Ioane Ena Matahanai

Aposetolo Ioane be Patamo motumotu ai dibura tauna bamona ia noho neganai, Iesu ese ia dekenai vaira negana ai do idia vara matahanai idauidau 16 ia hahedinaraia. Unai matahanai ai, Iehova ese ena ladana do ia hahelagaia, iena Basileia do ia mai bona iena ura guba dekenai ia vara bamona be tanobada dekenai do ia vara dalana ia hahedinaraia.

Matahanai ta ai, Ioane ese Iehova ena terona hairaina ia itaia, bona elda taudia 24 ese ia idia hagegea, edia dabua be kurokuro bona edia kwarana ai golo korona ia noho. Unai terona amo kevaru bona guba ena boiboi regena idia mai. Unai elda taudia 24 be Iehova vairanai idia tui diho bona ia idia tomadiho henia. Matahanai ma ta ai, Ioane ese hutuma bada ia itaia idia be bese bona gado idauidau amo, bona Iehova idia tomadiho henia. Mamoe Natuna, Iesu unai, ese ia naridia bona mauri ranuna dekenai ia hakaudia lao. Gabeai, matahanai ma ta ai, Iesu be guba ai King ai ia lao bona elda taudia 24 be ia ida idia lohia. Unai murinai, Ioane ia itaia Iesu ese huala, Satani unai, bona ena demoni ia tuari henia. Iesu ese guba amo idia ia negea diho tanobada dekenai.

Bena Ioane ese laulau hairaina ta ia itaia, Mamoe Natuna bona 144,000 taudia be Siona Ororona ai idia gini. Danu aneru ta ia itaia ia roho lao bona taunimanima ia hamaoroa, Dirava gari henia bona Ia umui hanamoa.

Matahanai ma ta ai, Ioane ia itaia Aramagedono tuarina ia vara. Iesu bona ena tuari orea ese Satani ena oromana dikana ia hadikaia ore. Matahanai dokona ai, ia itaia guba bona tanobada ai maino ia vara. Satani bona ena natudia idia hadikaia ore. Guba bona tanobada taudia ibounai ese Iehova ena ladana helagana idia matauraia bada bona ia sibona idia tomadiho henia.