Nihi ta ese Ia Hahedinaraia Nega Ia Ore Gwauraia

“IEHOVA … be mauri Diravana bona noho hanaihanai Pavapavana”(Ieremia 10:10) Nega ibounai guba bona tanobada ia biagua. Idau negai Babulono ena King Nebukadnesara ese nega ta unai ia abia dae lasi Dirava ia ura unai dirava koikoi ia tomadiho henidia pavapavana be do ia diba, “Atai Herea Diravana ese taunimanima edia basileia ia lohiaia,” unai dainai ia hanihia bena Ena hesiai tauna Daniel ena amo ena nihi ena anina ia hahedinaraia.—Daniel 4:17, 18.

Au lata hereana ta ia nihilaia. “Ena dorina be guba ai ia kau, bena tanobada ibounai dokona amo idia itaia.” Dirava ena hahegani dainai idia utua, to ena badina idia rakatania, bona auri bona kapa gaudia amo idia gegea. Unai gegea gaudia do idia noho ela bona “lagani 7” idia ore, bena unai au do ia tubu lou.—Daniel 4:10-17.

Daniel ia gwau: “Au oi itaia, … pavapava e, unai be oi. … bona emu siahu.” Nebukadnesara do idia utua. Ena basileia ena siahu do ia boio, do ia kavakava ia lao, bona uda boromana bamona murimuri ai do ia loaloa ela bona “lagani 7” idia ore. Dirava ese ia gwauraia negana ia ore neganai, au badina idia gegea auri bona kapa gaudia ese idia laulaulaia gauna do idia kokia, bena pavapava be do ia namo lou bona ena pavapava dagina do ia abia lou.—Daniel 4:20-27.

Idia peroveta hegeregerena, “unai ibounai be King Nebukadnesara dekenai ia vara.” (Daniel 4:28) Bible ta ia gwau unai “lagani 7” be lagani korikoridia 7. Nebukadnesara be lagani 43 (624-581 B.C.E.) lalodiai ia lohia, unai dainai haida idia gwau unai be momokani.

Ena Anina be Dahaka Ita Dekenai?

Nega ibounai Dirava ese ena lohia siahuna be dala maorona ai ia gaukaralaia. Nega ta lalonai tanobada ai Israel besena amo ia lohia, unai dainai idia gwau Israel ena lohia taudia tanobada ai be “Iehova ena terona ai idia helai.” (1 Sisiga 29:23) Israel besena ese Iehova ia dadaraia neganai, Iehova ia durua lasi bena idau bese taudia ese King David ena iduhu ai idia lohia taudia idia hadareredia.

Unai dainai, nega sisina murinai Dirava ese King Nebukadnesara—Dirava ese ia hagaukaraia tauna Ena basileia tanobada ai ia hadikaia ore tauna—dekenai idia hahedinaraia ia ura lasi Dirava ena lohia siahuna do ia ore. Gau badana be Dirava ese Nebukadnesara bona ia murinai do idia lohia idau bese taudia, Dirava ena basileia tanobada ai do idia moia besedia unai, ia hadibadia nega sisina sibona lalonai do idia karaia diba!

Nihi ia henia negana, daika dekenai ia henia, bona ena sinado, Dirava ena lohia siahuna unai, idia hahedinaraia unai nihi ena anina be Nebukadnesara dekenai sibona lasi ia vara, to ia be mai ena anina badana ma ta. Idia gwau, au idia utua bena ena badina idia gegea hegeregerena, Dirava ena lohia siahuna be Ierusalem dekenai ia hedinarai guna, to gabeai idia hadokoa, bena do idia hanamoa lou lasi ela bona “lagani 7” idia ore, bena koua gauna do idia kokia. Unai neganai Dirava ena Lohia Tauna, “taunimanima edia henuna momokani tauna,” anina be ia gwauhamatalaia Mesiana, be iena Basileia ai dagi do ia abia. Iesu ena hahediba taudia ese idia noia toa ta do ia henia, bena do idia diba edena negai Dirava ese unai bamona do ia karaia.—Daniel 4:17; Mataio 24:3.

Ma gau haida danu ese idia hahedinaraia Nebukadnesara ena nihi ena anina be tamona sibona lasi. Daniel 9:24-27 ena peroveta herevana ese Mesia do ia mai negana, lagani 500 mai kahana murinai, ia gwauraia. Bema Bible ese Mesia ena mai tanobada dekenai ia gwauraia goevagoeva, ita laloa ena lou mai Basileia ena siahu abia totona be mai anina bada dainai, ia danu do ia gwauraia goevagoeva, ani? Daniel ese unai ia gwauraia namonamo diba ani? Mani oi laloatao danu, iena matahanai bona ena peroveta nihidia, Nebukadnesara ena nihi au dekenai danu, be ia torelaidia negana murinai, Dirava ese Daniel ia hamaoroa, ia gwau: “Hereva oi hunidia, bona buka oi koua momokani, ela bona dokona negana.” Dahaka dainai unai nega ia gwauraia? Badina be unai negana lalonai “lalo-parara do idia habadaia.” Bema Daniel ese ia torea bukana idia koua noho, bona do idia lalo-pararalaia lasi ela bona “dokona negana,” unai ese ia hahedinaraia ena peroveta herevadia edia anina be unai negana lalonai do idia vara, ani?—Daniel 12:4.

“Lagani 7”—Edena Negai Idia Matamaia, Edena Negai Idia Doko?

Iesu ese iena toana ia herevalaia neganai unai “lagani 7” ia herevalaidia, to ia gwauraidia “idau bese edia nega.” Ia gwau: “Ierusalema do idia moia diho [noho] ia lao bona unai idau bese edia nega do ia ore.” (Luka 21:24) Bible ta ena hereva ta ia gwau, “idau bese edia nega’ be Nebukadnesara ese Iuda taudia ia hadareredia neganai ia matamaia. … Unai negana amo ema, Keriso ena hereva hegeregerena, ‘idau bese taudia ese [Ierusalem] idia moia diho.’”

Unai “lagani 7” eiava “idau bese edia nega” edia anina be dahaka? Idia be lagani korikoridia 7 lasi, idia ta ta mai edia dina 360, iboudiai be dina 2,520 lasi.

Bible ena hereva ta hegeregerena ita gwau, dina ta ta be lagani ta ta edia toana. (Numera 14:34; Esekiel 4:6; Apokalupo 12:6, 14 itaia danu.) Unai dainai unai “lagani 7” edia anina be lagani 2,520. Bema lagani 607 B.C.E. ai Ierusalem idia hadikaia neganai idia matamaia, lagani 1914 C.E. idia doko.

Lagani 30 bamona, lagani 1914 be do lasi neganai, Iehova ena Witness taudia idia gwau lagani 1914 be mai anina bada laganina. Buka ta, ladana International Crisis ia gwau, “tuari ia do vara lasi neganai, gau ta ese ia hahedinaraia lasi heai eiava badu dainai unai tuari do ia vara.” To idau, “lagani 1913 dokonai bona lagani 1914 matamanai … ia hedinarai mai edia siahu bada gavamanidia idia noho namonamo, guna be unai bamona lasi.” To hari, lagani 70 murinai, tanobada ena sivarai idia dibaia taudia idia gwau, lagani 1914 ai taunimanima edia noho ia idau matamaia. German bukana ta ia gwau, “Tanobada Tuarina Ginigunana ese taunimanima kahirakahira iboudiai edia noho dalana ia haidaua momokani, moni bona kohu dalanai, bona politikol dalanai.”

Taunimanima momo be lagani 1914 idia vara politikol karadia idia diba vadaeni. Buka ta ese taunimanima edia noho dalana ia gwauraia, ia gwau, “Lagani 1913 ai noho dalana ta ia doko.” Ma buka ta ia gwau, “Lagani 1914 be do lasi neganai, gavamani bona bisinesi edia moni naria dalana be hegeregere … Lagani 1914 ai ia idau matamaia.”

Nega Ia Ore Gwauraia A?

Ita itaia diba, Iesu ese ia gwauraia toana be hari inai negai ia hedinarai. Ia hamomokania lagani 1914 ai Nebukadnesara ese ia nihilaia gauna ia vara. “Dokona negana” be lagani 1914 ai ia matamaia, unai dainai hari, unai nega ena lagani 73 idia ore vadaeni. Iesu ia gwau “dokona negana” ia matamaia neganai ai idia noho taudia haida be do idia mauri noho hisihisi badana lalonai unai nega ia doko neganai.—Mataio 24:34.

Unai dainai namona be ita noga noho, badina Dirava ese ia hahedinaraia hegeregerena, unai nega ia ore gwauraia! Namo lasi iseda haheauka ia ore, bona Dirava ena nega ita haharagaia toho, bena lalohisihisi do ita davaria! To danu, namo lasi bema sibona eda noho ita moalelaia dainai Dirava ena nega ita halataia toho, bena do ita boio! Mani inai oi laloatao, bema ita leiti dainai iseda transpot ita reaia unai be namo lasi, to bema mauri hanaihanai Dirava ena nega matamatana lalonai do ita reaia, unai be dika bada herea!

[Chart on page 6]

(For fully formatted text, see publication)

607 B.C.E. 33 C.E. 1914 C.E. 1986 C.E.

[Pictures on page 7]

Nebukadnesara ena nihi ena anina be mai anina oi dekenai!