Karoa 38
Nega Vairai Dahaka Do Lau Davaria?
“LAU be nega vaira lau garilaia, badina be niuklia bomu do idia hapoudia garina lau gari.” Unai hereva be Germany merona ta ese ia gwauraia, Germany ena gavamani gunalaia tauna ia hereva henia neganai.
Reana oi danu be nega vaira oi laloa momo, badina be oi gari, niuklia bomu ta ese oi do ia hamasea garina. Mero ta ia henanadai, ia gwau: “Maka namodia be sikuli dekenai abia totona do lau hekwarahi be anina lasi ani, badina be tanobada ibounai do ia pou.” Momokani, sikuli memerodia bona kekenidia edia gari idia nanadailaidia neganai, idia haere, idia gwau idia gari bada niuklia tuarina do ia vara garina.
Niuklia tuarina mo sibona lasi, to dika badadia ma haida danu do idia vara diba. Tanobada taudia idia momo daekau noho dainai, reana edia noho gabudia edia bada do idia hegeregere lasi, tanobada ena kohu do idia haorea, bona tano, davara bona hodahoda do idia hadikaia momokani. Unai hisihisi bona ma hisihisi haida danu be do idia vara diba dainai, tau ta mai ladana bada, B. F. Skinner ia gwau: “Reana tanobada taudia do idia mase ore.” Ma ia gwau: “Lau laloa helaro namona be lasi. Ita idia hadikaia gwauraia gaudia do ita haorea diba lasi.”
Diba momo taudia be nega vaira garina idia gari, unai dainai memero kekeni momo edia lalohadai ta ita hoalaia lasi; unai lalohadai be inai: “Laloa lasi, ita aniani bona ita inuinu, badina be kerukeru do ita mase.” (1 Korinto 15:32) Momokani, politikol taudia bona saiens taudia be dala lasi emu vaira dinadia do idia hanamoa. Badina be Ieremia 10:23 ia gwau: “Taunimanima ena dala be ia sibona lalonai lasi, bona taunimanima ena raka be ia sibona ese do ia gwauraia hidi lasi.”
Unai siri ese ia hahedinaraia, Dirava ese taunimanima gwaumaoro ia henidia lasi sibodia do idia naria—siahu ia henidia lasi dahaka dahaka be tanobada ai do idia vara be do idia gwauraia hidi. Unai dainai do idia kwalimu lasi. Ieremia ese Dirava ia noia, ia gwau: “Iehova e, egu matana oi hakania mai emu hahemaoro ida.” (Ieremia 10:24) Anina be, ita ia havaraia Diravana ese iseda vaira dinadia edia anina do ia gwauraia hidi. Unai nega vaira lalonai dahaka do ia vara?
Dirava ena Palani Tanobada Totona—Bona Emu Vaira Dinadia
Dirava ese taunimanima ia havaradia bena nega sisina murinai ruaosi ia hereva henidia, ia gwau: “Emui bese umui havaraia, do umui hutuma. Tanobada umui hahonua bona umui biagua. Davara gwarumedia bona atai manudia bona mauri gaudia tanobada dekenai idia loa iboudiai umui biagudia.” (Genese 1:28) Helaro namona ia henidia unai, ena anina be tanobada paradaisona lalonai do idia noho.
To unai taunimanima ginigunadia ruaosi ese Dirava ena lohia siahuna idia dadaraia. Solomon ena hereva hegeregerena: “Dirava ese taunimanima ia karadia mai edia maoromaoro, to idia ese palani idauidau momo idia tahua vadaeni.” (Kohelete 7:29) Taunimanima edia palani ese dika bada idia havaraia dainai, hari inai negai idia noho taudia idia lalohisihisi bona edia helaro ia doko.
Unai ena anina be Dirava ese tanobada ia laloa lasi dainai do ia dika vaitani, bona noholaia taudia bona gaudia iboudiai be reana do idia mase ore, a? Lasi vaitani! Badina be “tanobada ia karaia bona ena oromana ia henia, bona ia haginia auka; ia karaia kava lasi, to taunimanima ese do idia noholaia totona ia karaia.” Iena palani tanobada totona be momokani do ia hagugurua!—Isaia 45:18; 55:10, 11.
To unai be edena negai bona edena dala amo do ia karaia? Mani Luka karoa 21 oi duahia. Unai karoa lalonai Iesu ese hisihisi idauidau ia perovetalaia; unai hisihisi, tanobada besedia be hari inai nega lalonai idia hisihisilaia gaudia, be inai: bese idauidau idia tuari heheni, tano ia mareremarere, gorere, doe bona taravatu utua karadia momo idia vara. Unai gau idia vara noho, anina be dahaka? Iesu ia gwau: “Inai gaudia do idia vara hamatamaia neganai be emui kwarana do umui abia isi. Badina be umui emui hahemauri be ia kahirakahira vadaeni. . . . Inai gaudia do idia vara do umui itaia, vadaeni do umui diba Dirava ena Basileia ia kahirakahira vadaeni.”—Luka 21:10, 11, 28, 31.
Unai Basileia be mai anina bada emu vaira dinadia dekenai. Ia be gavamani ta, ia amo Dirava ese tanobada do ia lohiaia. Unai Basileia gavamanina ese taunimanima edia lohia siahuna do ia haorea. (Daniel 2:44) “Tanobada idia hadikaia vadaeni taudia” be do idia hadikaia ore garina, Dirava ese idia do ia hadikadia ore, bona taunimanima be edia hadikaia karadia amo do ia hamauridia.—Apokalupo 11:18; Kohelete 1:4.
Dirava ena Basileia ese tanobada do ia naria namonamo neganai, taunimanima ese tanobada ibounai paradaiso ai do idia halaoa. (Luka 23:43) Taunimanima bona animal do idia hadikaia heheni lasi. (Isaia 11:6-9) Tuari bona tuari gaudia do idia haoredia. (Salamo 46:8, 9) Kara dika, hitolo, ogogami, gorere—bona mase danu—do idia ore. Tanobada noholaia taudia be “maino bada dainai do idia moale dikadika.”—Salamo 37:10, 11; 72:16; Isaia 65:21, 22; Apokalupo 21:3, 4.
Dirava ena Gwauhamata Oi ‘Tohodia’
Mauri hanaihanai paradaiso lalonai—unai hahenamo be oi ese do oi abia diba! To ena be unai hereva oi moalelaia, to reana oi abia dae be auka, badina be oi laloa kara namo taudia iboudiai be guba dekenai idia lao, eiava reana Baibel oi daradaralaia. Iehova ena Witness memerodia bona kekenidia haida danu idia davaria edia abidadama ena badina be auka lasi. Kekeni ta ladana Michelle ena tamana sinana be Witness taudia dainai ia danu ia abia dae Baibel ena hereva be momokani. To dina ta ia lalo-parara—Baibel ena hereva ia abia dae ena badina be ia diba lasi. Ia gwau: “Reana lau abia dae ela bona unai nega, badina be egu tamana sinana ese idia abia dae dainai.”
Baibel ia gwau: “Tau ta bema Dirava ia abidadama henia lasi neganai ia hegeregere lasi Dirava ena ura do ia badinaia.” (Heberu 11:6) Abidadama be emu tamana sinana edia amo ia hanai kava lasi oi dekenai. Emu vaira dinadia do idia namo totona, namona be emu abidadama be oi hamomokanilaia herevadia korikoridia latanai oi haginia, bena oi laroa gaudia oi naria mai emu daradara lasi be namo. (Heberu 11:1) Baibel ena hereva hegeregerena, namona be ‘hereva ibounai do oi laloa namonamo Dirava dekena amo ia mai eiava lasi.’—1 Tesalonika 5:21.
Baibel ena Hereva Oi Tohoa
Reana namona be Baibel ena hereva do oi tohoa guna, “Dirava ena Lauma ese ia havaraia” eiava lasi. (2 Timoteo 3:16) Edena bamona do oi tohoa diba? Siahu Ibounai Diravana sibona mo ese ‘matamana neganai dokona ia gwauraia diba.’ (Isaia 43:9; 46:10) Baibel lalonai ia be unai bamona ia karaia loulou. Peroveta herevadia, Luka 19:41-44 bona Luka 21:20, 21 ai idia torea, be mani oi duahia, Ierusalem ena moru idia gwauraia herevadia unai. Eiava Isaia 44:27, 28 bona Isaia 45:1-4 edia peroveta herevadia, Babulono ena moru idia gwauraia herevadia unai. Unai bese edia sivarai ese idia hamomokania, Baibel ese unai gau ia perovetalaidia maoromaoro! Kekeni ta ladana Janine ia gwau: “Baibel ena peroveta herevadia haida lau duahia namonamo neganai lau hoa, badina be ia ese gau momo ia perovetalaidia diba.”
Baibel ena hereva do oi abia dae ena badina ma haida be inai: Ia ese idaunegai idia vara gaudia ia gwauraia maoromaoro mai ena momokani ida, bona ena hereva ta ese ena hereva ma ta ia hakoikoia lasi. To edena bamona do oi diba Iehova ena Witness taudia ese Baibel ena anina idia gwauraia maoromaoro? Aposetolo Paulo ese Baibel ena hereva ena anina be Berea taudia dekenai ia gwauraia hedinarai neganai, idia ese ena hereva idia abia dae kava lasi, to “dina ibounai Buka Helaga idia tahua, inai hereva ia momokani eiava lasi.”—Kara 17:11.
Oi ai noia goadagoada inai, oi danu be Baibel ena hereva unai bamona do oi tahua namonamo. Buka ta, ladana Baibel be Dahaka Ia Hadibaia? (Iehova ena Witnes Taudia ese idia halasia gauna) ese unai hereva ia gwauraia hedinarai goevagoeva. Bema emu tamana sinana be Iehova ena Witness taudia, emu henanadai do idia haerelaidia diba. Haneulato ta ladana Janel ia gwau: “Bema hereva ta oi abia dae be auka, emu daradara be emu tamana sinana amo oi hunia lasi, to unai hereva oi nanadailaidia.” (Hereva Lada-isidia 15:22) Gabeai do oi diba, Iehova ese ena Witness taudia ia hanamodia dainai, Baibel ena hereva edia anina idia lalo-pararalaia momokani!
Mero ta ladana Prentice ia gwau: “Nega haida lau be tanobada ena dika dainai lau lalo-metau, to Apokalupo 21:4 bona unai bamona siri ma haida lau duahia neganai, helaro namona lau davaria.” Oibe, bema Dirava ena gwauhamata oi abia dae momokani, emu lalona do ia goada. Nega vaira do oi naria mai emu moale ida, do oi lalo-metau lasi. Bena hari inai nega lalonai do oi hekwarahi kava hanaihanai lasi, to dala do oi davaria, ‘emu badina namona do oi abia hegaegae, iseda vaira dinadia edia, bena mauri korikori do oi abia’ totona.—1 Timoteo 6:19, NW.
To bema Baibel ena hereva oi dibaia bona oi abia dae, unai sibona amo “mauri korikori” do oi abia diba a, eiava kara ma haida danu do oi karaia be namo, a? Unai do oi diba totona, karoa gabena mani oi duahia.
Inai Henanadai Herevalaia
◻ Memero kekeni momo idia gari, dahaka dahaka be edia vaira negana lalonai do idia vara garina?
◻ Matamana neganai Dirava ena palani tanobada totona be dahaka? Dahaka dainai ita diba Dirava ese unai palani ia haidaua lasi?
◻ Basileia ese Dirava ena palani tanobada totona edena bamona do ia hagugurua?
◻ Dahaka dainai namona be Baibel ena hereva do oi tahudia idia momokani eiava lasi, bona edena bamona do oi tahudia diba?
◻ Edena bamona do oi diba momokani Dirava ena lauma ese Baibel ia havaraia?
[Blurb on page 306]
“Helaro namona be lasi. Ita idia hadikaia gwauraia gaudia do ita haorea diba lasi.”—B. F. Skinner
[Picture on page 307]
Dirava ese taunimanima do ia koudia, tanobada do idia hadikaia ore garina
[Picture on page 309]
Oi diba momokani Baibel ena hereva be momokani, a?