“Inai be Lauegu Natuna”

NATUDIA be kara namodia idia karaia neganai, edia naria taudia idia moale. Bema kekeni ta ese gau ta ia karaia namo herea, ena tamana ia moale bada dainai ma haida do ia hamaoroa: “Inai be egu natuna kekeni.” Eiava bema mero ta ese kara namodia ia karaia, tamana be mai moale ida do ia gwau: “Inai be egu natuna mero.”

Iesu be hanaihanai iena Tamana ese ia moalelaia karadia ia karaia. Unai dainai ena Tamana be ia dekenai ia moale bada. Iesu be iena murinai idia raka taudia toi ida ia noho neganai, iena Tamana ese ia karaia karana oi laloatao, a?— Oibe, Dirava be guba amo idia ia hereva henia, ia gwau: ‘Egu Natuna be inai, lauegu lalokau Tauna. Lauegu lalona ia moale ia dekenai.’—Mataio 17:5.

Iesu be hanaihanai ia moale ena Tamana ese ia moalelaia karadia ia karaia totona. Oi diba dahaka dainai unai ia karaia? Badina iena tamana ia lalokau henia bada. Bema ta be maduna dainai gau ta ia karaia, do ia auka unai ia karaia totona. To bema mai ena ura ida ia karaia, do ia auka lasi. Mai emu ura ida gau ta oi karaia ena anina oi diba, a?— Ena anina be mai moale bada ida gau ta oi karaia.

Iesu be tanobada dekenai ia do mai lasi neganai, iena Tamana ia ura do ia karaia gaudia be mai ena ura ida ia karaia. Unai bamona ia karaia badina iena Tamana, Iehova Dirava, ia lalokau henia. Iesu be ena Tamana ida gabu namo hereana ta guba dekenai idia noho. To Dirava be mai ena gaukara ta Iesu totona. Iesu be unai gaukara ia karaia totona, guba do ia rakatania. Tanobada dekenai beibi ta bamona ia vara be namo. Iesu be mai ena ura ida unai ia karaia badina unai be Iehova ena ura.

Iesu be tanobada dekenai beibi ta bamona ia vara totona, namona be ia be mai ena sinana. Oi diba iena sinana be daika?— Iena ladana be Maria. Guba amo Iehova ese iena aneru Gabriela ia siaia Maria ia hereva henia totona. Gabriela ese Maria ia hamaoroa ia be natuna mero ta do ia havaraia. Iena ladana do idia atoa Iesu. Bona beibi ena tamana be daika?— Aneru ia gwau unai beibi ena tamana be Iehova Dirava. Unai dainai Iesu idia gwauraia Dirava ena Natuna.

Oi laloa Maria be unai ia kamonai neganai, ena hemami be edena bamona?— Ia gwau, “Lau ura lasi Iesu ena sinana ai do lau lao,” a? Lasi, Maria ia noho hegaegae Iehova ena ura do ia karaia totona. To, edena dala ai Iehova ena natuna guba ai, be tanobada dekenai beibi ta bamona do ia vara? Iesu ena vara dalana be edena dala ai beibi ibounai edia vara dalana amo ia idau? Oi diba, a?—

Dirava ese iseda tama sina ginigunadia, Adamu bona Heva, be dala namona ai ia hakapudia. Gabeai, beibi ta be ena sinana ena bogana lalonai ia tubu diba. Taunimanima idia gwau unai be hoa gauna ta! Lau diba unai hereva oi abia dae.

To Dirava ese hoa karana badana ma ta ia karaia. Ia ese guba amo ena Natuna ena mauri ia abia bona Maria ena bogana lalonai ia atoa. Dirava be guna unai bamona ia karaia lasi, bona unai murinai ia karaia lou lasi. Unai hoa karana dainai, Iesu be Maria ena bogana lalonai ia tubu matamaia, beibi ma haida be edia sinadia edia bogana lalonai idia tubu hegeregerena. Unai murinai, Maria ese Iosepa ia adavaia.

Iesu ia havaraia negana ia mai kahirakahira neganai, Maria bona Iosepa be Betelehema hanua idia vadivadi henia. To unai hanua be taunimanima amo ia honu. Maria bona Iosepa be daiutu ta idia davaria lasi dainai, animal idia naria gabuna ta dekenai idia noho. Unuseniai, Maria ese Iesu ia havaraia bona boromakau bona animal ma haida edia aniani mauana lalonai ia hahekurea, inai laulau dekenai oi itaia bamona.

Iesu ia vara hanuaboina ai hoa gaudia haida idia vara. Betelehema kahirakahira ai, aneru ta be mamoe naria taudia haida dekenai ia hedinarai. Idia ia hamaoroa Iesu be tau badana. Aneru ia gwau: ‘Hereva namona lau mailaia, taunimanima ia hamoalea sivaraina unai. Hari, inai dina, taunimanima do ia Hamauria Tauna ia vara vadaeni.’—Luka 2:10, 11.

Aneru ese mamoe naria taudia ia hadibaia, idia ese Betelehema ai Iesu do idia davaria, boromakau edia aniani mauana lalonai ia hekure noho. Vadaeni nega tamona, guba aneru ma haida be aneru ginigunana danu Dirava idia hanamoa. Aneru idia ane: “Dirava do ita hanamoa, bona tanobada dekenai be maino, Dirava idia hamoalea taudia ese inai maino do idia abia.”—Luka 2:12-14.

Aneru ese idia ia rakatania neganai, mamoe naria taudia be Betelehema dekenai idia lao bona unuseniai Iesu idia davaria. Idia kamonai gau namodia ibounai be Iosepa bona Maria idia hamaoroa. Maria ia ura Iesu ena sinana ai ia lao dainai, ia abia moalena be bada herea, ani?

Gabeai, Iosepa bona Maria ese Nasareta dekenai Iesu idia abia lao. Unuseniai Iesu ia tubu daekau. Tau badana ai ia lao neganai, iena hadibaia gaukara badana ia matamaia. Iehova Dirava ia ura ena Natuna be tanobada dekenai do ia karaia gaukarana ta be unai. Iesu ese ena guba Tamana ia lalokau henia bada dainai, mai ena ura ida unai gaukara ia karaia.

Iesu be Hadibaia Tauna Badana bamona ena gaukara ia do hamatamaia lasi neganai, Ioane Bapatiso ese Ioridane Sinavaina dekenai ia bapatisoa. Bena hoa gauna ta ia vara! Iesu be ranu amo ia daekau neganai, Iehova be guba amo ia hereva, ia gwau: “Inai be lauegu Natuna, egu lalokau, lau moale bada ia dekenai.” (Mataio 3:17) Bema emu tama sina be oi dekenai idia gwau oi idia lalokau henia, do oi moale, ani?— Ita diba Iesu be unai hereva dainai ia moale danu.

Iesu be hanaihanai kara namo ia karaia. Iena kara ia hunia toho lasi bona taunimanima dekenai ia gwau lasi ia be Dirava. Aneru Gabriela ese Maria ia hamaoroa vadaeni Iesu do idia gwauraia Dirava ena Natuna. Iesu danu ia gwau ia be Dirava ena Natuna. Bona taunimanima ia hamaoroa lasi iena diba ese iena Tamana ena diba ia hereaia. To, ia gwau: “Tamana ese lau ia hereaia.”—Ioane 14:28.

Guba ai danu, Iesu ena Tamana be ia dekenai gaukara ia henia neganai, Iesu ese ia karaia. Ia gwau lasi do ia karaia bena gau ma ta ia karaia. Iena Tamana ia lalokau henia. Unai dainai iena Tamana ena hereva ia kamonai henia. Gabeai Iesu be tanobada dekenai ia mai neganai, iena tamana ese ia siaia do ia karaia gaukarana ia karaia. Gau ma ta dekenai iena nega ia haorea lasi. Unai dainai Iehova be iena Natuna dekenai ia moale!

Ita ura Iehova ita hamoalea danu, ani?— Vadaeni, namona be ita hahedinaraia Dirava ena hereva ita kamonai henia, Iesu ia karaia bamona. Dirava be Baibel amo ita ia hereva henia. Namo lasi ita koikoi bona ita gwau Dirava ita kamonai henia, to ita abia dae bona karaia gaudia be Baibel ena hereva hegeregerena lasi, ani?— Bona laloaboio lasi, bema Iehova ita lalokau henia momokani, do ita ura Ia ita hamoalea.