Tomadiho bona Gari Kava be Gau Namodia o Gau Dikadia, A?

SATURDAY, June 11, 1983 ai, Indonesia ena motumotu ta Java ai, hanua taudia be edia ruma dekenai idia heau haraga bona ruma ena gui, uindo bona iduara dekenai idia noho matudia iboudiai idia koudia. Dahaka dainai mai edia gari ida idia kara? Hua ese dina ena diari ia koua matamaia, unai dainai idia laloa dina ena laulau ese edia ruma lalonai do ia vareai bena dika do idia davaria.

Ogogami tanodia ai idia noho taudia momo be unai bamona lalohadai idia abia dae bona mai edia lalo-goada ida idia badinaia. Unai dainai Africa tanodia haida ai, dina tubua ai, taunimanima be dina ena diari ai idia raka lasi, “do ia hakavadia garina.” Edia taravatu ta be, memero bona kekeni ese gatoi idia ania diba lasi, “henao taudia ai do idia lao” garina. Tama sina ese idia havaradia natudia hida idia gwauraia hedinarai diba lasi, “lauma dikadia ese oiemu heagi herevana do idia kamonai bena natu ta do idia abia” garina.​—African Primal Religions.

Taga tanodia ai idia noho taudia haida ese unai kara idia kirikirilaidia, idia gwau unai taudia idia gari kava edia ‘tomadiho koikoi karadia’ dainai. To, Keristen lasi taudia sibodia lasi ese unai bamona lalohadai idia abia. Bese idauidau edia kastom ia diba momo tauna ta, Doketa Wayland Hand, ia gwau, “Tanobada hegegemadai, bese idauidau lalodiai, unai kara oi davaria diba.” Ena bamona, Doketa Tally, ida idia ese United States ai idia noho taudia ese idia garilaia kava gaudia kahirakahira milion ta edia sivarai idia torea.

Sibodia idia gwauraia Keristen taudia momo be idia ura idia dekenai do idia vara gaudia do idia diba dainai, hisiu edia toana idia tahua​—idau negai idia noho taudia edia gari kava karana ta unai. Nega haida, tomadiho gunalaia taudia ese unai gari kava karadia idia abia dae. Haheitalai ta be inai: New York ai, January 10, 1982 ai, Eastern Greek Orthodox ena dubu tauna badana, Vasilios, ese dubu murimurinai, edia tomadiho hebouna ta dekenai Mass ia gunalaia. Niuspepa ta, New York Post ia gwau, unai murinai golo amo idia karaia korosina ta be East Sinavaina lalonai ia negea bena herarai taudia ia hamaorodia, do ia abia lou tauna ginigunana be ena mauri orena ibounai lalonai namo do ia davaria.

To Keristen hahediba herevadia bona gari kava karadia be nega tamona ita badinadia diba a? Sivarai torea tauna ta ia gwau: “Abidadama ia mase neganai, gari kava ia tubu.” Vadaeni, Keristen tomadiho be gari kava kokia gauna ta, a?

Tomadiho ese Gari Kava Ia Kokia A?

Tomadiho momokanina ese ia kokia diba, bona aposetolo taudia edia negai unai bamona ia karaia. Ena be unai negai Keristen taudia be Roma ena siahu henunai idia noho bona Roma taudia be mai edia gari kava karadia momo, to edia kara idia dadaraia. To Keriso ena aposetolo taudia idia mase murinai, tomadiho koikoi ena hahediba herevadia, gari kava karadia bona lalohadaidia danu, be kongregesen lalonai idia vareai matamaia. (1 Timoteo 4:​1, 7; Kara 20:30) Buka ta, ladana A History of the Christian Church, ia gwau tomadiho ena haroro taudia oreana ta ia vara, idia ese hisiu tahua karana bona gari kava karadia idia abia dae. Gabeai, unai bamona kara idia gwauraia “Keristen” karadia.

Hari inai nega lalonai, tomadiho oreadia ese gari kava karadia idia do abidia dae. Hegeregere, Suriname dekenai, sibodia idia gwauraia Keristen Africa bese taudia momo ese edia imana o aiona dekenai touni (mea gauna) idia kwatua lauma dikadia edia siahu koua totona. Edia kara ia itaia tauna ta ia gwau: “Mai edia gari ida idia noho, idia aniani, idia gaukara bona idia mahuta.” Tanobada hegegemadai taunimanima milion momo ese mase taudia edia “lauma” garina idia gari. Madi, tomadiho oreadia momo ese unai bamona gari kava lalohadaina idia habadaia.

Haheitalai ta be inai: Africa kahirakahira dekenai ia noho motumotuna, Madagascar dekenai, Kerisendom ena misinari taudia ese edia tomadiho ena hahediba herevadia idia harorolaidia matamaia neganai, Madagascar taudia ese edia hereva idia kamonai henia, to idia ura lasi edia bese edia hahediba herevadia do idia negedia. Unai tomadiho oreadia ese dahaka idia karaia? Kenya ena niuspepa ta, Daily Nation, ia gwau: “Misinari taudia gunadia ese idia badu henidia lasi, to edia kara idia abia dae.” Unai dainai hari inai negai, Madagascar taudia 10 10 amo 5 5 idia gwauraia Keristen taudia. To, idia ese edia sene taudia edia “lauma” garina idia do gari! Unai dainai, edia kara be fada o pasto ta idia boiria, edia mase vadaeni sene taudia edia turia hanamoa totona, bena gara lalonai idia udaia lou. Oibe, tomadiho gunalaia taudia ese inai hereva koikoina idia habadaia, idia gwau: Bema gari kava karadia haida oi karaia, Dirava, Diabolo, bona idia mase vadaeni sene taudia be hahenamo herevadia koikoidia amo oi koidia diba bona moni amo edia lalona oi ania diba.

South Africa dekenai danu, taunimanima 100 100 amo 77 77 idia gwau idia be Keristen taudia bona idia momo be guriguri dekenai idia lao, to edia sene taudia edia tomadiho karadia idia do karaia noho, edia mase vadaeni sene taudia garidia idia do gari kava. Unai dainai idia gwauraia Keristen tanodia momo lalodiai, tomadiho karana be koukouna mo. Ena anina be idau negai idia abia dae bona idia do badinaia gari kava karadia.

To, tomadiho momokanina ese gari kava ia negea. Edena bamona? Durua gauna ta be diba. Edena diba, bona unai be edena bamona oi abia diba?