Iesu Ena Sivarai Idia Torea Tatau Haida

Laulau ai idia noho tatau oi itadia, a?​— Edia ladana be Mataio, Mareko, Luka, Ioane, Petero, Iamesi, Iuda, bona Paulo. Inai tatau be Iesu ena negai idia noho, bona idia ese Iesu ena sivarai idia torea. Mani unai tatau edia sivarai ita herevalaia.

Unai tatau toi be Iesu ida idia haroro hebou aposetolo taudia. Edia ladana oi diba, a?​— Mataio, Ioane, bona Petero. Aposetolo Mataio bona Ioane be Iesu idia diba namonamo, unai dainai idia ese edia buka ta ta lalonai Iesu ena mauri sivaraina idia torea. Aposetolo Ioane ese Apokalupo bukana bona Ioane Ginigunana, Ioane Iharuana bona Ioane Ihatoina ia torea danu. Aposetolo Petero danu be Baibel ai idia noho revareva rua ia torea. Edia ladana be Petero Ginigunana bona Petero Iharuana. Petero ese ena revareva iharuana lalonai, Iehova be guba amo Iesu ia herevalaia negana ia gwauraia. Iehova ia gwau: ‘Inai be egu Natuna. Ia lau lalokau henia, bona lau lalonamo henia.’

Laulau ai idia noho tatau haida danu be edia buka lalonai Iesu idia herevalaia. Idia ta be Mareko. Iesu idia dogoatao neganai, reana ia noho bona idia vara gaudia ibounai ia itaia. Tau ma ta be Luka. Ia be doketa ta bona reana Iesu ia mase murinai Keristani tauna ai ia lao.

Laulau dekenai oi itaia Baibel torea taudia rua be Iesu ena tadina. Edia ladana oi diba, a?​— Edia ladana be Iamesi bona Iuda. Matamanai, idia ese Iesu idia abia dae lasi. Idia laloa Iesu be ia kavakava bamona. To, gabeai idia ese Iesu idia abia dae bona Keristani taudia ai idia lao.

Laulau ai oi itaia Baibel torea tauna ginigabena be Paulo. Keristani tauna ai ia do lao lasi neganai, ena ladana be Saulo. Ia ese Keristani taudia ia ura henia lasi bona ia dagedage henia. Dahaka dainai gabeai Paulo be Keristani tauna ai ia lao?​— Dina ta, Paulo be dala amo ia heau lao lalonai ia kamonai guba amo ta ese ia hereva henia. Unai tauna be Iesu! Ia ese Paulo ia nanadaia: ‘Dahaka dainai lau idia abidadama henia taudia oi dagedage henia?’ Unai murinai, Paulo ese ena kara ia haidaua bona Keristani tauna ai ia lao. Paulo ese Baibel bukadia 14 ia torea, Roma bukana amo ela bona Heberu bukana.

Ita ese dina ta ta ai Baibel ita duahia, ani?​— Baibel ita duahia neganai, Iesu ena sivarai momo ita dibaia. Oi ura Iesu ena sivarai ma haida oi diba, a?​—