu, kohu ia tahua momo lasi. Dirava ena nega matamatana ia ura henia dainai, Satana ena tanobada taudia edia hebamo amo ia siri. (1 Korinto 15:33; Salamo 1:1; 26:3-6, 9, 10) Unai amo, ena be Satana ena tanobada dekenai ia noho, to ia be tanobada ena lasi.
14 Oi be dahaka oi ura henia—Satana ena tanobada eiava Dirava ena nega matamatana? Bema Dirava ena nega matamatana oi ura henia, namona be tanobada mai ena tomadiho koikoi amo oi siri. Inai oda do oi badinaia: “Egu orea taudia e, [Babulono Badana] amo umui raka lasi.” (Apokalupo 18:4) Tanobada ena tomadiho koikoi basileiana Babulono Badana oi rakatania totona, namona be dubu orea koikoidia oi dadaraia. Bona namona be edia dina helagadia oi hahelagaia lasi danu.—2 Korinto 6:14-18.
15 Kirisimasi be dubu orea edia holide badana. To Keristen ginigunadia ese idia hahelagaia lasi. Iesu ese ena hahediba taudia ia hamaorodia iena mase do idia laloatao, ena vara dinana ia gwauraia lasi. (1 Korinto 11:24-26) Danu, Iesu be December 25 ai ia vara lasi. Ita be unai ita diba, badina be Bible ia gwau ia vara neganai mamoe naria taudia be hanuaboi ai murimuri dekenai idia noho. To unuseniai December be keru bona medu negana dainai, unai hua lalonai unai bamona idia noho diba lasi. (Luka 2:8-12) Gabeai, haida ese December 25 idia abiahidi Iesu ena vara dinana laloa totona, badina be Roma taudia ese unai dina idia hahelagaia vadaeni, ia dekenai Saturn Ariana idia karaia, dina ena vara dinana moalelaia totona.
16 Ista be dubu orea edia holide badana ma ta. To Keristen ginigunadia ese Ista idia hahelagaia lasi danu. Ia danu be Keristen lasi taudia edia kara lalonai ia matamaia. Bible ia gwau lasi Keristen taudia ese Ista idia hahelagaia. Kirisimasi bona Ista hahelagaia karana be Keristen karana lasi, to dirava koikoidia idia tomadiho henia taudia ese idia hamatamaia. Vadaeni, bema edia kara ita tohotohoa, ita be mai eda kerere eiava? Oibe, badina be aposetolo Paulo ia hahedinaraia, momokani gauna bona koikoi gauna ita haboua be kerere, ia gwau: “Hatubua muramurana sisina ese paraoa ibounai ia hatubua.” (Galatia 5:9) Keristen ginigunadia haida ia hamaorodia, dina haida be Mose ena taravatu hegeregerena idia hahelagaia be kerere, badina be Dirava ese unai taravatu ia hadokoa vadaeni. (Galatia 4:10, 11) Bema Keristen korikoridia be unai kara amo idia siri be namo, vadaeni Dirava ese ia gwauraia lasi holide, tomadiho koikoi amo idia mai dinadia, amo ita siri be gau badana!
17 Ma holide haida amo tanobada taudia ese ladana bada taudia bona edia orea idauidau edia ladana idia abia isi. To Bible ia gwau namona be taunimanima ita tomadiho henidia lasi bona edia orea ita abidadama henidia lasi. (Kara 10:25, 26; 12:21-23; Apokalupo 19:10; Ieremia 17:5-7) Unai dainai unai bamona holide be Dirava ena ura hegeregerena lasi, bona Keristen korikoridia ese idia hahelagaia lasi.—Roma 12:2.
18 Taunimanima ese idia karaia gaudia idauidau be idia matauraidia o idia tomadiho henidia. Haida be auri o au amo idia karaia. Ma haida be dabua amo idia karaia bona idia dekenai guba gauna o tanobada gauna ena laulau idia torea. Reana gavamani ese oda ia gwauraia, ena bese taudia iboudiai ese do idia hanamoa. To Dirava ena taravatu be ena hesiai taudia be unai bamona do idia karaia lasi. (Esodo 20:4, 5; Mataio 4:10) Vadaeni, Dirava ena taunimanima be dahaka idia karaia be namo?
19 Idau negai Babulono dekenai King Nebukadnesara ese kaivakuku badana gold amo ia karaia, bena oda ia gwauraia taunimanima iboudiai ese do idia tomadiho henia. Ia gwau ia tomadiho henia lasi tauna be lahi lalonai do idia negea. Heberu uhau toi, Sadaraka, Mesaka bona Abedenego, ese pavapava idia kamonai henia lasi, badina be idia diba Iehova sibona idia tomadiho henia be namo. Dirava ese edia kara ia moalelaia, bona pavapava ena badu amo ia hamauridia. Bena Nebukadnesara ia lalo-parara idia ese ena gavamani idia hadikaia gwauraia lasi, bona taravatu ia atoa ia naridia totona. (Daniel 3:1-30) Unai uhau toiosi edia kamonai be bada, ani? Do oi hahedinaraia Dirava ena nega matamatana oi ura henia momokani, bona ena taravatu iboudiai do oi badinaia, a?—Kara 5:29.
20 Satana ia ura lasi Iehova ena hesiai gaukara ita karaia. Ia ura iena hesiai gaukara ita karaia. Unai dainai ita ia veria toho, iena ura ita karaia totona, badina be ia diba ita be ita kamonai henia tauna ena hesiai taudia ai ita lao. (Roma 6:16) Video, muvini piksa, mavaru dikadia bona buka dikadia amo taunimanima ia veridia, idia sihari kava bona idia heudahanai totona, bona unai bamona kara idia abiadae totona. To Dirava ena taravatu idia utua unai. (Heberu 13:4; Efeso 5:3-5) Unai bamona kara ia karaia tauna ese ia hahedinaraia Satana ena tanobada ia ura henia.
21 Satana ena tanobada taudia ese Dirava ena taravatu utua karadia ma haida danu idia ura henia bada. Ta be inuinu kekero. (1 Korinto 6:9, 10) Ma haida be buatau eiava muramura dikadia (drugs) ania karana bona kuku ania karana danu. Unai gaudia ese tau-anina idia hadikaia bona idia hamiroa. Unai gaudia idia ania taudia ese Dirava ena oda ta idia utua; ena oda be inai: “Tau-anina bona lauma hadikaia karadia do ita huria oho.” (2 Korinto 7:1) Dirava ena taravatu ta be Keristen tauna ese ena dekena tauna do ia lalokau henia, to kuku ania tauna ese unai taravatu ia utua, badina be ena kuku ena kwalahu idia hadonoa taudia ia hadikaia.—Mataio 22:39.
22 Tanobada ena gabu momo dekediai taunimanima ese rara idia ania. Animal edia hidio mai ena rara danu idia ania, eiava rara idia bubua bena idia inua o idia ania. To Bible ese rara ania karana ia taravatua. (Genese 9:3, 4; Levitiko 17:10) Vadaeni, rara be varovaro lalonai abia vareai karana be edena bamona? Ena be taunimanima haida idia gwau unai be rara “ania” karana lasi, to unai kara ruaosi be hegeregere, badina be gorere tauna ta be ena uduna amo ia aniani diba lasi neganai, rara henia dalana amo idia ubua, ani? Bible ia gwau: “Rara . . . umui abiadae lasi.” (Kara 15:20, 29) Anina be dahaka? Bema doketa ia gwau kekero muramura oi abiadae lasi, anina be emu uduna amo oi inua be kerere, to emu rara varovaro lalonai oi abia vareai be kerere lasi, a? Lasi momokani! Vadaeni, ‘rara oi abiadae lasi’ anina be oi emu tau-anina lalonai oi abia vareai lasi, lasi vaitani.
23 Namona be oi emu kara amo Iehova vairanai oi hahedinaraia iena nega matamatana oi ura henia bona oi be tanobada ena lasi. Unai oi karaia totona, namona be emu lalona oi hadaia, Iehova ena ura do oi karaia. Idau negai Israel taudia haida bamona oi lalo-rua be dika. (1 Hanua Pavapavadia 18:21) Badina be, bema Iehova ena ura oi karaia lasi, Satana ena ura oi karaia. Bema Dirava ena nega matamatana oi ura henia, namona be emu kara amo emu hereva oi hamomokania. Namona be Dirava ese ia gwauraia dika karadia iboudiai amo oi siri.
[Study Questions]
1. Dahaka amo oi hamomokania diba Dirava ena nega matamatana oi ura henia?
2. (a) Edena biaguna rua idia noho? (b) Edena kara amo ita hahedinaraia ita be ta ena hesiai taudia?
3. (a) Bible ia gwau daika be tanobada ena lohia? (b) Iesu be edena bamona ia hahedinaraia tanobada be idau bona ena hahediba taudia be idau?
4. (a) Ioane 3:16 ai, inai hereva “tanobada” ena anina be dahaka? (b) “Tanobada,” Keriso ena hahediba taudia be ia amo idia siri be namo gauna, be dahaka?
5. Tanobada ena orea badana ta be dahaka, bona Bible ese edena bamona ia haheitalaia?
6, 7. (a) Dahaka ese ia hamomokania Babulono Badana be tomadiho basileiana ta? (b) Tomadiho koikoi be dahaka ia karaia gavamani dekenai?
8. Satana ena tanobada ena kahana badana ma ta be dahaka, bona Bible ese edena bamona ia haheitalaia?
9. (a) Satana ena tanobada ena kahana ma ta, Apokalupo 18:11 ese ia gwauraia gauna, be dahaka? (b) Ia be dahaka ia karaia, unai amo ia hahedinaraia ia be Satana ena?
10, 11. (a) Satana ena tanobada be edena bamona kara amo ia honu? (b) Bible ena sisiba be dahaka unai kara dekenai?
12, 13. (a) Iesu be edena bamona ia hahedinaraia Keristen taudia be tanobada dekenai do idia noho? (b) Edena dala amo, ena be tanobada dekenai idia noho, to idia be tanobada ena lasi?
14. Bema Dirava ena nega matamatana oi ura henia, edena oda do oi badinaia?
15. (a) Iesu ese Keristen taudia ia haganidia dahaka do idia laloatao? (b) Dahaka ese ia hahedinaraia Keriso be keru negana lalonai ia vara lasi? (c) Dahaka dainai December 25 idia abiahidi Iesu ena vara dinana laloa totona?
16. (a) Edena tomadiho holide badana ma ta be Keristen lasi tomadiho dekenai ia matamaia? (b) Dahaka dainai Keristen korikoridia ese Kirisimasi bona Ista idia hahelagaia lasi?
au amo idia karaia. Ma haida be dabua amo idia karaia bona idia dekenai
17. (a) Holide idaudia, taunimanima eiava bese edia ladana abia isi dinadia, edia kerere be dahaka? (b) Bible be dahaka ia hereva unai kara dekenai?
18. (a) Taunimanima ese dahaka dahaka idia karaia bena idia matauraidia o idia tomadiho henidia? (b) Dirava ena taravatu be dahaka unai kara dekenai?
19. (a) Babulono ena pavapava ese taunimanima iboudiai ia haganidia dahaka do idia karaia? (b) Keristen taudia ese daidia edia kara idia tohotohoa be namo?
20. Edena dala idauidau amo Satana ese ita ia veria toho, Dirava ena taravatu headava karana dekenai ita utua totona?
21. Edena kara ma haida, bema tau ta ese ia karaia, ia hahedinaraia Satana ena tanobada ia ura henia?
22. (a) Bible ese rara edena bamona ia gwauraia? (b) Dahaka dainai varovaro lalonai rara abia vareai karana be rara “ania” karana hegeregerena? (c) Dahaka ese ia hahedinaraia ‘rara abiadae lasi’ anina be oi emu tau-anina lalonai oi abiadae lasi?
23. (a) Emu lalona be edena bamona oi hadaia be namo? (b) Dahaka ese emu lalohadai do ia hahedinaraia?
[Picture on page 209]
Iesu bona ena hahediba taudia be tanobada ena lasi, anina be dahaka?
[Pictures on page 211]
Bible ia gwau tomadiho koikoi be ariara hahinena ta bamona bona tanobada ena gavamani, unai hahine be ia ia helai gauna, be dagedage gauna ta bamona
Satana ena tanobada be lebulebu karadia amo ia honu. Mata-ganigani bisinesi oreadia be ena kahana badana ta
[Picture on page 213]
Iesu ia vara neganai mamoe naria taudia ese edia mamoe hanua murimuri ai idia naridia, unai dainai December 25 ai ia vara diba lasi
[Picture on page 214]
Pavapava ese ia haginia kaivakukuna be Dirava ena hesiai taudia ese idia tomadiho henia lasi. Unai bamona hahetoho lalonai, dahaka do oi karaia?