Karoa 21

Moni Gaukarana be Edena Bamona Do Lau Davaria Diba?

REANA oi ura sikuli murinai moni gaukarana ta do oi karaia, oi sibomu do oi durua totona, eiava emu ruma bese taudia do oi durudia totona. Eiava reana oi ura moni gaukarana nega sisina do oi karaia, emu pioneer gaukarana durua totona. (Karoa 22 itaia.) To tano iboudiai lalodiai moni ena siahu ia maragi ia lao dainai, bona gaukara ta idia sikulilaia lasi taudia idia karaia diba gaukaradia be momo lasi dainai, moni gaukarana ta do oi davaria be auka. Vadaeni, sikuli amo do oi doko murinai, moni gaukarana be edena bamona do oi davaria haraga diba?

Sikuli be Gaukara Hadibaia Gabuna Ta

Cleveland Jones, lagani momo lalodiai gaukara taudia ia abidia hidi tauna, ena sisiba be inai: “Haisikuli ena diba oi abia namonamo. Gau badana be duahiduahi, toretore, bona herevahereva daladia maorodia oi dibadia. Kara maoromaoro bona hemataurai karadia oi dibadia, bena gaukara gabunai do oi hedavari henidia taudia do oi kara namo henidia diba.”

Taraka taria tauna, kampani ena hoihoi gaudia ia laohaia tauna unai, be bisinesi pepadia ia duahia diba be namo. Faktori dekenai idia gaukara taudia ese edia gaukara pepadia idia torea diba be namo. Sitoa dekenai gau idia hoihoilaia taudia ese namba idia hagaudia diba be namo. Gaukara momo herea lalonai, gaukara taudia idia hereva maoromaoro diba be namo. Unai kara iboudiai be sikuli dekenai oi dibaia diba.

Haheauka be mai Ena Davana Namona

Jones be ma ia gwau: “Bema sikuli amo oi doko vadaeni bona moni gaukarana oi tahua, unai oi hesikulaia lasi. Bema bisinesi rua o toi ese oi idia boiria oi do idia henanadai henia totona, oi rakatanidia neganai emu ruma dekenai oi lou lao lasi helai kava totona. Unai dala amo gaukara ta do oi davaria lasi.” Mero ta ladana Sal be hua 7 lalodiai gaukara ia tahua bena ta ia davaria. Ia gwau: “Sibogu dekenai lau gwau, ‘Lauegu maduna be gaukara lau tahua.’ Hua 7 lalodiai, Monday ia lao Friday, . . . daba momokani amo ela bona 4 okoloka adorahi ai, lau loaloa gaukara tahua totona.”

Dahaka dainai Sal ia haheauka? Ia haere, ia gwau: “Opesi ta ta lalodiai lau vareai negadiai, Iesu ena hereva lau laloa; ia gwau, ‘Umui goada karaia.’ Sibogu dekenai lau gwau, dina ta gaukara do lau davaria bena hari nega dikana do ia doko.”​—⁠Luka 13⁠:​24, NW.

Gaukara Davaria Gabudia

Bema hanua dekenai oi noho, reana plenteisini naria taudia, eiava boroma o kokoroku naria taudia, eiava haoda taudia dekenai gaukara do oi davaria diba. Bema taoni dekenai oi noho, niuspepa oi duahia be namo, badina bisinesi taudia momo ese edena bamona taudia idia ura henidia be niuspepa lalonai idia gwauraia hedinarai. Bema oi be unai bamona tauna ta, oi hamaorodia dahaka dainai oi be hegeregere unai gaukara do oi karaia. Emu tamana sinana, emu tisa, Labour and Employment Department, emu turadia, bona emu dekena taudia oi nanadaidia be namo, badina be reana oi do idia durua diba, gaukara do oi davaria totona.

Oiemu Gaukara Oi Dogoatao

Madi, bisinesi be moni lasi neganai, idia momo ese memero kekeni idia hadokodia guna. To reana unai dika do ia vara lasi oi dekenai. Mista Jones ia gwau: “Inai bamona idia karaia taudia ese edia gaukara idia dogoatao: Idia gaukara mai edia ura ida, bona edia lalona be hegeregere edia biaguna ena hereva do idia badinaia.”

Oiemu lalohadai, emu gaukara bona emu biaguna bona oi ida idia gaukara hebou taudia dekenai oi abia lalohadaina, be emu gaukara ena toana amo do ia hedinarai. Oiemu biaguna ese oi do ia gwauraia namo oiemu gaukara dainai sibona lasi, to oiemu lalohadai dainai danu.

Jones ma ia gwau: “Oiemu biaguna dekenai inai oi hahedinaraia: Hahegani oi badinaia, bona oi sibomu ese danu gaukara ma haida oi karaia diba, oi ia raraia lasi neganai. . . . Badina be, bema gaukara ia maragi to gaukara taudia be momo, reana gaukara daudau taudia do ia dogodiatao lasi, to gaukara goada bona gaukara namonamo taudia do ia dogodiatao.”

Sal ese unai ia hamomokania. Ia gwau: “Nega ibounai egu bosi lau hamoalea toho. Bema gau ta ia vara dainai ia ura hora idaudia ai do lau gaukara, egu lalona ia hegeregere unai bamona do lau karaia. Hahegani lau badinadia bona egu gaukara biagudia lau matauraidia.” Unai be Baibel ena sisiba bamona; ia gwau: “Nega ibounai emui biaguna tanobada dekenai do umui kamonai henia. Edia matana ese umui idia itaia neganai sibona umui gaukara, a? Inai bamona umui karaia koikoi, idia ese umui do idia ura henia totona, a? Inai bamona do umui karaia lasi, to mai emui lalona ibounai emui biaguna ena ura do umui karaia, Lohiabada umui matauraia dainai.”​—⁠Kolose 3⁠:⁠22.

Gari Hanaia Dalana

Bema gaukara matamatana ta oi karaia matamaia, reana taunimanima momo hegeregeredia dina haida lalodiai do oi gari. Reana sibomu dekenai do oi gwau: ‘Lau do idia ura henia, a? Lau hegeregere unai gaukara do lau karaia, a? Lauegu gaukara do idia moalelaia, a? Lau ura lasi do idia laloa lau kavakava.’ Namona be oi naria namonamo, oiemu gari ese oiemu lalona do ia hamanokaia garina.

Oiemu gaukara matamatana do oi manadalaia haraga bona oiemu gari do oi koua haraga totona, namona be emu diba unai kampani dekenai oi habadaia. Oi roharoha, oi hakala, bona oi duahiduahi be namo. Bema nega maorona ai emu biaguna dekenai emu gaukara oi henanadailaia, do ia laloa lasi oi kavakava. Sibomu emu lalona dekenai oi henanadai, oi gwau, ‘Lauegu gaukara ena anina be dahaka, egu dipatmen dekenai bona kampani ibounai ena palani dekenai?’ Unai henanadai ena haere ese oi idia durua diba, do oi gaukara namonamo bona oiemu gaukara do oi moalelaia totona.

Oiemu Gaukara Hebou Taudia Oi Kara Namo Henidia

Namona be taunimanima kara namo henidia dalana oi dibaia, badina unai ese oi ia durua diba oiemu gaukara do oi dogoatao totona. “Maino karaia daladia [oi] tahua dala idauidau ibounai dekenai, taunimanima danu mai maino danu do umui noho totona.” (Roma 12⁠:18) Bema unai bamona oi karaia, gaukara dekenai do oi hepapahuahu kava lasi.

Oiemu gaukara hebou taudia haida edia mauri daladia bona edia lalohadai be idau, bona oiemu be ma idau. To namo lasi oi laloa oi hereadia. Taunimanima iboudiai idia ura taunimanima ese do idia ura henidia bona do idia lalodia bada. Oiemu gaukara hebou taudia bona oiemu biaguna oi matauraidia, bena idia ese oi do idia matauraia.

Udu Mauri Lasi

Sal ia gwau: “Udu mauri herevadia dainai reana oi ese emu biaguna o ma taunimanima haida do oi lalodia kerere.” Gaukara taudia edia kiki kava oi kamonaia lasi, badina be unai bamona kiki momo be maoro momokani lasi bona taunimanima edia ladana namona idia hadikaia diba​—⁠oiemu ladana namona danu idia hadikaia diba.

Mani inai danu oi laloa: Taunimanima ese maumau tauna idia ura henia lasi. Ena be gaukara gabuna ai ia vara gauna ta ese oiemu lalona ia hahekwarahia, to oi gwauraia loaloa lasi. Namona be emu biaguna oi hamaorolaia. To, mai emu badu ida ena opesi lalonai oi vareai lasi, gabeai emu badu herevana do oi hemarailaia garina. Danu, oiemu gaukara hebou taudia edia kara oi gwauraia dika kava lasi. Unai lalo-hekwarahi gauna oi gwauraia goevagoeva mai emu momokani ida. Reana emu hereva be inai bamona oi hamatamaia diba, ‘Mani, lau oi durua . . . ’ eiava ‘Reana lau kerere, to lau laloa . . . ’

Oi Leiti Lasi be Gau Badana

Gaukara taudia idia hadokodia ena badina badadia rua be inai: Gaukara dekenai idia ginidae leiti, bona dina haida idia lao lasi gaukara. Kampani ta ena dairekta ta ese gaukara memerodia bona kekenidia be inai bamona ia gwauraidia, ia gwau: “Namona be daba momokani ai toreisi karana bona hahegani badinaia karana idia manadalaidia. Bema lasi, gaukara do idia dogoatao diba lasi.”

Sal be dala aukana amo ia davaria ia leiti lasi be namo. Ia gwau: “Lauegu moni gaukarana ginigunana ai hua toi sibodia lau gaukara bena lau idia hadokoa, badina be nega momo lau leiti. Unai dainai gaukara ma ta lau davaria be auka.”

Kara Maoromaoro ena Namo

Ai herevalaia vadaeni tauna, Jones, ia gwau: “Ta ena kara maoromaoro ese do ia durua ena gaukara do ia dogoatao totona.” Kara maoromaoro ena anina ta be inai: Kohu oi henaoa lasi, bona laga-ani negadia oi hadaudaudia lasi, nega henaoa karana unai. Gaukara biaguna ese gaukara tauna mai ena kara maoromaoro ia laloa bada bona ia abidadama henia. Haheitalai ta be inai: Iehova ena Witness merona ta be sitoa ta ai ia gaukara, dava bada dabuadia hoihoilaidia gabuna unai. Ia be mai ena ladana namona ia kara maoromaoro dainai.

Ia gwau: “Dina ta bosi ese dabua ta ia davaria kohu haboua daiutuna lalonai, gaukara tauna ta ese ia henaoa bona ma dabua haida lalodiai ia hunia. Doko neganai bosi ena opesi dekenai lau lao neganai, lau hoa maragi lasi badina gaukara taudia iboudiai be unuseniai idia hebou. Bosi be idia iboudiai dekenai henaohenao gaudia ia tahudia noho. Lau sibona ia sekea lasi.”

Keristen memero bona kekeni momo dekenai unai bamona kara ia vara vadaeni, bona edia kara dainai edia biagudia ese idia lalodia bada. Vadaeni, mai emu goada ida moni gaukarana oi tahua loulou, bena oi davaria neganai, mai emu goada ida oi gaukara, unai moni gaukarana do oi dogoatao noho totona!

Inai Henanadai Herevalaia

◻ Oiemu sikuli gaukarana ese oi edena bamona ia durua diba, moni gaukarana do oi davaria totona?

◻ Gaukara oi tahua neganai, dahaka dainai oi tahua loulou be mai anina bada?

◻ Gaukara oi tahua neganai, edena gabu dekediai oi lao bona daidia edia heduru oi tahua be namo?

◻ Gaukara oi tahua dainai gaukara biaguna ta ese oi ia henanadai henia neganai, dahaka oi karaia be namo?

◻ Dahaka oi karaia diba, gaukara amo oi do idia hadokoa lasi totona?

[Box/Picture on page 168, 169]

Gaukara Oi Tahua Dainai Gaukara Biaguna ese Oi Ia Henanadai Henia Neganai

Gaukara sisibalaia tauna ladana Cleveland Jones ia gwau, gaukara biaguna ta ese oi do ia henanadai henia totona opesi dekenai oi lao neganai, oiemu toana do ia laloa namonamo. Ma ia gwau, namo lasi jins piripou bona spot tamaka oi karaia. Namona be emu tauanina bona emu dabua idia goeva bona edia toana be namo. Gaukara biagudia momo idia laloa, ta be ena dabua ia karaia dalana hegeregerena do ia gaukara.

Opesi gaukarana oi tahua neganai, opesi taudia hegeregeredia dabua oi karaia. Bema oi be mero, faktori gaukarana oi tahua neganai namona be oi aeanidia dabuadia goevadia oi karaia, bona tamaka namodia oi atoa. Bema oi be kekeni, faktori gaukarana oi tahua neganai namona be mai hemataurai ida dabua oi karaia bona emu vairana oi penia momo lasi.

Jones ma ia gwau, namona be oi mo sibomu oi lao. Bema oiemu sinana eiava emu turadia ese oi idia bamoa, reana gaukara biaguna do ia laloa oiemu lalona ia goada lasi.

Bema oi ia nanadaia, guna oi ese gaukara ta oi karaia eiava lasi, oi koia lasi. Ta ia hereva maoromaoro lasi neganai, gaukara biagudia momo be unai idia diba. Hereva momokani sibona oi gwauraia.

Ena be hari be moni gaukarana oi tahua negana ginigunana, to reana gaukara ta oi manadalaia sisina vadaeni. Sikuli ena holide negana ai gaukara ta oi karaia, a? Nega ta ai hahine ta ena natudia oi naridia, a? Oiemu tamana sinana ese ruma dekenai gaukara ta, do oi karaia loulou gaukarana, oi idia henia a? Gaukara ta, pura iboudiai emui tomadiho rumana dekenai do oi karaia gaukarana, be oi idia henia, a? Taunimanima vairadiai haroro dalana be ta ese oi ia hadibalaia, a? Bema oibe, gaukara biaguna ese oi ia henanadai henia neganai, unai oi hamaorolaia, eiava lisi dekenai unai oi torea bena revareva ida oi siaia ia dekenai. Unai amo do oi hahedinaraia oi be hegeregere gaukara do oi karaia.

Gaukara biagudia ese idia laloa bada gauna ma ta be inai: Oi ese edia kampani bona idia gwauraia gaukarana oi laloa bada eiava. Namona be idia dekenai oi hahedinaraia oi ura unai gaukara do oi karaia bona oi be hegeregere do oi karaia. Bema sibomu emu namo tahua dalana sibona oi laloa, oi ia henanadai henia tauna ese oi do ia ura henia lasi.

Moni gaukarana oi tahua be mai ena hekwarahi, to unai dekenai oi kwalimu diba. Bema unai gaukara amo ma haida danu oi durudia, do oi moalelaia bada.

[Box on page 171]

Gaukara Biaguna ese Oi Ia Henanadai Henia Neganai Inai Bamona Oi Kara

Taunimanima badana ta bamona oi kara. Gaukara biaguna oi hanamoa mai emu hemataurai ida. “Tura” oi gwauraia lasi, to “Mista” oi gwauraia.

Oi helai maoromaoro bona emu aedia oi hamareredia lasi. Hesiku ena toana oi hahedinaraia lasi. Oi hegaegae namonamo guna, bena ia vairanai do oi gari lasi.

Henanadai ta oi do haerelaia lasi neganai, oi laloa namonamo guna. Mai emu hemataurai bona mai emu momokani ida oi hereva maoromaoro. Oi heagi lasi.

Lisi ta oi abia lao, ia dekenai inai oi torea vadaeni: emu moni gaukaradia gunadia iboudiai edia oromana, edia nega, edia pei, bona oi rakatanidia ena badina.

Namona be oi hegaegae, do oi hahedinaraia emu diba ese oi edena bamona do ia durua, oi tahua gaukarana do oi karaia namonamo totona.

Oi bona emu gaukara dalana idia diba taudia toi edia ladadia bona edia noho gabudia oi hamaorolaia.

Oi gari lasi. Oi hereva mai emu goada ida, to oi koikoi lasi. Oi hereva goevagoeva, bona oi hereva momo lasi.

Oi hakala namonamo mai emu hemataurai ida. Gau badana be, gaukara biaguna ida oi heai lasi.

Gaukara biaguna ia laloa gauna tamona be, do oi hegeregere unai gaukara do oi karaia eiava. Unai dainai, oiemu lalo-hekwarahi idauidau oiemu ruma bese dekenai o moni dekenai oi hamaorolaia lasi.

Bema oi laloa unai gaukara do oi abia lasi, oi nanadaia, bema gabeai ena kampani dekenai ma gaukara ta do ia noho, unai do oi tahua be hegeregere eiava.

Gaukara biaguna ese oi ia henanadai henia murinai, kara haraga revareva maragina ta amo oi tanikiu henia.a

[Footnotes]

[Pictures on page 167]

Sikuli ai oi dibaia karadia be reana moni gaukarana ai oi do idia durua diba