Kahana 13

Tomadiho Momokanina be Edena Bamona Oi Davaria Diba?

Dirava be tomadiho ibounai ia moale henia, eiava tamona sibona? (1)

Dahaka dainai sibodia idia gwauraia Keristani tomadiho be momo? (2)

Keristani taudia momokanidia edia toana be edena bamona oi diba? (3-7)

1. Iesu ese Keristani tomadiho momokanina tamona ia hamatamaia. Unai dainai hari Iehova Dirava tomadiho henia taudia momokanidia edia orea tamona sibona ia noho. (Ioane 4:​23, 24; Efeso 4:​4, 5) Baibel ese ita ia hadibaia taunimanima haida sibona be mauri ena dala maragina dekenai idia raka noho.​—⁠Mataio 7:​13, 14.

2. Baibel ia peroveta, ia gwau aposetolo taudia do idia mase murinai, metairametaira Keristani kongregesen lalonai hahediba kereredia bona Keristani lasi karadia do idia vareai. Tatau ese kamonai taudia edia lalona do idia ania, idia edia murinai idia raka totona to Keriso ena murinai lasi. (Mataio 7:​15, 21-23; Kara 20:​29, 30) Unai dainai sibodia idia gwauraia Keristani tomadiho momo idia noho. Keristani taudia momokanidia edia toana be edena bamona ita diba?

3. Keristani taudia momokanidia edia toana badana be mai momokani ida idia lalokau heheni. (Ioane 13:​34, 35) Idia hadibadia lasi idia ese bese ma haida eiava kopina idauna taudia idia hereaia. Bona idia hadibadia lasi tano ma haida taudia do idia inai henia. (Kara 10:​34, 35) Unai dainai tuari lalodiai idia vareai lasi. Keristani taudia momokanidia be tadikaka bona taihu hegeregerena idia kara heheni.​—⁠1 Ioane 4:​20, 21.

4. Tomadiho momokani ena toana ma ta be ena orea taudia ese Baibel idia laloa bada. Idia abia dae ia be Dirava ena Hereva bona ia gwauraia gaudia idia abia dae. (Ioane 17:17; 2 Timoteo 3:​16, 17) Idia dekenai Dirava ena Hereva be mai anina bada to taunimanima edia lalohadai eiava kastom edia anina be maragi. (Mataio 15:​1-3, 7-9) Edia mauri dinadia ibounai lalonai Baibel ena hereva idia badinaia toho. Unai dainai, idia karaia karadia be idia harorolaia herevadia amo idia idau lasi.​—⁠Tito 1:​15, 16.

5. Tomadiho momokanina ese Dirava ena ladana ia matauraia danu. (Mataio 6:⁠9) Iesu ese Dirava ena ladana, Iehova, ia gwauraia hedinarai ma haida dekenai. Namona be Keristani taudia momokanidia be unai bamona idia karaia. (Ioane 17:​6, 26; Roma 10:​13, 14) Emu noho gabuna dekenai daidia be Dirava ena ladana idia gwauraia hedinarai ma haida dekenai?

6. Namona be Keristani taudia momokanidia ese Dirava ena Basileia idia harorolaia. Iesu be unai ia karaia. Hanaihanai Basileia ia herevalaia. (Luka 8:⁠1) Iena hadibaia taudia ia hagania unai hereva tamona be tanobada ibounai dekenai do idia harorolaia. (Mataio 24:14; 28:​19, 20) Keristani taudia momokanidia idia abia dae, Dirava ena Basileia sibona ese inai tanobada ai maino bona noho namona korikori do ia havaraia.​—⁠Salamo 146:​3-5.

7. Namona be Iesu ena hadibaia taudia be inai tanobada dikana ena lasi. (Ioane 17:16) Inai tanobada ena politikol karadia bona taunimanima edia hepapahuahu lalonai idia vareai lasi. Dika idia havaraia diba karadia bona lalohadaidia, inai tanobada ai idia hedinarai badabada gaudia unai, idia dadaraia. (Iamesi 1:27; 4:⁠4) Oiemu noho gabuna dekenai tomadiho orea ta, unai Keristani mauri dalana ena toana ia hahedinaraia oreana ta, oi gwauraia hedinarai diba, a?

[Pictures on page 26, 27]

Keristani taudia momokanidia be idia lalokau heheni, Baibel idia laloa bada, bona Dirava ena Basileia idia harorolaia