Karoa 30
Mauri Hanaihanai Oi Abia Dalana
IEHOVA DIRAVA ese gau hereadaena—mauri hanaihanai iena kara maoromaoro nega matamatana lalonai—oi dekenai ia henia gwauraia. (2 Petro 3:13) To oi abia totona, namona be Dirava ena ura oi karaia hari. Inai tanobada bona idia badinaia taudia danu idia ore gwauraia, to “Dirava ena ura ia karaia tauna do ia noho ela bona hanaihanai.” (1 Ioane 2:17) Unai dainai dala rua amo ta oi abia hidi. Ta be mase ia lao henia, ta be mauri hanaihanai ia lao henia. (Deuteronomi 30:19, 20) Edena ta do oi abiahidi?
2 Edena bamona oi hahedinaraia mauri oi abiahidi? Dalana be inai: Iehova bona ena gwauhamata oi abidadama henia guna. Oi abiadae vaitani Dirava ia noho “bona ia idia tahua goadagoada taudia dekenai davana ia henia,” a? (Heberu 11:6) Namona be Dirava oi abidadama henia, mero o kekeni ta ese ena lalokau bona hebogahisi tamana ia abidadama henia bamona. (Salamo 103:13, 14; Hereva Lada-isidia 3:11, 12) Unai bamona abidadama dainai, nega ibounai do oi gwau iena sisiba be mai ena aonega bona iena dala be maoro, nega ta do oi daradaralaia lasi.
3 To abidadama sibona be hegeregere lasi. Namona be emu kara amo emu abidadama oi hahedinaraia. (Iakobo 2:20, 26) Emu kerere gunadia dainai oi sori dainai emu kara oi hamaoromaoroa vadaeni, a? Oi helalo-kerehai, bona Dirava ena ura oi badinaia totona emu kara oi haidaua vadaeni, a? Guna oi gavaia dalana kererena amo oi raka siri vadaeni bona Dirava ena ura karadia oi karaia matamaia, a? (Kara 3:19; 17:30) Unai bamona kara amo oi hahedinaraia mauri oi abiahidi.
GWAUHAMATA BONA BAPATISO
4 Namona be Dirava ena kara namodia oi laloa bada dainai, ena ura oi karaia. Dala ia karaia, gorere, hisihisi bona mase danu idia ore totona! Ena Natuna ia henia neganai, mauri hanaihanai tanobada ena paradaiso lalonai abia dalana ia kehoa oi emu. (1 Korinto 6:19, 20; 7:23; Ioane 3:16) Iehova ena lalokau ena mamina oi abia dainai ia oi lalokau henia neganai, dahaka oi karaia be namo? (1 Ioane 4:9, 10; 5:2, 3) Namona be Iesu ena ladanai Dirava oi guriguri henia, oi hamaoroa oi ura iena hesiai tauna ai oi lao. Unai dala amo sibona oi gwauhamatalaia Dirava dekenai. Unai be oi sibona oi karaia gauna. Ma ta be oi dainai ia karaia diba lasi.
5 Dirava oi gwauhamata henia murinai ia ura oi hamomokania. Unai dainai namona be inai gwauhamata oi hamomokania, emu mauri dinadia iboudiai lalodiai. (Salamo 50:14) Bema nega ibounai Dirava ena orea oi badinaia, Keristen taudia ese emu lalona do idia hagoadaia bona oi do idia durua mai edia lalokau bona mai edia moale danu.—1 Tesalonika 5:11.
6 To Iehova oi gwauhamata henia hehuni murinai, namona be taunimanima vairadiai oi hahedinaraia oi gwauhamata henia vadaeni. Edena bamona oi hahedinaraia? Namona be ranu lalonai bapatiso oi abia. Unai bamona bapatiso ese ia hahedinaraia ta ese sibona ena mauri Iehova dekenai ia gwauhamatalaia bona sibona ia henia Iena ura ia karaia totona.
7 Iesu Keriso ena kara ese ia hahedinaraia bapatiso ranu lalonai abia karana be mai anina bada. Iesu ese ena Tamana ia hamaoroa ia mai vadaeni Iena ura karaia totona, to danu, Dirava ena basileia harorolaia gaukarana ia hamatamaia gwauraia neganai, ia be sibona Iehova dekenai ia henia bona bapatiso be ranu lalonai ia abia. (Heberu 10:7; Mataio 3:13-17) Unai dainai Dirava idia gwauhamata henia taudia ese bapatiso idia abia be namo. (1 Petro 2:21; 3:21) Momokani, Iesu ese ena hahediba taudia ia haganidia bese iboudiai taudia be hahediba taudia ai do idia halaodia bena do idia bapatisodia. Unai be beibi bapatisodia karana lasi. Ia be sivarai namona idia abiadae bona Iehova ena hesiai gaukara idia karaia gwauraia taudia bapatisodia karana.—Mataio 28:19; Kara 8:12.
8 Bema oi lalohadai vadaeni Iehova ena hesiai gaukara do oi karaia, bona bema oi ura bapatiso oi abia, namona be Iehova ena Witness taudia edia congregation ena chairman oi hamaoroa. Ia bona congregation ena elder ma haida ese oi stadilaia vadaeni herevadia badadia be oi danu do umui herevalaia lou; unai amo do oi hegeregere, Dirava ena hesiai gaukara be dala maorona amo do oi karaia. Bena bapatiso do oi abia diba.
DIRAVA ENA URA OI DEKENAI
9 Abata ia do vara lasi neganai, Iehova ese Noa, “kara maoromaoro harorolaia tauna,” amo taunimanima ia hadibaia, dika bada herea do ia vara bona idia roho mauri dalana tamona be lagatoi ai idia gui. (Mataio 24:37-39; 2 Petro 2:5; Heberu 11:7) Dirava ia ura oi ese unai bamona haroro gaukara oi karaia hari. Iesu ia gwau, iseda nega lalonai “Inai basileia ena sivarai namona be tanobada ibounai dekenai do idia harorolaia.” (Mataio 24:14) Dirava ena ura oi diba vadaeni; namona be ma haida ese unai diba idia abia, inai nega ena dokona amo idia roho mauri bona idia mauri hanaihanai totona. (Ioane 17:3) Oi emu kudouna ia ura idia oi hadibaia, ani?
10 Keriso ena kara oi tohotohoa. Ia naria lasi ela bona taunimanima be ia dekenai idia mai, to Basileia ena sivarai do idia kamonai henia taudia ia tahudia. Bona oda ia gwauraia, ena hahediba taudia iboudiai be unai bamona do idia karaia. (Mataio 28:19; Kara 4:13; Roma 10:10-15) Keristen ginigunadia ese Keriso ena hereva idia badinaia bona ena kara idia tohotohoa, Basileia ena sivarai be “ruma ta ruma ta dekenai” idia abia lao. (Luka 10:1-6; Kara 20:20) Hari inai nega lalonai danu Keristen korikoridia edia haroro dalana badana be unai.
11 Inai gaukara karaia totona oi boga-auka be namo. Satana bona ena tanobada ese Keriso ena hahediba taudia ginigunadia idia koudia toho do idia haroro lasi, bona oi danu be unai bamona do idia koua toho. (Kara 4:17-21; 5:27-29,40-42) To oi gari lasi. Iehova ese unai Keristen ginigunadia ia durudia bona ia hagoadadia bamona, oi danu do ia durua bona do ia hagoadaia. (2 Timoteo 4:17) Oi boga-auka! Emu lalokau Iehova dekenai bona taunimanima dekenai oi hamomokania, haroro bona hadibaia gaukara amo taunimanima oi hamauridia. (1 Korinto 9:16; 1 Timoteo 4:16) Iehova ese emu gaukara do ia laloaboio lasi, to davana bada do ia henia oi dekenai.—Heberu 6:10-12; Tito 1:2.
12 Inai tanobada gunana be anina lasi, unai dainai, oi dadaraia neganai oi gwau lasi gau namodia haida oi haboioa unai. Iesu ia gwau: “Lot ena adavana umui laloatao.” (Luka 17:32) Ia mai ena ruma bese taudia danu be Sodom amo idia heau mauri murinai, ena matana be murina kahanai ia negea, ia rakatania gaudia ia ura henidia dainai. Dirava be ena ura ia diba dainai damena nadina ai ia halaoa. (Genese 19:26) Lot ena adavana bamona oi karaia lasi! Vaira kahanai ia noho gauna, “mauri korikori” Dirava ena kara maoromaoro negana matamatana lalonai, oi raraia noho.—1 Timoteo 6:19.
MAURI HANAIHANAI PARADAISO LALONAI ABIAHIDI
13 Dala rua sibodia idia noho. Keriso ia gwau dala ta ia “bada.” Unai dala dekenai idia raka taudia be sibodia edia ura idia karaia diba. Dala ta ia “maragimaragi.” Unai dala dekenai idia raka taudia ese Dirava ena hadibaia herevadia bona taravatu idia badinaia be namo. Iesu ia gwau taunimanima momo herea be dala badana dekenai idia raka, dala maragimaragi dekenai idia raka taudia be momo lasi. Edena dala do oi abiahidi? Namona be inai oi laloatao: dala badana ena dokona be mase, to bema dala maragimaragi oi gavaia, Dirava ena nega matamatana lalonai do oi raka vareai. Tanobada be paradaiso ai halaoa gaukarana lalonai ahuna do oi abia diba, bona do oi mauri hanaihanai diba mai emu moale danu.—Mataio 7:13, 14.
14 Oi laloa lasi dala idauidau amo mauri Dirava ena nega matamatana lalonai oi abia diba. Abia dalana be tamona. Abata amo idia roho mauri taudia be lagatoi tamona ai idia gui. Bona orea tamona—Dirava ena orea—be “hisihisi badana” amo do idia roho mauri. Tomadiho idauidau momo idia noho, to taunimanima be gabu tamona dekenai idia hakaudia lao lasi. (Mataio 7:21-23; 24:21) Dirava ena hahenamo, mauri hanaihanai, oi abia totona, ena orea lalonai oi vareai bona ena ura oi karaia be namo.—Salamo 133:1-3.
15 Unai dainai Dirava ena gwauhamata nega matamatana oi laloa bada nega ibounai. Iehova ese oi dekenai ia henia gwauraia davana hereadaena be dina iboudiai oi laloa—mauri hanaihanai tanobada ena paradaiso lalonai, unai. Inai helaro be gau korikorina! Badina be inai gwauhamata Bible lalonai do ia momokani: “Kara maoromaoro taudia ese tanobada do idia abia, bona ia latanai do idia noho ela bona hanaihanai.”—Salamo 37:29.
[Study Questions]
1. (a) Oi vairanai dahaka dala rua idia noho? (b) Dala maorona be edena bamona oi abiahidi diba?
2. (a) Bema oi be mai emu abidadama momokani, daika bona dahaka oi abidadama henia? (b) Bema Dirava oi abidadama henia natuna ta ese ena lalokau tamana ia abidadama henia bamona, unai ese oi edena bamona do ia durua iena ura oi karaia totona?
3. (a) Oi abidadama sibona lasi, to dahaka dahaka danu oi karaia be namo? (b) Dahaka kara oi karaia be namo, unai amo oi hahedinaraia mauri oi abiahidi?
4. (a) Namona be dahaka dainai oi ura Dirava ena ura oi karaia? (b) Dirava ena hesiai gaukara oi karaia gwauraia neganai, dahaka oi karaia be maoro?
5. (a) Dirava oi gwauhamata henia murinai, ia ura dahaka oi karaia? (b) Dahaka heduru oi abia diba, emu gwauhamata oi hamomokania totona?
6. (a) Emu mauri be Dirava dekenai oi gwauhamatalaia murinai, dahaka oi karaia be namo? (b) Bapatiso ena anina be dahaka?
7. (a) Iesu be dahaka haheitalai ia karaia Keristen taudia totona? (b) Dahaka dainai Iesu ese ia gwauraia bapatisona be beibi edia lasi?
8. Bema oi ura bapatiso oi abia, daika congregation lalonai oi hamaoroa be namo, bona dahaka dainai?
9. Dahaka gaukara, Abata ia vara gwauraia neganai Noa ese ia karaia, be Dirava ia ura oi karaia hari?
10. (a) Bema taunimanima oi lalokau henidia, Iesu be edena bamona oi tohotohoa be namo? (b) Haroro gaukara karaia dalana badana be dahaka?
11. (a) Dahaka dainai Dirava ena basileia idia harorolaia taudia idia boga-auka be namo, to dahaka dainai ita gari lasi be namo? (b) Iehova be dahaka ia laloa, ita karaia gaukarana dekenai?
12. Lot ena adavana ena kara ese dahaka ia hadibaia ita dekenai?
13. Iesu be edena bamona ia hahedinaraia dala ta ita abiahidi be namo?
14. Oi roho mauri bena Dirava ena nega matamatana lalonai oi vareai totona, dahaka lalonai oi vareai be namo?
15. (a) Dahaka be dina iboudiai ita karaia be namo? (b) Dahaka helaro be gau korikorina?
[Picture on page 251]
Dirava oi gwauhamata henia . . . bona bapatiso oi abia
[Picture on page 253]
“Lot ena adavana umui laloatao”
[Pictures on page 254]
Dirava ena nega matamatana oi laloa bada nega ibounai