Kara Badadia Rua Headava Ia Goada Totona

1, 2. (a) Dirava ia ura headava ena lata be edena bamona? (b) Edena bamona unai do ia vara diba?

DIRAVA ese headava lalonai tau bona hahine ginigunadia ia hatamonaia neganai, gau ta ese ia hahedinaraia lasi idia noho hebou negana be nega kwadogina sibona. Lasi. Adamu bona Heva be edia mauri ibounai lalonai do idia noho hebou. (Genese 2:24) Dirava ena taravatu hegeregerena headava maorona lalonai tau ta bona hahine ta do idia tamona. Baibel ese ia hahedinaraia tau o hahine eiava idia ruaosi edia heudahanai karana sibona dainai, edia headava idia hadokoa bena ma ta idia adavaia be maoro.—Mataio 5:32.

² Taunimanina rua be mai moale ida nega daudau do idia noho hebou diba, a? Oibe, bona Baibel ese tau bona hahine idia durua kara badadia rua ia hahedinaraia. Bema tau bona hahine ese unai kara rua idia hahedinaraia, idia ese moale bona hahenamo momo do idia davaria. Unai kara badadia be dahaka?

KARA BADANA GINIGUNANA

3. Tau bona ena adavana be edena bamona lalokau toi idia habadaia be namo?

³ Kara badana ginigunana be lalokau. Baibel ese lalokau ena toana idauidau ia herevalaia. Idia ta be ta ena hemami namona ma ta dekenai, turana namodia huanai ia vara lalokauna. (Ioane 11:3) Ma ta be ruma bese taudia huanai ia vara lalokauna. (Roma 12:10) Ihatoina be tau bona hahine idia ura heheni neganai, ia vara lalokauna. (Aonega Herevadia 5:15-20) Momokani, tau bona ena adavana ese unai ibounai idia habadaia be namo. To lalokau ihahanina ia noho danu, ena anina ese unai haida ia hereaia.

4. Lalokau ihahanina be dahaka?

⁴ Keristani Greek Revarevadia idia torea gadona ai, unai lalokau ihahanina idia herevalaia neganai idia gaukaralaia herevana be a·gaʹpe. Unai hereva be 1 Ioane 4:8 ai idia gaukaralaia, ia gwau: “Dirava be lalokau.” Momokani, ‘ita be mai iseda lalokau badina Dirava ese ita ia lalokau henia guna.’ (1 Ioane 4:19) Keristani tauna ese Iehova Dirava dekenai bena taunimanima dekenai unai bamona lalokau ia habadaia. (Mareko 12:29-31) Unai hereva a·gaʹpe be Efeso 5:2 dekenai idia gaukaralaia danu, ia gwau: “Lalokau ena dala dekenai do umui mauri noho, Keriso ese ita ia lalokau henia bamona, bona ia sibona ena mauri ia atoa diho ita dainai.” Iesu ia gwau haida ese unai bamona lalokau idia hahedinaraia dainai, taunimanima do idia diba idia be Iesu murinai idia raka taudia. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau [a·gaʹpe] henia dainai.” (Ioane 13:35) Korinto Ginigunana 13:13 (NW) dekenai a·gaʹpe idia gaukaralaia dalana mani oi itaia danu, ia gwau: “To vadaeni, abidadama, helaro, bona lalokau idia do noho, idia toi; to idia amo hereadaena be lalokau [a·gaʹpe].”

5, 6. (a) Dahaka dainai lalokau ese abidadama bona helaro ia hereaia? (b) Dahaka badina haida dainai lalokau ese headava do ia hagoadaia diba?

⁵ Dahaka dainai a·gaʹpe lalokauna ese abidadama bona helaro ia hereaia? Dirava ena Hereva lalonai idia noho hakaua herevadia—hakaua herevadia maorodia—ese unai lalokau idia biagua dainai. (Salamo 119:105) Ena anina be ta ese sibona ena ura ia dadaraia bona taunimanima ma haida dekenai Dirava ena vairanai idia maoro bona namo karadia ia hahedinaraia, herevana idia ese ena kara namo idia laloa bada eiava lasi. Unai bamona lalokau dainai headava tatau bona hahine idia hegeregere inai Baibel sisiba idia badinaia, ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.” (Kolose 3:13) Idia lalokau heheni tauna bona hahinena be ‘idia lalokau [a·gaʹpe] heheni mai edia lalona ibounai ida, badina be lalokau ese kara dika momo ia koua.’ (1 Petero 4:8, NW) Mani oi itaia lalokau ese kara dika ia koua. Ia kokidia lasi, badina goevadae lasi taudia ibounai be kerere idia karaia.—Salamo 130:3, 4; Iamesi 3:2.

⁶ Tau bona hahine ruaosi ese unai bamona lalokau Dirava dekenai bona idia ta ta dekenai idia habadaia neganai, edia headava do ia goada bona moale do ia noho, badina “lalokau be do ia noho hanaihanai doko lasi.” (1 Korinto 13:8) Lalokau be “hatamonaia gauna hereadaena.” (Kolose 3:14, NW) Bema oi headava, oi bona emu adavana ese unai bamona lalokau be edena bamona umui habadaia diba? Dirava ena Hereva umui duahia hebou, bona umui herevalaia. Iesu ena lalokau karana umui laloa namonamo bona umui tohotohoa, ena anina be ia bamona do umui laloa bona umui kara. Danu, Keristani heboudia umui lao henia, unuseniai Dirava ena Hereva idia hadibaia. Bona Dirava ena heduru umui noia unai bamona lalokau hereadaena umui hahedinaraia diba totona, ia be Dirava ena lauma helaga ena huahua ta.—Aonega Herevadia 3:5, 6; Ioane 17:3; Galatia 5:22; Heberu 10:24, 25.

KARA BADANA IHARUANA

7. Hemataurai karana ena anina be dahaka, bona headava lalonai daika ese hemataurai karana ia hahedinaraia be namo?

⁷ Bema idia headava taudia be idia lalokau heheni momokani, do idia hemataurai heheni danu, bona hemataurai be kara iharuana headava lalonai moale havaraia totona. Hemataurai ena anina be “ma haida laloa bada bona hanamoa.” Dirava ena Hereva ese Keristani taudia ibounai, tatau bona edia hahine danu, ia sisiba henidia: “Umui ta ta dekenai danu do umui matauraia.” (Roma 12:10) Aposetolo Petero ia gwau: “Tatau e, umui danu, emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia.” (1 Petero 3:7) Baibel ese hahine ia sisiba henia “iena adavana do ia matauraia.” (Efeso 5:33) Bema oi ura ta oi matauraia, ia do oi kara namo henia, ena hemami bona ena lalohadai oi matauraia, bona ia noia gaudia maorodia ibounai oi ura oi henia.

8-10. Edena dala haida ai hemataurai ese headava do ia hagoadaia bona moale ia havaraia diba?

⁸ Headava lalonai moale idia ura idia davaria taudia ese edia adavadia idia matauraia dainai, ‘idia edia namo sibona idia tahua lasi to haida [edia adavadia] edia namo do idia tahua danu.’ (Filipi 2:4) Idia ese edia namo idia laloa sibona lasi—unai be mataganigani karana. To, idia ese edia adavadia edia namo idia laloa danu. Momokani, edia namo idia tahua guna.

⁹ Hemataurai dainai tau bona hahine idia abia dae edia lalohadai haida idia idau. Namo lasi ta ia laloa taunimanima rua be gau iboudiai dekenai do idia lalo-tamona. Reana tau ese ia laloa bada gauna be hahine ese ia laloa bada lasi, bona hahine ese ia ura henia gauna be tau ese ia ura henia lasi. To namona be ta ese ma ta ena lalohadai bona ia abia hidi gaudia ia matauraia, bema idia be Iehova ena taravatu bona hakaua herevadia hegeregerena. (1 Petero 2:16; mani Filemona 14 itaia.) Danu, ta ese ma ta ena hemami ia matauraia dainai, taunimanima vairanai eiava idia ruaosi sibona idia noho neganai, hahemaraia eiava hevasehalaia herevadia do ia gwauraia lasi.

¹⁰ Oibe, Dirava bona idia ta ta idia lalokau henia bona idia hemataurai heheni be kara badadia rua headava do ia namo totona. Headava maurina ena kahana badadia dekenai unai kara badadia rua be edena bamona idia hahedinaraia be namo?

KWARA DAGINA GAUKARALAIA KERISO IA KARAIA BAMONA

11. Baibel ena hereva hegeregerena headava lalonai kwara dagina ia abia tauna be daika?

¹¹ Baibel ia gwau Dirava ese tau ia havaraia neganai, kara haida ia henia ruma bese kwarana namona ai ia lao totona. Tau be ruma bese ena kwarana dainai, Iehova vairanai ia be mai ena maduna lauma bona tauanina dalanai ena hahine bona natudia ia naria. Namona be ia abia hidi gaudia be maoro bona Iehova ena ura hegeregerena, bona Dirava ena kara ia tohotohoa dainai haheitalai namona ia hahedinaraia. “Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona.” (Efeso 5:22, 23) To, Baibel ia gwau tau danu be mai ena kwarana, unai Tauna ena siahu henunai ia noho. Aposetolo Paulo ia gwau: “To lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Korinto 11:3) Aonega tauna ese ena kwarana, Keriso Iesu, ena kara ia tohotohoa bona unai amo kwara dagina gaukaralaia dalana ia dibaia.

12. Iesu ese kamonai karana bona kwara dagina gaukaralaia karana be edena bamona ia hahedinaraia?

¹² Iesu danu be mai ena kwarana, Iehova, bona Iehova ia kamonai henia. Iesu ia gwau: “Lau sibona egu ura lau karaia lasi, to Dirava ena ura sibona lau karaia.” (Ioane 5:30) Ia be haheitalai namo hereana! Iesu be “vara guna natuna.” (Kolose 1:15) Ia be Mesia ai ia lao. Ia be horoa Keristani taudia edia kongregesen ena Kwarana ai do ia lao bona Dirava ese ia abia hidi, ena Basileia ena King dagina do ia abia totona, aneru iboudiai do ia hereaia. (Filipi 2:9-11; Heberu 1:4) Ena be Iesu ena siahu be bada bona dagi bada do ia abia, to ia kara auka lasi, ena lalohadai ia dogoatao auka lasi, bona ma haida ia biagua auka lasi. Ia be biaguna tauna aukana lasi, ena hahediba taudia ia hamaoroa loulou lasi ia idia kamonai henia totona. Iesu be lalokau bona hebogahisi tauna, bona ia idia hahisia taudia dekenai unai kara ia hahedinaraia bada. Ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” (Mataio 11:28-30) Taunimanima ese ena hebamo idia moalelaia.

13, 14. Lalokau tauna ese kwara dagina be edena bamona ia gaukaralaia bona unai amo Iesu ia tohotohoa?

¹³ Ruma bese lalonai moale ia ura havaraia tauna ese Iesu ena kara namodia ia laloa be namo. Tau namona be ia kara auka biaguna tauna bamona lasi, ena hahine dagedage henia totona ena kwara dagina be dadabaia auna bamona ia gaukaralaia lasi. To, ia ese ena hahine ia lalokau henia bona ia matauraia. Bema Iesu be “manau tauna,” namona be tau ia manau danu, badina ia be Iesu bamona lasi bona kerere ia karaia danu. Ia kerere neganai, ia ura ena hahine ese ia hebogahisi henia. Unai dainai, manau tauna ese ena kerere do ia gwauraia, ena be reana inai hereva, “Lau sori; oi be maoro,” ia gwauraia be auka. Hahine ese ia manada bona ia manau tauna ia matauraia be auka lasi, to ia hekokoroku bona ena lalohadai ia dogoatao auka tauna ia matauraia be auka. Danu, ena tau ia matauraia hahine ese sibona ena kerere dainai sori herevana do ia gwauraia.

¹⁴ Dirava ese hahine ia havaraia neganai ia henia kara namodia be hahine ese do ia gaukaralaia diba, headava lalonai moale ia havaraia totona. Aonega tauna ese unai ia abia dae bona ena hahine ia koua toho lasi. Hahine momo be mai edia hebogahisi bada, bona ruma bese naria lalonai bona hetura karana taunimanima ida habadaia karana lalonai unai kara be mai anina bada. Nega momo, ruma be noho gabuna namona ai halaoa gaukarana be hahine ia diba momo. Aonega Herevadia karoa 31 ese ia herevalaia “hahine namona” be mai ena diba bada bona ena kara namodia be momo, bona ena ruma bese ese unai kara dainai namo ia davaria. Dahaka dainai? Ena tau ese mai ena kudouna ibounai ida unai hahine “ia abidadama henia noho” dainai.—Aonega Herevadia 31:10, 11.

15. Tau ese ena hahine dekenai Keriso ese ia hahedinaraia lalokau bona hemataurai karadia be edena bamona ia hahedinaraia diba?

¹⁵ Bese haida lalonai, tau ena dagi idia habadaia momokani, bona idia laloa ia dekenai idia henanadai henia danu be hemataurai lasi karana. Ena hahine be hesiai hahinena bamona ia kara henia diba. Unai bamona kwara dagina ia gaukaralaia kerere dainai, ena hetura karana ena hahine ida bona Dirava ida ia dika. (1 Ioane 4:20, 21 itaia.) To danu, tatau haida idia ura lasi edia ruma bese idia hakaua, bona edia hahine ese ruma bese idia biagua bona unai idia koua lasi. Keriso ia kamonai henia namonamo tauna ese dala kererena ai ena hahine ia kara henia lasi bona ena hemami ia hadikaia lasi. To ia ese Iesu ia hahedinaraia lalokauna, sibona ena ura dadaraia lalokauna, ia tohotohoa, bona Paulo ena sisiba ia badinaia, ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:25) Keriso Iesu ese ia murinai idia raka taudia ia lalokau henia bada bona idia dainai ia mase. Tau namona ese unai lalokau, sibona ena namo ia tahua lasi lalokauna, ia hahedinaraia toho, ena hahine ia biagua auka lasi, to ena namo do ia tahua. Tau be Keriso ia kamonai henia bona Keriso ena lalokau bona hemataurai karadia ia tohotohoa neganai, ena hahine ese do ia kamonai henia mai ena ura ida.—Efeso 5:28, 29, 33.

HAHINE ENA KAMONAI KARANA

16. Hahine ese ena tau ia kara henia lalonai, dahaka kara ia hahedinaraia be namo?

¹⁶ Iehova Dirava ese Adamu ia havaraia bena nega sisina murinai, “ma ia gwau, ‘Unai tau sibona ia noho be ia namo lasi, lau ese durua tauna ia bamona do lau karaia.’ ” (Genese 2:18) Dirava ese Heva ia havaraia ia be Adamu ena “bamona,” idia kara helulu totona lasi. Dirava ia ura lasi headava be sisima mai ena biaguna rua bamona. Ia ura tau ese ena kwara dagina be mai ena lalokau ida ia gaukaralaia, bona ia ura hahine ese ena tau ia lalokau henia, ia matauraia, bona ia kamonai henia mai ena ura ida.

17, 18. Hahine ese ena tau ia durua daladia haida be dahaka?

¹⁷ To, hahine namona ese ena tau ia kamonai henia sibona lasi. Ena tau ia durua toho, bona ena tau ese ia abia hidi daladia ia badinaia. Momokani, bema ena tau ese ia abia hidi daladia ia abia dae, do ia badinaia be auka lasi. To ena be ena tau ese ia abia hidi gauna ia ura henia momokani lasi, to reana hahine ena heduru dainai namo do idia havaraia hebou.

¹⁸ Hahine ese ma dala haida amo ena tau ia durua diba ruma bese kwarana namona ai ia lao totona. Ena tau ia hanamoa diba, badina ia be ruma bese hakaua totona ia hekwarahi, namo lasi ia maumauraia bona ena kara dainai tau do ia laloa adavana ena ura ia hagugurua diba lasi. Dala namona ai ena tau ia kara henia lalonai, namona be ia laloatao “laloa manau, bona dagedage lasi . . . be namo bada herea Dirava ena vairanai,” ena tau ena vairanai sibona lasi. (1 Petero 3:3, 4; Kolose 3:12) To edena bamona bema ena tau be abidadama lasi tauna? Herevana ia be abidadama tauna eiava lasi, to Baibel ese hahine ia hagoadadia “edia adavana bona natuna do idia lalokau henia. Bona do idia laloa maoromaoro, do idia noho namonamo, mai laloa goevagoeva danu, bona edia ruma lalonai do idia gaukara. Bogahisihisi karadia do idia karaia, bona edia adavana edia hereva do idia kamonai henia. Unai dekena amo, tau ta ese Dirava ena Sivarai Namona do ia hadikaia diba lasi.” (Tito 2:4, 5) Hahine ena lalona ena mamina idia hadikaia diba gaudia idia vara neganai, abidadama lasi tauna ese ena hahine ena lalohadai do ia matauraia diba, bema hahine ese “mai mataurai bona manau” ida ena lalohadai ia hahedinaraia. Abidadama lasi tatau haida ese ‘edia lalona idia giroa, bona Dirava idia abidadama henia, badina edia adavana edia kara goevagoeva bona edia hemataurai karana idia itaia.’—1 Petero 3:1, 2, 15; 1 Korinto 7:13-16.

19. Edena bamona bema tau ese ena hahine ia noia Dirava ena taravatu do ia utua?

¹⁹ To bema tau ese ena hahine ia noia Dirava ese ia taravatua karana ta do ia karaia be edena bamona? Bema unai bamona ia vara, namona be hahine ia laloatao Dirava be ena Lohia badana. Siahu taudia ese Dirava ena taravatu utua totona aposetolo taudia idia oda henia neganai idia gwauraia herevana be hahine ese do ia badinaia. Kara 5:29 ia gwau: “Petero bona aposetolo taudia danu idia haere, idia gwau, ‘Dirava ai kamonai henia be namo, taunimanima ai kamonai henia be dika.’ ”

HEREVAHEREVA NAMONAMO

20. Headava lalonai, edena kahana dekenai lalokau bona hemataurai be mai anina bada?

²⁰ Headava ena kahana ma ta—herevahereva—dekenai, lalokau bona hemataurai edia anina be bada danu. Lalokau tauna ese ena hahine ena gaukara, ena hekwakwanai, bona ena lalohadai gau idauidau dekenai be ia ida ia herevalaia. Unai be gau badana hahine dekenai. Nega ia atoa ena hahine ida do ia herevahereva bona ena hereva do ia kamonai namonamo tauna ese ia hahedinaraia ena hahine ia lalokau henia bona ia matauraia. (Iamesi 1:19) Madi, hahine haida idia maumau, idia gwau edia tatau be nega haida sibona idia ida idia herevahereva. Momokani, hari inai negai ita bisi bada dainai, reana tatau be hora momo lalonai idia gaukara, bona moni ena hekwarahi dainai, reana hahine haida danu ese moni gaukara idia karaia. To namona be tau bona hahine ese nega idia atoa, idia ruaosi idia hebamo totona. Bema unai bamona idia karaia lasi, idia ta be sibona ena ura do ia badinaia. Hekwakwanai badadia idia vara diba bema idia laloa hebogahisi idia hahedinaraia turadia be headava murimurinai idia tahua be namo.

21. Hereva maorodia ese edena dala ai idia durua headava ia moale totona?

²¹ Tatau bona edia hahine idia herevahereva dalana be mai ena anina bada. “Hereva namodia mai bogahisihisi danu, . . . be namo, lauma dekenai, bona tauanina dekenai danu.” (Aonega Herevadia 16:24) Herevana ta ena adavana be abidadama tauna eiava lasi, Baibel ena sisiba be mai ena namo, ia gwau: “Nega ibounai mai laloa namona bona mai gado namo do umui hereva,” anina be dala namona ai idia herevahereva. (Kolose 4:6) Ta be dina lalonai hekwakwanai momo ia davaria murinai, adavana ese ia gwauraia hebogahisi hereva namodia haida ese hemami namo idia havaraia diba. “Hereva maorona gwauraia namonamo karana, be golo herahera siliva bosea latanai bamona.” (Aonega Herevadia 25:11) Gado ena regena bona oi abia hidi herevadia be mai anina bada. Hegeregere, ta be mai badu ida ia boiboi diba: “Iduara oi koua!” To bema mai manau bona hebogahisi ida ia gwau, “Mani emu kara, iduara oi koua,” unai be “mai laloa namona” herevana.

22. Tau bona hahine ese edena kara idia hahedinaraia be namo, idia herevahereva namonamo totona?

²² Do umui herevahereva namonamo bema umui hereva mai manau ida, bona bema lalo-namo toana, hebogahisi, lalo-parara, bona lalokau umui hahedinaraia. Bema tau bona ena hahine idia gaukara goada idia herevahereva namonamo totona, edia ura gaudia do idia hahedinaraia diba mai gari lasi ida, bena lalohisihisi bona hekwakwanai idia davaria neganai, idia ta ta do idia hagoadaia bona durua. Dirava ena Hereva ese ita ia hagoadaia ‘lalo-metau taudia ita gado namo henia bona ita hagoadaia.’ (1 Tesalonika 5:14, NW) Nega haida tau ia lalo-metau bona nega haida hahine ia lalo-metau. Idia “gado namo” heheni diba, bona unai amo ta ta do idia hagoadaia.—Roma 15:2.

23, 24. Idia lalo-tamona lasi neganai, edena dala ai lalokau bona hemataurai ese idia durudia diba? Haheitalai oi gwauraia.

²³ Bema tau bona ena hahine ese lalokau bona hemataurai idia hahedinaraia, do idia laloa lasi lalo-tamona ia vara lasi negadia ibounai be hekwarahi bada idia havaraia. Idia gaukara goada idia “dagedage” lasi totona. (Kolose 3:19) Namona be idia ruaosi idia laloatao “mai manau danu ia haere tauna, ese badu ia koua noho.” (Aonega Herevadia 15:1) Oi naria namonamo, mai ena kudouna ibounai ida ena hemami ia hahedinaraia adavana oi laloa maragi eiava oi gwauraia dika garina. To, namona be oi laloa unai bamona hereva ese dala ia kehoa ena lalohadai momokanina oi lalo-pararalaia totona. Namona be umui gaukara hebou, emui lalohisihisi umui hamaoromaoroa bona maino umui karaia totona.

²⁴ Sara ena sivarai mani umui laloa. Nega ta ia ese ena adavana, Aberahamo, dekenai hekwakwanai hanaia dalana ta ia hahedinaraia, to Aberahamo ese unai dala ia ura henia lasi. To, Dirava be Aberahamo dekenai ia gwau: “Sara ena ura do oi karaia.” (Genese 21:9-12) Aberahamo be unai ia karaia, bona hahenamo ia abia. Unai hegeregerena, ena be hahine ese ia gwauraia gauna be tau ena ura hegeregerena lasi, to namona be tau ia kamonai. Danu, namo lasi hahine ese edia herevahereva ia biagua, to namona be ena tau ese ia gwauraia herevana ia kamonai. (Aonega Herevadia 25:24) Bema tau eiava hahine be sibona ena ura gaudia ia tahua hanaihanai, ia ese lalokau bona hemataurai ia hahedinaraia lasi.

25. Edena dala ai herevahereva namonamo karana ese idia ia durua diba headava lalonai mahuta hebou karana amo moale idia davaria totona?

²⁵ Tau bona hahine ese edia mahuta hebou karana idia herevalaia namonamo danu be gau badana. Sibona edia ura idia tahua bona idia boga auka lasi karana ese headava lalonai tau bona ena hahine ia hatamonaia momokani karana ia hadikaia diba. Idia herevahereva namonamo bona idia haheauka be gau badana. Bema ta ese ma ta ena namo ia tahua, mahuta hebou karana ese hekwakwanai badana ia havaraia lasi. Unai bona kara ma haida lalonai, namona be ta ese ‘sibona ena namo do ia tahua lasi, to ma ta ena namo ia tahua.’—1 Korinto 7:3-5; 10:24.

26. Ena be headava ibounai lalonai gau namodia bona gau dikadia idia vara, to Dirava ena Hereva kamonai henia karana ese tatau bona edia hahine be edena bamona ia durua moale idia davaria totona?

²⁶ Dirava ena Hereva ia henia sisiba be namo herea! Momokani, headava ibounai lalonai gau namodia bona gau dikadia idia vara. To, bema tau bona hahine ese Iehova ena lalohadai, Baibel lalonai ia hedinarai gaudia, idia badinaia bona lalokau hereadaena bona hemataurai latanai edia hetura karana idia haginia, edia headava be do ia goada bona ia lalonai moale do idia davaria. Unai dala ai idia ese idia ta ta idia hanamoa sibona lasi, to headava ia Havaraia Tauna, Iehova Dirava, do idia hanamoa danu.