Karoa 19
Dirava Ena Hereva Harorolaia Noho mai Gari Lasi Ida
1. (a) Iesu ena hahediba taudia ese dahaka sivarai namona idia harorolaia, to Iuda taudia haida be edena bamona idia kara? (b) Edena henanadai haida ita laloa be namo?
KAHIRAKAHIRA lagani 2,000 gunanai, Dirava ese ena Natuna Iesu Keriso ia horoa, vaira negana ai tanobada ibounai ena king ai do ia lao. Tomadiho gunalaia taudia edia hereva dainai Iesu idia hamasea, to Iehova ese ia hatoreaisi lou. Iesu amo, taunimanima ese mauri hanaihanai idia abia diba. To, Iesu ena hahediba taudia ese sivarai namona idia harorolaia neganai, dagedage idia davaria. Idia haida be dibura ruma dekenai idia atoa, idia dadabadia, bona idia haganidia Iesu ena ladana dekenai do idia haroro lasi. (Kara 4:1-3, 17; 5:17, 18, 40) Dahaka do idia karaia? Bema unai negai oi noho, dahaka do oi karaia? Mai gari lasi ida do oi haroro noho, a?
2. (a) Dahaka sivarai namona be iseda nega lalonai ita harorolaia be gau badana? (b) Sivarai namona harorolaia ena maduna be daika ena?
2 Lagani 1914 ai, Dirava ena Basileia ena King, Iesu Keriso, be guba ena terona latanai ia helai bona ena ‘inai taudia bogaragidiai ia lohia’ matamaia. (Salamo 110:2, NW ) Unai murinai, Satani bona ena demoni be tanobada dekenai ia negedia diho. (Apokalupo 12:1-5, 7-12) Inai tanobada dikana ena nega dokona ia matamaia unai. Inai nega ia ore neganai, Dirava ese Satani ena tanobada ibounai do ia haorea momokani. (Daniela 2:44; Mataio 24:21) Idia roho mauri taudia be paradaiso ai do ia lao tanobadana dekenai mauri hanaihanai do idia abia. Bema unai sivarai namona oi abia dae vadaeni, do oi ura ma haida dekenai oi gwauraia. (Mataio 24:14) To, taunimanima ese unai sivarai do idia kamonai, eiava?
3. (a) Basileia ena sivarai ita harorolaia neganai, taunimanima be edena bamona idia kara? (b) Dahaka henanadai ita laloa be namo?
3 Basileia sivarai namona oi harorolaia neganai, taunimanima haida do idia kamonai, to momo do idia ura lasi. (Mataio 24:37-39) Haida ese oi do idia kirikirilaia eiava dagedage henia. Iesu ia gwau, reana oiemu varavara taudia ese oi do idia dagedage henia. (Luka 21:16-19) Emu gaukara gabuna o sikuli gabuna dekenai danu do ia vara. Tanobada ena gabu haida dekenai, gavamani ese Iehova ena Witnes taudia edia gaukara idia taravatua. Unai bamona hahetoho oi davaria neganai, mai gari lasi ida Dirava ena Hereva do oi harorolaia noho bona ‘abidadama dekenai do oi gini goada,’ a?—1 Korinto 16:13.
Sibona Iseda Goada Dekenai Ita Tabekau Lasi
4. (a) Mai kamonai ida Iehova ita hesiai henia noho totona, dahaka ita karaia be gau badana? (b) Dahaka dainai Keristani hebou be mai anina bada?
4 Mai kamonai ida Iehova ita hesiai henia noho totona, gau badana be Iehova ese ia henia gau namodia dekenai ita tabekau. Idia ta be kongregesen ena hebou idauidau. Baibel ese ita ia hagoadaia, hebou lao henidia karana ita rakatania lasi. (Heberu 10:23-25) Witnes taudia haida be mai kamonai ida Iehova idia do hesiai henia noho, badina hanaihanai edia tadikaka ida hebou karana idia goadalaia dainai. Unai hebou ai iseda diba Baibel dekenai ita habadaia. Danu, ita dibaia vadaeni hereva momokanidia dekenai iseda diba ia bada ia lao, bona iseda lalo-parara unai hereva gaukaralaia daladia dekenai ita habadaia. Iseda Keristani tadikaka kahirakahira ita lao bona mai eda lalo-tamona ida ita tomadiho hebou, bona goada ita abia Dirava ena ura ita karaia totona. Iehova ena lauma ese kongregesen amo ita ia hakaua, bona unai lauma amo Iesu be ita huanai ia noho.—Mataio 18:20; Apokalupo 3:6.
5. Iehova ena Witnes taudia be taravatu henunai idia noho neganai, hebou be edena bamona idia karaia?
5 Hebou ibounai dekenai oi lao hanaihanai, bona unuseniai idia herevalaia gaudia be oiemu mauri lalonai oi badinaia, a? Nega haida, Iehova ena Witnes taudia edia gaukara idia taravatua neganai, tadikaka be ruma ta ai grup maragidia dekenai hebou idia karaia. Reana hebou be gabu idauidau bona nega idauidau ai idia karaia dainai, nega momo unai hebou dekenai idia lao be auka, hebou haida be hanuaboi momokani ai idia karaia. To, ena be ia auka bona dika idia davaria diba, tadikaka bona taihu idia hekwarahi unai hebou iboudiai dekenai idia lao totona.
6. Edena dala ai ita hahedinaraia Iehova ita tabekau henia, bona unai ese edena bamona ita ia durua mai gari lasi ida ita haroro noho totona?
6 Mai kudouna ibounai ida Iehova guriguri henia karana amo Ia ita tabekau henia karana ita habadaia, ita abia dae ena heduru ita abia be gau badana. Unai bamona oi karaia, a? Iesu be tanobada ai ena hesiai gaukara ia karaia neganai, ia guriguri loulou. (Luka 3:21; 6:12, 13; 22:39-44) Idia ese Iesu idia do hamasea lasi ena hanuaboi ginigabena ai, iena hahediba taudia ia hamaorodia, ia gwau: “Umui naria, umui guriguri, dika ese umui ia abia garina.” (Mareko 14:38) Bema ita haroro henidia taudia ese Basileia sivaraina idia ura henia lasi, reana unai ese ita ia tohoa bena haroro gaukara do ita goadalaia lasi. Bema taunimanima ese ita idia kirikirilaia eiava ita idia dagedage henia, reana ita laloa unai hekwakwanai dadaraia totona ita haroro lasi be namo. To bema Dirava ita guriguri henia goadagoada, iena lauma amo ita do ia durua mai gari lasi ida ita haroro totona, ita do ia naria bena hedibagani lalonai do ita moru lasi.—Luka 11:13; Efeso 6:18-20.
Mai Gari Lasi ida Idia Haroro Taudia Edia Sivarai
7. (a) Dahaka dainai Kara bukana lalonai ia noho sivaraina be mai anina bada ita dekenai? (b) Inai paragraf henunai idia noho henanadai oi haerelaia, oi hahedinaraia edena bamona unai hereva amo namo ita abia diba.
7 Kara bukana lalonai ia noho sivaraina be mai anina bada ita ibounai dekenai. Aposetolo bona hahediba taudia ginigunadia ma haida edia sivarai ia gwauraia—edia hemami be ita bamona—edena dala ai koua gaudia idauidau idia hanaia bona Iehova ena gari lasi kamonai witnes taudia ai idia lao. Namona be henunai idia noho henanadai bona idia gwauraia siridia amo unai sivarai ena kahana ta mani ita tahua. Unai bamona ita karaia neganai, mani unai sivarai ese oi ia durua diba dalana oi laloa namonamo.
Aposetolo taudia be sikuli bada taudia, a? Herevana idia dekenai dahaka ia vara, to edia kara korikori be idia be gari lasi taudia, a? (Ioane 18:17, 25-27; 20:19; Kara 4:13)
Dahaka ese Petero ia durua Iuda taudia edia kota, Dirava ena Natuna ia hahemaoro henia kotana unai, ena vairanai mai gari lasi ida ia hereva totona? (Mataio 10:19, 20; Kara 4:8)
Aposetolo taudia be kota dekenai idia do hakaudia lao lasi neganai, dahaka idia karaia noho? (Kara 1:14; 2:1, 42)
Lohia taudia ese aposetolo taudia idia oda henidia Iesu ena ladana dekenai do idia haroro lasi neganai, Petero bona Ioane be edena bamona idia haere? (Kara 4:19, 20)
Aposetolo taudia be dibura amo idia ruhadia murinai, daika dekenai heduru idia tahua lou? Unai dagedage ia ore totona idia guriguri, eiava dahaka totona idia guriguri? (Kara 4:24-31)
Edia inai taudia ese edia haroro gaukara idia koua gwauraia neganai, Iehova ese edena bamona idia ia durudia? (Kara 5:17-20)
Aposetolo taudia be edena dala amo idia hahedinaraia, Dirava ese idia ia hamauria ena badina idia lalo-pararalaia? (Kara 5:21, 41, 42)
Dagedage bada herea dainai hahediba taudia be gabu idauidau dekenai idia heau lao, to dahaka idia karaia noho? (Kara 8:3, 4; 11:19-21)
8. Hahediba taudia ginigunadia edia haroro gaukara amo dahaka anina namodia idia vara, bona edena dala ai ita danu be unai gaukara ita karaia?
8 Edia hekwarahi sivarai namona harorolaia totona, be hekwarahi kava lasi. Pentekoste 33 C.E. ai, hahediba taudia 3,000 bamona be bapatiso idia abia. “Lohiabada idia abidadama henia taudia momo herea, tatau bona hahine idia dekenai idia haboua lao.” (Kara 2:41; 4:4; 5:14) Gabeai, Dirava ena taunimanima ia dagedage henia bada Taso tauna Saulo, be Keristani tauna ai ia lao bona mai gari lasi ida hereva momokani ia harorolaia matamaia. Gabeai ia idia gwauraia aposetolo Paulo. (Galatia 1:22-24) Aposetolo edia negai idia hamatamaia gaukarana be ia doko lasi. Unai gaukara be inai dina gabedia lalonai ia bada ia lao bona tanobada ibounai lalonai idia karaia noho. Ita danu be unai gaukara ita karaia ena hahenamo ita abia, bona ita karaia noho lalonai, mai kamonai ida idia noho witnes taudia ginigunadia edia haheitalai amo gau momo ita dibaia diba.
9. (a) Paulo be edena dala idauidau ia gaukaralaia taunimanima ia haroro henidia totona? (b) Edena dala idauidau oi gaukaralaia, ma haida dekenai Basileia ena sivarai oi gwauraia totona?
9 Paulo be Iesu Keriso ena sivarai momokani ia dibaia neganai dahaka ia karaia? “Vadaeni nega tamona, ia ese Iesu ia harorolaia, ia gwau Iesu be Dirava ena Natuna.” (Kara 9:20) Dirava ena hariharibada ia dekenai ia laloa bada, bona ia lalo-parara ia kamonaia sivarai namona be taunimanima ibounai ese idia kamonaia danu be gau badana. Paulo be Iuda tauna, bona unai negai Iuda taudia edia kara be dubu dekenai idia hebou, unai dainai Paulo be dubu dekenai ia lao, ia haroro henidia totona. Danu, ia be ruma ta ruma ta dekenai ia haroro, bona maketi gabudia dekenai ia davaria taudia ia hereva henidia. Bona mai ena ura ida gabu matamatadia dekenai ia lao, sivarai namona ia harorolaia totona.—Kara 17:17; 20:20; Roma 15:23, 24.
10. (a) Edena dala ai Paulo ia hahedinaraia ia gari lasi, bona mai aonega ida ia haroro? (b) Iseda varavara, gaukara turadia bona sikuli turadia ita haroro henidia neganai, edena dala ai Paulo ena kara ita tohotohoa diba?
10 Paulo ia gari lasi, bona danu aonega dalanai taunimanima ia kara henidia, ita danu be unai bamona ita karaia be namo. Iuda taudia edia lalona ia veria totona, Dirava ese edia sene taudia dekenai ia karaia gwauhamata ia herevalaia. Greek taudia dekenai ia ese idia diba vadaeni gaudia ia herevalaia. Nega haida, ia ese hereva momokani ia davaria dalana ena sivarai ia gaukaralaia ma haida ia haroro henia totona. Ia gwau: “Sivarai Namona dainai, inai kara ibounai lau karaia noho. Bona lau diba, bema inai gaukara lau karaia noho, lau danu ese Sivarai Namona ena mauri hanamoa gaudia do lau abia.”—1 Korinto 9:20-23; Kara 22:3-21.
11. (a) Paulo be dahaka ia karaia ia idia dagedage henia taudia ida ia hepapahuahu loulou lasi totona? (b) Edena negai Paulo ena haheitalai ita tohotohoa diba, bona edena dala ai? (c) Mai gari lasi ida ita haroro noho totona, goada be edeseni amo ita abia?
11 Dagedage dainai Paulo ia laloa bema nega sisina gabu ma ta dekenai ia haroro be namo neganai, unai bamona ia karaia, unai amo ia idia inai henia taudia danu ia hepapahuahu loulou lasi. (Kara 14:5-7; 18:5-7; Roma 12:18) To sivarai namona dainai ia hemarai lasi. (Roma 1:16) Ena be Paulo ia davaria ia idia inai henia taudia edia kara be hemataurai lasi—idia botaia danu—to ‘Dirava ese ia hagoadaia, vadaeni Sivarai Namona ia gwauraia, mai gari lasi danu.’ Ia gwau: “To Lohiabada ese lau ia durua, bona lau ia hagoadaia, vadaeni Sivarai Namona ibounai lau gwauraia.” (1 Tesalonika 2:2; 2 Timoteo 4:17) Keristani kongregesen ena Kwarana, Iesu, ese ita dekenai siahu ia henia noho, iseda nega totona ia perovetalaia gaukarana ita karaia totona.—Mareko 13:10.
12. Keristani taudia be edena dala ai gari lasi karana idia hahedinaraia, bona unai kara ena badina be dahaka?
12 Mai gari lasi ida Dirava ena Hereva ita harorolaia noho ena badina be momo, Iesu bona aposetolo edia negai idia noho Dirava ena kamonai hesiai taudia ma haida ese idia karaia bamona. To ita gwau lasi unai anina be taunimanima ita kara auka henidia eiava ita doridia sivarai namona idia kamonai totona. Lasi, to taunimanima idia kamonai lasi neganai, ita hesiku lasi; bona dagedage karadia dainai iseda haroro ita hadokoa lasi. Iesu hegeregerena, ita hahedinaraia Dirava ena Basileia be gavamani maorona tanobada ibounai ia lohiaia totona. Mai gari lasi ida ita hereva badina ita be Iehova, Guba bona Tanobada edia Lohia Badana ena hesiai taudia, bona ita harorolaia sivaraina be iseda lasi, to Iehova amo ia mai. Bona namona be Iehova ita hanamoa ena badina badana be Ia ita lalokau henia.—Filipi 1:27, 28; 1 Tesalonika 2:13.
Riviu Henanadai
• Dahaka dainai taunimanima ibounai dekenai Basileia ena sivarai ita harorolaia be mai anina bada, to haida be edena bamona do idia kara?
• Iehova ita hesiai henia neganai, edena bamona ita hahedinaraia ita be sibona eda goada dekenai ita tabekau lasi?
• Kara bukana amo dahaka mai anina bada gaudia ita dibaia?
[Pictures on page 173]
Idaunegai bamona, hari Iehova ena hesiai taudia be mai edia gari lasi ida Dirava ena hereva idia harorolaia