Dirava be mai Ena Ladana

NEGA ginigunana tau ta oi hedavari henia neganai, oi karaia kara ginigunana be dahaka?— Oibe, iena ladana totona oi henanadai. Ita ibounai be mai iseda ladana. Dirava be tanobada ai ia noho tauna ginigunana dekenai ladana ia henia. Iena ladana ia atoa Adamu bona iena adavana ena ladana ia gwauraia Heva.

To, taunimanima sibona ese ladana idia abia lasi. Mani oi laloa, gau ma haida danu be mai edia ladadia. Tau ta be oi dekenai doli eiava animal ta ia henia neganai, unai gauna dekenai ladana oi henia, ani?— Oibe, ladana be mai anina bada.

Hanuaboi ai guba oi raraia bona idia noho hisiu momo herea oi itaia. Oi laloa idia be mai edia ladana, a?— Oibe, Iehova be guba dekenai idia noho hisiu ta ta dekenai ladana ia henia. Baibel be ita ia hamaoroa: “Lohiabada ese hisiu edia namba ia gwauraia vadaeni, bona ia ese idia ibounai edia ladana ia atoa.”—Salamo 147:4.

Tanobada bona guba ibounai lalonai, daika be tau badana momokani?— Oibe, ia be Dirava. Oi laloa ia be mai ena ladana, a?— Iesu ia gwau Dirava be mai ena ladana. Nega ta Iesu be Dirava dekenai ia guriguri, ia gwau: ‘Oiemu ladana danu lau hadibaia vadaeni egu murinai idia raka taudia dekenai.’ (Ioane 17:26) Dirava ena ladana oi diba, a?— Dirava sibona ese ita dekenai iena ladana ia gwauraia. Ia gwau: “Lau be Iehova, egu ladana be unai.” Unai dainai Dirava ena ladana be IEHOVA.—Isaia 42:​8, Buka Helağa.

Ma haida ese emu ladana idia laloatao neganai, emu hemami be edena bamona?— Oi moale, ani?— Iehova ia ura taunimanima ese iena ladana idia diba danu. Unai dainai Dirava ita herevalaia neganai, namona be ena ladana Iehova ita gaukaralaia. Hadibaia Tauna Badana be taunimanima dekenai ia hereva neganai, Dirava ena ladana, Iehova, ia gaukaralaia. Nega ta Iesu ia gwau: “Lohiabada [“Iehova,” NW ] oiemu Dirava oi ura henia, mai oiemu kudouna ibounai.”—Mareko 12:30.

Iesu ia diba “Iehova” be mai anina bada ladana ta. Unai dainai ena murinai idia raka taudia ia hamaorodia Dirava ena ladana idia gaukaralaia totona. Ia gwau edia guriguri lalonai Dirava ena ladana do idia gaukaralaia. Iesu ia diba Dirava ia ura taunimanima ibounai ese Iena ladana Iehova, do idia diba.

Idaunegai Dirava ese ena ladana ena anina be Mose, Israela tauna ta dekenai, ia hahedinaraia. Israela taudia be Aigupito tanona dekenai idia noho. Unai tano taudia idia gwauraia Aigupito taudia. Idia ese Israela taudia be edia hesiai taudia ai idia halaoa bona idia kara auka henidia. Mose ia tubu daekau neganai, ena bese tauna ta ia durua toho. Unai ese Farao, Aigupito ena king ia habadua. Ia ura Mose ia alaia! Unai dainai Mose be Aigupito amo ia heau.

Mose be tano ma ta dekenai ia lao. Midiana tanona unai. Unuseniai Mose ia headava bona ruma bese ia havaraia. Mamoe naria gaukarana ia karaia danu. Dina ta Mose be ororo ta badinai ena mamoe ia naria noho neganai, hoa gauna ta ia itaia. Lahi ese au ginigini ia araia, to ia gabua ore lasi! Mose ia raka kahirakahira unai au do ia itaia namonamo totona.

Oi diba dahaka ia vara?— Mose ese gado ta ia kamonai au ginigini dekena amo. Ia gwau, “Mose e, Mose e.” Daika ese unai hereva ia gwauraia?— Unai be Dirava ena gadona! Dirava be mai ena gaukara momo Mose totona. Dirava ia gwau: ‘Oi mai, oi dohore lau siaia Farao, Aigupito ena king dekenai, lauegu bese taudia Israela be Aigupito dekena amo dohore oi hakaudia siri totona.’ Dirava ia gwauhamata Mose do ia durua unai ia karaia totona.

To Mose be Dirava dekenai ia gwau: ‘Lau be dohore lau lao Aigupito ai idia noho Israela taudia dekenai. Do lau hamaoroa Dirava ese lau ia siaia. Bema lau idia nanadaia, “Iena ladana be daika?” Lau be edena bamona do lau haere?’ Dirava ese Mose ia hamaoroa Israela taudia dekenai do ia gwau: ‘Iehova, ese lau ia siaia umui dekenai. Iehova be lau egu ladana, ia lao hanaihanai.’ (Esodo 3:​1-15) Unai ese ia hahedinaraia Dirava ena ladana Iehova, be do ia noho hanaihanai. Do ia haidaua lasi. Dirava ia ura taunimanima ese ena ladana Iehova, idia dibaia bona idia gaukaralaia hanaihanai.

Mose be Aigupito dekenai ia giroa lou neganai, Aigupito taudia idia laloa Iehova be Israela taudia edia dirava maragina ta sibona. Idia laloa lasi ia be tanobada ibounai ena Dirava. Unai dainai Iehova ese Aigupito ena king ia hamaoroa: ‘Tanobada taudia ibounai dekenai lauegu ladana dohore lau hahedinaraia.’ (Esodo 9:16) Oibe, Iehova ese iena ladana ia hahedinaraia. Oi diba edena dala ai unai ia karaia?—

Iehova ese Mose ia gaukaralaia Israela taudia be Aigupito amo ia hakaudia siri totona. Davara Kakakakana dekenai idia ginidae neganai, Iehova ese davara ia hapararaia bona ena tano ia hakaukaua. Israela taudia be tano kaukauna dekenai idia raka hanai. Unai murinai, Farao bona ena tuari oreana ibounai be Israela taudia murinai idia mai, to kahana rua dekenai idia haboua ranu be Aigupito taudia latanai ia moru bona idia ibounai ia hamasea.

Nega sisina murinai, tanobada hegegemadai taunimanima ibounai be Iehova ese Davara Kakakakana dekenai ia karaia karana idia kamonai. Edena bamona ita diba unai sivarai idia kamonaia?— Lagani 40 murinai, Israela taudia be Kanana, Iehova ia gwauhamata idia dekenai do ia henia tanona unai, dekenai idia lao. Unuseniai Rahaba ese Israela tatau rua ia hamaorodia: “Ai kamonai Lohiabada ese Davara Kakakaka be umui emui vairanai ia hakaukaua, Aigupito tano dekena amo umui raka mai neganai.”—Iosua 2:10.

Hari, taunimanima momo be unai Aigupito taudia bamona. Idia abia dae lasi Iehova be tanobada ibounai ena Dirava. Unai dainai Iehova ia ura ena taunimanima ese ma haida dekenai iena kara do idia herevalaia. Iesu be unai ia karaia. Iena tanobada maurina ena dokona ai, guriguri amo Iehova ia hamaoroa: “Oiemu ladana danu lau hadibaia vadaeni idia dekenai.”—Ioane 17:26.

Oi ura oi be Iesu bamona, a? Vadaeni, ma haida oi hamaoroa Dirava ena ladana be Iehova. Reana do oi davaria taunimanima momo be unai idia diba lasi. Reana Baibel amo idia dekenai Salamo 83:18 oi hahedinaraia diba. Mani Baibel ita abia bona unai siri ita duahia hebou. Ia gwau: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”

Unai siri amo dahaka ita dibaia?— Oibe, ita dibaia gauna be inai, Iehova sibona ena ladana be mai anina bada. Unai be Siahu Ibounai Diravana, Iesu ena Tamana bona gau ibounai ia Karaia Tauna ena ladana. Bona laloaboio lasi, Iesu ia gwau namona be mai iseda kudouna ibounai ida Iehova Dirava ita lalokau henia. Iehova oi lalokau henia, a?—

Edena bamona ita hahedinaraia diba Iehova ita lalokau henia?— Dala ta be Turana ta bamona Ia ita dibaia. Dala ma ta be ma haida dekenai iena ladana ita herevalaia. Baibel amo ita hahedinaraia diba iena ladana be Iehova. Iehova ese ia havaraia gau namodia bona ia karaia vadaeni kara namodia ita herevalaia diba danu. Unai ese Iehova ia hamoalea bada badina ia ura taunimanima be ia idia dibaia. Unai ita karaia diba danu, ani?—

Taunimanima dekenai Iehova ita herevalaia neganai, momo do idia ura lasi kamonai. Iesu, Hadibaia Tauna Badana unai, be taunimanima dekenai Iehova ia herevalaia neganai, momo idia kamonai lasi danu. To unai ese Iesu ia koua lasi Iehova ia herevalaia totona.

Unai dainai namona be ita be Iesu bamona. Iehova ita herevalaia noho. Bema unai bamona ita karaia, Iehova Dirava be ita dainai do ia moale, badina iseda lalokau iena ladana totona ita hahedinaraia.