Hisihisi Do Idia Ore, A?

BAIBEL IA GWAU

“Dirava . . . ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.”​—Apokalupo 21:3, 4, Nega Matamata Baibel.

UNAI GWAUHAMATA ENA NAMO

Ita abia dae ita davaria hekwakwanai be Dirava ese ia havaraia lasi.​—Iamesi 1:13.

Ita diba Dirava ese iseda hisihisi ia mamia danu.​—Sekaraia 2:8.

Ita abia dae hisihisi ibounai be do idia ore.​—Salamo 37:9-11.

BAIBEL ITA ABIDADAMA HENIA DIBA, A?

Oibe, badina rua be inai:

• Dirava be hisihisi bona kara gageva ia inai henia. Baibel negadiai, haida ese Iehova Dirava ena taunimanima idia dagedage henia neganai, iena hemami be edena bamona? Baibel ia gwau, Dirava be ena bese “idia hisihisi henidia taudia” edia kara ia moalelaia lasi.​—Gunalaia Taudia 2:18.

  Ma haida idia hahisia taudia be Dirava ese ia inai henidia. Hegeregere, Baibel ia gwau, “kerere lasi taudia alaia karana” be Dirava ese ia ura henia lasi.​—Aonega Herevadia 6:16, 17.

• Dirava be ita ta ta ia laloa bada. Iehova be ita ia hagoadaia ita lalohekwarahilaia gaudia be ia dekenai ita negea, ‘badina ia be ita ia laloa bada.’​—1 Petero 5:7.

  Kahirakahira, Iehova ese ena Basileia amo ita ta ta eda hisihisi do ia haorea. (Mataio 6:9, 10) Unai ita naria noho lalonai, Iehova be ia idia tahua taudia dekenai lalogoada ia henia.​—Kara 17:27; 2 Korinto 1:3, 4.