‘Lalokau Bona Kara Namodia’ Dibaia Heboudia

LAGANI handred momo lalodiai, Iehova ena taunimanima be orea ta bamona idia hebou. Idaunegai Israela ai, tatau ibounai be aria badadia toi totona Ierusalema dekenai idia lao. (Deu. 16:16) Aposetolo edia negai, Keristani taudia be hanaihanai ta ena ruma dekenai idia hebou. (File. 1, 2) Hari, ita ese kongrigeisen, sekit, bona rijinol heboudia ita moalelaia. Dahaka dainai Dirava ena hesiai taudia idia hebou? Badina unai be eda tomadiho ena kahana badana ta.​​—Sal. 95:6; Kol. 3:16.

² Danu hebou dekenai idia mai taudia be heduru idia abia. Au Raurau Rumadia Ena Aria idia karaia neganai, Dirava ese Israela taudia ia hamaorodia, ia gwau: “Taunimanima do oi haboua, tatau, hahine, natudia, bona emui siti lalodiai idia noho idau taudia, unai amo Iehova emui Dirava do idia kamonai henia, ia do idia dibaia bona gari henia, bona inai Taravatu ena hereva ibounai do idia badinaia namonamo.” (Deu. 31:12) Ia hedinarai goevagoeva, ita hebou ena badina badana be Iehova ese ita ia “hadibaia” totona. (Isa. 54:13) Hebou karana amo haida ita dibaia, hagoadaia herevadia ita abia, bona hebamo karana dainai goada ita abia.

KONGRIGEISEN HEBOUDIA

³ Pentekoste 33 C.E. murinai idia hebou taudia be aposetolo taudia edia hadibaia herevadia idia badinaia, bona “dina ta ta ibounai idia be dubu helaga dekenai idia hebou.” (Kara 2:42, 46) Gabeai, Keristani taudia be tomadiho totona idia hebou neganai, toretore helagadia, bona aposetolo taudia o Keristani hahediba taudia ma haida ese idia torea revarevadia idia duahia. (1 Kor. 1:1, 2; Kol. 4:16; 1 Tes. 1:1; Iam. 1:1) Kongrigeisen idia guriguri hebou danu. (Kara 4:24-29; 20:36) Nega haida, misinari gaukara ena ekspiriens haida idia herevalaia. (Kara 11:5-18; 14:27, 28) Baibel ena hahediba herevadia bona peroveta herevadia idia guguru karana idia herevalaia. Keristani kara namodia bona Dirava badinaia karadia idia dibaia. Ibounai idia hagoadaia sivarai namona idia harorolaia goadagoada totona.​​—Roma 10:9, 10; 1 Kor. 11:23-26; 15:58; Efe. 5:1-33.

⁴ Iseda Keristani heboudia be aposetolo edia negai idia karaia heboudia hegeregerena ita karaia. Ita ese Heberu 10:24, 25 ena sisiba ita badinaia, ia gwau: “Namona be ta ta ita laloa bada . . . , iseda hebou karana ita rakatania lasi, haida ese idia karaia bamona, to ita hagoadaia heheni, bona unai kara do ita habadaia noho, badina umui itaia dina be ia kahirakahira noho.” Inai dina gabedia ai, ita ura hagoadaia herevadia ita abia hebou hanaihanai karana amo, unai amo iseda hetura karana Iehova ida bona iseda Keristani badinaia karana ita hanamoa noho diba. (Roma 1:11, 12) Ita Keristani taudia be inai tanobada ena uru gagevana bona dikana lalonai ita noho. Ita be Dirava ese ia inai henia karadia bona tanobada ena ura idauidau ita dadaraia vadaeni. (Fili. 2:15, 16; Tito 2:12-14) Oibe, Iehova ena taunimanima ida ita hebamo karana be mai anina bada, ani? (Sal. 84:10) Danu, bema Dirava ena Hereva ita stadilaia dahaka namo do ita abia? Ita idia durua bada heboudia mani ita laloa.

WIKEN HEBOUDIA

⁵ Wiken hebou ena kahana ginigunana be Pablik tok, ia be kamonai taudia ibounai totona, reana idia haida be edia nega ginigunana hebou idia mai. Pablik tok ese nega ginigunana idia mai taudia bona tadikaka taihu edia abidadama ia hagoadaia.​​—Kara 18:4; 19:9, 10.

⁶ Keriso Iesu, iena aposetolo taudia, bona edia bamodia be unai bamona pablik hebou idia karaia, hari kongrigeisen ta ta ai Iehova ena taunimanima be unai bamona hebou idia moalelaia noho. Ita daradara lasi, tanobada dekenai Iesu be pablik tok ia henia tauna hereadaena. Ia be inai bamona idia gwauraia. “Guna tau ta be unai bamona ia hereva lasi”. (Ioa. 7:46) Iesu be mai ena siahu danu ia hereva dainai, idia kamonai taudia momo idia hoa. (Mat. 7:28, 29) Mai kudouna ibounai ida ena hereva idia kamonai taudia momo ese namo bada idia davaria. (Mat. 13:16, 17) Aposetolo taudia ese iena haheitalai idia tohotohoa. Kara 2:14-36 ai, Petero be Pentekoste 33 C.E. ai, kudouna hamarerea pablik tok ia henia ena sivarai ita duahia. Taunimanima momo be idia kamonai gaudia dainai edia mauri idia haidaua. Atena dekenai, Paulo ena pablik tok idia kamonai taudia haida be gabeai abidadama taudia ai idia lao.​​—Kara 17:22-34.

⁷ Unai hegeregerena, iseda negai taunimanima milioni momo ese kongrigeisen heboudia, sekit, bona rijinol hebouhebou dekenai idia henia pablik tok idauidau amo, namo bada idia abia. Unai bamona tok ese ita ia durua Keristani hahediba herevadia ita dibaia namona noho bona Basileia ena hesiai gaukara ita goadalaia totona. Kamonai taudia bona taunimanima ibounai ita invait neganai, taunimanima ita durua diba Baibel ena hereva badadia idia diba totona.

⁸ Pablik tok ai topik idauidauidia idia herevalaia. Idia henia tok ai Baibel ena hahediba herevadia bona peroveta herevadia, bona Baibel ena hakaua herevadia ruma bese maurina, headava maurina, bona matamata taudia ese idia davaria hekwakwanai hamaoromaoroa daladia, bona Keristani kara maoromaoro badinaia daladia idia herevalaia. Tok haida be Iehova ese hoa dalanai ia havaraia gaudia idia herevalaia. Ma haida be, Baibel ai abidadama, boga-auka, bona badinaia karana idia hahedinaraia taudia edia haheitalai idia herevalaia, bona hari iseda negai edia haheitalai ita badinaia diba daladia idia hahedinaraia.

⁹ Pablik tok amo namo bada ita abia totona, gau badana be ita kamonai namonamo, tok henia tauna ese ia gwauraia Baibel siridia ita kehoa, bona ia ese ia duahia bona anina ia hahedinaraia neganai, ia ita badinaia be namo. (Luka 8:18) Unai dainai idia herevalaia gaudia ibounai ita abia dae momokani neganai, iseda lalona do ita hadaia ita dibaia gaudia ita dogoatao auka bona ita badinaia totona.​​—1 Tes. 5:21.

¹⁰ Bema pablik tok henia taudia momo idia noho, kongrigeisen be wiki ta ta ai pablik tok do idia kamonai. Unai ia vara totona, nega momo kongrigeisen ma haida amo tadikaka idia mai tok idia henia totona. Bema tok henia taudia be momo lasi, tok haida be nega ta ta idia karaia lou.

¹¹ Wiken hebou ena kahana iharuana be Gima Kohorona stadi, unai be henanadai bona haere karana amo stadi Gima Kohorona ena atikol ta idia herevalaia. Gima Kohorona magasin amo nega korikori ai Iehova ese ena hereva amo ita ia ubua hanaihanai.

¹² Hanaihanai stadi atikol ese dina ta ta ai Baibel ena hakaua herevadia ita badinaia diba daladia idia herevalaia. Keristani taudia idia hagoadaia “tanobada ena laloa dalana” bona kara mirodia amo idia gini siri totona. (1 Kor. 2:12) Gima Kohorona amo Baibel ena hahediba herevadia bona peroveta herevadia idia hahedinaraia namonamo, unai amo hereva momokani be hanaihanai ita abia bona kara maoromaoro taudia edia dala ai ita raka diba. (Sal. 97:11; Aon. 4:18) Gima Kohorona Stadi ita lao bona ita haere karana ese ita ia durua diba Iehova ena kara maoromaoro tanobada matamatana ena helaro ita moalelaia totona. (Roma 12:12; 2 Pet. 3:13) Iseda Keristani hebamo karana ese ita ia durua lauma ena huahua ita hahedinaraia totona, bona Iehova ena hesiai gaukara karaia urana ia habadaia. (Gal. 5:22, 23) Bona ita ia hagoadaia hahetoho idauidau ita haheaukalaia, bona “vaira negana totona badina namona” ita haginia unai amo ‘mauri korikorina do ita dogoatao auka.’​​—1 Tim. 6:19; 1 Pet. 1:6, 7.

¹³ Edena dala ai ita hahedinaraia diba Dirava ena hereva amo idia hegaegaelaia program ita laloa bada? Namona be ruma bese danu eiava ita sibona ese do ita stadilaia atikol ita hegaegaelaia guna, idia torea siri ibounai ita itaia, bona hebou lalonai sibona eda hereva dalana amo ita haere diba. Unai bamona ita karaia neganai, hereva momokani be iseda kudouna ai do ia noho, bona mai eda abidadama ida ita haere neganai idia kamonai taudia do ia durua diba. Haida edia haere ita kamonai namonamo neganai, wiki ta ta ena stadi amo namo bada do ita abia.

WIKI ENA HEBOU

¹⁴ Kongrigeisen be wiki ta ta ai Kingdom Hall dekenai inai program, Iseda Haroro Bona Mauri Dalana ena hebou idia karaia. Inai hebou mai ena kahana toi be ita ia durua dalana ai idia karaia, unai amo do ita “hegeregere” Dirava ena hesiai taudia ai ita lao totona. (2 Kor. 3:5, 6) Hua ta ta ai Iseda Haroro Bona Mauri Dalana​​—Hebou Pepana dekenai do ita badinaia sediual bona do ita herevalaia topik idia noho. Danu unai hebou pepana lalonai auka lasi haroro daladia idia noho.

¹⁵ Inai hebou ena kahana ginigunana idia gwauraia, Baibel Ena Hereva Badadia, unai kahana ese ita do ia durua Baibel negadia ai idia vara sivaraidia bona edia anina ita diba namonamo bona ita badinaia daladia danu. Unai kahana lalonai tok ta do idia henia, Baibel ena kahana ta idia duahia, bona unai wiki ena Baibel duahiduahi be henanadai bona haere dalana ai do idia karaia. Inai Baibel duahiduahi ena kahana totona laulau bona leseni haida be Mauri Bona Haroro Hebou Pepana lalonai idia noho. Baibel be inai bamona ita stadilaia dobu karana ese iseda mauri bona hahediba dalana ia hanamoa, unai amo do ita ‘hegeregere momokani, bona noho hegaegae gaukara namodia ibounai ita karaia totona.’​​—2Tim. 3:16, 17.

¹⁶ Hebou ena kahana iharuana, Emu Haroro Dalana, idia karaia dalana ese tadikaka bona taihu ia durua haroro gaukara karaia daladia idia haheitalaia totona, unai amo edia haroro bona hadibaia gaukara idia hanamoa diba. Danu, stiuden edia asainmen ena kahana dekenai haroro herevadia edia vidio idia hahedinaraia. Inai kahadia ese ita idia durua haroro gaukara ai ‘do ita herevalaia gaudia ia hadibaia’ unai amo ‘hesiku taudia do ita hagoadaia diba.’​​—Isa. 50:4.

¹⁷ Kahana ihatoina, Keristani Taudia Edia Mauri Dalana, be dina ta ta maurina lalonai Baibel ena hakaua herevadia do ita badinaia diba daladia ia herevalaia. (Sal. 119:105) Inai hebou ai mai anina bada kahana ta be Kongrigeisen Baibel Stadi. Gima Kohorona stadi hegeregerena, Kongrigeisen Baibel Stadi be henanadai bona haere dalanai idia karaia.

¹⁸ Hua ta ta ai Iseda Haroro Bona Mauri Dalana Hebou Pepana idia abia neganai, elda oreana ena kodineita eiava iena durua tauna ese do ia stadilaia namonamo bona sediual ta ia karaia. Wiki ta ta ai, hadibaia gaukara ia diba namonamo elda ta bona elda oreana ese ia abia hidi tauna, be hebou ena seamani ai do ia lao. Iena maduna be do ia itaia hebou be nega korikori ai do ia matamaia bona do ia doko bona kahana idia henia stiuden do ia hanamoa bona sisiba henia.

¹⁹ Hanaihanai Iseda Haroro Bona Mauri Dalana ena Hebou totona ita hegaegae, ita lao bona ita haere neganai, Baibel do ita dibaia namonamo, ena hakaua herevadia do ita lalopararalaia, mai gari lasi ida sivarai namona do ita harorolaia, bona hahediba taudia halaoa gaukarana do ita karaia namonamo diba. Idia do bapatiso lasi o witnes lasi taudia be unai hebou ai hebamo karana bona hagoadaia herevadia amo namo idia abia. Inai hebou bona gau ma haida ita hegaegaelaia neganai heduru ita abia totona, Watchtower Library, JW Library^®, Watchtower ONLINE LIBRARY^™ (bema emu gado ai ia noho), bona Kingdom Hall ena laiberi ita gaukaralaia diba. Kingdom Hall laiberi ai Iehova ena Witnes Taudia edia pablikeisen idauidau idia noho hegeregere, Watch Tower Publications Index o Iehova Ena Witnes Taudia Edia Stadi Indeks, bona gado ma haida ai idia hahanaia Baibel haida, concordance, diksenari, bona heduru bukadia ma haida. Unai laiberi be hebou vairanai o hebou murinai idia gaukaralaia diba.

HARORO GRUP ENA HEBOU

²⁰ Wiki lalonai bona wikeni ai nega idauidau ai, pablisa taudia be haroro grup ena hebou totona do idia haboua. Unai haroro heboudia be ta ena ruma ai o idia abia hidi gabuna ai idia karaia. Danu, Kingdom Hall idia gaukaralaia diba. Grup maragidia be teritori ena gabu idauidau ai idia karaia neganai, do ia auka lasi pablisa be unai haroro hebouna bona teritori dekenai idia lao totona. Unai amo pablisa do idia haria bona haroro teritori dekenai do idia lao haraga. Danu, grup naria tauna ese ena grup lalonai idia noho taudia do ia naria namonamo. Grup maragidia ai idia haroro karana be mai ena namo, to nega haida ia auka dainai grup ma haida ida idia gaukara hebou be namo. Hegeregere, bema wiki ena haroro lalonai pablisa be momo lasi, grup ibounai idia haboua diba, eiava Kingdom Hall dekenai idia hebou o ma gabu ta ai idia hebou diba. Unai amo pablisa ta ta be mai edia bamoa taudia. Tanobada taudia edia holidei negadiai, Kongrigeisen be Kingdom Hall ai idia hebou diba. Eiava, Kongrigeisen ena grup ibounai be Gima Kohorona stadi murinai haroro hebou totona do idia hebou diba.

²¹ Bema grup ta ta be sibona haroro totona do idia hebou, namona be grup naria tauna ese do ia hakaua. Nega ta ta ai, grup naria tauna ese iena durua tauna o ia hegeregere tadikaka ta ia noia diba unai hebou ia naria totona. Namona be grup naria tauna ese haroro gaukara ai do idia gaukaralaia diba gauna ta ia hegaegaelaia namonamo bona herevalaia. Haroro taudia ia haria murinai, ta ese guriguri do ia gwauraia. Bona, grup be teritori dekenai idia lao diba haroro totona. Unai hebou be miniti faiv ia lao seven lalonai do idia karaia, to bema kongrigeisen ta ena hebou be edia hebou murinai do ia matamaia, edia hebou idia hakwadogia be namo. Haroro totona do idia lao taudia do idia hagoadaia, bona do idia badinaia diba haroro daladia bona hadibaia herevadia idia gwauraia. Pablisa matamata bona ma haida be idia manada vadaeni pablisa danu do idia gaukara hebou unai amo treinini idia abia diba.

KONGRIGEISEN MATAMATA O MARAGIDIA EDIA HEBOU DALANA

²² Hahediba taudia edia namba ia bada neganai, kongrigeisen ena namba ia bada danu. Kongrigeisen matamata totona aplikeisen be hanaihanai sekit naria tauna ese do ia siaia. To nega haida, grup maragidia ese edia gabu kahirakahira ai idia noho kongrigeisen idia badinaia neganai namo do idia davaria.

²³ Nega haida, kongrigeisen maragidia dekenai taihu sibona idia noho. Bema unai ia vara, kongrigeisen lalonai guriguri ia gwauraia o hebou ia hakaua taihuna ese ena kwarana ia koua, unai amo ia ese Baibel ena hakaua herevana ia badinaia. (1 Kor. 11:3-16) Namona be do ia helai bona grup do ia vaira henia. Taihu be hebou dekenai pablik tok do idia henia lasi. To, idia ese orea amo idia mai gaudia idia duahia bona herevalaia, o unai kahana be do idia herevalaia hebou o haheitalai amo do idia karaia. Brans ofesi ese taihu ta do idia noia kongrigeisen ena revareva bona hebou do ia naria. Gabeai, tadikaka idia hegeregere neganai, unai maduna ibounai idia huaia diba.

SEKIT HEBOUHEBOUDIA

²⁴ Lagani ta ta ai, sekit ta lalonai idia noho kongrigeisen ibounai ese dina tamona sekit hebouna be nega rua idia abia. Unai moale negadia ai, idia lao taudia ibounai be Keristani hebamo karana amo edia “lalokau bada [idia] hahedinaraia” diba. (2 Kor. 6:11-13) Iehova ena orea ese momo do ia durua dalana ta ia laloa bena Baibel amo sinado bona program ena kahana idauidau ia hegaegaelaia. Unai ibounai be pablik tok, haheitalai, ekspiriens haheitalaidia, sibona hereva haheitalaidia, bona inteviu amo idia karaia. Unai hadibaia dala namodia amo, idia mai taudia ibounai ia hagoadaia. Unai bamona hadibaia herevadia ese hebou taudia ibounai ia hagoadaia. Inai hebou ai hahediba taudia matamatadia be bapatiso karana amo edia gwauhamata Iehova dekenai idia hamomokania.

RIJINOL HEBOUHEBOU

²⁵ Lagani ta ta ai, hebouhebou badadia be nega tamona idia karaia. Unai be dina toi Rijinol hebouheboudia, bona sekit haida lalonai idia noho kongrigeisen be unai hebou dekenai idia lao. To brens maragidia edia henunai idia noho kongrigeisen ibounai be gabu tamona ai idia hebou diba. Tano haida dekenai, edia noho dalana hegeregerena eiava Iehova ena orea ena hadibaia dalana hegeregerena unai hebou do idia karaia. Nega ta ta ai, intenesenel eiava spesol hebouheboudia idia karaia bona tano ma haida amo Witnes taudia tausen momo idia lao. Idia hanaia lagani momo lalodiai, taunimanima momo be Basileia ena sivarai namona idia kamonai, badina Iehova ena Witnes taudia edia hebouhebou badadia edia sivarai idia kamonai.

²⁶ Iehova ena taunimanima dekenai, unai hebou badadia be moale bona lalotamona ai idia tomadiho negadia. Unai hebouhebou amo hereva momokani ena diari idia halasia. Unai hebouhebou haida lalonai, sibona eda stadi ai o kongrigeisen ai do ita stadilaia eiava haroro gaukara ai do idia gaukaralaia pablikeisen matamatadia idia halalsia. Danu bapatiso idia karaia. Unai hebouhebou be mai anina bada hereva momokani lalonai ita tubu totona. Bona idia hahedinaraia Iehova ena taunimanima be tanobada hegegemadai Keristani tadikaka oreana lalonai idia noho, bona Iesu Keriso ena hahediba taudia edia toana badana idia hahedinaraia.​​—Ioa. 13:35.

²⁷ Kongrigeisen heboudia bona hebouhebou badadia dekenai ita lao neganai, goada ita abia Iehova ena ura ita karaia totona. Danu tanobada ena laloani karadia, iseda Keristani abidadama ia hadikaia diba gaudia, amo ita ia gimaia diba. Unai bamona hebouhebou ese Iehova dekenai hairai bona hanamoa idia henia. (Sal. 35:18; Aon. 14:28) Ita ibounai ita moale, badina Iehova ese inai nega dokona lalonai ena hereva amo ita ia durua noho.

LOHIABADA ENA ANIBOU

²⁸ Lagani ta ta ai, Iesu Keriso ena mase laloatao dinana ai, Iehova ena Witnes taudia be tanobada hegegemadai ai iena mase laloatao totona Memorial, eiava Lohiabada ena Anibou idia karaia. (1 Kor. 11:20, 23, 24) Iehova ena taunimanima dekenai inai hebou be mai anina bada. Baibel ese ita ia hagania unai Memorial hebouna ita karaia totona.​​—Luka 22:19.

²⁹ Baibel ena hereva hegeregerena Pasova ariana ena deit bona Memorial ena deit be idia hegeregere. (Eso. 12:2, 6; Mat. 26:17, 20, 26) Pasova ariana be lagani ta ta ai idia karaia, Israel taudia be lagani 1513 B.C.E. ai Aigupito amo idia ruhaia negana idia laloatao totona. Unai nega ai, Iehova ese edia hua ginigunana ena dina namba 14 ia makaia, Pasova mamoe do idia ania bona Aigupito do idia rakatania. (Eso. 12:1-51) Unai deit be Ierusalem ai March lalonai hua matamatana ia hedinarai negana amo, dina 13 oi duahia neganai do oi abia. Unai dainai nega momo Memorial be hua kuboruna ginigunana ia hedinarai neganai idia karaia.

³⁰ Mataio 26:26-28 lalonai, Iesu ese Memorial karaia dalana ia herevalaia. Inai be sene karana ta bamona lasi to Iesu Keriso ida guba Basileia dekenai do idia lohia taudia ese anibou ta ai idia gaukaralaia paraoa bona wain ia laulaulaia. (Luka 22:28-30) Gwauhamata Keristani taudia bona kamonai taudia ibounai ese Lohiabada ena Anibou dekenai idia lao bona itaia be namo. Unai amo idia ese Iehova Dirava be ena Natuna Iesu Keriso amo taunimanima ibounai totona ia karaia karana idia laloa bada. Memorial ia do vara lasi neganai, spesel pablik tok ta idia henia unai amo kamonai taudia edia ura ia habadaia Memorial dekenai idia mai totona bona Baibel stadi idia abia dae diba.

³¹ Iehova ena Witnes taudia be mai moale ida do idia vara heboudia totona idia hegaegae badina unuseniai “ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia.” (Heb. 10:24) Hesiai tauna mai ena kamonai bona mai ena aonega be idia noho hegaegae unai bamona heboudia amo iseda abidadama ia hagoadaia gaudia idia halasia. Namona be Iehova ena hesiai taudia bona kamonai taudia ibounai be unai hebou lao henia hanaihanai karana idia laloa bada. Iehova ese ena orea amo ia halasia gaudia be Dirava ena hesiai taudia ese idia laloa bada dainai, lalotamona ai idia noho bona gau badana be Iehova ita hanamoa.​​—Sal. 111:1.