Iehova be Iona Dekenai Ia Haheauka

Asuria ena siti Nineva ai taunimanima edia kara be dika. Iehova ese ena peroveta tauna Iona ia hamaoroa Nineva dekenai do ia lao, bona idia do ia hadibaia edia kara idia haidaua totona. To Iona be unai ia badinaia lasi, Tarasisi ia lao henia bouti ai ia guia bona ia lao.

Davara ai lai gubana ia toa, bona bouti ai idia gaukara taudia be idia gari. Edia dirava dekenai idia guriguri: ‘Dahaka dainai inai ia vara?’ Bena Iona ese ia hamaoroa: ‘Egu kerere. Lau be Iehova amo lau heau. Davara dekenai lau umui negea, bona lai gubana do ia doko.’ Bouti ai idia gaukara taudia idia ura lasi Iona idia negea, to Iona ia noinoi loulou. Iona be davara dekenai idia negea neganai, lai gubana ia doko.

Iona ia laloa do ia mase. Ranu lalonai ia diho noho lalonai, Iehova dekenai ia guriguri. Bena Iehova ese gwarume badana ia siaia, bona Iona ia hadonoa. To Iona ia mase lasi. Gwarume lalonai Iona ia guriguri: ‘Lau gwauhamata oi do lau badinaia hanaihanai.’ Iona be dina toi gwarume ena bogana lalonai Iehova ese ia naria, bena gwarume ese tano dekenai Iona ia mumutaia.

Iehova ese Iona ia hamauria, to Iona be Nineva dekenai do ia lao lasi, a? Lasi. Iehova ese Iona ia hamaoroa lou Nineva dekenai do ia lao. Hari Iona be hereva ia badinaia. Ia lao bona kara dika taudia ia hamaoroa: ‘Dina 40 murinai Nineva be do ia dika.’ Bena Iona ia laloa lasi gauna ia vara—Nineva taudia ese Iona ena hereva idia kamonai bona edia kara idia haidaua. Nineva ena king ese ena taunimanima ia hamaoroa: ‘Dirava dekenai umui boiboi, bona umui helalo-kerehai. Reana ia ese ita do ia hadikaia lasi.’ Iehova ia itaia taunimanima idia helalo-kerehai neganai, Nineva ia hadikaia lasi.

Iona ia badu badina Dirava ese siti ia hadikaia lasi. Mani oi laloa: Iehova be Iona dekenai ia haheauka bona ia hebogahisi henia, to Iona be Nineva taudia ia hebogahisi henia lasi. Bona Iona be siti murimuri ai, tubutubu gauna ena ikerukeru henunai ia helai. Bena tubutubu gauna ia mase, bona ia badu. Iehova ese Iona ia hamaoroa: ‘Oi be unai tubutubu gauna oi laloa bada, to Nineva taudia oi laloa lasi. Idia dekenai lau hebogahisi bona idia lau hamauria.’ Point be dahaka? Nineva taudia edia mauri be mai anina bada, tubutubu gauna ia hereaia.