Iesu Ena Mauri Bona Gaukara

Lai Bada Herea Ia Hadokoa

IESU be dina tamona lalonai gaukara momo ia karaia vadaeni. Kone dekenai taunimanima hutuma ia hadibaia, bena unai murinai ena parabole edia anina be ena hahediba taudia dekenai ia gwauraia hedinarai. Adorahi neganai, ia hamaorodia, ia gwau: “Davara unai kahanai ita hanaia lao.”

Galilea Gohuna ena east kahanai dekenai provinsi ta ladana Hanua Gwauta ia noho. Unai hanua lalodiai Greek taudia momo idia noho, to Iuda taudia momo be unai hanua dekenai idia noho danu. To unuseniai Iesu ese kara momo ia karaia lasi. Unai gabu ia vadivadi henia neganai, nega daudau lalonai ia noho diba lasi.

Iesu ese ena hahediba taudia ia noidia ma kone ta dekenai, east kahanai do idia lao. Unai neganai, edia vanagi dekenai idia abia lao. To idia lao neganai, taunimanima ese idia itaia. Nega sisina murinai, ma taunimanima haida ese edia vanagi idia guia, Iesu bona ena hahediba taudia do idia bamodia totona. Galilea Gohuna ia bada, ena lata be kilomita 21 bamona bona ena kahana haida dekenai ena lababana be kilomita 12 bamona.

Gaukara bada dainai Iesu ia hesiku. Unai dainai kone idia rakatania nega sisina murinai, Iesu be vanagi ena murina kahana dekenai ia hekure, ena kwarana be pilou dekenai ia atoa, bona ia mahuta. Aposetolo taudia haida be Galilea Gohuna dekenai haoda gaukara idia karaia momo dainai, vanagi taria dalana dekenai idia manada momokani bona vanagi idia taria.

Idia laolao neganai idia hekwarahi bada. Galilea Gohuna be diho gabuna dekenai ia noho, mita 210 bamona davara ena maka henunai, bona ororo gabuna be gohu kahirakahira dekenai ia noho. Gohu ena kopina dekenai ranu ia siahu sisina bona ororo gabuna dekenai hodahoda ia keru. Unai dainai, nega haida lai bada herea be ororo gabudia amo idia diho bona gohu dekenai lai badana idia havaraia. Iesu bona ena hahediba taudia idia laolao neganai, unai ia vara. Davara hurehure ese vanagi idia botaia dikadika, bona vanagi lalonai idia aru vareai dainai, vanagi ia mutu gwauraia. To Iesu ia mahuta noho!

Unai davara dekenai idia manada taudia idia gaukara goadagoada, vanagi do idia taria namonamo totona. Momokani, nega momo lai gubana lalonai vanagi idia taria. To unai dina dekenai idia hekwarahi bada. Do idia mase garina idia gari, unai dainai Iesu idia hanogaia. Idia gwau: ‘Biaguna e, oi laloa lasi, a? Kahirakahira do ita mase! Mani ai oi hamauria, ita maloa mase gwauraia!’

Iesu ia gini toreisi, bena lai bona davara ia haganidia, ia gwau: “Umui doko, umui maino noho.” Vadaeni, lai ia doko bona hurehure be lasi. Iesu ese ena hahediba taudia ia nanadaia, ia gwau: ‘Dahaka dainai umui gari bada? Abidadama umui do abia lasi, a?’

Unai neganai, hahediba taudia idia gari dikadika. Idia nanadaia heheni, idia gwau: “Inai tau be daika? Lai bona davara ese iena hereva idia kamonai henia.”

Iesu ese siahu bada herea ia hahedinaraia! Ita gari lasi, badina ita diba iseda Pavapava ena siahu ia hegeregere, guba, tanobada bona davara do ia biagua, bona ena Basileia lalonai ia lohia neganai taunimanima iboudiai be guba, davara bona tanobada edia kara garina do idia gari lasi, to noho namona bona maino do idia davaria!

Lai ia doko murinai, Iesu bona ena hahediba taudia be gohu ena east kahana ena kone dekenai idia ginidae. Reana lai badana ese ma vanagi haida dekenai ia mai bada lasi, bona unai vanagi idia guia taudia be edia hanua dekenai idia giroa lou neganai, dika idia davaria lasi. Mareko 4:​35–5:2; Mataio 8:​18, 23-28; Luka 8:​22-27.

◆ Hanua Gwauta be dahaka, bona edeseniai ia noho?

◆ Dahaka dainai Galilea Gohuna dekenai lai bada idia vara?

◆ Hahediba taudia be vanagi taria karana dekenai idia diba namonamo, to unai diba ese ia hamauridia diba lasi neganai, dahaka idia karaia?