Dirava ese Guba Bona Tanobada Ia Karaia

Iehova Dirava be iseda Havaraia Tauna. Ia ese ita itaia diba gaudia bona ita itaia diba lasi gaudia ibounai ia karaia. Ita itaia diba gaudia ia do karaia lasi neganai, aneru momo herea ia karaia. Aneru oi diba, a? Aneru be Iehova ese iena toana hegeregerena ia karaia. Idia ita itaia diba lasi, Dirava ita itaia diba lasi hegeregerena. Iehova ese ia karaia aneru ginigunana be iena durua tauna ai ia lao. Unai aneru ese Iehova ia durua hisiu, planeti idauidau, bona gau idauidau idia karaia totona. Planeti ta be ita noholaia tanobada hairaina.

Bena Iehova ese animal bona taunimanima totona tanobada ia hegaegaelaia. Bona tanobada ia diari totona dina ia karaia. Ia ese ororo, davara bona sinavai ia karaia.

Gabeai dahaka ia karaia? Iehova ia gwau: ‘Lau ese rei, tubutubu gaudia, bona au idauidau do lau karaia.’ Au huahua, uma aniani bona flaoaflaoa idauidau idia tubu matamaia. Bena Iehova ese idia roho, idia nahu, bona idia rau diba animal ibounai ia karaia. Bona animal maragidia bona badadia hegeregere, rabiti bona elefant ia karaia. Edena animal oi ura henia?

Bena Iehova be aneru ginigunana dekenai ia gwau: “Namona be taunimanima ita karaia.” Taunimanima be animal amo do idia idau. Badina gau matamatadia idia karaia diba. Idia hereva, kiri, bona guriguri idia gwauraia diba. Idia ese tanobada bona animal do idia naria. Oi diba tau ginigunana be daika? Mani ita itaia.