Kahana 9
Hari Ita be “Dina Gabedia” ai Ita Noho
1, 2. Edena bamona ita diba ita be dina gabedia ai ita noho?
EDENA bamona ita diba momokani Dirava ena Basileia ese iseda nega lalonai taunimanima edia gavamani do ia haoredia? Edena bamona ita diba nega daudau lasi murinai Dirava ese kara dika bona hisihisi ibounai do ia haorea?
2 Iesu ena hahediba taudia ese unai gau idia nanadailaia. Idia nanadaia, Basileia siahuna lalonai do ia lou mai vadaeni negana bona “tanobada dokona danu” edia toana be dahaka. (Mataio 24:3) Iesu ia haere neganai, hisihisi badadia ia herevalaidia, idia ese do idia hahedinaraia “dokona negana,” inai tanobada ena “dina gabedia” unai, be idia ginidae vadaeni. (Daniel 11:40; 2 Timoteo 3:1, NW) Hari inai nega lalonai ita ese unai toa mai ena kahana idauidau be ita itaia vadaeni a? Oibe, ita itaia vadaeni!
Tuari Badadia
3, 4. Hanaia laganidia 90 lalodiai idia vara tuaridia ese Iesu ena peroveta herevana edena bamona idia hamomokania?
3 Iesu ia gwau “bese ta ese do ia toreisi, bese ta do ia tuari henia.” (Mataio 24:7) Lagani 1914 lalonai tanobada besedia idia tuari heheni matamaia; unai tuari be idau vaitani, tuari gunana ta hegeregerena lasi. Unai dainai sivarai torea taudia ese idia gwauraia Tuari Badana, tanobada ibounai tuarina ginigunana unai. Ia lalonai tuari taudia bona hanua taudia 20,000,000 idia mase; edia momo ese tuari gunadia ta ta lalodiai idia mase taudia edia momo ia hanaia momokani.
4 Unai tuari be dina gabedia edia matamana. Iesu ia gwau unai bona ma gau haida danu be “hisihisi nega ena hamatamaia sibona.” (Mataio 24:8) Unai be momokani, badina be Tanobada Ibounai Tuarina Iharuana be dika herea; ia lalonai tuari taudia bona hanua taudia 50,000,000 idia mase. Hanaia laganidia 90 lalodiai, taunimanima 100,000,000 be tuari lalodiai idia hamasedia, edia momo ese lagani gunadia 400 lalodiai idia hamasedia taudia edia momo ia hanaia momokani! Unai ese taunimanima edia lohia dalana ena dika ia hahedinaraia goevagoeva!
Toana ena Kahana Ma Haida
5-7. Dahaka danu ese idia hahedinaraia ita be dina gabedia ai ita noho?
5 Iesu ese dina gabedia ai do idia vara gaudia ma haida ia gwauraidia: “Gabu ibounai dekenai tano do idia mareremarere, hitolo bada, bona ta ta dekenai do ia hanaia gorerena do idia vara.” (Luka 21:11) Lagani 1914 amo ema bona hari, unai bamona hisihisidia idia momo daekau momokani.
6 Tano ia marere bada loulou dainai taunimanima momo idia mase. Tanobada Ibounai Tuarina Ginigunana murinai gorere ta ladana Spanish influenza ese taunimanima 20,000,000 ia hamasedia. AIDS gorerena dainai, taunimanima tausen tausen idia mase vadaeni bona reana milion milion do idia mase. Lagani ta ta iboudiai taunimanima milion milion be kudou goreredia, kensa, bona gorere idaudia dainai idia mase. Ma milion momo be hitolo dainai idia mase. Momokani, lagani 1914 amo ema bona hari, ‘Apokalupo ena hosi gui taudia’ ese tuari, doe, bona daihanai goreredia amo taunimanima momo herea idia hamasedia.—Apokalupo 6:3-8.
7 Tano iboudiai lalodiai raskol karadia idia bada daekau. Iesu ese unai danu ia perovetalaia, ia gwau: “Kara dikadia danu do idia vara gabu idauidau dekenai, vadaeni taunimanima momo edia lalokau be do ia keru.”—Mataio 24:12.
8. Timoteo Iharuana karoa 3 ena peroveta herevana be edena bamona ia momokani iseda nega lalonai?
8 Hari inai negai, tanobada ibounai lalonai, taunimanima momo ese kara maoromaoro idia negea. Baibel ese unai danu ia perovetalaia: “Nega dokonai . . . taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. . . . Kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:1-13) Unai ibounai be iseda matadia ai ia vara.
Ena Badina Ma Ta
9. Dina gabedia be tanobada ai idia matamaia neganai, dahaka be guba ai ia vara?
9 Hari inai negai hisihisi momo herea idia vara ena badina ma ta be, dina gabedia be lagani 1914 lalonai idia matamaia neganai, taunimanima hadikadia bada gauna ia vara. Unai neganai, Apokalupo bukana ena peroveta herevana hegeregerena: “Guba dekenai tuari ia vara. Mikael [Keriso, guba siahuna lalonai] mai ena aneru danu ese huala [Satana] idia tuari henia. Huala mai ena aneru [lauma dikadia] danu idia tuari henia. To huala ena goada hegeregere lasi dainai ia kwalimu lasi. . . . Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. . . . Oibe, ia, mai ena aneru ibounai danu, be idia ese tanobada dekenai idia negea diho.”—Apokalupo 12:7-9.
10, 11. Satana bona ena aneru be tanobada dekenai idia negedia diho dainai, dahaka be taunimanima dekediai ia vara?
10 Unai dainai dahaka ia vara taunimanima dekediai? Unai peroveta herevana orena be inai: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Oibe, Satana ia diba iena tanobada be kahirakahira do ia ore, unai dainai ia ese taunimanima iboudiai ia hakereredia haraga toho. (Apokalupo 12:12; 20:1-3) Unai lauma ese edia ura-kwalimu idia gaukaralaia kerere dainai idia dika rohoroho! Bona lagani 1914 amo ema bona hari idia ese hisihisi badadia tanobada dekenai idia havaradia!
11 Unai hegeregerena, Iesu ese iseda nega ia perovetalaia, ia gwau: “Tanobada besedia be do idia hisihisi bona edia kudouna dekenai do idia gari dikadika. . . . Edia laloa danu do idia doko, unai idia vara gaudia dainai.”—Luka 21:25, 26.
Taunimanima bona Lauma Dikadia Edia Lohia Negana be Kahirakahira Do Ia Ore
12. Edena peroveta herevana ma ta do ia momokani guna, inai nega do ia ore lasi neganai?
12 Baibel ena peroveta herevadia ma hida do idia momokani guna bena Dirava ese hari inai nega do ia hadokoa? Momo lasi! Ginigabedia ta be 1 Tesalonika 5:3 ai; ia gwau: “Maino bona noho namo idia herevalaia noho lalonai, karaharaga hadikadia ore negana be idia dekediai do ia ginidae.” (The New English Bible) Unai ese ia hahedinaraia, taunimanima ese edia helaro hegeregerena maino bona noho namo idia “herevalaia noho lalonai,” unai dika do idia davaria, idia hegaegae lasi neganai.
13, 14. Dahaka hisihisi negana be Iesu ese ia perovetalaia, bona ena dokonai dahaka do ia vara?
13 Inai tanobada, Satana ese ia biagua gauna, be kahirakahira do ia ore. Iesu ese ena dokona ia perovetalaia, ia gwau: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari.”—Mataio 24:21.
14 Unai “hisihisi bada herea” ena dokonai, Dirava ena tuari, Aramagedono, do ia vara. Peroveta tauna Daniel ese unai nega ia gwauraia, ia gwau Dirava ese “unai basileia iboudiai do ia hamakohidia maragimaragi bona do ia haoredia.” Anina be, taunimanima edia gavamani iboudiai do ia haoredia. Bena ena guba Basileiana ese taunimanima do ia lohiadia. Daniel ia gwau ena lohia siahuna do ia hanai lasi “bese idauna ta dekenai.”—Daniel 2:44; Apokalupo 16:14-16.
15. Dahaka do ia vara, Satana bona ena lauma dikadia edia siahu dekenai?
15 Unai neganai, Satana bona ena lauma dikadia edia siahu danu do ia ore. Unai gwau-edeede anerudia be do idia koudia, ‘tanobada bese do idia koia diba lasi totona.’ (Apokalupo 12:9; 20:1-3) Dirava ese edia mase herevana ia gwauraia vadaeni; unai hegeregerena do ia hadikadia ore. Ia ese taunimanima na edia siahu dikana amo do ia ruhadia nege!
Daidia Mo Do Idia Roho Mauri?
16-18. Daidia be inai nega ena dokona amo do idia roho mauri, bona daidia be lasi?
16 Dirava ese ena hahemaoro na inai tanobada latanai do ia karaia neganai, daidia mo do idia roho mauri? Baibel ese ia hahedinaraia, Dirava ena lohia siahuna idia ura henia taudia be ia ese do ia naridia bena do idia roho mauri. To idia ura henia lasi taudia be ia ese do ia hadikadia ore, Satana ena tanobada ida.
17 Hereva Lada-isidia 2:21, 22 ia gwau: “Kara maoromaoro taudia [Dirava ena lohia siahuna idia abia dae taudia] be tanobada do idia noholaia, bona kerere lasi taudia be ia lalonai do idia noho. To kara dika taudia [Dirava ena lohia siahuna idia abia dae lasi taudia] be tanobada amo do idia negedia, bona kerere taudia be tanobada amo do idia ragadia oho.”
18 Salamo 37:10, 11 ia gwau: “Nega sisina murinai, kara dika tauna do ia noho lasi . . . To manau taudia ese tano do idia abia, bona maino bada do idia moalelaia dikadika.” Siri 29 ia gwau: “Kara maoromaoro taudia ese tanobada do idia abia, do idia noholaia hanaihanai.”
19. Dahaka hereva ita laloa be namo?
19 Namona be Salamo 37:34 ena hereva ita laloa; ia gwau: “Iehova oi naria, iena dala ai oi raka, bena oi do ia abia dae, tano do oi abia oiemu. Kara dika taudia do ia haoredia neganai, unai do oi itaia.” Siri 37 bona 38 idia gwau: “Kerere lasi tauna oi raraia bona kara maoromaoro tauna oi itaia noho, badina be dina vairai ia ese maino do ia abia. To kara dika taudia do idia hamasedia ore; dina vairai do idia utudia oho.”
20. Dahaka dainai ita gwau diba hari inai nega be moale negana?
20 Dirava ese ita ia laloa bona nega sisina murinai ia ese kara dika bona hisihisi ibounai do ia haorea. Unai ita diba dainai iseda lalona idia goada! Ita moale bada, badina be ita diba unai peroveta herevadia namodia be kahirakahira do ia hamomokanidia!
[Picture on page 20]
Baibel ese gau haida ia perovetalaidia, dina gabedia edia “toana” ai do idia lao
[Picture on page 22]
Aramagedono ai, Dirava ena lohia siahuna idia dadaraia taudia be ia ese do ia haoredia. Bena idia abia dae taudia ese tanobada matamatana do idia noholaia