Karoa 20
Iehova Ena Dina Oi Laloa Noho
1. Inai tanobada dikana ena lalohisihisi gaudia do idia ore be nega ginigunana oi dibaia neganai, emu mamina be edena bamona?
BAIBEL oi stadilaia matamaia neganai oi dibaia gauna ginigunana be, Iehova ena ura be tanobada ibounai be Paradaiso ai do ia lao. Unai tanobada matamatana dekenai tuari, kara dika, ogogami, gorere, hisihisi bona mase do idia ore. Mase taudia danu be do idia mauri lou. Helaro namo hereana unai! Gau momo ese idia hamomokania Keriso be lagani 1914 ai ia lohia matamaia, bona unai lagani amo ema bona hari ita be inai tanobada dikana ena dina gabediai ita noho, bona tanobada matamata be ia kahirakahira momokani. Inai nega dokona ena dina gabedia lalonai, Iehova ese inai tanobada dikana do ia hadikaia ore bona ia gwauhamatalaia tanobada matamatana do ia havaraia!
2. ‘Iehova ena dina’ be dahaka?
2 Baibel ese unai hadikaia ore negana ia gwauraia ‘Iehova ena dina.’ (2 Petero 3:10) Unai dina be ‘Iehova ena badu dinana’ Satani ena tanobada ibounai dekenai. (Sepanaia 2:3) Iehova ena badu do ia bada ia lao ela bona “Siahu Ibounai Diravana ena Dina Badana . . . , Heberu gado dekenai be Aramagedono,” unai tuari lalonai Dirava ese inai “tanobada edia king ibounai” do ia hadikaia ore. (Apokalupo 16:14, 16) Emu mauri dalana amo oi hahedinaraia, oi abia dae momokani ‘Iehova ena dina’ be kahirakahira, a?—Sepanaia 1:14-18; Ieremia 25:33.
3. (a) Iehova ena dina be edena negai do ia mai? (b) Iehova ese “unai dina bona dina gauna” ia hahedinaraia lasi ena namo be dahaka?
3 Iesu Keriso be Iehova ladanai Satani ena tanobada do ia hadikaia ore dinana korikorina be Baibel ese ia gwauraia hedinarai lasi. Iesu ia gwau: “Unai dina bona dina gauna, tau ta ia diba lasi, aneru guba dekenai idia diba lasi, Natuna danu ia diba lasi, to Tamana sibona ia diba.” (Mareko 13:32) Bema haida be Iehova idia lalokau henia momokani lasi, do idia laloa Iehova ena dina do ia mai lasi, bena tanobada gaudia idauidau do idia tahua. To, Iehova idia lalokau henia momokani taudia ese mai edia lalona ibounai ida Ia idia hesiai henia, herevana inai nega dikana ena dokona be edena negai do ia mai.—Salamo 37:4; 1 Ioane 5:3.
4. Iesu ese dahaka sisiba ia henia?
4 Iesu ese Iehova idia lalokau henia taudia ia sisiba henidia, ia gwau: “Umui naria namonamo, umui noga noho, badina be inai gaudia idia mai nega umui diba lasi.” (Mareko 13:33-37) Ia gwau, namo lasi aniani bona inuinu karana eiava “tanobada ena laloa metau momo gaudia” ita laloa momo dainai, ita laloaboio ita be dokona negana lalonai ita noho.—Luka 21:34-36; Mataio 24:37-42.
5. Petero ese ia gwauraia bamona, Iehova ena dina ai dahaka do ia vara?
5 Petero danu ese ita ia sisiba henia, ‘Dirava ena Dina do ita naria noho, bona do ia ginidae haraga totona do ita gaukara goada noho. Unai Dina neganai lahi ese guba do ia araia ore, bona siahu badana ese guba dekenai noho hisiu, hua bona dina do ia gabua ore.’ Tanobada ena gavamani iboudiai—“guba” unai—bona taunimanima dikadia iboudiai—“tanobada” unai—be do idia ore. “Ia lalonai noho gaudia ibounai,” anina be inai tanobada dikana ena lalohadai bona kara idauidau, hegeregere ena gwau-edeede karadia, bona ena matabodaga bona kohu momo tahua karadia ibounai, be Dirava ese do ia haorea. Inai gaudia edia gabu ai “guba matamata [Dirava ena guba Basileiana] bona tanobada matamata [tanobada bese matamatana] do ia havaraia. . . . Unai gabu dekenai be kara maoromaoro sibona do ia noho.” (2 Petero 3:10-13) Tanobada ibounai do ia hamarerea bada karadia be ita diba lasi dinana bona horana ai do idia vara haraga.—Mataio 24:44.
Idia Vara Toa Oi Itaia Namonamo
6. (a) Iesu ese ena hahediba taudia edia henanadai ia haerelaia neganai, edena dala ai ia be Iuda taudia edia dokona negana ia herevalaia? (b) Iesu ena haere lalonai, edena kahana ese lagani 1914 amo ema bona hari idia vara gaudia ia gwauraia?
6 Nega dikadia ai ita noho dainai, nega dokona—“tanobada ena dokona” unai—ena toana idia hahedinaraia toa idauidau ita diba namonamo be gau badana. Namona be inai ita laloatao, Iesu ese ena hahediba taudia edia henanadai Mataio 24:3 dekenai ia haerelaia neganai, siri 4 ia lao 22 dekenai ia gwauraia gaudia haida be dala maragina ai, lagani 33 C.E. ela bona 70 C.E. ai Iuda besena dekenai idia guguru. To unai peroveta herevana be dala badana ai lagani 1914 C.E. amo ia matamaia lagani lalodiai ia guguru, Keriso ena “giroa mai bona tanobada dokona” ena nega ia matamaia negana unai. Mataio 24:23-28 ese lagani 70 C.E. amo ela bona Keriso ia giroa mai negana lalonai do idia vara gaudia ia gwauraia. Mataio 24:29–25:46 lalonai idia gwauraia gaudia be dokona negana lalonai do idia vara.
7. (a) Dahaka dainai ita ta ta ese hari idia vara gaudia, toa idia hagugurua gaudia unai, ita itaia namonamo be namo?(b) Inai paragraf ena dokonai idia noho henanadai haerelaia, oi hahedinaraia edena bamona unai toa be lagani 1914 amo ia vara ema bona hari.
7 Namona be ita ta ta ese idia vara gaudia idauidau, toa idia hagugurua gaudia ita itaia namonamo. Unai gaudia be Baibel ena peroveta herevadia danu ita hahegeregerea karana ese ita do ia durua Iehova ena dina ita laloa noho totona. Danu, unai ese ita do ia durua ma haida dekenai unai dina be ia kahirakahira ita harorolaia neganai, edia lalona ita veria dalanai do ita hereva henidia. (Isaia 61:1, 2) Unai gaudia ita laloa noho lalonai, namona be henunai idia noho henanadai ita laloa, idia ese toa ena kahana idauidau idia herevalaia, Mataio 24:7 bona Luka 21:10, 11 ese idia gwauraia bamona.
‘Bese ta ese bese ta ia tuari henia bona basileia ta ese basileia ta ia tuari henia’ ena peroveta herevana, be edena dala ai lagani 1914 ai ia guguru matamaia? Unai nega amo ema bona hari, tuari be edena bamona?
Lagani 1918 ai, edena gorere ese taunimanima momo herea ia hamasedia bona edia momo ese Tanobada Tuarina Ginigunana lalonai idia mase taudia edia momo ia hanaia? (Diba bukana, karoa 11, par. 7 itaia.) Ena be doketa taudia edia diba idia habadaia noho, to edena gorere idauidau ese taunimanima milioni momo idia do hamasea noho?
Ena be idia hanaia lagani handred lalonai saiens taudia ese edia diba idia habadaia, to edena dala ai hitolo bada ese taunimanima edia mauri ia do hadikaia noho?
Dahaka dainai oi abia dae momokani 2 Timoteo 3:1-5 bona 13, be vaia mauri lalonai idia vara gaudia idia herevalaia lasi, to nega dokona ena dina gabedia ita lao henia lalonai idia bada idia lao dika idauidau ia herevalaia?
Taunimanima Hapararaia Karana
8. (a) Mataio 13:24-30, 36-43 ena hereva bamona, Iesu ese dahaka danu ia gwauraia inai nega dokona lalona do ia vara? (b) Iesu ena parabole ena anina be dahaka?
8 Iesu ese inai nega ena dokona ia herevalaia neganai, gau badadia ma haida ia gwauraia. Unai gaudia ta be, “Basileia ena taunimanima” bona “Satani ena taunimanima” hapararaia karana. Uiti umana lalonai ava dikadia ia hadoa inai tauna ena parabole lalonai Iesu ese unai ia herevalaia. Unai parabole lalonai, “uiti” ese horoa Keristani taudia momokanidia ia laulaulaia. “Ava dikadia” ese idia laulaulaia taudia be sibodia idia gwauraia Keristani taudia, to edia kara amo idia hahedinaraia idia be “Satani ena taunimanima,” badina be Diabolo ese ia lohiaia tanobadana idia badinaia. Idia be “Basileia ena taunimanima” amo idia hapararadia bona mase do idia davaria. (Mataio 13:24-30, 36-43) Unai hapararaia karana be ia vara vadaeni, a?
9. (a) Tanobada Tuarina Ginigunana murinai, sibodia idia gwauraia Keristani taudia ibounai be edena bamona idia hapararadia? (b) Horoa Keristani taudia ese edena dala ai idia hamomokania idia be Basileia ena hesiai taudia korikoridia?
9 Tanobada Tuari Ginigunana murinai, sibodia idia gwauraia Keristani taudia iboudiai be orea rua dekenai idia hapararaia: (1) Kerisendom ena dubu gunalaia taudia bona edia murinai idia raka taudia, idia ese League of Nations (hari United Nations) idia durua goadagoada bona edia bese idia abia isi danu, bona (2) Tanobada Tuari Ginigunana murinai idia noho Keristani taudia korikoridia, ese Dirava ena Mesia Basileiana idia badinaia momokani bona inai tanobada ena bese idauidau idia badinaia lasi. (Ioane 17:16) Tanobada hegegemadai “Basileia ena Sivarai Namona” harorolaia karana amo idia hahedinaraia, idia be Dirava ena Basileia ena hesiai taudia korikoridia. (Mataio 24:14) Unai amo dahaka ia vara?
10. Basileia harorolaia gaukarana ese dahaka ia havaraia guna?
10 Gau ginigunana be, Dirava ena lauma ese ia horoa orena taudia idia gogoa, edia helaro be Keriso ida guba Basileiana dekenai do idia lohia. Ena be unai taudia be bese idauidau dekenai idia noho, to orea tamona lalonai idia haboua. Unai horoa taudia makaia gaukarana be kahirakahira do ia ore.—Apokalupo 7:3, 4.
11. (a) Dahaka haboua gaukarana idia karaia noho, bona edena peroveta herevana ese unai ia hamomokania? (b) Unai peroveta herevana be hari ia guguru noho ese dahaka ia hahedinaraia?
11 Bena, Iesu ena hakaua henunai “taunimanima momo . . . bese idauidau, iduhu idauidau, kopina idauidau, bona gado idauidau” idia haboua matamaia. Idia be “hisihisi bada herea” amo do idia roho mauri “mamoe idaudia” bona Dirava ena tanobada matamatana lalonai do idia vareai. (Apokalupo 7:9, 14; Ioane 10:16) Dokona ia do mai lasi lalonai do idia karaia Dirava ena Basileia harorolaia gaukarana be hari idia karaia noho. Mamoe idaudia taudia hutuma bada herea, hari edia namba be milioni momo, ese orena taudia idia durua mai anina bada Basileia sivaraina idia harorolaia totona. Unai sivarai be bese iboudiai ese idia kamonaia noho.
Vaira Negana ai Dahaka Do Ia Vara?
12. Iehova ena dina ia do mai lasi neganai, do ita karaia haroro gaukara ena bada be edena bamona?
12 Ataiai idia herevalaia gaudia ibounai ese idia hamomokania ita be nega dokona ena dina gabedia lalonai ita noho bona Iehova ena dina be ia mai kahirakahira noho. To unai dina badana mai garina ia do vara lasi neganai, peroveta herevadia ma haida do idia guguru guna, a? Oibe. Basileia dainai taunimanima hapararaia karana be ia do ore lasi. Gabu haida ai lagani momo lalodiai dagedage bada idia davaria, to hari unai gabudia dekenai hahediba taudia matamatadia edia namba ia bada daekau. Taunimanima ese sivarai namona idia dadaraia gabudia dekenai danu, iseda haroro karana amo Iehova ena hebogahisi ita hahedinaraia. Unai dainai, ita gaukara noho! Iesu ese ita ia hagoadaia, unai gaukara ita haorea neganai, dokona be do ia ginidae.
13. Tesalonika Ginigunana 5:2, 3 ese ia hahedinaraia bamona, dahaka mai anina bada gauna ta be ia do vara lasi, bona ena anina ita dekenai be dahaka?
13 Baibel ena peroveta herevana badana ma ta ia gwau: “Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi be do ia ginidae. Bona unai taunimanima do idia roho mauri diba lasi.” (1 Tesalonika 5:2, 3) Ita diba lasi unai hereva “maino bona gari lasi ita noho inai” be edena bamona do idia halasia. Ena be unai do idia gwauraia, to tanobada gunalaia taudia ese taunimanima edia hekwakwanai idia kokia momokani lasi. Iehova ena dina idia laloa noho taudia be unai hereva ese do ia koidia lasi. Idia diba unai hereva idia gwauraia murinai, karaharaga hisihisi dikana do ia ginidae.
14. Hisihisi badana lalonai dahaka do idia vara guna bona dahaka be gabeai?
14 Hisihisi badana ia matamaia neganai, tanobada ena lohia taudia ese Babulonia Badana, tanobada ena tomadiho koikoi ibounai, do idia tuari henia bona ia do idia hadikaia ore. (Mataio 24:21; Apokalupo 17:15, 16) Unai murinai, tanobada besedia ese Iehova ena lohia siahuna idia badinaia taudia do idia tuari henia, unai ese Iehova ena badu politikol gavamanidia bona edia durua taudia dekenai do ia habadaia, bena do ia hadikadia ore vaitani. Unai be hisihisi badana ena dokona, Aramagedono unai. Bena, Satani bona ena demoni be guri dobu masemase lalonai do idia negedia diho, bona taunimanima do idia koidia lou lasi. Iehova ena ladana do ia hahelagaia neganai, Iehova ena dina do ia doko.—Esekiela 38:18, 22, 23; Apokalupo 19:11–20:3.
15. Bema ta ia laloa Iehova ena dina be ia daudau, dahaka dainai unai be aonega lasi lalohadaina?
15 Inai tanobada hadikaia ore negana be Iehova ese ia abia hidi negana korikorina ai do ia ginidae. Do ia leiti lasi. (Habakuku 2:3) Mani ita laloatao, lagani 70 C.E. ai Ierusalema hadikaia ore negana ia ginidae haraga, Iuda taudia idia laloa dika do ia vara lasi negana ai ia vara. Bona idaunegai Babulonia hanua be edena bamona? Unai hanua be hanua goadana, ia laloa bese ta ese do ia hamorua lasi, bona ena magu be bada bona auka herea. To hanuaboi tamona lalonai ia moru. Unai hegeregerena, inai tanobada dikana hadikaia ore negana be do ia ginidae haraga. Ia ginidae neganai, namona be ita ura Iehova ese ita ia davaria mai lalo-tamona ida tomadiho momokani ita badinaia noho, badina be Iehova ena dina ita laloa dainai.
Riviu Henanadai
• Dahaka dainai Iehova ena dina ita laloa noho be gau badana? Edena bamona unai ita karaia diba?
• Hari taunimanima idia haboua noho karana ena anina ita dekenai be dahaka?
• Iehova ena dina ia do vara lasi neganai, dahaka gaudia do idia vara guna? Unai dainai, ita ta ta ese dahaka ita karaia noho be namo?
[Pictures on page 180, 181]
Kahirakahira nega dokona do ia ore, Satani ena tanobada idia hadikaia ore neganai