Lohia Siahuna Matamatana be Kahirakahira Do Ia Vara!

TAUNIMANIMA momo idia laloa lasi gauna be inai: Bese idauidau be tanobada ibounai lohiaia totona idia hepapahuahu noho lalonai, idia laloparara lasi, lohia siahuna ta, edia lohia siahuna ia hanaia gauna unai, be ia noho. Idia laloa lasi, “Taunimanima edia basileia dekenai Atai Herea Diravana be Lohia, bona ia ura do ia henia tauna be ia henia.” (Daniel 4:25) Vadaeni, Siahu Ibounai Diravana ese ia abia hidi bona tanobada ibounai ena Pavapava ai ia halaoa tauna be daika? Edena negai lohia siahuna ia abia?

Pavapava Ma Ta

‘North kahana pavapavana bona south kahana pavapavana’ ia do perovetalaidia lasi neganai, Daniel ese peroveta matahanaina ta ia abia, ia lalonai Dirava ena abia hidi pavapavana ia itaia. Ia gwau: “Ta be guba oridia dekenai ia mai, ia be taunimanima ena natuna bamona; ia be Gaukara [Iehova Dirava] dekenai ia mai . . . Bena lohia siahuna ia henia, bona hairai bona basileia danu, bese idauidau bona basileia idauidau bona gado idauidau iboudiai ese iena hesiai gaukara do idia karaia totona. Iena lohia siahuna be . . . do ia ore lasi gauna, bona ena basileia danu ta ese do ia hadikaia ore lasi.”—Daniel 7:13, 14.

Unai matahanai lalonai tanobada gavamanidia badadia mai goadadia be dagedage animal hegeregeredia idia hedinarai, ta ta ena nega ena nega ai. Bona momokani, “taunimanima ese edia bamodia idia lohiaia bona idia hahisidia” mai edia dagedage danu. (Kohelete 8:9) Danu, taunimanima idia lohia noho lalonai, gwau-edeede lauma lohiadia mai edia gunalaia tauna Satana ese idia biagudia mai edia dagedage danu. (Daniel 7:17; 10:13; Apokalupo 12:9; 13:2-4 itaia.) To “taunimanima ena natuna bamona” tauna be idau; ia ese lohia siahuna Iehova ena amo ia abia. Hari lohia ena kara bamona diba be hegeregere, ia ese taunimanima, Dirava ese matamana neganai “ia sibona ena laulau bamona” ia karaia taudia, do ia lohiadia. (Genese 1:27) To tauna be daika?

Lagani 1,900 idia lao vadaeni, Iesu be tanobada dekenai ia noho neganai, sibona ia gwauraia “Taunimanima ena Natuna” Unai neganai ia be tanobada tauna ta dainai, ia be momokani “taunimanima ena natuna” ta, bona ia ese kara namodia, hegeregere lalokau, hebogahisi bona hahemaoro goevagoeva karana ia hahedinaraia goevagoeva. Ia ese danu ena mauri ia henia, taunimanima edia mauri davana; unai amo ia be taunimanima edia varavara korikorina bamona ia karaia—momokani ia be “Taunimanima ena Natuna” ta.—Mataio 20:28; Heberu 2:11-17.

Iesu ese Daniel ena peroveta herevana ma ia gwauraia lou, ia gwau: “Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.” Gabeai ia be sibona unai bamona ia gwauraia lou, ia gwau: “Taunimanima ena Natuna be mai ena hairai danu do ia mai, . . . ena terona namo herea momokani latanai do ia helai.“ (Mataio 24:30; 25:31) Hari inai negai Iesu be taunimanima ta lasi tanobada dekenai. Lagani 33 C.E. lalonai mase amo ia toreisi lou negana amo ema bona hari, ia be guba laumana ta, Dirava sibona ena laulau bamona. Taunimanima edia lohia be ia danu idia hegeregere lasi, badina be “ia sibona ia mase diba lasi, ia sibona diaridiari bada dekenai ia noho, bona ia kahirakahira ita lao diba lasi. Ta ese ia idia itaia lasi, bona vaira neganai do ia itaia diba lasi.” (1 Timoteo 6:16) Taunimanima edia gavamani ese dagedage karadia idia karaia badina be lauma dikadia ese idia biagudia dainai, to iena Basileia ena lohia siahuna lalonai unai bamona kara do idia hedinarai lasi.

Inai hegeregerena, Iesu mo sibona be Dirava ese Pavapava ai bona Mesia o Keriso ai ia halaoa, bona siahu ia henia, tanobada ibounai do ia lohiaia. (Daniel 7:14) Anina be, “north kahana pavapavana” bona “south kahana pavapavana” bona taunimanima edia gavamani oredia iboudiai edia dokona negana do ia ginidae, bena Dirava ena Basileia, Keriso ese ia lohiaia gauna, be edia gabu dekenai do ia gini.—Daniel 2:44; Salamo 2:7, 8, 12 itaia.

‘Lohia Badana’ ese Siahu la Abia

To Iesu ese taunimanima ia lohiadia matamaia lasi lagani 33 C.E. lalonai. Ia naria guna bena Iehova ese Siahu ia henia ‘do ia lao, iena inai taudia bogaragidiai do ia kwalimu’ totona. (Salamo 110:1, 2; Kara 2:32-36) Daniel ese unai ia perovetalaia, ia gwau: “unai neganai Mikael, emu bese naria lohiana badana do ia toreisi . . . Hekwakwanai negana ta do ia vara; unai bamona nega be nega gunadia ta ai ia vara lasi . . . ema bona hari ela bona unai nega do ia ginidae.”—Daniel 12:1.

Daniel ia hahedinaraia, “north kahana pavapavana” bona “south kahana pavapavana” be “dokona negana” lalonai do idia tuari heheni guna bena Mikael be unai bamona do ia toreisi. Hari ‘pavapava’ ta be “mai ena badu badana danu do ia raka lasi,” hutuma do ia aladia ore totona. (Daniel 11:40, 44, 45) Unai neganai, Dirava ena orea taudia “naria lohiana badana” be kara ta do ia karaia ia hamauridia totona.—Daniel 11:2, 3, 7, 20, 21; 12:1 itaia.

To inai ena anina be dahaka Iesu dekenai? Mani oi laloa, ia ese Pavapava dagina do ia gaukaralaia negana ia herevadia neganai, ia ese Daniel ena peroveta herevana ia gwauraia. Ma ia gwau, unai neganai “hisihisi bada herea” do ia vara. (Mataio 24:21, 29-31) Daniel ese ia gwauraia “hekwakwanai negana,” ia lalonai Mikael do ia toreisi negana, be Iesu ese ia gwauraia unai. (Mataio 24:15; Daniel 11:31 itaia.) Inai dala amo Iesu ia hahedinaraia, ia sibona be Mikael, do ia lohia totona do ia toreisi tauna.

Inai peroveta herevadia amo Iesu bona Daniel ese “dokona negana” lalonai do idia vara gaudia idia gwauraia. Inai hereva be hoa dalanai idia momokani, lagani 1914 amo ema bona hari. Unai lagani lalonai Iesu ese Pavapava siahuna ia abia guba dekenai, bona unai nega amo ema ia be ena inai taudia bogaragidiai ia lohia noho.—Mataio 24:3, 7-12.

Tanobada Paradaisona be la Kahirakahira!

Reana oi diba vadaeni bese iboudiai ese Keriso ena Basileia idia laloa lasi. Unai Basileia be ia gini vadaeni sivaraina idia dadaraia bona sibodia edia lohia siahuna idia gaukaralaia noho. Idia laloa unai sivarai be kavakava. Unai dainai, Dirava ena aonega, Keriso be Pavapava ai ia halaoa neganai ia hahedinaraia aonegana, be “inai tanobada ena gunalaia taudia . . . idia diba lasi momokani.” Satana bona ena gwauedeede lauma lohiadia ese edia tanobada oreadia amo edia matana idia hakepulua dainai, idia ese Mesia ena Basileia idia inai henia.—1 Korinto 2:8; Luka 4:5, 6; 2 Korinto 4:4 itaia.

Unai dainai, Iesu ia peroveta bamona, iena Basileia idia harorolaia mai edia kamonai taudia be do idia dagedage henidia. Gabeai do idia tuari henidia bada. (Mataio 24:9, 14; Daniel 11:44, 45; Esekiel 38: 14-16 itaia.) To “king ibounai edia King,” Iesu, do ia raka lasi, iena orea taudia dainai do ia tuari. Unai tuari lalonai Dirava ena abia hidi Pavapavana do ia kwalimu vaitani. Iena orea taudia idia tuari henidia taudia ‘edia dokona negana do ia ginidae, unai neganai ta ese do ia durudia lasi.’ Unai neganai ‘pavapava’ oredia iboudiai be ia ese ia hadikaia ore vadaeni.—Apokalupo 11:15, 18; 19: 11, 16, 19-21; Salamo 2:1-3, 6-9.

“Dokona negana” be lagani 1914 lalonai ia matamaia dainai, bari ia ore gwauraia. Iesu ia gwau inai nega ena matamana idia itaia taudia haida ese ena dokona danu do idia itaia. (Mataio 24:32-34) Unai dainai nega namo hereana ia hure mai haraga, unai nega lalonai Iesu Keriso ese tanobada do ia lohiaia momokani, bona kamonai taudia iboudiai do ia hatamonadia, iena gavamani tamona henunai.

Oibe, lohia siahuna matamatana be kahirakahira do ia hedinarai. Inai ena anina be dahaka oi dekenai? Reana oi be taunimanima edia gavamani bona idia badinaia taudia danu do umui mase ore hebou. Eiava, bema dala idauna oi rakalaia, mauri hanaihanai bona noho namo tanobada paradaisona lalonai do oi abia, unai paradaiso be Dirava ena Basileia ese do ia naria bona do ia lohiaia. Bema oi be Iehova ena Witnes taudia hutuma bada danu Iehova ena lohia siahuna umui abia isi, unai davana namona do oi abia diba.