Iehova ese Egu Kara Ia Hanamoa
Samuel B. Friend ena sivarai
GUNAGUNA, July 1952 lalonai Saturday hanuaboi iboudiai, Little Rock hanuana ai, Arkansas dekenai, lau ese kantri-westen miusik lau anelaia. Taunimanima momo idia mai kamonaia totona, bona reidio steisini ta ladana KLRA ese unai konset ena miusik ia halasia dainai ma taunimanima tausen momo ese hora toi lalonai edia reidio amo idia kamonaia danu. Unai neganai televisen idia do abia lasi United States ena south kahana dekenai.
Hanuaboi ta, ane lau abia murinai tau ta MGM (Metro-Goldwyn-Mayer) ena rekodi kampani amo, be lau dekenai ia mai, ia gwau: “Lau ura ane oi abia aiemai rekodi kampani totona.” Bena maoromaoro rekodi ena kontraka amo moni bada do lau abia dalana ia gwauraia. Ia gwau, wiki momo lau ia kamonai ane lau abia neganai, bona ia laloa bema rekodi dekenai ane lau abia do lau kwalimu momokani.
Lau hamaoroa lau ura lasi, bena ia hoa. Lau hamaoroa, unai konset dekenai ane lau abia moni sisina lau davaria totona, bena unai amo lau bona egu adavana ese pioneer gaukara ai karaia noho diba. Lau ura lasi miusik bisinesi lau tahua momo.
Lagani 1952 ena dokonai Arkansas-Little Rock dekenai televisen idia abia. Televisen program ena dairekta ia ura do idia halasia program ginigunana be lau ese do lau naria. Mai moale danu unai gaukara lau abia dae unai televisen steiseni dekenai. Lau hamaoroa wiki ibounai gaukarana lau ura lasi, to dina haida sibona. Vadaeni ia gwau program ginigunana do idia halasia murinai lau do ia hadibaia.
Unai program ginigunana be namo herea momokani. Mavaru o miusik gadaralaia dalana idia diba momo taudia ta ta edia ladadia lau boiridia bena idia mai, edia kara idia karaia totona, bona lau ese ane haida lau anelaidia danu. Unai program ia ore murinai, dairekta lau noia dina haida wiki lalonai do lau gaukara. Ia gwau, “Lasi, lau ura lasi dina haida sibona oi gaukara. Lau ura wiki ibounai oi gaukara.” Iena hereva ia haidaua lasi dainai lau vairanai dala rua idia noho; unai dainai namona be lau lalohadai dahaka do lau karaia. Lau be Arkansas ena televisen steisini ginigunana dekenai gaukara namona do lau abia diba. To, unai gaukara ese egu Tamana guba dekenai, Iehova Dirava ena hesiai gaukara, pioneer gaukara unai, ia hereaia lasi! Unai dainai unai gaukara lau dadaraia.
Unai program ia ore murinai, lau bona egu adavana Jean ai kiki hebou, bona lau ese lau abia hidi dalana ia ura henia danu. Unai hanuaboi ai ruma dekenai ai giroa lao neganai, revareva ta ai davaria. Unai revareva ena hereva ese lau ia boiria sekit naria gaukarana lau abia dae totona, unai anina be Iehova ena orea taudia edia kongregesen do lau vadivadi henidia, lauma dalanai hagoadadia totona. Lau diba, dala maorona lau abia hidi dainai Iehova ese lau ia hanamoa.
Dala Rua Ma Lau Lalohadailaia
Ma nega ta lau dekenai dala rua idia noho lau lalohadailaia totona. Haisikuli, Mount Ida, Arkansas dekenai lau haorea murinai, lau bona egu kakana Fred be westen miusik gadaralaia oreana dekenai ai vareai, ena ladana Texas Rangers. Lagani 1930 murinai, lagani toi lalodiai lau be unai orea taudia danu America ena south kahana hanuadia ai lao unai miusik gadaralaia totona. Gabu daudau Chicago bamona amo danu, taunimanima ese davana bada idia henia gwauraia aiemai band durua totona. Mississippi bona Arkansas hanua dekediai miusik heluluna idia karaia bona aiemai band be band iboudiai ia hereadia, ai be namba 1 gabuna ai abia, bona Arkansas dekenai lau ese tatau iboudiai lau hereadia ane abia dekenai, lau be namba 1 gabuna lau abia. Unai dainai bema unai gaukara lau tahua do lau kwalimu momokani diba.
To lau daradara sisina. Lagani 1920 lalonai lau be mero maragi neganai, Watch Tower Society oreana taudia be aiemai ruma bese idia vadivadi henia. Unai haroro loaloa taudia ese aiemai hanua, Hot Springs ena west kahanai, idia vadivadi henia neganai, aiemai ruma dekenai ai abidia dae idia mahuta totona. Aiemai ruma bese taudia idia ura edia hereva idia kamonai henia bona edia hahediba herevadia idia abia dae danu.
Unai dainai, lau tubu daekau lalonai lau ese Bible ena hereva momokani lau diba sisina. Danu, unai haroro loaloa taudia edia hereva bona Gima Kohorona magasin dekenai lau duahia sivaraidia lau gwauraidia egu turadia dekenai. Lauegu turana ta ena ladana be Floyd Garrett. Lagani 1930 bona 1940 ihuanai ai sikuli hebou. Floyd ese lau hadibaia herevadia ia abia dae, bona gabeai ena mauri ia gwauhamatalaia Dirava dekenai, bona lagani 1940 dekenai pioneer gaukara ia hamatamaia. Hari ia be loaloa hesiai tauna ena gaukara ia karaia.
Vadaeni, band taudia danu lau loaloa hebou neganai, egu tamana ese egu hanua dekena amo revareva ia siaidia bona loaloa hesiai taudia edia vadivadi herevadia ia toredia lau dekenai. Vadaeni, lagani 1938 dokonai, ai be Jackson hanua, Mississippi dekenai ai noho neganai, Watch Tower Society ena president, J. F. Rutherford be London, England ena hebouhebou dekenai ia henia herevana be rekodi ta dekenai lau kamonai, ena ladana be “Tanobada Hahonua.” Unai hereva ese egu lalona ia veria hereva momokani lau laloa lou totona. Lau diba unai gaukara rua amo tamona sibona lau abia hidi diba. Vadaeni murina lagani dekenai unai band lau rakatania bona lau giroa lao egu hanua, Arkansas dekenai.
Lauma Dalanai Lau Tubu
Unai neganai lau ese miusik, haoda bona labana karadia lau laloa maragi bona Basileia lau tahua guna egu mauri lalonai, unai dainai lauma gaudia edia anina lau moalelaia. (Mataio 6:33) Iehova lau dibaia matamaia bona lau ura dikadika ena hesiai gaukara lau karaia. Egu mauri lau gwauhamatalaia Iehova dekenai bona bapatiso lau abia November 27, 1939 ai, Arkansas ena keru sinavai maragina dekenai. Daudau lasi murinai egu sinana danu be bapatiso ia abia.
Lau ese motuka gunana ta lau hoia, ena davana be K50, bona November 1940 lalonai, egu mauri lagani be 23 neganai, lau ese pioneer gaukara lau hamatamaia Arkansas gunika hanuadia dekenai. Unai dainai lau moale bada herea! Badina be lau daradara lasi, lau diba Iehova ese lau ia durua, bona unai sibona be gau hereadaena.
Unai nega lalonai, Hot Springs gunika dekenai mamoe bamona taudia tahudia be ia auka. Motuka be dala dikadia ai ai haheaua, sinavai maragidia ai hanaia, bena motuka ai rakatania bona aena amo dala maragidia ai ai raka, unai ruma lao henidia totona. Lau ese Bible hadibaia bukadia lau hariharilaidia neganai, au huahua, uma aniani, kokoroku, gatoi bona aniani idauidau lau abia, unai buka edia davana. Unai neganai lau karaia gaukarana lau do laloatao noho mai egu moale danu.
Tuari Laganidia edia Hekwakwanai
Lagani 1941 ai, United States ese Tanobada Ibounai Tuarina Iharuana lalonai ia vareai neganai, Iehova ena Witness taudia idia ura lasi tuari lalonai idia vareai, unai dainai dagedage bada herea ia vara idia dekenai. (Isaia 2:4) Unai tano ena gabu momo dekenai taunimanima idia hebou ia idia dagedage henia totona, bona Witness uhaudia tausen momo idia atodia dibura rumadia dekenai. Ena be lau be haroro tauna ta dainai gavamani amo gwaumaoro pepana 4-D lau abia lau tuari lasi totona, to taunimanima ese lau idia do dagedage henia, idia gwau lau idia hamasea danu.
Nega ta tau ta ese ipidi ia abia isi bona lau dekenai ia duduia, ia gwau: “Lauegu tano amo oi siri; bema lasi, oi do lau pidia!” Iena ruma lau raka henia lalonai ia diba lau be Witness tauna. Vadaeni kara haraga lau rakatania. Danu, Bible amo lau stadi henia tauna ta ia gwau ia kamonai taoni ena east kahana dekenai tau ta ia naria noho, ia hegaegae ena ruma dekenai do lau vadivadi neganai lau do ia hamasea ia gwau.
Hua haida murinai lau be taoni ena east kahana dekenai haroro gaukara lau karaia neganai, ruma hahinena ta ese lau ia abia dae ena ruma dekenai,bona rekodi ta pikap dekenai lau atoa Tadikaka Rutherford ena Bible herevana ta ia kamonaia totona. Unai rekodi hereva noho lalonai, hahine ena adavana raka vareai bona ia gini lau bona iduara ihuanai, bona ena kaia ia abia hegaegae. Ia ura diba dahaka lau karaia ena ruma dekenai, to lau gwauraia neganai egu hereva ia koua. Vadaeni ena kaia lau dekenai ia duduia, ia gwau: “Pepe do oi saluti henia a? Ami dekenai do oi tuari a?” Vadaeni lau lalo-parara egu stadi tauna ia herevalaia tauna be inai, bona ia ura lau ia hamasea, unai dainai dala namona lau tahua haerelaia totona.
Unai tau lau nanadaia, lau gwau: “Bema ta ia gwau oi ese Nazi ena hahediba oi abia dae, emu lalona ena mamina be edena bamona?” Mai egu badu sisina danu ma lau gwau: “Lau be oi hegeregerena Hitler lau ura henia lasi. Lau ura henia gauna tamona be taunimanima lau durudia idia be Bible ena hereva idia lalo-pararalaia totona.” Unai hereva ese unai tau ena badu ia haorea, bena ena ruma lau rakatania bona bero ta lau davaria lasi. Ruma lau rakatania lalonai, Iehova lau tanikiu henia badina be lau ia naria bona lau ia durua unai tau lau haerelaia namonamo totona.
Ma nega ta ai, lau ese Bible hereva be rekodi amo lau halasia tau ta ia kamonaia totona. Ia kamonai noho lalonai lau itaia ena vairana ia idau. Ena vairana ia huaia, bona ia kurokuro bamona. To unai rekodi ena hereva ia kamonaia noho. Rekodi ena hereva ibounai ia ore murinai, lau nanadaia unai hereva ia moalelaia eiava lasi. Ia laloa sisina bena ia gwau: “Guna lau laloa inai be Iehova ena Witness edia hereva, bona oi lau hamasea gwauraia.” Vadaeni lau hanamoa, ia kamonai namonamo guna dainai, bena Bible sivarai pepana lau henia bona lau rakatania haraga. Unai pepa amo do ia diba lau be Witness tauna, to lau ura lasi lau noho unai ia diba neganai.
Lau tubu daekau hanuana, Bonnerdale dekenai kongregesen matamatana idia haginia. Lau be unai kongregesen ena gunalaia tauna ena dagi lau abia lagani rua lalodiai, bona unai nega lalonai pablisa taudia idia momo daekau 17 dekenai, vadaeni unai murinai sekit naria tauna ese lau ia noia, Hot Springs hanua dekenai do lau lao, unai kongregesen gunalaia dagina do lau abia totona. Unai bamona lau karaia lagani 1942 dekenai. Unai kongregesen ena lagani bada taudia lau bamodia dainai, lau idia durua lauma dalanai lau goada lau lao totona.
Unai nega lalonai, Iehova ese lau ia naria namo herea. Nega ta lau be moni lasi motuka laiseni ena davana K5 do lau henia. Iehova dekenai lau gurigurilaia bena unai murinai haroro gaukara dekenai lau lao. Unai dabai taunimanima ta ese K5 ia henia kava lau dekenai!
Betele Gaukara
Lagani 1944 ai lau idia siaia Joliet, Illinois dekenai special pioneer gaukara lau karaia totona. Unuseniai lau noho neganai, Informant (hari be Iseda Basileia Gaukara) pepana lalonai Betele gaukara Brooklyn, New York dekenai idia kikilaia. Vadaeni aplikesen lau siaia neganai lau idia abia dae.
March 1945 ai Betele dekenai lau ginidae neganai, taunimanima 230 sibona idia gaukara Brooklyn ena hedikwota gabuna dekenai, to hari 2,500 mai kahana idia gaukara noho! Lagani 5 lalodiai mai moale danu Betele ena gaukara idauidau lau karaia, Hesiai Gaukara Naria Dipatmen dekenai danu. Vadaeni dina ta Tadikaka Knorr, Society ena president, ese lau ia boiria ena opesi dekenai.
Lau hoa badina ia gwau: “Oi ai abia hidi, Society ena reidio steisinsi WBBR do oi naria totona.” Lau hamaoroa, lau gwau: “Reidio steinisi naria dalana lau diba lasi.”
Ia gwau: “Guna reidio steisini ta dekenai miusik oi gadaralaia ani?”
Lau gwau: “Unai be momokani, to steisini naria dalana be ma ia idau.”
Tadikaka Knorr ese lau ia hagoadaia unai gaukara lau karaia totona, bona lau hamaoroa do lau karaia toho mai egu goada ibounai ida. Unai gaukara be mai hekwarahina, to unai maduna amo hahenamo bona moale bada lau abia. Betele ena memba taudia 90 bamona be reidio program dekenai idia vareai wiki ta ta ai. Idia halasia program dekenai, hora 10 10 amo hora 6 mai kahana lalodiai be miusik idia halasia, bona wiki iboudiai miniti 15 dekenai ane lau abia danu. Nega orena dekenai Bible ena hereva idia gwauraia hedinaraia, Bible study idia karaia, bona henanadai Bible dekenai idia haerelaia, bona dala idauidau ai Bible ena sivarai idia halasia, tanobada ena sivarai, bona taunimanima edia mauri naria taravatudia idia halasia danu.
Tamagu Lau Bapatisoa
Lagani 1950 ai Betele gaukara amo lau livi neganai, lau moale bada herea badina egu tamana lau bapatisoa! Lagani 27 lalodiai ia ese Society ena buka bona magasin ia duahidia, to ia abia dae haraga lasi Iehova ese orea ta ia gaukaralaia Iena hereva momokani ia halasia totona. (Mataio 24:45-47) Guna, Tamagu be Dirava abia dae lasi tauna ta. Dahaka dainai ia be unai bamona?
Ena sivarai be inai bamona: Egu kakana Jim ena mauri lagani be 13 sibona neganai ia mase, unai dainai haroro tauna ia gwau, hel lahina dekenai ia lao badina ia be dubu oreana ena memba ta lasi. Tamagu ese unai hereva ia kamonai neganai ia hoa. Sibona ia laloa: ‘Dahaka dainai dirava dikana, taunimanima ia hahisidia diravana, do lau tomadiho henia?’ Ia laloa unai haroro tauna ia gwauraia herevana be Bible dekenai ia noho. Unai dainai ia be Dirava abia dae lasi tauna ai ia lao. To ena abidadama Dirava dekenai ma ia abia lou, ia ese Bible Student (Iehova ena Witness) hahinena ta danu idia kiki matamaia neganai, badina be unai hahine ese Bible amo ia hahedinaraia, hel be taunimanima hahisidia gabuna lasi, to ia be taunimanima edia gara gabuna sibona.
Headava
Lagani 1952 ai ma gau ta lau lalohadailaia. Jean Mylton, pioneer goada kekenina, bona lau ai ura ai headava. Unai neganai bema Betele dekenai ia gaukara tauna ia headava, adavana ia mailaia diba lasi Betele dekenai idia noho totona, unai dainai ta ese Jean ia nanadaia dahaka do ia karaia. Ia hamaoroa ai be Little Rock, Arkansas dekenai pioneer gaukara do ai karaia. Ena turana ma ia gwau, “Edena bamona do umui lao diba, badina emui kohu ta be lasi?”
Momokani, aiemai moni be bada lasi, badina lau ese lagani 12 bona Jean ese lagani 7 lalodiai pioneer gaukara ai karaia dainai. Jean ena turana ia gwau, hanamoa be hua 6 lalodiai moni gaukara ai karaia guna bona ‘K600 ai haboua motuka hoia totona.’ Jean ese lau ia hamaoroa neganai, lau gwau: “Ita diba lasi do ita hegeregere eiava lasi, badina ita do karaia toho lasi dainai. Bema do ita hegeregere lasi, vadaeni pioneer gaukara do ita rakatania bona moni gaukara do ita karaia, to namona be ita karaia toho guna.”
Ai hoa badina aiemai headava ariana dekenai motuka ta bona K600 ai idia henia. Iehova ia diba unai gaudia dekenai ai dabu, bona ai ia henia badina emai lalohadai be pioneer gaukara do ai karaia noho. (Malaki 3:10) Ai headava murinai hua haida ai pioneer noho, bena lagani 1953 ai lau idia boiria sekit gaukarana lau karaia totona. Lagani 1954 dekenai ai idia boiria Watch Tower Bible School of Gilead dekenai ai vareai totona. Unai sikuli ai haorea murinai, lagani rua lalodiai lau be distrik gaukarana lau karaia lalonai, Jean ese lau ia bamoa loaloa.
Idau Gabu Dekenai Ai Gaukara bena Betele Dekenai Ai Giroa Lao
Lagani 1957 ai Pasco, Washington dekenai haroro totona ai hebou neganai, revareva ta ai davaria President ena Opesi amo. Tadikaka lau noidia nega sisina hebou do lau rakatania, bona lau bona egu adavana ai lao ma daiutu ta dekenai unai revareva duahia totona. Unai revareva amo ai idia boiria Mexico dekenai do ai lao bona unai branch naria dagina do lau abia totona. Lau hoa bada herea! Badina Spanish gado ai diba lasi, bona branch naria gaukarana lau diba bada lasi. To Iehova ai abidadama henia; ai kwalimu dalana tamona be unai. Haroro ena teritori be bada herea bona gaukara hegaegaelaia gaukarana be bada, to tadikaka unai gabu dekenai idia ura dikadika idia heduru, bona Iehova ese edia gaukara ia hanamoa.
Lagani haida Mexico dekenai ai gaukara noho murinai, lau idia boiria lou Gilead School, New York dekenai lau vareai totona. Unai sikuli lau haorea neganai, lau bona Jean idia siaia ma gabu ta, Guatemala dekenai, sekit gaukara ai karaia totona. To gabeai Jean be ia gorere dainai ai giroa lao United States dekenai bona unuseniai sekit gaukara lau karaia noho. Lagani haida lalodiai lau ese Kingdom Ministry School be elda taudia totona lau karaia danu. Bena murinai ai giroa lao Brooklyn dekenai Betele gaukarana ai karaia totona, bona ai be inai gabu namona dekenai ai noho ia mai harihari.
Hari egu mauri lagani be 69; pioneer bona Betele gaukara lau karaia lagani 45 lalodiai, bona unai nega lalonai hesiai gaukara ena hahenamo idauidau lau moalelaia. Momokani, Iehova be namo herea bona ena hahenamo be momo. Egu adavana Jean, lagani 34 lalodiai lau ia badinaia hahinena, be hahenamo bada lau dekenai. Lau diba Iehova ese maragi taudia bona bada taudia ia hanamodia diba. Lau be maragi tauna ta, to Iehova ena amo lau davaria hahenamo dainai lau moale bada. (Salamo 115:13) Egu lalona lau hadaia vadaeni, iseda lalokau bona siahu Diravana, Iehova ena hesiai gaukara do lau karaia noho, herevana dahaka ia ura do lau karaia, bena unai amo ena ladana do lau hanamoa bada.
[Picture on page 27]
Sam Friend be idibana kahanai ia gini
[Picture on page 28]
Lagani 1942 ai, ia ese Gima Kohorona ia hariharilaia, Hot Springs, Arkansas dekenai
[Picture on page 29]
Kaia ia dogoatao tauna lau nanadaia, lau gwau: “Dahaka oi laloa, bema ta ia gwau oi ese Nazi ena hahediba oi abia dae, emu lalona ena mamina be edena bamona?”
[Picture on page 30]
Sam friend bona ena adavana Jean hari inai negai
[Hadibaiai Herevana on page 31]
INTERNATIONAL BIBLE STUDENTS ASSOCIATION OF PAPUA NEW GUINEA INC. ENA MEMBA TAUDIA EDIA HEBOU
International Bible Students Association of Papua New Guinea Inc. ena memba taudia be 4 p.m. Saturday, October 3, 1987 ai do idia hebou, Hohola Assembly Hall, Port Moresby dekenai.