Iesu ena Mauri bona Gaukara

Samaria Hahinena la Hadibaia

IESU bona ena hahediba taudia ese Iudea idia rakatania bona Galilea dekenai idia lao. Samaria tanona ai idia raka hanai noho lalonai, edia tauanina idia manoka, laolao dainai, bena dina tubua ai ranu gurina ta badinai idia helai diho, Sukara hanuana kahirakahira dekenai. Lagani handred momo gunanai Iakobo ese unai guri ia geia, bona ia do noho ema bona hari.

Iesu be unuseniai ia laga-ani neganai, ena hahediba taudia idia lao hanua, aniani hoia totona. Samaria hahinena ta be ranu utua totona ia mai neganai, Iesu ese ia noia, ia gwau: “Ranu sisina oi henia lau dekenai.”

Iuda bona Samaria taudia idia hetura heheni lasi, badina idia badu heheni dainai. Unai dainai hahine ia hoa, ia gwau: “Badina be dahaka? Oi be Iuda tauna, lau be Samaria hahine, ma lau dekenai ranu oi noia, a?”

Iesu ese ia haere henia, ia hamaoroa, bema ia diba ia be daika, do ia noia “mauri ranuna” do ia henia. Ia gwau unai ranu be “mauri hanaihanai danu do ia henia.”

Hahine ia gwau: “Tau badana e, mani unai ranu oi henia lau dekenai.”

Iesu ia hamaoroa, ia gwau: “Oi lao, oiemu adavana oi boiria, umui ruaosi do umui mai.”

Ia haere, ia gwau: “Lau be mai egu adavana Lasi.”

Iesu ia gwau: “Oiemu hereva ia maoro vadaeni, oi gwau, ‘Lau be adavana lasi,’ badina oiemu adavana be 5 oi abia vadaeni, bona harihari oi abia tauna be oiemu adavana lasi.”

Ena hereva dainai hahine ia hoa, bena ia gwau: “Tau badana e, harihari lau diba vadaeni oi be peroveta tauna.” Ia gwau Samaria taudia be Gerisim Ororona ai idia tomadiho, to Iuda taudia be Ierusalem dekenai idia tomadiho. Unai amo ia hahedinaraia ia be tomadiho ia laloa momo.

Iesu ia gwau taunimanima be edena gabu dekenai idia tomadiho be herevana Ia gwau: “Dirava be Lauma, bona do idia tomadiho henia taudia ese lauma bona momokani dekena amo do idia tomadiho henia.”

Hahine ese ena hereva ia moalelaia. Ia gwau: “Lau diba Mesia, Keriso idia gwauraia tauna, be do ia mai, bona do ia mai neganai ia ese gau ibounai do ia gwauraia hedinarai.”

Iesu ese ia hamaoroa, ia gwau: “Tauna be lau inai.” Inai mani oi laloa: Hari hahine be dina tubua ai ranu utua totona ia mai, reana badina be hanua hahinedia ese ena kara idia badulaia dainai ia ura lasi ia idia danu do idia hedavari. To unai neganai Iesu ese ia hamaoroa ia be Mesia. Unai hereva be ma ta dekenai ia do gwauraia lasi. Bena dahaka ia vara? Gima Kohorona, June gauna, ese unai do ia gwauraia. Ioane 4:3-26.

◆ Dahaka dainai Samaria hahinena ia hoa, Iesu ese ia hereva henia neganai?

◆ Dahaka dainai Iesu ese mauri ranuna bona tomadiho gabuna ia hamaorolaia?

◆ Edena dala amo Iesu ese ia hadibaia ia be daika, bona dahaka dainai unai be hoa gauna?