Iesu Ena Mauri Bona Gaukara

Iena Dabua Ia Daua Toho

KAPERANAUMA dekenai ia giroa neganai, taunimanima hutuma bada be davara badinai Iesu idia naria, ia be Hanua Gwauta amo ia giroa murinai. Reana idia kamonai ia ese lai bada ia koua bona tau ta amo demoni ia lulua vadaeni. Kone dekenai ia ginidae neganai, idia koua hegege bona iena hereva idia naria.

Iesu ia naria tauna ta be Iairo, ia be dubu ena tau badana ta. Ia be Iesu dekenai ia tui diho bona ia noinoi: “Egu natuna kekeni maragina be kahirakahira ia mase, lau noinoi, mani oi mai, oiemu imana oi atoa ia latanai, oi hamauria.” Iena natuna be tamona sibona bona iena lagani be 12; unai dainai, Iairo ese ia lalokau henia bada.

Iesu ia ura ia durua, bona ia be hutuma taudia ida Iairo ena ruma dekenai idia lao. Taunimanima idia moale bada reana badina idia laloa Iesu be hoa karana ma ta do ia karaia. To hutuma taudia dekenai, hahine ta ia noho, bona ia be sibona ena hekwakwanai bada herea ia laloa.

Lagani 12 lalodiai, unai hahine be hisihisi ia abia badina ia gorere ena rara ia diho noho dainai. Ia be doketa momo dekediai ia lao bona moni bada herea ia negea. To idia durua diba lasi; iena hisihisi ia bada ia lao sibona.

Unai gorere ese ena tauanina ia hamanokaia bada, to unai sibona lasi, ia hemarai bada herea danu. Unai bamona gorerena be taunimanima ma haida dekediai do ia herevalaia momo lasi. Danu, Mose ena Taravatu henunai idia noho hahinedia, bema edia rara ia diho, do idia gwauraia hahine mirona, bona bema ta ese iena dabua, ia dekenai rara ia noho gauna, ia daua toho, do ia lao ia digu be namo bona idia gwau ia miro ela bona hanuaboi.

Unai hahine be Iesu ena hoa karadia edia sivarai ia kamonai bona hari ia tahua. Ia miro dainai, hehuni dalana dekenai hutuma taudia bogaragidiai, Iesu ia tahua, sibona dekenai ia hereva: “Bema iena dabua lau dogoatao sibona be do lau namo.” Ia karaia murinai, haraga herea mamina ia abia iena rara ia diho lasi!

“Daika ese ia dogoatao lau?” Iesu ena hereva dainai hahine ia hoa bona ia gari! Edena bamona ia diba? Petro ia gwau: ‘Aiemai biaguna e, taunimanima momo herea oi danu idia raka hebou, oi dekenai danu idia kamokau. Badina be dahaka oi gwau, “Daika ia dogoatao lau?” ’

Iesu be matana ia negea, hahine ia tahua, bona ia gwau: “Ta ese ia dogoatao lau dekenai, badina be lau diba siahu lau dekena amo ia lao vadaeni murimuri dekenai.” Momokani, hahine be unai bamona ia dogoatao neganai, ena gorere ia namo vadaeni, to unai bamona ia vara neganai Iesu ese goada bada ia negea.

Ia itaia ena kara ia hunia diba lasi dainai, hahine be gari dekenai, Iesu vairanai ia moru diho. Taunimanima iboudiai vairadiai, sibona ena gorere sivaraina ia hadibadia bona edena dala amo hari sibona unai gorere ia ore.

Ena hereva ia kamonai neganai, hebogahisi dekenai Iesu ese ia hanamoa, ia gwau: “Lauegu natuna, oiemu abidadama dainai mauri oi davaria vadaeni, oi lao mai maino danu, bona oiemu gorere do oi davaria lou lasi.” Namo herea, badina Dirava ese ia abia hidi Tauna, tanobada ia lohia totona, be hebogahisi bada tauna, ia ura taunimanima ia durudia bona ia be mai ena siahu ia durudia totona!

Mataio 9:​18-22; Mareko 5:​21-34; Luka 8:​40-48; Levitiko 15:​25-27.

◆ Iairo be daika, bona dahaka dainai Iesu dekenai ia mai?

◆ Hahine ta be dahaka hekwakwanai ia abia, bona badina be dahaka Iesu dekenai ia mai be ia dekenai hekwarahi bada gauna?

◆ Hahine ena gorere be edena dala amo ia ore, bona Iesu be edena bamona ia hebogahisi henia?