LESENI 10

Edena Dala ai Iehova Ena Witnes Taudia Edia Hebou ese Oi Ia Durua Diba?

Printaia Gauna

Iehova ena Witnes taudia edia hebou ta dekenai oi lao vadaeni, a? Bema nega ginigunana edia hebou dekenai oi lao reana do oi hemarai. Reana do oi laloa: ‘Unai hebou ai dahaka idia karaia? Dahaka dainai ia be mai anina bada? Dahaka dainai hebou lau lao be namo?’ Inai leseni ai, ma haida ida hebou karana amo, Dirava kahirakahira oi lao bona emu mauri hanamoa dalana do oi dibaia.

1. Dahaka dainai Iehova ena Witnes taudia idia hebou?

Baibel ia torea tauna ta ese ma haida ida hebou karana ena badina badana be inai bamona ia gwauraia: “Hebou badana lalonai, lau be ane amo Iehova do lau hanamoa.” (Salamo 26:12) Unai hegeregerena, tanobada hegegemadai, Iehova ena Witnes taudia be wiki ta ta ai idia hebou neganai idia moale, Dirava idia hanamoa, ane idia abia bona idia guriguri. Lagani ta ta ai, tomadiho totona hebou badadia idia karaia danu.

2. Emai hebou ai dahaka do oi dibaia?

Hebou ai Dirava ena Hereva ai hadibaia bona ‘edia anina ai gwauraia hedinarai namonamo.’ (Nehemia 8:8 duahia.) Hebou oi lao neganai, Iehova bona ena kara namodia do oi dibaia. Oi ia lalokau henia karana oi dibaia noho neganai, ia kahirakahira do oi lao. Danu oi do ia durua, mauri namona moalelaia dalana oi dibaia.—Isaia 48:17, 18.

3. Edena dala ai hebou ai oi bamoa taudia ese oi idia durua diba?

Iehova ese ita ia oda henia “ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia. Iseda hebou karana ita rakatania lasi.” (Heberu 10:24, 25) Hebou ai ta ta idia laloa bada taudia do oi hedavari henia, bona idia danu be oi bamona idia ura Dirava do idia dibaia noho. Do oi kamonai, idia be Baibel amo hagoadaia herevadia idia gwauraia. (Roma 1:11, 12 duahia.) Danu, edia mauri ai hekwakwanai idia haheaukalaia taudia haida do oi hedavari henia. Unai badina haida dainai Iehova ia ura hanaihanai ita hebou!

DIBA MA HAIDA ABIA

Oi tahua Iehova ena Witnes taudia edia hebou ai dahaka idia karaia, bona dahaka dainai unai hebou oi lao be namo.

4. Iehova ena Witnes taudia edia hebou

Keristani ginigunadia edia negai, Keristani taudia be hanaihanai Iehova tomadiho henia totona idia hebou. (Roma 16:3-5) Kolose 3:16 duahia, bena inai henanadai herevalaia:

Edena dala ai Keristani ginigunadia ese Iehova idia tomadiho henia?

Hari, Witnes taudia danu be hanaihanai edia tomadiho gabudia ai idia hebou. Edia hebou ai idia karaia gaudia oi itaia totona, VIDIO itaia. Bena kongrigeisen hebou ena laulau oi itaia bona inai henanadai herevalaia.

VIDIO: Kingdom Hall ai Dahaka Idia Karaia? (2:12)

Kingdom Hall ai idia karaia gaudia be edena dala ai Kolose 3:16 ai oi duahia hereva ida ia hegeregere?
Oi itaia vidio eiava laulau amo, dahaka gau ma haida oi moalelaia?

Korinto Iharuana 9:7 duahia, bena inai henanadai herevalaia:

Dahaka dainai Iehova ena Witnes taudia edia hebou dekenai moni idia noia lasi?

Emu hadibaia tauna ida wiki ena hebou ai do idia herevalaia kahana ta umui itaia.

Edena kahana unai hebou totona be oi ura henia eiava oi do ia durua?

Inai oi diba, a?

Tanobada hegegemadai idia karaia hebou edia gabu bona nega be jw.org ai oi davaria diba.

Laulau: Kingdom Hall ai hebou ia do matamaia lasi, hebou lalonai bona hebou murinai idia vara gaudia. Inai laulau be A ia lao D dekenai idia hedinarai lou.

A. Witnes tauna ta be hebou lalonai steij amo Baibel tok ta ia henia.

Emai hebou ai tok do oi kamonai, haheitalai, bona vidio do oi itaia. Hebou be ane bona guriguri amo ai kehoa bona koua
Hebou ena kahana haida ai helai taudia idia haere diba
Ibounai idia mai diba—famili, singul taudia, buruka taudia, bona natudia
Emai hebou be davana lasi. Iehova ena Witnes taudia be oi amo moni do idia gogoa lasi

5. Hebou dekenai oi lao totona, oi hekwarahi be namo

Iesu ena famili mani oi laloa. Lagani ta ta ai, tomadiho totona idia be Nasareta amo dina toi bamona idia raka, ororo idia hanaia bona Ierusalema dekenai idia ginidae. Luka 2:39-42 duahia, bena inai henanadai herevalaia:

Oi laloa Ierusalema dekenai idia lao totona be mai ena hekwarahi, a?
Dahaka dainai hebou lao totona oi hekwarahi be namo?
Oi laloa hebou lao totona oi hekwarahi be mai ena namo, a? Dahaka dainai?

Laulau: Iosepa, Maria, Iesu bona ena tadina ta be laolao ta totona idia hegaegae. 1. Iosepa be doniki latanai baege ia atoa, bona Maria be aniani gaudia ia hegaegae. 2. Mapu ese Nasareta ia lao Ierusalema ena dala ia hahedinaraia.

Baibel ia gwau, Iehova tomadiho henia totona ita hebou be mai anina bada. Heberu 10:24, 25 duahia, bena inai henanadai herevalaia:

Dahaka dainai hanaihanai hebou ita lao be namo?

HAIDA IDIA GWAU: “Ma haida ida oi hebou be anina lasi. To, ruma ai Baibel oi stadilaia be hegeregere.”

Edena siri eiava Baibel ena sivarai ese Iehova ena ura ia hahedinaraia?

POINT BADANA

Hebou oi lao karana ese oi do ia durua Iehova oi dibaia, emu hetura karana ia ida oi hagoadaia, bona ma haida ida ia umui tomadiho henia diba.

Riviu

Dahaka dainai Iehova ia ura hebou ita lao?
Iehova ena Witnes taudia edia hebou ai dahaka do oi dibaia?
Oi laloa hebou ese dala ma haida ai oi ia durua diba, a?

Leseni ia ore deit:

Tahua Gauna

Hebou ta dekenai oi lao bona unuseniai ma haida oi hedavari henia.

Gau ma haida:

Emu tahua gauna ma ta

REFERENS ITAIA

Bema hebou ta lao totona oi hemarai be edena bamona? Do oi itaia tau ta be unai bamona hemami ia abia, to gabeai hebou lao henia karana ia moalelaia.

Unai Welkam Karana Ai Laloaboio Diba Lasi (4:16)

Tau matamata ta be hebou ia moalelaia bona hebou reaia lasi totona ia karaia gaudia do oi itaia.

Hebou Lau Ura Henia Bada! (4:33)

Ma haida ese hebou lao henia karana idia laloa dalana oi dibaia.

“Dahaka Dainai Hebou Totona Kingdom Hall Dekenai Oi Lao?” (Websait atikol)

Dagedage raskol tauna ta be Iehova ena Witnes taudia edia hebou ta ia lao murinai, ena mauri ia haidaua dalana mani oi duahia.

“Hanaihanai Egu Ipidi Lau Abia Loaloa” (Gima Kohorona, July 1, 2014)