Iesu ena Mauri bona Gaukara

Hebogahisi Dalana Ia Hadibadia

IESU be reana Nain, lalonai vabu ta ena natuna ia hatorea isi lou hanuana, eiava Nain badibadinai ia noho hanuana ta ia vadivadi henia neganai, Farisea tauna ta, ladana Simona ese Iesu ia boiria ena ruma dekenai do idia aniani hebou badina ia ura hoa karadia ia karaia tauna, Iesu, ia diba namonamo.

Iesu ia laloa unai be nega namona unuseniai idia noho taudia do ia haroro henidia totona, unai dainai Farisea tauna ena ruma dekenai ia lao, do idia aniani hebou totona, takisi gogoa taudia bona kara dika taudia edia ruma lalodiai ia aniani hegeregerena. To, Simona ena ruma lalonai ia vareai neganai, Iesu idia kara namo henia lasi, vadivadi taudia be vaia idia kara namo henidia hegeregerena.

Laolao taudia ese Galilea ena kahu bada daladia ai idia raka neganai, tamaka sibodia be edia aena dekenai idia karaia dainai, edia aena idia siahu bona idia miro danu. Vaia, vadivadi taudia edia aena be ranu keruma amo idia huria. To Iesu be Farisea tauna ena ruma dekenai ia ginidae neganai ena aena idia huria lasi, bona vadivadi taudia abia dae karana hegeregerena, idia kisi henia lasi. Danu, vadivadi taudia edia huina dekenai idia bubua dehorona be Iesu ena huina dekenai idia bubua lasi.

Unai adorahi ai, vadivadi taudia be aniani patana dekenai idia hekure negana lalonai, idia boiria lasi hahinena ta be daiutu lalonai ia vareai. Unai hanua taudia idia diba ia be ariara hahinena ta. Reana, Iesu ena hereva, “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai” herevana be ia kamonai vadaeni. Ia itaia gaudia bona ia kamonai herevadia ese ena kudouna idia hamarerea, unai dainai Iesu ia tahua.

Iesu be aniani patana dekenai ia helai neganai, unai hahine be Iesu ena aena badibadinai ena tuina ia hadaia. Ena mata ranuna be Iesu ena aena dekenai ia moru neganai, ena huina amo ia dahua kaukau. Danu dehoro mai bonana namona be Iesu ena aena dekenai ia bubua bona ena aena ia kisi henia. Simona ese ena kara ia itaia neganai, ia moale lasi. Ena lalona ai, ia gwau: “Inai tau bema ia peroveta tauna, do ia diba inai ia dekenai ia kamokau hahinena be ariara hahinena.”

Iesu ese ena lalohadai ia diba dainai, ia gwau: “Simona e, lau be mai egu hereva sisina.”

Simona ia gwau: “Hadibaia tauna e, mani oi hereva.”

“Tau ta mai ena abitore taudia rua, ta ena abitore be 100 kina, ma ta ena abitore be 10 kina. Idia be gau ta lasi, edia abitore davana do idia karaia, vadaeni ia ese idia ruaosi edia abitore ia gwauatao. Idia ruaosi huanai be daika ese henitorehai tauna do ia lalokau henia bada?”

Reana Simona ia laloa Iesu ese unai henanadai ia henia be anina lasi bona ia gwau: “Sedira ena abitore badana ia gwauatao tauna.”

Iesu ia gwau, “Oibe, momokani.” Bena unai hahine dekenai ia giroa, ia itaia, bena Simona ia hereva henia, ia gwau: “Inai hahine oi itaia, a? Lau be emu ruma dekenai lau daekau, egu aena huria totona ranu oi mailaia lasi, to ia be ena matana ranu dekena amo egu aena ia hapariparia bona ena huina dekenai amo ia dahua kaukau. Oi be oi kisi henia lasi lau dekenai, to lau be emu rumai lau daekau neganai ia mai bona hari, lauegu aena dekenai ia kisi henia noho. Oi be egu kwarana dehoro dekena amo oi dahua lasi, to ia be egu aena dehoro dekena amo ia hapariparia vadaeni.”

Unai hahine ena kara amo ia hahedinaraia, ena kara dika amo ia helalo-kerehai vadaeni. Unai dainai Iesu ia gwau: “Unai dainai, lau hamaoroa oi dekenai, inai hahine ena dika idia bada, to idia lau gwauatao vadaeni, badina be ena lalokau be ia bada. To ena dika idia maragi sibona ia gwauatao tauna be, ena lalokau danu ia maragi.”

Iesu ia gwau lasi sihari kava karana be namo. To ena hereva ese ia hahedinaraia, idia kerere bena idia helalo-kerehai momokani bona Keriso dekenai idia mai taudia be ia hebogahisi henidia. Iesu ese laga-ani momokanina be unai hahine ia henia. Ia gwau: “Oiemu dika be lau gwauatao vadaeni. . . . Oiemu abidadama ese ia hamauria oi. Mai maino danu oi lao.” Luka 7:​36-50; Mataio 11:​28-30.

◆ Simona ese Iesu edena bamona ia kara henia?

◆ Daika ese Iesu ia tahua, bona badina be dahaka?

◆ Iesu ese dahaka haheitalai ia gwauraia, bona ena anina be edena bamona ia gwauraia?