Mase Neganai Dahaka ia Vara?

Mase be mauri amo ia idau. Mase be mahuta bamona. (Ioane 11:​11-​14) Mase taudia be gau ta idia kamonai, itaia, herevalaia, eiava laloa diba lasi. (Hadibaia Tauna 9:​5, 10) Tomadiho koikoi idia gwau mase taudia be lauma gabuna ta dekenai idia lao, unuseni edia sene taudia danu idia noho totona. Unai be Baibel ena hahediba herevana lasi.

Idia mase taudia ese ita idia durua diba lasi, bona ita idia hadikaia diba lasi. Taunimanima momo ese sene karadia bona boubou gaudia idia karaia, badina idia laloa unai karadia ese mase taudia idia hamoalea. Unai ese Dirava ia hamoalea lasi, badina unai kara be Satani ena koikoi herevana badinaia karana ta. Mase taudia ia hamoalea lasi danu, badina idia mauri lasi. Mase taudia ita gari henia bona ita tomadiho henia lasi be namo. Dirava sibona ita tomadiho henia be namo.​​—Mataio 4:​10.

Mase taudia do idia mauri lou. Iehova ese mase taudia be paradaiso tanobadana ai do ia hatoredia isi. Unai be vaira negana ai do ia vara. (Ioane 5:​28, 29; Kara 24:15) Dirava ese idia mase taudia ia hatoreaisi lou diba, oi ese mahuta amo ta oi hanogaia diba bamona.​​—Mareko 5:​22, 23, 41, 42.

Ita mase lasi lalohadaina be Satani Diabolo ese ia halasia koikoi herevana ta. Satani bona ena demoni ese taunimanima idia koia dainai idia laloa mase taudia edia lauma idia do mauri noho bona idia ese gorere bona ma hekwakwanai haida idia havaraia. Satani ese taunimanima ia koidia, nega haida nihi eiava matahanai amo unai ia karaia. Iehova ese mase taudia idia hereva henia taudia ia gwauraia dika.​​—Deuteronomi 18:​10-​12.