“Dokona Negana” ai Ita Noho A?

“To oi, Daniel, hereva oi hunia bona buka oi koua momokani, ela bona dokona negana.”—Daniel 12:4.

NEW York City dekenai, mid-Manhattan ena aniani rumana ta ai ia aniani noho tauna ia daradara. Dina gauna badadia toi ia itadia diba, ta ena nega be 11:28, ma ta ia heau metaira sisina dainai ena nega be 11:26, to ihatoina ia heau haraga dainai ena nega be 11:29.

Reana do oi gwau, ‘Edia nega idia idau momokani lasi, miniti tamona eiava rua sibodia idia idau. Unai be gau ta lasi.’ To bema basi, tereini, eiava peleini ai ia guia gwauraia tauna ta be miniti ta eiava sekondi haida ia leiti dainai ena transpot ia reaia, do ia gwau unai nega be gau ta lasi! Nega maorona ita diba be gau badana. Dirava ena gaukara negana ita diba be gau badana momokani.

Dokona Ia Vara Diba

Reana oi diba vadaeni, lagani handred momo lalodiai taunimanima ese “dokona negana” idia herevalaia—haida idia gwauraia ‘tanobada ena dokona’ eiava ‘dika abia dinana.’ Lagani 2,500 gunanai, peroveta tauna Daniel ese unai nega ia herevalaia. (Daniel 12:4) To hari inai negai, toretore tauna ta, ladana James David Besser, ia gwau: “Gunaguna, tomadiho ena hahediba herevana dainai eiava Dirava ena amo ia mai abidadama dainai taunimanima idia gwau dokona do ia vara diba, to hari, bema taunimanima ese televisen ena sivarai idia itaia idia lalo-parara ia vara diba.” Unai hereva oi hamomokania a?

Momokani, televisen amo taunimanima ese tanobada ena gabu ibounai lalonai idia vara gaudia idia itadia diba, unai dainai idia diba idia vara momokani bona idia lalodia momo. Televisen ai idia hahedinaraia inai bamona karadia idia vara diba: niuklia siahu ese siti o taoni ta ia hadikaia ore diba, raskol taudia ese mero o kekeni ta idia hadikaia diba, dagedage taudia ese sina o tama ta idia dogoatao diba. Ita ese unai hekwakwanai iboudiai ita davaridia diba. To idia vara diba gaudia sibodia ese dokona negana be ia kahirakahira idia hamomokania lasi. To idia hahedinaraia ia vara diba, unai dainai mai anina bada henanadai be inai: “Dokona negana” ai ita noho a?

Iesu, Daniel, bona Tanobada Dokona

Lagani 1,900 mai kahana gunanai, Iesu ena hahediba taudia ese idia nanadaia, idia gwau: “Do oi giroa mai, bona tanobada dokona danu, ena toana be dahaka?” (Mataio 24:3) Iesu ese toa ta ia henidia; ia gwau gau idauidau be nega tamonai do idia vara unai toa hegeregerena. Idia vara vadaeni dainai ita diba ita be “tanobada dokona” neganai ita noho hari. Mani emu kara, emu Bible oi kehoa bena Iesu ia gwauraia gaudia be Mataio karoa 24 bona 25 ai, Mareko karoa 13 ai, bona Luka karoa 21 ai oi duahilaidia.

Reana do oi hoa, do oi gwau, unai gaudia be televisen ena niusi ripoti hegeregerena. Do oi duahilai gaudia be inai: tuari, tano mareremarere, gorere, bona hitolo—tanobada ibounai lalonai idia vara gaudia. Danu, do oi duahia “tanobada besedia be do idia hisihisi bona edia kudouna dekenai do idia gari dikadika,” bona “taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai.”Hari inai negai tanobada ai idia vara gaudia, televisen ese ia hahedinaraia gaudia, be unai, ani?—Luka 21:10, 11, 25, 26.

Unai gaudia sibodia lasi ese idia hamomokania ita be “dokona negana” ai ita noho. Ataiai ai hereva bamona, lagani 500 bamona Iesu be tanobada ai ia do noho lasi neganai, Iuda peroveta tauna Daniel ese inai nega ia herevalaia. Iesu ese Daniel ena ladana ia gwauraia, bona ena peroveta herevana hagugurua negana ia herevalaia. (Mataio 24:3, 15, 21 bona Daniel 11:31; 12:1, 4 mani oi hahegeregeredia.) Unai bamona ia hereva dainai, ia hahedinaraia Daniel ena hereva “Taravatu Gunana” lalonai be do mai anina. Namona be ita danu be unai bamona ita laloa.

Ataiai herevadia mani oi itadia. Daniel ena hereva bona Iesu ena hereva idia hegeregere, ani? Sibona dekenai oi henanadai: ‘Idia be gau tamona idia herevalaia a?’

Edia hereva amo ia hedinarai goevagoeva idia ruaosi be “dokona negana” idia herevalaia, unai nega lalonai Keriso ia noho mai ena pavapava siahuna. Unai nega dokonai, ena inai taudia iboudiai tanobada ai do ia haoredia vaitani hisihisi badana lalonai. To Dirava ena orea do idia roho mauri.

Oi ura do oi roho mauri a? Bema oibe, namona be Daniel ena hereva “dokona negana” dekenai oi tahua. Ita do ia durua do ita diba, hari be edena nega Dirava ena gaukara negana lalonai.

[Box on page 4]

DANIEL

“Nega dokona ai … Mikael [Iesu Keriso], … do ia toreisi. Hekwakwanai negana ta do ia vara; unai bamona be nega gunadia ta ai ia vara lasi, basileia ia matamaia negana amo ema. … Unai negana emu bese taudia do idia roho mauri—Daniel 11:40; 12:1.

IESU

“Do oi giroa mai, bona tanobada dokona danu, ena toana be dahaka? …

“Hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari …

“Bema unai nega do ia hakwadogia lasi, taunimanima ta be do ia mauri diba lasi. To … unai nega do ia hakwadogia.”—Mataio 24:3, 21, 22.