Karoa 39
Edena Bamona Dirava Dekenai Do Lau Raka Kahirakahira Lao Diba?
DIRAVA dekenai ita raka kahirakahira lao diba, a? Taunimanima momo idia laloa Dirava ese taunimanima ia lalodia lasi. Unai dainai reana oi be ia kahirakahira dekenai do oi lao garina oi gari.
Eiava, reana oi be hahine matamatana ta ladana Lynda bamona. Iena tamana sinana be Keristen taudia bona Keristen dalanai ia tubu daekau. Ia gwau: “Lau be kekeni badana neganai, Keristen heboudia ta ta sibona lau reaia, bona hua iboudiai lalodiai lau haroro, to Iehova lau tura henia momokani lasi.”
To, oiemu vaira negana do ia namo totona, namona be Dirava dekenai oi raka kahirakahira lao. Iesu ia gwau: “Mauri hanaihanai be inai, idia ese oi Dirava momokani tamona do idia diba.” (Ioane 17:3) Dirava ita diba totona, namona be ita badinaia bona iena turana ai ita lao. (Iakobo 2:23 itaia.) Dirava ese ita ia boiria ia do ita tahua bona do ita davaria, badina be “Dirava be daudau lasi ita ta ta dekenai.”—Kara 17:27.
Dirava Do Oi Dibaia Dalana
Nega ta hisiu oi raraidia a, o davara ena regena oi kamonaia a, o kaubebe ta ena toana namona oi moalelaia a, o au rauna ta ena toana namona oi hoalaia, a? Dirava ese unai iboudiai ia karaia, bona idia amo iena siahu, iena aonega, bona iena lalokau ia hahedinaraia sisina. “Taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. . . . Dirava ese ia karaia gaudia ibounai idia itaia vadaeni. Inai gaudia idia itaia dainai idia be Dirava ena hunia gaudia idia kamonai diba danu.”—Roma 1:19, 20.
To, Dirava ese ena kara haida sibona be ia karaia gaudia amo ia hahedinaraia, unai dainai iena Hereva be buka ta lalonai ita ia henia, Ia do ita dibaia momokani totona. Unai buka ese ia hahedinaraia Dirava be Lauma Tauna korikorina mai ena ladana. Salamo torea tauna ia gwau: “Umui diba Iehova be Dirava.” (Salamo 100:3) Baibel lalonai Iehova ese ena kara ma haida ia gwauraia hedinarai, ia gwau: “Iehova, hebogahisi bona hariharibada Diravana. Lau badu haraga lasi; egu hebogahisi bona egu kara momokani be bada herea.” (Esodo 34:6) Dirava ese taunimanima dekenai ia karaia karadia edia sivarai be Baibel ese ia gwauraia goevagoeva. Unai dainai, Dirava dekenai ita raka kahirakahira lao totona, gau badana be Baibel ita duahia.
Baibel Duahia Karana Moalelaia Dalana
Momokani, Baibel be buka badana mai ena hereva momo, unai dainai memero kekeni momo idia laloa idia be hegeregere lasi do idia duahia. Danu, haida idia maumau, idia gwau ena hereva momo idia hesikulaia. To, Baibel amo Dirava ese ia hahedinaraia gaudia haida be inai: taunimanima ia havaradia dalana, vaira neganai do ita davaria gaudia, bona tanobada ena Paradaiso lalonai mauri do ita davaria dalana. Unai hereva oi hesikulaia diba lasi, ani? Momokani, Baibel ena hereva ita duahia haraga diba lasi, bona “iena hereva haida edia anina davaria be auka.” (2 Petero 3:16) To, Baibel duahia karana ita moalelaia diba.
Mero ta ladana Marvin ia gwau: “Lau duahilaia gaudia be egu lalona ena matana amo lau itaia toho bona lau laloa, hegeregere lau danu be lau duahilaia gabuna dekenai lau noho bamona.” Daniel karoa 6 ena sivarai mani oi laloa. Oi duahia kava lasi, to oi duahia neganai oi laloa oi be Daniel. Oi idia dogoatao badina haida ese oi idia samania kava emu Dirava oi guriguri henia dainai. Emu kara ena davana be dahaka? Mase! Parasa ena tuari taudia ese oi idia veria lao emu mase gabuna dekenai—kohua ta, leona idia noholaia kohuana unai!
Iduara koua nadina idia kokia neganai ia regerege. Leona idia boiboi badabada. Oi gari dikadika, to tuari taudia ese oi idia negea vareai bona iduara be nadi amo idia koua lou. Dibura lalonai oi gini neganai, leona ta be emu tauanina dekenai ia kamokau. . .
Unai sivarai oi hesikulaia lasi, ani? To mani inai oi laloa: Oi duahia lasi do oi moalelaia totona. Unai sivarai ena anina mani oi tahua. Ia ese ita ia hadibaia, Iehova ese hedibagani haida ia koudia lasi dainai, ena hesiai taudia ese hedibagani badadia idia davaria diba, ani?
Danu, namona be nega oi atoa, dina iboudiai Baibel do oi duahia totona. Bema dina ta ta iboudiai miniti 15 lalodiai Baibel oi duahia, reana lagani tamona lalonai Baibel ibounai do oi duahia ore! Namona be anina bada lasi karana ta, hegeregere TV raraia karana, ena nega oi hakwadogia, bena nega orena oi gaukaralaia namonamo Baibel duahia karana dekenai. (Efeso 5:16) Baibel duahia karana do oi manadalaia neganai, do oi davaria oi be Dirava kahirakahira dekenai oi lao unai.—Hereva Lada-isidia 2:1, 5.
Guriguri ese Oi Ia Veria Lao Dirava Kahirakahira Dekenai
Kekeni badana ta ladana Laverne ia gwau: “Bema ta oi hereva henia lasi, oi gwau diba lasi ia oi tura henia.” “Guriguri kamonaia Diravana” Iehova ese ita ia boiria, ia do ita hereva henia totona. (Salamo 65:2) Bema mai eda abidadama ida ita guriguri henia, “gau ta iena ura hegeregerena ita noia neganai, ia ese ita dekenai do ia kamonai.”—1 Ioane 5:14.
Ai gwauraia vadaeni hahinena ladana Lynda be unai ia diba. Ia gwau, nega ta hekwakwanai bona lalo-hekwarahi momo ia davaria neganai, ‘dina momo lalodiai Dirava ia noia loulou, ena hekwakwanai hanaidia dalana do ia hadibalaia.’ Guna, ia laloa Dirava be ia kahirakahira dekenai ia noho lasi, to ia guriguri henia bona goada ia davaria unai hekwakwanai do ia haheaukalaidia totona neganai, mamina ia abia Dirava be ia kahirakahira dekenai ia noho. Kekeni badana ma ta ladana Kay danu ese guriguri ena namo ia davaria; ia gwau: “Nega haida lau ura egu lalona ena anina be ta dekenai do lau gwauraia hedinarai. Bona lau diba Iehova dekenai do lau gwauraia hedinarai be namo, badina be lau ia lalo-pararalaia bona lau diba ia sibona ese lau do ia durua momokani diba.”
Iakobo 1:2-5 ese ita ia hamaoroa, hedibagani bona hisihisi ita davaria neganai, namona be ‘Dirava do ita noia . . . Badina be Dirava ese taunimanima ibounai dekenai gau namodia ia henia noho.’ Reana Dirava ese ita hedibagani amo do ia harohoa mauri lasi, to ia gwauhamata, aonega be ita do ia henia bena hedibagani do ita davaria neganai mai eda aonega ida do ita kara diba! Reana oi do ia durua Baibel ena hahegani do oi laloa lou totona, unai hahegani bema oi badinaia do oi kwalimu diba. (Ioane 14:26 itaia.) Eiava reana dala do ia kehoa, Baibel do oi stadilaia neganai o Keristen heboudia dekenai, aonega dalana do oi dibaia totona. ‘Ia ese oi do ia naria, emu goada ia hanaia hedibagani ese oi do ia pidia garina. Bona hedibagani neganai emu dala ta do ia kehoa.’ Oibe, Dirava ese oi do “ia rakatania lasi.” (1 Korinto 10:13; 2 Korinto 4:9) Hedibagani oi davaria neganai bema Dirava ese oi ia durua, oi diba ia be oi kahirakahira dekenai ia noho, ani?
To sibomu emu hekwakwanai mo oi gurigurilaidia lasi. Iesu ese guriguri dalana ia haheitalaia neganai, ia hahedinaraia inai gau be mai anina bada: Iehova ena ladana hahelagaia karana, Iena Basileia ena mai, bona Iena ura do ia vara dalana. (Mataio 6:9-13) Namona be ‘oi noia negadia ibounai, mai tanikiu danu do oi guriguri henia.’—Filipi 4:6.
Bema guriguri oi manadalaia momokani lasi, dahaka oi karaia diba? Namona be unai hekwakwanai oi gurigurilaia! Dirava oi noia, oi do ia durua, emu lalona ena anina be ia vairanai do oi gwauraia hedinarai totona. ‘Guriguri do oi goadalaia nega ibounai,’ bena gabeai do oi davaria Iehova do oi hereva henia diba, emu turana ma ta oi hereva henia hegeregerena. (Roma 12:12) Kekeni ta ladana Maria ia gwau: “Lau diba, hekwakwanai lau davaria neganai, Iehova ena heduru lau noinoilaia diba, bona lau do ia durua.”
Dirava ita hereva henia neganai, hereva idaudia amo ita hereva henia be anina lasi. Salamo torea tauna ia gwau: “Emui lalona edia anina be ia vairanai do umui hahedinaraia.” (Salamo 62:8) Oiemu lalona ena mamina bona emu lalo-hekwarahi oi hamaorolaia. Oi noia, oi do ia durua emu manoka gabudia ai. Oi noia, ia ese emu ruma bese taudia bona emu Keristen bamodia do ia hanamodia. Oi noia, emu kerere do ia gwaudiatao. Ena harihari gauna, mauri, dainai dina iboudiai oi tanikiu henia. Bema dina iboudiai oi guriguri loulou, unai guriguri karadia dainai Iehova Dirava do oi tura henia diba mai emu moale ida.
Dirava Oi Tura Henia Karana be Taunimanima Vairadiai Oi Gwauraia Hedinarai
Dirava oi tura henia matamaia vadaeni dainai, namona be oi ura ma haida danu do oi durudia Dirava do idia tura henia totona, ani? Momokani, Dirava ena hahegani be, idia ura iena turana ai do idia lao taudia ese taunimanima vairadiai ‘inai abidadama be edia uduna dekenai idia gwauraia hedinarai, be mauri do idia davaria.’—Roma 10:10.
Memero kekeni momo ese edia abidadama idia gwauraia matamaia dalana be, edia bamodia sikuli ai, edia dekena taudia, bona edia varavara dekediai idia gwauraia hedinarai. Gabeai, Iehova ena Witness taudia idia bamodia, ruma ta ruma ta dekenai idia haroro neganai. (Kara 5:42) To memero kekeni haida ese unai haroro gaukarana idia hekwakwanailaia. Keristen merona ta ia gwau: “Lau laloa memero kekeni momo idia hemarai dainai idia ura lasi ruma ta ruma ta dekenai idia haroro. Edia turadia ese do idia lalo-namo henidia lasi garina idia gari.”
To daika ena lalo-namo be mai anina bada—oiemu bamodia edia, eiava oiemu Turana guba dekenai, Iehova ena? Gari eiava hemarai ese emu hahemauri dalana ia koua be namo, a? Aposetolo Paulo ia gwau: “Namona be iseda abidadama ita dogoatao goada noho. Ita gwauraia noho abidadama be unai.” (Heberu 10:23) Danu, bema ta ese haroro dalana oi ia hadibalaia bona bema oi hegaegae namonamo, haroro gaukarana do oi moalelaia momokani diba!—1 Petero 3:15.
Gabeai, emu Turana guba dekenai ena kara do oi laloa bada dainai, do oi ura emu mauri ibounai be Dirava dekenai do oi gwauhamatalaia, bona unai gwauhamata ena toana hegeregerena ranu lalonai bapatiso do oi abia. (Roma 12:1; Mataio 28:19, 20) Keriso ena hahediba tauna ai do oi lao totona taunimanima vairadiai do oi karaia karadia, be oi laloa maragi lasi be namo. Unai kara ena anina be, ‘oi sibomu emu kopina ena namo oi laloa lasi,’ to Iehova Dirava ena ura oi tahua guna. (Mareko 8:34) Danu, ena anina ma ta be, oi hahedinaraia oi be Iehova ena Witness taudia edia orea tauna ta ai oi lao vadaeni.
Mero ta ladana Robert ia gwau: “Lau laloa memero kekeni momo idia ura lasi do idia bapatiso. Idia laloa bema idia bapatiso, gabeai bapatiso taudia edia maduna do idia negea diba lasi.” Momokani, bema ta ese Dirava ia gwauhamata henia, unai gwauhamata ia negea diba lasi. (Kohelete 5:4 itaia.) To, “bema kara namodia ia karaia diba tauna ese unai kara ia karaia lasi, unai tau be kara dika tauna,” ia bapatiso eiava ia bapatiso lasi be herevana! (Iakobo 4:17) Gau badana be inai: Dirava ena hetura oi laloa bada, a? Iena kara dainai oi ura do oi hesiai henia ela bona hanaihanai, a? Vadaeni, namona be oi gari lasi, to sibomu oi gwauraia hedinarai, oi be Dirava ena turana!
Do Idia Noho Hanaihanai Hahenamodia Dirava ena Turadia ese Do Idia Abia!
Bema Dirava ena turana ai oi lao, tanobada ibounai ese oi do ia inai henia. (Ioane 15:19) Haida ese oi do idia kirikirilaia reana. Lalo-hekwarahi, hekwakwanai, bona hedibagani momo do oi davaria reana. To namo lasi tau ta eiava gau ta ese Dirava ena hebamo amo oi do ia kokia. Dirava ia gwauhamata vadaeni: “Lau ese umui do lau negea lasi, bona umui do lau rakatania lasi. Lasi bona lasi momokani.”—Heberu 13:5.
Iehova ena orea ese inai buka ia karaia dainai bona ma gau momo dainai, oi diba Iehova bona iena orea ese oiemu namo hari ela bona hanaihanai be idia laloa. Ena be inai buka lalonai emu henanadai bona hekwakwanai iboudiai ai herevalaidia diba lasi, to ai laloa hari oi diba Baibel be mai ena aonega herevadia momo herea! (2 Timoteo 3:16, 17) Hekwakwanai dainai oi daradara negadiai, Buka Helaga oi tahua. (Hereva Lada-isidia 2:4, 5) Bema oiemu tamana sinana be Dirava gari henia taudia, bona bema emu lalona ena anina be idia dekenai oi gwauraia hedinarai, idia danu ese oi do idia durua diba, bona Dirava ena amo ia mai aonegana be oi do idia henia diba.
Gau badana be inai oi laloa: Dirava be henanadai iboudiai edia haere ia diba. “Iena heduru ita davaria haraga hisihisi negadiai,” bona hekwarahi iboudiai lalodia amo oi ia hakaua namonamo diba. (Salamo 46:1) Unai dainai, “oi ia havaraia Diravana be oiemu tauhau [o haneulato] negana lalonai oi laloatao.” (Kohelete 12:1) Bema unai bamona oi karaia, Iehova ena lalona do oi hamoalea. (Hereva Lada-isidia 27:11) Danu, unai dala amo mauri hanaihanai do oi abia diba, do ia doko lasi Paradaisona lalonai—Dirava ese ena turadia dekenai do ia henia davana namona unai.
Inai Henanadai Herevalaia
◻ Dahaka dainai iena turana bamona Dirava kahirakahira dekenai oi noho be mai anina bada?
◻ Baibel ese Dirava edena bamona ia gwauraia hedinarai?
◻ Dahaka oi karaia diba, Baibel duahia karana do oi moalelaia bona iena amo heduru do oi abia totona?
◻ Emu abidadama be taunimanima vairadiai oi gwauraia hedinarai ena anina be dahaka? Oi ura unai bamona do oi karaia, a? Dahaka dainai?
◻ Keristen heboudia ese oi edena bamona idia durua, Dirava kahirakahira dekenai do oi lao totona, bona edia heduru be edena bamona oi abia badabada diba?
◻ Dirava ena turana ai ia lao tauna ese dahaka hahenamo ia davaria?
[Blurb on page 311]
Dirava kahirakahira dekenai do lau lao diba, a?
[Blurb on page 312]
Dirava ese taunimanima ia havaradia dalana bona edia vaira negana be Baibel amo ia gwauraia hedinarai
[Box/Picture on page 316, 317]
Hebou ese Oi Idia Durua, Dirava Kahirakahira Dekenai Oi Lao Totona
“Lau davaria Iehova idia lalokau henia taudia bema lau bamodia, unai ese lau ia durua, Ia kahirakahira dekenai do lau noho totona.” Nigeria merona ta ena hereva unai. Iehova ena Witness taudia ese dala idia karaia, edia Kingdom Hall dekediai taunimanima be unai bamona do idia hebou loulou totona. (Heberu 10:23-25) Kekeni badana ta ladana Anita ia gwau: “Kingdom Hall lalonai tura korikoridia lau davaridia.”
To, idia hebamo heheni sibona totona idia hebou lasi. Kingdom Hall lalonai pura ta ta iboudiai Baibel hadibalaia heboudia 5 idia karaia. Idia herevalaia gaudia haida be inai: ruma bese taudia edia mauri, Baibel ena peroveta herevadia, taunimanima edia kara, Baibel ena hahediba herevadia, bona Keristen haroro gaukarana. Hebou idia karaia daladia haida be inai: ta ese hereva ta ia harorolaia, haida ese hereva ta idia herevalaia hebou, ta ese haida ia henanadai henidia, bona haheitalai idia karaia. Haroro School ese taunimanima momo herea ia hadibadia vadaeni, haroro taudia namodia ai idia lao totona.
Bema hari oi be hebou dekediai oi lao loulou, oi goada karaia idia edia amo hahenamo ma haida do oi abia totona. (1) Oi hegaegae: Anita ia gwau: “Nega lau abia hidi vadaeni, hebou dekenai ai gaukaralaia bukadia do lau stadilaia totona.” Bema unai bamona oi karaia (2) Hereva do oi gwauraia diba: Iesu be mero neganai, dubu lalonai lauma gaudia idia herevalaia neganai ia hakala namonamo, ia henanadai henidia, bona ia haere henidia danu. (Luka 2:46, 47) ‘Oi kamonai vadaeni gauna do oi dogoatao bona badinaia’ totona, namona be hereva badadia be pepa dekenai oi torea. (Heberu 2:1) Hebou taudia idia henanadai henidia neganai, oi danu oi haere.
Sisiba herevana ma ta be (3) Oi dibaia herevadia oi gaukaralaidia: Ma haida dekenai oi herevalaidia. Gau badana be, oi dibaia herevadia be emu mauri lalonai oi badinadia. Emu manoka gabudia oi hanamodia. Namona be oi hahedinaraia, hereva momokani be emu “lalona dekenai ia gaukara noho.”—1 Tesalonika 2:13.
Hebou karana oi tahua guna. Bema oi be mai emu houmwok momo, namona be hebou negana vairanai oi karaia guna. Mero ta ladana Simeon ia gwau: “Lau ura hebou idia doko murinai ma haida ida ai herevahereva ela bona hebou taudia oredia idia lao vadaeni. To bema lau be mai egu houmwok, hebou ia doko neganai, maoromaoro lau lao houmwok karaia totona.” To namona be oi laloa edena negai emu houmwok oi karaia be namo, bena dala oi karaia, hebou iboudiai dekediai do oi lao totona. Idia be mai anina bada, badina be idia amo lauma dalana ai do oi goada oi lao diba.
[Picture on page 315]
Dirava ena turana ai do oi lao totona, Baibel oi duahia
[Pictures on page 318]
“Lau diba, hekwakwanai lau davaria neganai, Iehova ena heduru lau noinoilaia diba, bona lau do ia durua”