Iesu Ena Mauri Bona Gaukara

Taitai Ia Doko bona Moale Bada Ia Vara

IAIRO ese hahine ta ia itaia ena rara gorere ia namo lou neganai, iena abidadama ia bada ia lao Iesu ena hoa karadia dekenai. Daba kahanai Iairo ese Iesu ia noia do idia lao ena hanua dekenai badina iena natuna kekeni tamona sibona ia vara, ena lagani be 12, ena mase be ia kahirakahira dainai. Vadaeni Iairo ena ruma dekenai idia lao neganai, unai be Kaperanauma ena hanua kahirakahira dekenai, hahine ta ese Iesu ena dabua duduna ia dogoatao neganai ia namo lou.

Unai hoa karana ia vara noho lalonai, Iairo ese ia gari henia bada gauna ia vara. Iesu be unai hahine danu idia do hereva henia neganai, tatau haida idia mai bona metairametaira Iairo dekenai idia gwau: “Oiemu natuna ia mase vadaeni. Badina dahaka hadibaia tauna dekenai oi noinoi noho?”

Unai be hagaria hereva badana! Mani inai oi laloa: Unai tau be idia matauraia bada unai hanua dekenai, to hari ia lalohisihisi bada, ena natuna ena mase sivaraina ia kamonai neganai. To Iesu ese edia hereva ia kamonai neganai, Iairo dekenai ia giroa bona hagoadaia hereva ia henia, ia gwau: “Oi gari lasi, oi abidadama henia mo.”

Iesu ese inai lalohisihisi tauna ia bamoa noho bona idia giroa lao ena ruma dekenai. Idia ginidae neganai taunimanima momo idia mai hebou bona taitai bada bona lalohisihisi bada regena idia karaia, bona lalohisihisi dainai sibodia idia botaia. Iesu ia raka vareai bena ia henanadai, ia gwau: “Badina dahaka umui boiboi bona tai momo? Kekeni ia mase lasi, ia mahuta.”

Unai taunimanima idia kamonai neganai idia kiri mai edia hevaseha danu, badina idia diba kekeni be ia mase momokani. To Iesu ia gwau kekeni be ia mahuta noho, badina ia ura hahedinaraia Dirava ese ia henia siahuna amo taunimanima be mase amo do idia toreisi lou diba, hegeregere ta ese mahuta mase amo idia hanogaia karana bamona.

Iesu ese unai taunimanima ibounai ia siaidia lao murimuri dekenai, to Petro, Iakobo, Ioane bona mase kekeni ena tamana bona sinana idia noho Iesu ida. Bena Iesu ese unai taunimanima ima ia hakaudia lao kekeni ena hekure gabunai, ia ese mase kekenina ena imana ia abia bena ia gwau: “Talita kumi,” (anina be, “Kekeni e, oi toreisi”). Bona nega tamona unai kekeni ia toreisi bena ia raka! Ena tamana bona sinana ese idia itaia neganai idia hoa bona moale ese ia hahonudia bada.

Vadaeni Iesu ese ia hamaorodia aniani do idia henia, bena Iesu ese Iairo bona adavana ia hamaorodia ia vara gauna tau ta do idia hamaoroa lasi. Ena be Iesu ese ia taravatudia to sivarai be unai tano ibounai dekenai idia gwauraia loaloa. Unai be Iesu ia karaia toreisi lou iharuana unai. Mataio 9:​18-26; Mareko 5:​35-43; Luka 8:​41-56.

◆ Dahaka sivarai be Iairo ia kamonai, bona edena bamona Iesu ese ia hagoadaia?

◆ Iairo ena ruma dekenai idia ginidae neganai dahaka idia davaria?

◆ Dahaka dainai Iesu ia gwau mase kekenina be ia mahuta sibona?

◆ Edena taunimanima ima Iesu danu be unai toreisi lou idia itaia?