Tura Korikoridia Davaridia Dalana

AMERICA ena toretore tauna ta, ladana Emerson, ese inai hereva ia torea: “Turana ta oi abia dalana tamona be, taunimanima oi tura henidia.” Sibodia idia laloa bona sibodia edia namo idia tahua taudia ese tura korikoridia idia davaridia haraga diba lasi. To unai kara dekenai idia kwalimu diba.

Hetura kara korikorina ena badina be lalokau, badina lalokau ese taunimanima ia veridia. To taunimanima idia tura henidia haraga diba lasi taudia be edena bamona do idia kwalimu diba?

Tau ta ladana Dale Carnegie ia gwau: “Oi hakala namonamo. Taunimanima oi hagoadadia, sibodia edia sivarai do idia gwauraia totona.” Pati o hebou ta dekenai idau taudia idia hedavari neganai, edena taudia be tura namodia? Udu mauri taudia lasi, to ma haida edia namo idia tahua taudia, badina idia ese ma haida idia ha-uradia idia hereva totona, bena edia hereva idia hakala henia. Oi hedavari henidia taudia edia ladana bona edia sivarai bema oi laloatao, unai ese oi do ia durua, idia na oiemu turadia ai do oi halaodia totona.

Buka ta ena hereva be inai: “Ta oi laloa bada totona, namona be iena kara ta oi ura henia bada . . . nega ibounai gau ta be iena amo oi hunia lasi . . . Mai emu momokani ida oi kara henia be namo.”

Tura korikoridia idia koikoi lasi, sibodia edia namo idia tahua lasi, idia hametaua heheni lasi, bona idia vagege lasi. Idia lalo-parara heheni bona edia turadia edia lalohadai gau idauidau dekenai idia diba dainai idia bogadia hisi diba. Edia hetura karana ia goada ia lao neganai, edia lalona edia mamina idia gwauraia hedinarai heheni, bena tura korikoridia ai idia lao bona idia hebamo heheni momo. Iesu be mai ena tura korikoridia momo, to idia haida mo sibodia ia bamodia momo.​—Mareko 9:​1-10; Luka 8:51.

Hetura Karana Korikorina Ia Gwauraia Bukana

Hetura karana ia gwauraia bukana hereadaena, Bible, be ia gwau: “Turana korikorina be nega ibounai lalokau ia hahedinaraia, bona ia be tadikaka ta, dika idia vara neganai ita ia durua totona ia vara.” (Hereva Lada-isidia 17:17) Tura korikoridia be mai edia hebogahisi, bona hekwakwanai idia vara neganai, idia hegaegae heduru idia henia totona. Idau negai Israel dekenai ia vara sivaraina namona ta be inai:

Doe dainai, Iuda tauna ta mai ena adavana Naomi ida be edia hanua idia rakatania, Moab tanona dekenai idia lao bona unuseniai idia noho. Vadaeni, tau be Moab ai ia mase. Gabeai ena natuna memerodia ruaosi ese Moab ulatodia, Ruta bona Oropa idia adavadia. Vadaeni, unai natuna ruaosi idia mase, bena vabu toi idia noho. Naomi ese Iuda ia lou henia gwauraia neganai, ena ravana hahinedia ese idia bamoa. To, dala dekenai Naomi ese ruaosi ia hamaorodia, do idia lou lao sibodia edia bese dekenai, bena idia bogaragidiai adavadia matamatadia do idia tahudia. Oropa be unai bamona ia karaia, to Ruta ia hereva goada, ia gwau ia ese Naomi do ia bamoa. Dahaka dainai? Badina be ia be Naomi ena ravana sibona lasi, to ia be ena tura korikorina danu. Ia be mai ena hebogahisi dainai vabu burukana ia kahua nege diba lasi, ia sibona be Iuda dekenai ia lou lao totona.​—Ruta 1:​1-17.

Ruta ese hebogahisi, kara namo, badinaia karana, bona lalokau korikorina ia hahedinaraia. Hetura karana korikorina ena badina goadana be unai. To danu, ma badina ta dainai Ruta ese Naomi ia tura henia.

Hetura Karana Hereadaena

Naomi ese Ruta ia hamaoroa do ia lou lao neganai, Ruta ia gwau: “Lau oi hagania lasi, oi gwau lasi oi do lau rakatania, badina be do oi lao gabuna lau danu do lau lao . . . Oiemu bese be lauegu bese ai do ia lao, bona oiemu Dirava be lauegu Dirava ai do ia lao.” (Ruta 1:16) Gunaguna, Ruta ese dirava koikoina ia tomadiho henia, to Naomi ese ia durua, Dirava korikorina, Iehova ia diba bona ia lalokau henia totona. Idia ruaosi ese Dirava tamona idia tomadiho henia dainai, unai ese lauma dalanai ia hakapudia bona tura korikoridia ai ia halaodia. Iehova ese ia hanamodia; Ruta ese taga tauna ta Iuda dekenai ladana Boa ia adavaia, bena natuna merona ladana Obed idia havaraia. Obed be King David ena tubuna ai ia lao.​—Ruta 4:​13-22; Mataio 1:​5, 6.

Edia hetura karana be namo herea, badina Ruta bona Naomi ese Iehova, “hebogahisi bona harihari bada Diravana, ia badu haraga lasi, iena hebogahisi bona kara momokani be bada herea” Diravana, idia tomadiho henia. (Esodo 34:6) “Dirava be lalokau,” bona bema lauma bona momokani ai do ita tomadiho henia, iseda lalokau ia dekenai bona taunimanima dekediai do ia bada ia lao. (1 Ioane 4:8; Ioane 4:24) Unai amo iseda kara do idia idau. Taunimanima do ita lalo-namo henidia, bona manau taudia, bese iboudiai lalodiai hisihisi idia ania taudia, edia namo do ita tahua bada. Unai amo, sibodia edia namo idia tahua taudia ese ma haida edia namo do idia tahua. Dirava ena lauma helaga ena huahua​—“lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana”​—ita hahedinaraia matamaia unai.​—Galatia 5:​22, 23.

Unai kara ese ita idia durua, taunimanima edia manoka bona edia kerere ita gwauatao totona, “nega 7 sibona lasi, to nega 70 × 7,” Iesu ia hereva bamona. (Mataio 18:​21, 22) Gwauatao karana be lasi dainai, tura momo idia parara. Iesu Keriso ese hegwautao karana ia harorolaia bona ia badinaia. Nega momo ena hahediba taudia edia kerere ia gwauatao, bona Petro ese Lohiabada ia dadaraia neganai, Iesu ese ena kerere ia gwauatao!​—Mataio 26:​69-75.

Lauma dalanai ita goada ita lao neganai, tura momo ita davaridia diba. Ita be hetura besena badana taudia ai do ita lao! Do ita davaria iseda turadia edia kara be namo herea. Haheitalai ta be inai: Tau ta ladana Brian, Iehova tomadiho henia tauna matamatana ta, ia gwau ena turadia gunadia ese idia veria, idia ida kekero muramurana idia inua totona, bena ena adavana bona ena natudia ia durudia lasi. To hari ia ese ena adavana bona ena natudia ia durudia bada. Iena turadia matamatadia, Iehova idia tomadiho henia taudia unai, be inai bamona ia gwauraidia: “Bema hekwakwanai ta lau davaria, lau diba bema idia ta lau rini henia, mai moalena ida lau do ia durua.”

Tau ta ladana Alan ena turadia gunadia ese motuka bona kekeni idia herevalaidia hebou momo. To, ena turadia matamatadia, Iehova idia tomadiho henia taudia, be ia davaridia neganai, motuka bona kekeni edia sivarai be “anina lasi” ia dekenai. Ena turadia matamatadia ese “lalokau korikorina” idia hahedinaraia ia dekenai bena ena turadia gunadia ia lalodia boio.

Iseda Turadia Hereadia

Unai taudia bona ma milion haida danu be hetura besena ta, tanobada hegegemadai idia noho. Politik amo idia siri, bona taunimanima edia bese, edia kopina ena kala, bona idia ogogami eiava idia taga be herevana. Keristen taudia ginigunadia hegeregeredia, idia be varavara korikoridia bamona. (3 Ioane 14) Iehova Dirava tomadiho henia karana ese ia hatamonadia, Ruta bona Naomi ia hatamonadia hegeregerena. Idia iboudiai be mai edia manau bona tanikiu ida idia gwau, Iehova bona Iesu Keriso be edia turadia hereadia.

Reana oi henanadai, oi gwau: ‘Siahu Ibounai Diravana bona iena Natuna be edena bamona idia tura henidia diba? Unai bamona idia hereva be hekokoroku herevana ani?’ To, Bible ia gwau: “ ‘Aberahamo ese Dirava ia abidadama henia, . . . ’ Unai dainai idia gwau Aberahamo be Dirava ena turana.” Iehova ena Hereva be ma ia gwau: “Dirava ese hekokoroku taudia edia dala ia koua, to manau taudia dekenai iena hariharibada ia henia.”​—Iakobo 2:23; 4:6.

Reana taunimanima haida idia laloa, idia be kara dika taudia dainai idia be hegeregere lasi Dirava ena turana ai idia lao. To Iakobo be ma ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai. Kara dika taudia e, emui imana do umui huria. Ekalesia koikoi taudia e, laloa rua dekena amo umui emui kudouna do umui hagoevaia. Lohiabada ena vairanai do umui manau, vadaeni ia ese umui do ia abia isi.”​—Iakobo 4:​8, 10.

Iesu ia gwau: “Lauegu taravatu do umui badinaia, unai dekena amo lauegu turana do umui lao.” Ma ia gwau taravatu hereadia be inai: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai. . . . Oiemu badibadinai tauna dekenai oi lalokau henia, oi sibona oi lalokau henia bamona.” (Ioane 15:14; Mataio 22:​37-40) Bema unai bamona ita karaia, tura korikoridia momo do ita davaridia. Danu, do ita hegeregere ma hahenamo ta do ita abia​—mauri hanaihanai tanobada goevana lalonai do ita abia, Dirava ena Basileia henunai. (Mataio 6:​9, 10) Iesu ia gwau: “[Iehova] ena taravatu ena anina be mauri hanaihanai.”​—Ioane 12:​50, NW.

Oi ura Iehova ena Witness taudia ese oi do idia durua a? Taunimanima idia lalo-namo henidia dainai, idia ura oi do idia vadivadi henia bona hetura karana do idia herevalaia oi dekenai, davana lasi. Oi do idia durua diba, tura korikoridia momo do oi davaridia totona.

[Box on page 6]

Tura Korikoridia Davaridia Daladia

Oiemu bamodia oi abidia hidi namonamo.

Taunimanima edia namo oi tahua, bona edia hereva oi hakala henia.

Umui gaukara hebou, unai amo emui hetura karana do umui hagoadaia diba.

Nega ibounai umui hereva momokani heheni.

Ma haida ese dika idia davaria neganai, hebogahisi oi hahedinaraia idia dekenai.

Emu turadia idia kara kerere eiava oiemu lalona idia hahisia neganai, edia kerere oi gwauatao, “nega 70 7.”​—Mataio 18:22.

Haida ese oiemu turadia idia gwauraidia dika kava o idia samanidia koikoi neganai, emu turadia oi badinadia bona edia kara namo oi hamomokania.

Iehova umui tomadiho henia hebou, badina unai kara ese emui hetura karana do ia hagoadaia bada.

[Picture on page 7]

Ruta ese Naomi ia rakatania lasi, badina edia hetura karana ena badina be Iehova Dirava idia tomadiho henia. Oi be mai emu turadia korikoridia idia bamona, a?