Uhau bona Ulato Iehova ena Kudouna Idia Hamoalea
“Lauegu kudouna oi hamoalea, lau ia gwau henia tauna do lau haere henia totona.”—HEREVA LADA-ISIDIA 27:11.
1. Iseda mauri dalana ena anina be dahaka, iseda tamana bona sinana bona ita ia havaraia Diravana dekediai?
HEREVANA inai oi diba eiava oi diba lasi, oiemu mauri dalana be mai anina. Hegeregere, ia be mai anina oiemu tamana bona oiemu sinana dekenai. “Aonega merona ese ena tamana ia hamoalea, to kavakava merona ese ena sinana ena lalona ia hahisia.” (Hereva Lada-isidia 10:1; 23:24, 25) To gau badana be inai, oiemu mauri dalana amo oi ese ita ia karaia Diravana, Iehova oi hamoalea diba eiava ena lalona oi hahisia diba. Iehova ia gwau: “Lauegu natuna e, oi aonega, lauegu kudouna oi hamoalea, lau ia gwau henia tauna do lau haere henia totona.”—Hereva Lada-isidia 27:11.
2. Satana ese dahaka ia hepapahuahulaia, bona unai ena anina ita dekenai be dahaka?
2 Iehova ia gwau henia tauna be Satana Diabolo. Eden imeana lalonai, Satana ese mai anina bada gauna ia hepapahuahulaia matamaia dainai, Dirava ese ia haere henia be namo. Gau haida ese idia hahedinaraia, Diabolo ese Eva bona Adam ia hakereredia haraga murinai, ia ese Iehova ia gwau henia. Satana ena hereva ena anina be inai: ‘Dala oi kehoa lauegu bena lau ese taunimanima iboudiai be oi dekenamo do lau veridia oho.’ (Iobu 1:6-12) Unai dainai Iehova ese iena natuna ia noia, do ia aonega, Ia ese Satana ena hereva do ia haerelaia diba totona.
3. Dahaka dainai Iehova ena noinoi be mai anina bada Iesu dekenai, bona daidia danu ese Dirava ena kudouna idia hamoalea?
3 To Iehova ese daika inai bamona ia noia bona “Lauegu natuna” ia gwauraia? Iesu Keriso be Dirava ena natuna idau hereana, badina be Dirava sibona ese ia havaraia natuna tamona be ia. (Ioane 1:14) Danu, tau goevadaena ginigunana, Adam ese Dirava ia badinaia lasi, bona tau goevadaena ma tamona, Iesu, sibona be ia hegeregere, do ia hamomokania vaitani taunimanima ese Dirava idia badinaia hanaihanai diba. (1 Korinto 15:45) Unai dainai Iehova ena noinoi be mai anina bada Iesu dekenai. Bona Iesu ese ena Tamana ena lalona ia hahisia lasi. Satana be guna ia heagi, ia gwau taunimanima do ia tohodia neganai Dirava do idia badinaia noho lasi, to Iesu ena kamonai dainai Dirava ese Satana ia haere henia diba. (Heberu 2:14; 12:2) Danu, Keriso danu guba dekenai do idia lohia taudia iboudiai ese Iehova ena kudouna idia hamoalea, badina be ia idia badinaia noho ela bona mase.—Apokalupo 2:10.
4. Oiemu mauri do oi gaukaralaia dalana oi lalohadailaia neganai, dahaka gau mai anina bada oi laloa be namo?
4 To hari inai nega lalonai, ai bona umui bona uhau bona ulato, ita ibounai be edena bamona? Oi danu be emu kara amo oi hahedinaraia taunimanima ese Dirava do idia badinaia noho, eiava lasi? Momokani, oi emu Kara danu be mai anina inai hepapahuahu lalonai! (Salamo 147:11; 148:12, 13) Ena be reana inai oi diba lasi, to oiemu mauri amo oi ese Dirava oi durua eiava Satana oi durua. Oi ese Iehova oi hamoalea eiava Satana oi hamoalea. Momokani, namona be Iehova ena noinoi oi laloa, hegeregere ia ese oi sibona ia noia hegeregerena, ia gwau: “Lauegu natuna e, oi aonega, lauegu kudouna oi hamoalea, lau ia gwau henia tauna do lau haere henia totona.” (Hereva Lada-isidia 27:11) Oi ia havaraia Diravana ena kudouna hamoalea dalana bema oi tahua, unai amo moale do oi davaria, ani?
Aonega Karana
5. Dahaka dainai Iehova ena kudouna hamoalea karana be aonega karana?
5 Mani oi laloa, Iehova ese iseda lalona ia hagoadaia, do ita “aonega” totona. Dahaka dainai Iehova ena kudouna hamoalea karana be aonega karana? Badina be Iehova be iseda Tamana lalokauna, bona ia ura gau namo hereadia sibodia do ita davaria, bona iena hahegani ita dekenai be iseda namo havaraia totona. Isaia 48:17, 18 dekenai ia gwau: “Lau inai Iehova, emu Dirava; emu namo habadaia dalana oi lau hadibalaia noho, emu raka dalana namona dekenai oi lau hakaua noho. Egu hahegani bema oi kamonai henidia be namo; bena emu maino be sinavai ida do idia hegeregere, bona emu kara maoromaoro be davara ena hurehure ida do idia hegeregere.”
6. (a) Dahaka ese ia hahedinaraia Iehova ia ura mauri do oi moalelaia? (b) Dahaka oi reaia diba lasi?
6 Iehova be iseda Tamana lalokauna dainai, ia ura oi ese iena harihari gauna namona, mauri do oi moalelaia bada. Unai dainai ia gwau: “Tauhau e, emu tauhau negana lalonai oi moale, emu tauhau dinadia ai oiemu kudouna ese oi do ia hamoalea be namo, bona oiemu kudouna ena dala bona oiemu matana ese idia itaia gaudia edia dala dekenai oi raka.” To inai hereva amo oi ia boiria lasi, oiemu ura karadia iboudiai do oi karaia totona. Unai ita diba, badina be unai murinai ia be ma ia gwau: “To oi diba, inai gau iboudiai dainai Dirava momokani ese oi do ia hahemaoro henia.” (Kohelete 11:9) Oibe, oiemu kara ena anina oi reaia diba lasi; oiemu kara hegeregeredia Dirava ese oi do ia hahemaoro henia. Hereva momokanina be inai: “Bema tau ta aniani uhena ia hadoa, vadaeni unai bamona aniani sibona be do ia abia.”—Galatia 6:7.
7, 8 (a) Lalo-hekwarahi be edena bamona oi kokia diba bona hisihisi be edena bamona oi abia oho diba? (b) Dahaka dainai tauhau negana bona matamata negana be anina lasi?
7 Unai dainai, Iehova be ma ia gwau: “Unai dainai lalo-hekwarahi be emu kudouna amo oi kokia, bona hisihisi be emu tauanina amo oi abia oho; badina be tauhau negana bona matamata negana be anina lasi.” (Kohelete 11:10) Momokani, aonega karana be inai: Kara kereredia amo oi siri, unai kara do oi karaia bena unai dainai oi be gabeai do oi lalohisihisi garina. Haida ese oi do idia dibagania, do idia gwau oi ese gau namodia oi reaia noho—ma do idia gwau, bema oi inuinu kekero lasi, bema oi sihari kava lasi, eiava unai bamona kara ma ta oi karaia lasi, oiemu mauri be anina lasi. To idia kavakava momokani! Sikuli kekenina ta ia heudahanai murinai, ena kara ia herevalaia mai ena taitai danu, ia gwau: “Unai nega amo ema bona harihari lau lalo-hekwarahi.”
8 Vadaeni, umui uhau bona ulato e, Dirava ena sisiba umui badinaia mai emui aonega danu; lalohisihisi havaraia gaudia iboudiai be emui kudouna amo umui abia oho, unai bamona lalohisihisi be idia lebulebu eiava idia sibodia edia ura dalana idia badinaia taudia ese idia davaria. Idau negai toretore tauna ta ia gwau: “Taunimanima momo be edia lagani ginigunadia idia gaukaralaidia, edia lagani gabedia ai do idia lalohisihisi totona.” Madi, unai hereva be ia momokani! Bema taunimanima matamatana ta ese iena tauanina ena goada bona ena diba ia gaukaralaia kerere bena unai dainai ia be ena lagani gabedia ai hekwarahi momo ia davaria, iena tauhau negana bona matamata negana be momokani anina lasi! (Hereva Lada-isidia 22:3) Unai dainai umui aonega! Inai sisiba danu mani umui badinaia: “Oi ia havaraia Diravana be emu tauhau negana lalonai oi laloatao.”—Kohelete 12:1.
9. Bema emu matamata neganai Iehova oi laloatao, dahaka hahenamo do oi abia?
9 Bema Iehova be emu matamata negana lalonai oi laloatao, unai amo namo do oi davaria. Lalo-hekwarahi bona hisihisi idauidau amo do oi siri sibona lasi, to oi ia karaia Diravana Badana ena hesiai gaukara be hari inai nega lalonai do oi karaia mai emu moale danu, bona unai dainai emu mauri ena anina do ia bada. Danu, oi ese kohu be guba dekenai do oi haboua noho, unai kohu ese oi do ia hanamoa ela bona hanaihanai. (Mataio 6:19-21) Bema Iehova be hari oi laloatao dainai iena ura oi karaia noho, ia ese oi do ia laloatao bona “oiemu kudouna ena ura gaudia” be oi do ia henia; oibe, mauri mai moalena bona mai anina bada be Paradaiso lalonai do oi moalelaia ela bona hanaihanai!—Salamo 37:4; 133:3; Luka 23:43; Apokalupo 21: 3, 4.
Iehova be Edena Bamona Oi Laloa?
10 Namona be emu lalona oi hadaia Iehova ena hesiai gaukara do oi karaia, to bema unai bamona oi lalohadai ena badina tamona be oi laloa unai be aonega karana, unai be hegeregere lasi. Bema oi ese sibomu emu namo sibona oi laloa, oiemu inai tauna, Satana ese emu ura ta amo emu lalona do ia ania, Iehova ena hesiai gaukara amo oi do ia veria oho. Unai dainai Iehova ese oi ia noia, do oi aonega sibona lasi, to sibomu emu mauri be ia dekenai do oi gwauhamatalaia danu. Iesu ai gwau: “Iehova oiemu Dirava do oi lalokau henia mai emu kudouna ibounai ida.” (Mataio 22:37, NW) Ta be mai ena kudouna ibounai ida Iehova ia lalokau henia karana ena anina be oi diba a?
11. Emu Kudouna be Iehova oi henia, anina be dahaka? (b) Iosef ena sivarai ese edena bamona ia hahedinaraia, kudou ena ura maorona ese ita ia doria diba Iehova ena ura ita karaia totona?
11 Iehova oi lalokau henia mai emu kudouna ibounai danu, anina be oi lalokau henia bada bona oi ura bada emu kara amo iena kudouna do oi hamoalea bena ia ese Satana ena hereva do ia haerelaia diba. Unai oi lalo-pararalaia bona Dirava oi lalokau henia bada bona oi laloa momo dainai, iena ura do oi karaia diba mai emu ura bada danu; hedibagani negadiai danu unai bamona do oi karaia diba. Tauhau Iosef ese Iehova unai bamona ia lalokau henia dainai, hahine to mai ena ladana badana ese ia noia, ia gwau “Ita mahuta gabu tamona dekenai” neganai, Iosef ese ia haere henia, ia gwau: “Inai kerere badana do lau karaia, Dirava ena vairana dekenai do lau kara dika be edana bamona?”—Genese 39:7-9.
12. (a) Edena bamona oi hahedinaraia emu kudouna be Iehova oi henia? (b) Bema oiemu kudouna be Iehova oi henia lasi, oi be sibona dekenai edena bamona oi henanadai be namo?
12 Bema Iehova oi guriguri henia, bema oi hamaoroa oi ura ia be oiemu biaguna ai do ia lao bona oi ura iena hesiai gaukara do oi karaia ela bona hanaihanai, unai amo oi hahedinaraia oi lalokau henia. Unai dala amo oi be sibona oi gwauhamatalaia Iehova dekenai. Oi be unai bamona oi karaia vadaeni a? Bema lasi, badina be dahaka? Dahaka ese oi ia koua? Oiemu mauri laganidia be taina momo dainai Iehova bona Satana edia hepapahuahu ena anina be oi lalo-pararalaia a? Bona oi ura Iehova ena kudouna do oi hamoalea, a? Satana be momokani ia ura lasi Iehova do oi lalokau henia mai emu kudouna ibounai ida. Ia ura oi ese sibomu emu ura karadia do oi karaia, sibomu oi hamoalea totona. Daika do oi hamoalea, Iehova eiava Satana? Mani inai oi laloa namonamo.
13. Bema oi gwauhamata vadaeni bona oi bapatiso vadaeni, oi be sibona dekenai edena bamona oi henanadai be namo?
13 Bema Dirava oi gwauhamata henia vadaeni bona emu gwauhamata ena toana hegeregerena ranu lalonai bema oi bapatiso vadaeni, emu mauri dalana amo oi hahedinaraia emu kudouna ese Dirava ia badinaia momokani, a? Oi be dahaka oi ura bada? Oi ura motuka matamatana ta do oi hoia a? eiava oi ura moni do oi gogoa, dabua bona sibomu emu gau ma haida hoia totona a? Daika ena ura oi tahua guna—oiemu eiava Iehova ena? Iehova ena noinoi hegeregerena, emu kudouna be ia oi henia momokani a?
14. (a) Taunimanima matamatadia be mai edia dahaka gau namona? (b) Ia matamata neganai ena Dirava ia laloatao lasi tauna ena dika be dahaka?
14 Ena be taunimanima badadia edia diba bona edia aonega ese uhau bona ulato edia idia hanaia, to uhau bona ulato be mai edia gau namona, unai gau idia gaukaralaia diba Dirava idia hamoalea totona. Bible ia gwau: “Uhau edia hairai be edia goada.” (Hereva Lada-isidia 20:29) Unai dainai unai goada be hari oi gaukaralaia be namo. Oi ia karaia Diravana oi laloatao, buruka negana ena “dina dikadia idia do ginidae lasi neganai,” unai neganai emu tauanina do ia manoka bona do ia gaukara namonamo lasi. Taunimanima ta be ia matamata neganai bema iena Dirava ia laloatao lasi dainai, ia buruka neganai ena kara namona ta be Dirava vairanai ia gwauraia hedinarai diba lasi, madi! Unai be “anina lasi momokani!” (Kohelete 12:1-8) Vadaeni, oi be do mai emu goada neganai, oi ia karaia Diravana oi laloatao mai emu aonega danu. Dirava ena hesiai gaukara oi karaia noho mai emu kamonai danu, bena oi do ia hahemaoro henia neganai, emu kara namodia do ia laloatao bona davana namona, mauri hanaihanai, be oi do ia henia.—Heberu 6:10-12; Kohelete 12:13, 14.
Idia ese Dirava ena Kudouna Idia Hamoalea
15. Edena uhau, edia goada be Dirava ena hesiai gaukarana lalonai idia gaukaralaia taudia, be Bible ese ia gwauraidia?
15 Bible lalonai uhau momo edia sivarai idia torea, idia ese edia “hairai”—edia goada unai—be Iehova ena hesiai gaukara lalonai idia gaukaralaia. “Uhau,” idia raka haraga diba taudia, be Gwauhamata Tanona dekenai idia raka loaloa, tano taudia edia goada itaia totona. (Iosua 6:22, 23; 2: 15, 16, 23) David, ia do tau matamatana neganai, ese “uhau 10” Nabal dekenai ia siaidia, do idia noinoi henia totona. (1 Samuel 25:4, 5) Gavana Nehemia ena nega lalonai, Iuda taudia ese Ierusalem ena magu idia haginia lou noho lalonai, edia inai taudia ese idia tuari henidia gwauraia; unai negai daidia ese unai gaukara aukana idia karaia? Nehemia ia gwau: “Egu uhau edia orea kahana be magu idia gaukaralaia, ma kahana be edia io kesi peva bona tuari dabuadia idia abidia hegaegae.” (Nehemia 4:16) Bona Dirava ese Anania bona ena adavana Sapira be edia koikoi dainai ia hamasedia neganai, “uhau taudia” ese idia huadia lao, idia guridia.—Kara 5:5, 6, 10.
16. Gunaguna taunimanima matamatadia haida ese Dirava ena hesiai gaukara edena bamona idia karaia?
16 Momokani, uhau bona ulato be hesiai gaukara idauidau karaia totona sibodia idia henia negadiai, unai ese Iehova ema kudouna ia hamoalea. Idia haida ese edia tauanina edia goada ia hanaia gauna be Iehova ena hesiai gaukara lalonai idia gaukaralaia. Elihu ia gwau: “Lau be tau matamatana.” To, Iehova ese ia hagaukaraia, Iobu ena lalona hamaoromaoroa totona. (Iobu 32:4-6) Samuel ia do “mero” neganai, hesiai gaukara be Iehova ena guriguri kalagana dekenai ia karaia matamaia, Silo dekenai. (1 Samuel 2:18) “Kekeni ta, ena be ia be hesiai kekenina ta Naaman ena ruma lalonai, to Iehova ena peroveta tauna ena kara ia gwauraia hedinarai mai ena goada danu, ia gari lasi. (2 Hanua Pavapavadia 5:2-4) Iehova ese Ieremia na peroveta tauna ai ia halaoa neganai, Ieremia ia gwau: “Lau be tauhau mo.” Ieremia 1:5, 6) Bona “hari uhau 4-osi”—Daniel mai ena bamona toiosi—edia sivarai be bada, badina be Iehova ena hesiai gaukara idia karaia goevagoeva, Babulono dekenai idia noho neganai! (Daniel, karoa 1 bona 3) Paulo ena vavana, “tauhau” ta, ta ia kara mai ena boga-auka danu, Paulo hamauria totona. (Kara 23:16-22) Uhau ma ta. Timoteo, be ia mero maragi negana amo Buka Helagadia dekenai ia manada vadaeni, bona iena tauhau negana be Iehova ena hesiai gaukara lalonai ia gaukaralaia.—2 Timoteo 3:15; Filipi 2:19-23; 1 Korinto 4:17.
Dirava ena Kudouna Hamoalea Hari Inai Nega Lalonai
17. Uhau bona ulato, hari inai nega lalonai Iehova idia hamoalea taudia, be ia ese edena bamona ia perovetalaidia?
17 Idau negai uhaudia bona ulatodia sibodia lasi, to ma haida danu ese Dirava ena kudouna idia hamoalea, iena hesiai gaukara be mai edia kamonai danu idia karaia dainai. “Dirava ia gwau, Inai nega do kahirakahira ia doko neganai, lauegu laumana dohore lau bubua diho, taunimanima ibounai dekenai, bona umui emui natudia tau bona hahine dohore idia peroveta karaia, bona emui uhau taudia be Dirava ena hunia gaudia do idia itaia.” (Kara 2:17; Ioel 2:28) Unai hegeregerena, hari inai dina gabediai Keristen taudia matamatadia, uhau bona ulato, ita davaridia, idia ese Iehova idia hamoalea noho! Ita ibounai hegeregerena, hari Witness taudia matamatadia idia goevadae lasi, to idia be Keristen karadia idia goadalaia noho. Iehova ena kudouna hamoalea daladia idia tahua.—Hereva Lada-isidia 27:11; 3:1, 2.
18, 19. Dahaka gaukara be hari inai nega lalonai idia karaia be namo, bona dahaka dainai uhau be hegeregere unai gaukara do idia karaia?
18 Hari inai nega lalonai, Iehova ia ura iena Basileia be tanobada hegegemadai do idia harorolaia, gaukara bada hereana unai. (Mataio 24:14) Kingdom Hall be tomadiho totona idia haginidia be namo, bona hebou rumadia badadia sekit hebouheboudia totona danu. Tano momo dekenai, edia faktori idia habadaia Bible bukadia momo karaia totona, bona Betele taudia edia noho gabudia idia habadaia danu. Unai gaukara be mai hekwarahi bada, Nehemia ena nega lalonai hanua ena magu haginia gaukarana hegeregerena, unai dainai uhau mai edia goada ese unai gaukara momo idia karaia.
19 Unai bamona uhau ese gaukara aukadia momo idia karaia; lagani ta ta iboudiai idia ese Bible bukadia momo herea idia printaia, idia hakapua, bona idia siaia lao. Iehova ena Witness taudia edia hedikwota dekenai, New York bona Watchtower Uma Gabudia dekenai, uhau 1,400 idia gaukara noho, lagani 26 idia do abia lasi taudia unai. Bona edia hesiai gaukara be Monday ela bona Saturday idia hekwarahilaia gaukarana sibona lasi; Saturday bona Sunday ai idia be edia kongregesen taudia danu haroro gaukara ruma ta ruma ta dekenai idia karaia bona Keristen heboudia dekenai idia hebou danu. Iehova ena kudouna idia hamoalea bada!
20. (a) Uhau bona ulato ese pioneer gaukara edena bamona idia durua? (b) Taunimanima matamatadia, pioneer gaukara idia karaia lasi taudia, be sibodia dekenai edena bamona idia henanadai be namo?
20 United States lalonai, unai bamona lagani taudia 12,700 be idia danu idia gaukara hebou, regular pioneer gaukara idia karaia. Tanobada ena gabu ma haida dekenai, taunimanima matamatadia ma tausen momo be pioneer gaukara idia karaia noho. Bema oi be tauhau ta eiava haneulato ta to pioneer gaukara oi do karaia lasi, dala oi tahua diba, Iehova ena ura be oiemu mauri lalonai oi atoa guna totona a? Anina be, dala do oi tahua guna lasi, moni gaukarana mai ena pei badana do oi abia, bena oi do headava bona emu bese do oi havaraia totona. Dirava bona Satana edia hepapahuahu ena anina oi lalo-pararalaia a? Oi ura dika ibounai be ita ia karaia Diravana Badana ena ladana amo do idia kokia a? Bema unai bamona, Iehova ena hesiai gaukara oi karaia badabada be maoro, ani? Unai anina be, umui momo be do umui volantia, Betele rumadia dekenai umui gaukara totona eiava pioneer gaukara umui karaia totona.
21. (a) Iehova ese oi edena bamona ia boiria, bona unai dainai dahaka oi karaia be namo? (b) Dahaka dainai ita diba momokani ma taunimanima matamatadia momo be Iehova ena boiboi do idia haere henia Isaia ese ia haere henia hegeregerena?
21 Oi kamonai! Iehova ese oi ia boiria, oibe, oi ia noia, do oi durua, Satana ena hereva dikadia ia haerelaia totona. Isaia hegeregerena, oi ese Iehova ena henanadai oi kamonai a, ia gwau: “Daika do lau siaia? Daika be ai dainai do ia lao?” Namona be oi be mai emu aonega danu oi haere, Isaia ia haere hegeregerena, ia gwau: “Lau inai! Lau oi siaia.” (Isaia 6:8) Ai diba momokani umui matamata taudia momo be unai bamona do umui karaia, badina be Dirava ena Hereva ia gwauhamata: “Oiemu tuari dinana lalonai oiemu orea taudia be sibodia do idia henia mai edia ura danu. . . . Oiemu uhau [bona ulato] edia orea be daba rere ena paripari bamona.” (Salamo 110:3; 148:12, 13) Bona unai bamona do oi karaia neganai do oi moale, badina be oi diba Iehova ese oi ia itaia bona oi ia moale henia, iena kudouna oi hamoalea noho dainai!
Henanadai Haida
□ Dahaka dainai iseda mauri dalana be mai anina bada Iehova dekenai?
□ Dahaka dainai Iehova ena kudouna hamoalea karana be aonega karana?
□ Edena bamona ita hahedinaraia diba, iseda kudouna be Iehova ita henia vadaeni?
□ Gunaguna daidia ese Iehova ena kudouna idia hamoalea, bona edena dala amo?
□ Hari inai negai daidia ese Iehova ena kudouna idia hamoalea noho, bona edena dala amo?
10. (a) Dirava ena hesiai gaukara oi karaia gwauraia neganai, dahaka dainai aonega dalana sibona oi lalohadailaia be hegeregere lasi? (b) Iehova be edena bamona ma ia noinoi lou?
[Blurb on page 20]
Matamata taudia ese Dirava ena taravatu idia utua murinai, lalohisihisi idia davaria
[Picture on page 21]
Uhau ese Dirava ena kudouna idia hamoalea, Ierusalem ena magu haginia gaukarana idia durua neganai