Karoa 32

Loa Hebou Karana be Edena Bamona Do Lau Kwalimulaia?

“HEADAVA momo idia dika, loa hebou daladia kereredia dainai. Inai hereva be mai anina bada.” Paul H. Landis, ruma bese edia mauri daladia ia tahua namonamo tauna, ena hereva unai. Hahine ta ladana Louise ese unai hereva ia hamomokania, ia gwau: “Lauegu kerere badana be inai: Andy ena kara korikori lau do diba namonamo lasi neganai, ia lau ura henia. Ai loa hebou lalonai ai ruaosi sibona be nega momo ai hebamo heheni. Nega idaudia ai ia karaia karadia be lau itaia lasi.” Vadaeni edia headava idia hadokoa. To edia loa hebou karana idia kwalimulaia taudia be unai bamona hisihisi amo idia siri diba.

Turana Ta Oi Tahua Neganai

“Lalo-parara tauna [o hahinena] ia roharoha bona iena raka dalana ia laloa namonamo.” (Hereva Lada-isidia 14⁠:​15, The Amplified Bible) Ena be ta ena toana oi moalelaia, to ia oi do diba namonamo lasi neganai bema oi ura henia, dika do oi davaria diba. Reana ia do oi adavaia bena unai murinai do oi davaria, iena lalona bona ena palani bona oiemu be idau vaitani! Ia be taunimanima haida bogaragidiai ia karaia karadia oi itaia guna be namo, reana unai be do umui gadara hebou negadiai do oi itaia.

Tau ta ladana David mai ena adavana ida be lagani 10 lalodiai idia noho hebou mai edia moale ida ema bona hari; ia gwau: “Guna lau diba, bema matamana neganai lau be Rose kahirakahira dekenai lau lao, egu ura-heni ese egu lalona do ia haduhua. Unai dainai daudau amo ia lau raraia, egu ura ia do diba lasi neganai. Taunimanima ia kara henidia dalana be lau itaia diba, bona lau diba ia be memero gadara henidia kekenina eiava. Ai kiki hebou negadiai, iena noho dalana bona ena palani lau dibadia.” Oi bamoa gwauraia merona o kekenina ena kara ia diba momo tauna ta oi nanadailaia danu be namo; unai amo do oi diba ia be mai ena ladana namona eiava lasi.​—⁠Hereva Lada-isidia 31⁠:31 itaia.

Ta Oi Davaria Neganai

Bema emu lalona ai ta oi gwauraia hidi badina oi laloa ia do oi adavaia be namo, namona be oi hamaoroa oi ura ia do oi diba namonamo. Bema emu hereva ia abia dae, umui ruaosi be dahaka do umui karaia be namo, do umui diba heheni totona?a Reana umui be ma haida ida do umui aniani hebou; unai dala amo do oi diba oi ura do oi bamoa lou eiava lasi. Bema umui ruaosi sibona umui loa hebou lasi, bena bema gabeai umui ta ena lalona ia hegeregere lasi dainai umui parara, lalohisihisi bada o hemarai bada do ia vara lasi.

Herevana edena dala amo umui ruaosi be ma haida ida umui hebamo heheni gwauraia, namona be dabua namona oi karaia namonamo bona umui gwauraia guna negana korikori ai oi ginidae. Oi hereva henia namonamo bona ena hereva oi kamonaia namonamo. (Iakobo 1⁠:19) Namona be tauhau ese haneulato ia kara henia mai ena hemataurai ida; unai hemataurai karadia haida be inai: iduara ia kehoa iena, o sea dekenai ia hahelaia. Ena be haneulato ia ura lasi ena bamona be hesiai tauna ta bamona do ia kara henia, to namona be ena heduru ia abia dae mai ena hemataurai ida. Bema ruaosi idia kara heheni mai edia hemataurai ida, dala idia lailaia vaira dinadia edia. Dirava ese tau ia hagania, ‘hahine ena tauanina be goada herea lasi, unai dainai do ia naria namonamo bona do ia matauraia.’ Bona hahine ia hagania “iena adavana do ia matauraia.”​—⁠1 Petero 3⁠:7; Efeso 5⁠:⁠33.

Oi laloa tauhau ese haneulato ena imana ia dogoatao, ia kisi henia bona ia rosia be maoro, eiava? Baibel ena buka ladana Solomon ena Ane ese Sulama kekenina bona ena lalokau tauna, iena maoheni unai, be ia gwauraidia. Idia ruaosi idia lalokau heheni, to edia kara idia naria namonamo mai edia goeva ida dainai idia mahuta hebou lasi. Unai hegeregerena, oi bona emu turana umui naria namonamo be namo, emui lalokau be dala mirona amo do umui hahedinaraia o do umui mahuta hebou garina.b​—⁠Galatia 5⁠:​19, 21.

Iena Lalona Do Oi Dibaia

Magasin ta ladana Journal of Marriage and the Family, May 1980 gauna, ena ripoti herevana ta be inai: “Idia headava gwauraia taudia be edia maoheni taudia edia lalona bema idia diba namonamo guna, idia momo edia headava do idia namo.” Oibe, gau badana be emu bamona ena lalona oi dibaia.​—⁠1 Petero 3⁠:⁠4.

Namona be dala oi tahua goadagoada iena lalohadai “veria lasi” totona. (Hereva Lada-isidia 20⁠:⁠5) Kara haida oi lalohadailaia guna, unai kara do umui karaia hebou neganai emu bamona ena lalona do oi dibaia haraga diba. Reana Keristen taudia ma haida ida do umui hebou edia ruma dekenai bona aniani do umui nadua hebou, eiava gita do umui hataia bona ane do umui abia hebou, eiava volibol o unai bamona gadara ma ta do umui gadaralaia hebou.

Emu bamona ena lalona oi dibaia sisina totona, inai bamona oi nanadaia, oi gwau, ‘Emu laga-ani negadiai dahaka oi karaia?’ ‘Bema emu moni be hegeregere, oi ura dahaka do oi karaia?’ ‘Iseda Dirava tomadiho henidia karadia, edena oi ura henia bada? Badina be dahaka?’ Emu bamona ese inai henanadai be mai ena lalona ida do ia haerelaia neganai, ena haere amo do oi diba ia be dahaka ia laloa bada.

Umui ruaosi umui ura heheni bada bona headava umui lalohadailaia neganai, namona be anina bada gaudia umui herevalaidia hebou; gaudia haida be inai: edeseniai bona edena bamona do umui noho; moni do umui davaria dalana; umui ruaosi be moni gaukara do umui karaia eiava; natu; natu edia vara dalana koua daladia; emui lalohadai emui headava dagidia dekenai; umui tahua noho gaudia, kerukeru vanegai bona nega daudau murinai umui abia gwauraia gaudia unai, bona unai gau do umui abia daladia danu. Iehova ena Witness memerodia bona kekenidia momo be sikuli amo idia doko murinai pioneer gaukara idia karaia, bona idia ura do idia headava murinai unai gaukara do idia karaia noho. Namona be umui ruaosi emui palani lauma gaudia totona be umui tahua namonamo, idia hegeregere eiava lasi. Emui headava do idia hadikaia diba gaudia oi gwauraia hedinarai be namo. Bema oi be mai emu abitorehai bada eiava mai emu maduna badadia eiava mai emu gorere metauna, unai oi gwauraia hedinarai danu be namo.

Unai bamona umui hereva heheni negadiai, Elihu ena kara oi tohotohoa; ia gwau: “Egu lalona amo lau hereva maoromaoro, bona lau hereva mai egu momokani ida.” (Iobu 33⁠:⁠3, The Holy Bible in the Language of Today, William Beck ese ia torea) Hahine ta ladana Esther ia gwau, iena maoheni negana lalonai ia karaia karadia ese idia hahegaegaea headava totona, bena ena headava lalonai moale ia davaria. Ia gwau: “Lauegu lalohadai bona Jaye ena lalohadai be idau negadiai, iena hereva lau hamomokania koikoi lasi. Nega iboudiai lau be hereva momokani lau gwauraia toho, ema bona hari.”

Bema oi ura emu bamona ena lalohadai gau ta dekenai do oi dibaia, namona be oi nanadailaia namonamo; emu henanadai dainai do ia lalohisihisi garina oi gari lasi. Beth be inai kara dekenai ia kerere, ia be John ida idia loa hebou negana lalonai. Beth ia gwau, ia laloa namona be edia moni do idia haorea kava lasi to nega vaira totona do idia haboua be namo. John ia gwau iena lalohadai be unai hegeregerena. Beth ese ia nanadailaia lou lasi, badina be ia laloa idia ruaosi be moni naria dalana dekenai idia lalo-tamona. To gabeai John ese ena lalohadai korikorina ia hahedinaraia, ia laloa moni be nega vaira totona haboua, anina be moni do ia haboua motuka matamatana mai ena hairai hoia totona! Idia headava murinai, mai edia lalohisihisi ida idia lalo-parara moni gaukaralaia dalana dekenai idia lalo-tamona lasi.

Unai bamona kerere koua dalana ia noho. Ai gwauraia vadaeni hahinena, Louise be ena maoheni negana ia laloa lou, ia gwau: “Unai negai ma henanadai momo lau henanadailaia be namo, inai bamona: ‘Bema lau rogorogo to oi ura lasi natu ta do oi havaraia, dahaka do oi karaia?’ Eiava, ‘Bema ita be mai eda abitorehai bona lau ura ruma ai do lau noho iseda natuna naria totona, dahaka do oi karaia?’ Bena iena haere lau laloa namonamo be namo.” Unai bamona herevahereva ese taunimanima ta ena lalona ena toana ia hahedinaraia diba. Idia do headava lasi neganai ena bamona ese unai toana ia dibaia guna be namo.

Iena Kara Korikori Oi Itaia!

Esther ia gwau: “Oi be emu bamona mo sibona ida umui hebamo heheni negadiai, oi ia gado namo henia diba, to umui be taunimanima bogaragidiai umui noho negadiai, ia laloa guna lasi gauna be ia dekenai ia vara diba. Reana idia ta ena hereva do ia moalelaia lasi. Bena do oi itaia, ia badu neganai ia be edena bamona do ia kara. Unai hereva ia gwauraia tauna do ia gwau henia mai ena badu ida eiava?” Esther be ma ia gwau: “Ai loa hebou neganai ai ruaosi emai turadia bona varavara ai bamodia dainai, ai diba heheni momokani.”

Moale karadia sibodia lasi, to gaukara haida danu umui karaia hebou be namo. Keristen gaukaradia haida umui karaia hebou, anina be Dirava ena Hereva stadilaia karana bona Keristen hesiai gaukarana bona ma gaukara haida danu. Do umui headava neganai dina ta ta iboudiai do umui karaia karadia haida be hari umui karaia hebou​—⁠aniani umui hoia bona umui hegaegaelaia, mereki umui huria, ruma umui hagoevaia. Headava taudia edia kara korikoridia be unai bamona do umui karaia hebou negadiai, emu bamona ena kara dikadia danu do oi itaia​—⁠ena kara korikorina ta do ia hunia diba lasi.

Mamoe naridia tauhauna, Solomon ese ena ane lalonai ia gwauraia tauna unai, ese ena lalokau haneulatona ia itaia, ia lalohisihisi neganai, bona dina ena siahu dekenai ia hekwarahi dainai ena varahuna ia diho bona ia hesiku neganai danu. (Solomon ena Ane 1⁠:​5, 6; 2⁠:15) Ia ese danu haneulato ia itaia, moni momo tauna King Solomon ena lalo-ani ia dadaraia neganai; unai murinai ia hanamoa, ia gwau: “Egu lalokau e, oi be mai emu hairai bada, bona oi lalonai kerere be lasi.” (Solomon ena Ane 4⁠:⁠7) Ia laloa lasi ia goevadae momokani, to ia laloa iena kerere badana ta be lasi. Haneulato ena kara maoromaoro ese ena hairai ia habadaia dainai, ena kerere maragidia ia laloa lasi.​—⁠Iobu 31⁠:7 itaia.

Taunimanima ta ena lalona be unai bamona do oi dibaia haraga diba lasi. Unai dainai, oi headava haraga lasi be namo. (Hereva Lada-isidia 21⁠:⁠5) Tauhau bona haneulato be vaia edia lalona idia ania heheni goadagoada, to nega taina daudau murinai edia kara kereredia bona edia ura kereredia idia hedinarai. Bema idia kara haraga lasi to edia maoheni negana idia gaukaralaia namonamo, do idia headava murinai reana do idia lalo-hekwarahi bada lasi. Mai edia lalo-parara ida do idia headava neganai edia lalona do idia goada, badina be idia diba, gau ta do idia lalo-tamonalaia lasi negadiai, unai hekwakwanai do idia hanamoa diba. Edia loa hebou karana idia kwalimulaia dainai, idia hegeregere edia headava danu do idia kwalimulaia mai edia moale ida.

[Footnotes]

Inai Henanadai Herevalaia

◻ Tauhau be haneulato ida idia loa hebou ena badina badana be dahaka, bona edia headava negana do idia moalelaia dalana dekenai unai be mai anina bada, eiava?

◻ Ta be dahaka ia karaia be namo, ena bamona ena lalona do ia diba totona?

◻ Idia loa hebou negadiai, dahaka dahaka idia herevalaia be namo, unai kara dekenai do idia kwalimu totona?

◻ Dahaka dainai ruaosi be dala idauidau amo idia hebamo heheni be namo?

◻ Dahaka dahaka be idia ruaosi padadiai idia vara neganai idia hahedinaraia idia lalo-tamona lasi?

◻ Edia loa hebou karana be edena negai idia hadokoa be namo?

[Blurb on page 255]

“Idia headava gwauraia taudia be edia maoheni taudia edia lalona bema idia diba namonamo guna, idia momo edia headava do idia namo.”​—⁠Journal of Marriage and the Family

[Box/Picture on page 256, 257]

Ai Ruaosi Do Ai Parara be Namo, A?

Headava lalohadailaia namonamo negana ia kahirakahira neganai, daradara ia vara diba. Oiemu bamona ena kerere badadia dainai eiava emui hebamo heheni karana ena kerere haida dainai bema oi daradara, dahaka do oi karaia be namo?

Momokani, idia lalokau heheni taudia danu be nega ta ta idia heai heheni. (Genese 30⁠:2; ma danu Kara 15⁠:39 itaia.) To bema umui ruaosi be gau momo herea umui heailaia, oi naria namonamo be namo! Doketa taudia 400 edia hereva ese idia hahedinaraia, bema tauhau ta be ena haneulato ida idia heai heheni loulou, unai ese ia hahedinaraia “edia lalona idia hegeregere lasi do idia headava,” bona reana “do idia lalo-tamona diba lasi.”

Eiava reana oi laloa momo, badina be emu bamona ena kerere badadia haida oi davaria. Nega haida ia badu dikadika, o ena kara amo ia hahedinaraia sibona ena namo ia tahua, o ena lalona be maragi ta ena hegeregerena, o ia tudaga, o ena lalona ia ha-aukaia kava; unai dainai reana oi daradara, emu mauri dinadia oredia lalodiai oi be ia ida do umui noho hebou be namo eiava lasi. To momo ese unai bamona kerere idia laloa momo lasi bona dala idia tahua goadagoada edia hebamo ese anina namona do ia havaraia totona. Dahaka dainai unai bamona idia karaia?

Keristen taudia idia laloa loa hebou karana be gadara karana lasi, unai dainai haida idia laloa bema edia bamona idia adavaia lasi idia be mai edia kerere. Reana idia gari danu, iena lalona do idia hahisia garina. Ma haida be reana idia gari, turana ma ta do idia davaria diba lasi garina. To bema edia hebamo heheni karana idia hekwakwanailaia momo, unai gau garidia idia gari dainai idia loa hebou noho be maoro lasi.

Tauhau be haneulato ida idia loa hebou headava dalana tahua totona. Bona bema Keristen tauna be unai kara ia hamatamaia mai ena momokani ida, bena gabeai bema ia hadokoa gwauraia badina ia laloa idia ruaosi do idia headava be hegeregere lasi, ia kerere lasi. Bema ruaosi edia hebamo heheni karana be ia dika ia lao, to idia hebamo heheni noho badina be idia ta ta idia laloa, ‘reana lau ese ma ta do lau davaria lasi,’ idia ta ta ese sibona ena namo sibona ena namo idia tahua kerere unai. (Filipi 2⁠:4 itaia.) Gau badana be oi ese umui ruaosi emui hekwakwanai do oi laloa namonamo mai emu momokani ida. Unai oi karaia totona, namona be oiemu bamona ena kara oi laloa namonamo guna.

Inai bamona oi henanadailaia be namo: Inai haneulato be egu adavana namona ai do ia lao bona lau do ia kamonai henia, eiava? (Hereva Lada-isidia 31⁠:​10-31) Inai tauhau do ia kara mai ena lalokau momokani ida bona emai natudia do ia naridia namonamo, eiava? (Efeso 5⁠:​28, 29; 1 Timoteo 5⁠:⁠8) Reana taunimanima ta ia gwau ia be Dirava ena hesiai tauna mai goadana, to ena hereva be ena kara amo ia hamomokania, eiava?​—⁠Iakobo 2⁠:​17, 18.

Bema ta be nega daudau lalonai oi bamoa mai emu lalokau ida bena unai murinai oi davaria ia goevadae lasi, unai sibona dainai oi dadaraia lasi. (Iakobo 3⁠:⁠2) Reana iena kerere do oi haheaukalaia diba.

To bema oi laloa do oi haheauka henia diba lasi, emu lalohadai oi hamaorolaia. Emu palani bona emu lalohadai bona iena be idia idau vaitani, a? Eiava gau be ena hereva ena anina oi abia namonamo lasi, a? Reana namona be umui ruaosi do umui haheauka heheni bona do umui hereva heheni mai emui manau ida, a? (Hereva Lada-isidia 25⁠:28) Iena kara kereredia oi badulaia dainai oi laloa momo negadiai, ena kerere ia gwauraia hedinarai bona ia hahedinaraia ia ura ena kara do ia hamaoromaoroa, a? Do oi badu henia haraga lasi be namo, a? (Kohelete 7⁠:⁠9) Lalokau dekenai haheauka heheni karana be headava namona ena badina korikorina.​—⁠Efeso 4⁠:⁠2.

Bema emui hekwakwanai umui herevalaia hebou, reana unai ese emui hebamo karana do ia hadikaia ore lasi, to do ia hahedinaraia unai kara be nega vairai edena bamona do umui habadaia diba! To bema emui herevahereva dainai umui badu heheni lou, namona be oi naria namonamo, badina be unai ese ia hahedinaraia goevagoeva, dika be kahirakahira do umui davaria. (Hereva Lada-isidia 22⁠:⁠3) Bema umui headava, namo do umui davaria lasi. Umui ruaosi be namo do umui davaria totona, reana namona be umui parara.

[Picture on page 253]

Umui ruaosi umui do loa hebou lasi neganai, haida bogaragidiai umui itaia heheni diba

[Picture on page 254]

Mai edia hemataurai ida idia kara heheni neganai, do idia headava negana lalonai do idia kara heheni dalana idia lailaia

[Picture on page 259]

Bema emui loa hebou karana ese anina namona ia havaraia lasi, namona be emu bamona oi hereva henia; unai kara oi hadokoa gwauraia ena badina oi hamaorolaia