Iesu ena Mauri bona Gaukara

Hadibaia Tauna Idauna

IESU be kone dekenai ia diho neganai gari gauna ta ia itaia! Mai edia lauma dikadia dagedage taudia rua be mase guria gabuna dekena amo idia heau henia. Idia ta be ia dagedage bada badina lauma dikadia be sisina daudau ia dekenai idia noho. Unai dainai unai tau ena sivarai idia kikilaia.

Madi inai tau be mase guria gabunai kopina kavakava dekenai ia loaloa. Dina iboudiai, hanuaboi danu, ia boiboi bona iena kopina ia utua nadi dekenai. Ia be dagedage bada tauna dainai, taunimanima be unai dala dekena amo idia raka hanaia diba lasi. Auri kwatua gaudia dekenai ena imana bona ena aena idia guia, to imana bona aena kwatua gaudia ia hamakohidia. Tau ta ese ia hamanadaia be hegeregere lasi.

Unai tau ese Iesu ia heau henia bona ia moru ia vairanai, bona demoni idia hasiahua dainai ia boiboi badabada, ia gwau: “Dahaka oi ura karaia lau dekenai, Iesu, Dirava ataiai momokani ena Natuna? Dirava ena ladana dainai lau noinoi, lau oi hahisia lasi.”

Iesu ia gwau loulou: “Vadaeni, lauma dikana e, inai tau oi rakatania, oi lao.” Bena murinai Iesu ia gwau: “Oiemu ladana be daika?” Ia haere, ia gwau: “Lauegu ladana be Hutuma, badina ai be momo herea.” Demoni be taunimanima dekenai idia noho neganai idia hahisihisidia karana idia moalelaia, bona badina idia be momo dainai be nega tamona idia hahekwarahidia. To Iesu idia itaia neganai, idia noia guri dobu masemase lalonai ia negedia lasi totona. Ita diba Iesu ena siahu be ia bada herea badina unai dagedage bada demoni ia koudia diba. Demoni idia diba Dirava ese idia bona edia biaguna, Satana Diabolo, do ia hahemaoro henidia neganai, guri dobu masemase gabunai do ia negedia.

Ororo kahirakahira dekenai boroma 2,000 idia aniani noho. Unai dainai demoni idia gwau: “Oi siaia ai boroma dekenai, bona boroma lalonai ai vareai.” Demoni be mauri tauanina dekenai idia vareai neganai unai kara bodaga ese ia hamoaledia. Iesu ia koudia lasi dainai unai boroma dekenai idia vareai, bona nega tamona unai boroma 2,000 idia heau lao bona ororo dekena amo idia moru davara dekenai, bona idia iboudiai idia maloa mase.

Boroma naria taudia ese unai idia itaia neganai idia heau lao hanua dekenai, bona uma gabudiai, unai sivarai idia gwauraia loaloa totona. Hanua taudia idia mai ia vara gauna idia itaia totona. Idia ginidae neganai, guna mai lauma hutuma tauna idia itaia. Ia helai diho, mai dabua, bona iena lalona ia namo lou, bona Iesu aena badinai ia helai!

Unai ia vara gauna idia itaia taudia ese kava tauna edena bamona Iesu ia hanamoa dalana idia hamaorodia. Unai boroma idia mase ena badina idia hamaorodia danu. Unai sivarai idia kamonai neganai idia gari, bona Iesu idia noia edia tano do ia rakatania totona. Vadaeni ia be vanagi dekenai ma ia guia, unai neganai lauma dika idia rakatania tauna ese Iesu ia noia, ia danu do idia lao totona. To Iesu ia gwau: “Emu ruma dekenai oi giroa lou, Dirava ese oi dekenai ia karaia karadia ibounai do oi harorolaia.”

Iesu ese taunimanima ia hanamodia neganai nega momo ia hamaorodia ia karaia gauna do idia gwauraia lasi, badina ia ura lasi taunimanima ese ia karaia hoa karadia edia sivarai idia kamonai kerere. To mai lauma dikadia tauna ia hanamoa neganai unai bamona ia hamaoroa lasi, badina Iesu ia diba ia be nega lasi, to ia diba unai tau ese ena hanua taudia dekenai ia vara hoa karana do ia harorolaia. Ma danu, unai tau ia namo lou idia itaia neganai do idia diba Iesu be mai ena siahu namo karadia ia karaia totona, bona unai boroma idia mase sivaraina dainai do idia gwauraia dika lasi.

Vadaeni Iesu ena hereva ia badinaia, bona guna mai demoni tauna ese Iesu ia rakatania. Bona ia raka lao neganai Iesu ia karaia hoa karana ia harorolaia, bona taunimanima be idia hoa bada. Mataio 8⁠:​28-34; Mareko 5⁠:​1-20; Luka 8⁠:​26-39;Apokalupo 20⁠:​1-3.

◆ Mai demoni taudia rua idia noho, dahaka dainai tamona ena sivarai sibona idia kikilaia?

◆ Dahaka ese ia hahedinaraia demoni idia diba gabeai guri dobu masemase dekenai do idia negedia?

◆ Dahaka dainai demoni idia ura taunimanima eiava animal edia tauanina dekenai do idia vareai?

◆ Dahaka dainai mai demoni tauna ia hanamoa murinai Iesu ese ena hereva ia haidaua, ia gwau ia dekenai ia vara gauna do ia harorolaia taunimanima iboudiai dekediai?