Keristen Taudia Abidia Daekau

Anina: Taunimanima haida idia laloa 1 Tesalonika 4:17 ena anina be, karaharaga Dirava ese kamonai Keristen taudia iboudiai na edia tauanina lalodiai tanobada amo do ia abidia isi, bena Lohiabada ida do idia hedavari, ‘guba padanai.’

Aposetolo Paulo ese dahaka ia herevalaia noho lalonai ia gwau Dirava ese Keristen taudia do ia “abia daekau” Lohiabada ida do idia hedavari totona?

1 Tes. 4:​13-18: “Aiemai varavara taudia e, ai ura lasi mase dekenai idia mahuta taudia totona umui daradara. Umui lalohisihisi lasi, ekalesia lasi taudia bamona, madi idia laloa goada diba lasi. Badina be ita abidadama henia gauna be inai: Iesu ia mase, ma ia toreisi lou. Unai dainai Iesu idia abidadama henia taudia idia mase neganai, Dirava ese do ia hakaudia vareai, vadaeni Iesu danu do idia noho. Ai ese Lohiabada ena hereva umui dekenai ai hadibaia noho be inai bamona: Lohiabada do ia giroa mai neganai be ita mauri noho taudia ese guna mase dekenai idia mahuta taudia do ita gunalaia lasi. Lasi, to mai goada danu Lohiabada do ia boiboi, bona aneru badana ese do ia boiboi, Dirava ena kibi regena danu. Bona unai neganai Lohiabada be guba dekena amo do ia diho mai. Vadaeni Iesu idia abidadama henia taudia, bona mase dekenai idia mahuta vadaeni taudia be do idia toreisi lou guna. Unai neganai ita mauri noho taudia be Dirava ese idia danu ita do ia abia daekau, guba ena ori latanai, Lohiabada danu do ita hedavari. Vadaeni Lohiabada danu do ita noho hebou hanaihanai. Unai dainai, inai hereva dekena amo umui ta ta dekenai goada do umui henia.” (Tesalonika dekenai Keristen kongregesen taudia haida idia mase vadaeni dainai, Paulo ese idia mauri noho taudia ia hamaorodia toreisi-lou helarona amo do idia hagoadaia heheni. Ia hamaorodia lou Iesu ia mase murinai ia toreisi lou; unai hegeregerena, Lohiabada do ia mai neganai, unai Keristen taudia mai edia kamonai, idia mase vadaeni taudia, be do idia toreisi bena Keriso ida do idia noho hebou.)

Daidia be Dirava ese do ‘ia abidia daekau, guba ena ori latanai,’ 1 Tesalonika 4⁠:17 ena hereva hegeregerena?

1Th 4 Siri 15 ese ia hahedinaraia idia be abidadama taudia, ‘Lohiabada Keriso do ia giroa mai neganai be idia mauri noho taudia.’ Do idia mase eiava? Roma 6⁠:​3-5 bona 1 Korinto 15⁠:​35, 36, 44 (rau 247 ai) ese idia hahedinaraia guba maurina do idia abia diba lasi ela bona do idia mase guna. To mase dekenai do idia mahuta lasi Keriso ena lou mai naria totona. “Karaharaga momokani . . . matana hakapua haraga ena nega bamona” Dirava ese idia do ia “abia daekau,” Lohiabada ida do idia noho totona.​—⁠1 Kor. 15:​51, 52; ma danu Apokalupo 14:13.

Keriso be ori ta latanai do ia hedinarai bena tanobada taudia ese idia raraidia noho lalonai kamonai Keristen taudia be guba dekenai do ia abidia daekau, a?

Iesu ia gwau tanobada taudia be edia matana amo ia do idia itaia lou, a?

Ioane 14:​19: “Nega daudau lasi tanobada taudia ese lau do idia itaia lou lasi, to umui [iena hahediba taudia mai edia kamonai] ese lau do umui itaia. Lau mauri dainai umui danu do umui mauri.” (Timoteo Ginigunana 6⁠:16 itaia.)

Inai hereva, “Lohiabada be guba dekena amo do ia diho mai,” anina be dahaka?

Taunimanima ese edia matana amo do idia itaia lasi neganai, Lohiabada be 1 Tesalonika 4⁠:16 ena hereva hegeregerena “guba dekena amo do ia diho mai” diba, a? Idaunegai hanuadia Sodoma bona Gomora edia nega lalonai, Iehova ia gwau do ia “diho” unai hanua taudia edia kara do ia “itaia” totona. (Gen. 18⁠:21) To Iehova be unai bamona ia karaia neganai taunimanima ta ese ia itaia lasi, ia siaidia anerudia mo sibodia be idia itadia. (Ioane 1⁠:18) Unai hegeregerena, ena be ena tanobada tauanina ia abia lou lasi, to Iesu ese ena orea taudia mai edia kamonai tanobada dekenai ia hageredia diba, edia davana namona henidia totona.

Vadaeni, edena dala amo taunimanima ese Lohiabada do idia “itaia,” “ori ena latanai do ia mai”?

Iesu ia gwau: “Idia ese Taunimanima ena Natuna [Iesu Keriso] do idia itaia, ori ena latanai do ia mai, mai ena siahu bada bona mai ena hairaina danu.” (Luka 21:​27) Inai hereva, eiava ia hegeregerena herevadia siri ma haida lalodiai, ese Iesu ena hereva Ioane 14⁠:19 dekenai idia utua lasi. Mani inai oi laloa: Esodo 19⁠:9 ena hereva hegeregerena, Sinai Ororona dekenai, Dirava be ‘ori badana lalonai taunimanima dekenai ia mai’ neganai, dahaka ia vara? Dirava be idia dekenai ia noho hehuni; Israel taudia ese toa haida idia itaia dainai unai idia diba, to idia ta ese ena matana amo Dirava ia itaia lasi. Unai hegeregerena, Iesu ena hereva, “ori ena latanai do ia mai” anina be, taunimanima ese edia matana amo do idia itaia diba lasi, to do idia diba ia noho. Edia lalona edia matana amo ia do idia “itaia,” edia lalona do idia parara ia lou mai vadaeni. (Ma anina haida tahua totona, inai sinado badana “Keriso ena Lou Mai” itaia.)

Keristen taudia be mai edia tauanina ida guba dekenai idia daekau diba, eiava?

1 Kor. 15:​50: “Lauegu varavara taudia e, lauegu hereva ena anina be inai: tauanina bona rara ese Dirava ena Basileia do idia abia diba lasi.”

Peroveta tauna Elia ena sivarai ese unai hereva ia hakoikoia, a? Lasi vaitani. Namona be Iesu ena hereva ida ita hahegeregerea; lagani 900 murinai ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai.” (Ioane 3:​13) Ena be Elia be ‘koehirihiri amo ia daekau guba ai’ neganai tau ta ese ia itaia, to unai ese ia hahedinaraia lasi ia be Dirava bona aneru edia noho gabuna dekenai ia ginidae. Badina be dahaka? Badina be Baibel ia gwau, unai murinai ia ese revareva ta ia siaia Iuda ena pavapava dekenai. (2 Pav. 2⁠:11; 2 Sis. 21⁠:​1, 12-15) Taunimanima ese peleini idia do karaia diba lasi neganai, Iehova ese sibona ena gau (lahi kariotana ta bona koehirihiri) ia gaukaralaia, Elia na tano ena kopina amo ia abia daekau guba padana, manu idia roho gabuna, dekenai, bona idau gabu dekenai ia abia lao totona.​—⁠Genese 1⁠:​6-8, 20 itaia.

Reana Keristen taudia mai edia kamonai be tanobada dekenai do idia mase lasi, to do idia puki oho sibona, bena Dirava ese do ia abidia daekau hehuni guba dekenai, a?

Roma 6:​3-5: “Ita bapatiso neganai Keriso Iesu danu ita mase. . . . Bema Keriso danu ita hakapua tamona iena mase lalonai, vadaeni ia danu do ita hakapua tamona iena toreisi lou lalonai danu.” (Iesu dekenai ia vara gauna be idia dekenai ia vara danu. Iena hahediba taudia bona taunimanima ma haida idia diba ia mase vadaeni. Guba maurina ia abia lou lasi, ela bona ia mase bona ia toreisi lou murinai.)

1 Kor. 15:​35, 36, 44: “Sedira tau ta ia henanadai, ia gwau, ‘Mase taudia be edena bamona do idia toreisi? Edia tauanina be do edena bamona?’ Kava taudia e, uhe ta tano lalonai oi hadoa neganai be do ia tubu lasi ela bona ia mase guna. Tauanina ita guria neganai ia be tanobada gauna. To Dirava ia hatorea isi neganai, ia be lauma anina gauna.” (Anina be, ta ia mase guna bena gabeai unai lauma anina ia abia, ani?)

Hisihisi badana ia do vara lasi neganai, Lohiabada ese Keristen taudia mai edia kamonai iboudiai be hoa dalanai tanobada amo do ia abidia oho, a?

Mat. 24:​21, 22: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi. Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai unai nega do ia hakwadogia.” (Ia gwau lasi hisihisi badana ia do vara lasi neganai, “ia abia hidi taudia” iboudiai be guba dekenai do ia abidia daekau guna, ani? To, reana anina be idia haida mai edia bamodia ida be unai hisihisi badana amo do idia roho mauri tanobada dekenai.)

Apok. 7:​9, 10, 14, BH: “Ini ḡau muridiai na roha lao, hutuma bada-herea na itadia, asi iduahidia, bese idau-idau bona iduhu idau-idau bona hanua idau-idau bona gado idau-idau amo, ibouboudiai na terono vairanai bona Mamoe Natuna vairanai e gini, edia dabua na kukuro-kukuro, bona imadia na mai retadia. Idia na e lolo badabada, eto ‘Hahemauri na iseda Dirava, terono ai e helaimu Diravana, bona Mamoe Natuna, ediai’. . . . Ini na hisihisi badana amo vada ema.” (Ia amo idia mai, anina be ia lalonai idia vareai guna eiava idia noho guna. Unai dainai, unai hutuma bada herea be hisihisi badana lalonai idia vareai bena gabeai roho mauri taudia hegeregeredia ia amo idia raka lasi.) (Idia be tanobada dekenai idia noho herevana be rau 152-3 dekenai.)

Hisihisi badana negana lalonai, daika ese Keristen momokani taudia do ia naridia?

Roma 10:​13: “Dirava [Iehova] ena ladana idia noinoi henia taudia ibounai be mauri do idia davaria.”

Sef. 2:​3: “Umui tano taumui mai manaumui ida, ena haheḡani o badinadiamu taudia, Iehova ba tahua! Kara maoromaoro ba tahua, lalo-manau ba tahua; bena reana ba hehuni diba, Iehova ena badu dinana ai.” (Isaia 26⁠:20 danu)

Hisihisi badana murinai Keristen momokani taudia iboudiai be guba dekenai do ia abidia daekau, a?

Mat. 5:​5: “Dagedage lasi taudia be idia namo, badina tanobada do idia abia.”

Sal. 37:​29: “Kara maoromaoro taudia ese tano bae abia, bae noholaia hanaihanai.” (Ps 37 Siri 10, 11, 34 danu)

1 Kor. 15:​50: “Tauanina bona rara ese Dirava ena Basileia do idia abia diba lasi.”

Inai sinado badana “Guba” itaia danu.

Dahaka dainai Dirava ese Keristen taudia haida ia abidia daekau guba dekenai Keriso ida do idia noho totona?

Apok. 20:​6: “Idia be Dirava bona Keriso edia boubou helaga karaia taudia. Bona lagani 1,000 lalonai Keriso danu do idia lohia.” (Keriso ida do idia lohia neganai, idia ese daidia do idia lohiadia? Mataio 5⁠:5 bona Salamo 37⁠:29 itaia.)

Inai sinado badana “Vara Lou” itaia danu.

Guba dekenai idia daekau taudia be gabeai tanobada dekenai do idia giroa mai Paradaiso lalonai do idia noho hanaihanai totona, a?

1 Tes. 4:​17: “[Ita guba dekenai do ia abia daekau taudia be] Lohiabada danu do ita noho hebou hanaihanai.”

Bema Ta Ia Gwau​—⁠

‘Oi laloa Dirava ese Keristen taudia do ia abidia daekau, a?’

Reana inai bamona oi haere henia diba: ‘Lau davaria taunimanima edia lalohadai inai hereva ena anina dekenai be idauidau. Mani emu lalohadai oi gwauraia hedinarai. . . . Gau ta ita laloa neganai, namona be iseda lalohadai be Baibel ena hereva ida ita hahegeregerea. (Atai herevadia haida oi gwauraia.)’

Eiava inai bamona oi hereva diba: ‘Haida idia gwau Dirava ese Keristen taudia do ia abidia daekau, hisihisi badana amo harohodia mauri totona. Oi danu be unai bamona oi laloa, a?’ Bena reana ma oi gwau: (1) ‘Momokani unai neganai Dirava ese ita do ia naria be gau badana, bona Baibel ena siri ta ese egu lalona ia hagoadaia, badina be ita do ia naria dalana ia hahedinaraia. (Sef. 2⁠:⁠3)’ (2) ‘Baibel ese ia hahedinaraia Dirava ese kamonai taudia haida do ia naridia tanobada dekenai. (Her. 2⁠:​21, 22) Unai be Dirava ena palani hegeregerena, Adam ia havaraia bona Paradaiso lalonai ia hanohoa neganai, ani?’

Ma haere ta: ‘Oiemu hereva ena anina be, tanobada ena dokona negana lalonai idia noho Keristen taudia be Dirava ese do ia abidia daekau guba dekenai, ani? . . . Inai oi laloa vadaeni a, guba dekenai do idia ginidae neganai, dahaka do idia karaia? Mani Apokalupo 20⁠:6 (bona Apok 5⁠:​9, 10) ena hereva oi laloa. . . . To idia ese daidia do idia lohiadia? (Sal. 37⁠:​10, 11, 29)’