Iesu ena Mauri bona Gaukara

Siahu Bada Lohia Namona

IESU be hoa karana ta amo taunimanima tausen tausen ia ubua neganai, taunimanima idia hoa dikadika. Idia gwau: “Momokani, tanobada dekenai do ia mai peroveta tauna be inai.” Idia laloa Iesu be peroveta tauna bona Mose ia hanaia. Unai sibona lasi to idia laloa danu, ia be lohia tauna namo hereana. Unai dainai idia ura Iesu do idia dogoatao bona pavapava ai do idia halaoa.

To, Iesu be edia palani ia diba. Unai dainai kara haraga ia be ma gabu ta ai ia lao, idia ese ia do idia dogoatao garina. Ia ese hutuma ia siaia oho, bona iena hahediba taudia ia haganidia, edia vanagi lalonai do idia guia bona Kaperanauma dekenai do idia giroa lao. Bena ia be ororo gabuna dekenai ia lao, Dirava ia guriguri henia totona. Unai hanuaboi ai Iesu sibona be unai gabu dekenai ia noho, ma tau ta be lasi.

Daba rere be kahirakahira neganai, Iesu be ororo amo ia itaia davara ia hurehure bada, lai bada herea dainai. Pasova negana ia kahirakahira dainai hua be kahirakahira ia kuborokuboro. Unai hua ena diari amo Iesu ese vanagi ia itaia, bona ia itaia iena hahediba taudia idia hekwarahi bada vanagi be hurehure dekenai do idia guia totona. Unai tatau be mai edia goada ibounai ida vanagi idia baraia.

Iesu ese unai ia itaia murinai, ororo amo ia raka diho bona vanagi dekenai ia raka lao matamaia, davara ena kopina latanai. Ia raka kilomita 5 o 6 bamona murinai, iena hahediba taudia dekenai ia ginidae. To, ia raka noho, hegeregere idia do ia raka hanaia bamona. Idia ese Iesu idia itaia neganai, idia boiboi idia gwau: “Unai be lauma ta.”

Iesu ia gado namo henidia, ia gwau: “Umui goada abia, inai be lau, umui gari lasi.”

To Petro ia gwau: “Lohiabada e, bema inai be oi momokani, oi hereva lau dekenai, vadaeni davara ena kopina dekenai do lau mai.”

Iesu ia gwau, “Oi mai.”

Vadaeni, Petro be vanagi amo ia diho, bona davara ena kopina dekenai ia raka Iesu dekenai. To ia be lai gubana ia itaia neganai, ia gari, bona davara lalonai ia diho. Vadaeni ia boiboi, ia gwau: “Lohiabada e, oi hamauria lau.”

Kara haraga Iesu ese iena imana ia henia, bona ia dogoatao, bona ia gwau: “Abidadama maragimaragi tauna, dahaka totona oi daradara?”

Petro bona Iesu be vanagi dekenai idia guia murinai, lai ia ore, bona iena hahediba taudia idia hoa dikadika. To idia hoa be maoro, a? Hora haida gunanai, Iesu ese hoa karana ia karaia. Taunimanima tausen tausen ia ubua paraoa 5 bona gwarume rua amo. Bema Iesu ena hahediba taudia ese unai hora karana ena anina dekenai idia lalo-parara dainai “paraoa hoa kara anina idia diba,” do idia hoa lasi Iesu be davara kopina latanai ia raka diba bona lai ia koua diba dainai. To hari, hahediba taudia be Iesu dekenai idia tomadiho, idia gwau: “Momokani, oi be Dirava ena Natuna.”

Nega sisina murinai, Genesareta kone dekenai idia ginidae. Unai gabu be taora hairaina ta mai huahua audia momo. Unuseniai edia vanagi ena dogo idia negea. To kone dekenai idia daekau neganai, taunimanima be Iesu ena vairana idia diba. Vadaeni, unai gabu ena kaha ibounai dekenai idia heau lao, bona gorere taudia idia tahudia. Unai gorere taudia edia geda latanai idia mailaia bona Iesu ena dabua ena isena idia dogoatao neganai idia namo lou.

Murina dinana ai, Iesu be hoa dalanai taunimanima tausen tausen ia ubua karana idia itaia taudia hutuma idia itaia Iesu ese edia gabu ia rakatania vadaeni. Unai dainai vanagi maragidia Tiberia dekena amo idia ginidae neganai, idia ese idia guia bona Kaperanauma dekenai idia heau lao, Iesu idia tahua totona. Iesu idia davaria neganai, idia henanadai idia gwau: “Rabi e, edena negai oi mai?” Iena haere amo Iesu ese gau momo ia hahedinaraia. Ioane 6:​14-25; Mataio 14:​22-36; Mareko 6:​45-56.

◆ Iesu be hoa dalanai taunimanima tausen tausen ia ubua murinai, taunimanima idia ura dahaka do idia karaia ia dekenai?

◆ Iesu be ororo dekenai ia lao murinai dahaka ia itaia, bona unai murinai dahaka ia karaia?

◆ Dahaka dainai unai gaudia dainai hahediba taudia idia hoa be maoro lasi?

◆ Kone dekenai idia ginidae murinai dahaka ia vara?

[Full-page picture on page 9]