Abidadama amo Gorere Hanamoa Karana—Dahaka Dainai Idia Ura Henia?
Dubu lalonai regerege bada ia vara, gita, kibi, gaba, tareko, bona botabota auridia edia regena unai. Tatau, hahine, bona natu be idia moale dikadika mai kavakava ida idia mavaru bona ane idia abia neganai. Taunimanima edia lalona ena mamina be hegeregere, gorere taudia hanamodia matamaia totona.
Abidadama amo gorere hanamoa tauna ena dabua be lata bona kurokuro. Ena imana be aena dika tauna ta latanai ia atodia. Unai murinai, ena imana be matakepulu tauna ta ena kwarana latanai ia atoa. Aena dika tauna ia raka matamaia neganai bona matakepulu tauna ia itaia matamaia neganai, idia raraia taudia idia boiboi, idia gwau: “Hoa gauna inai!”
AFRICA lalonai, abidadama amo gorere hanamoa karadia idia karaia dubu oreadia momo lalodiai unai bamona kara idia vara. Momokani, Africa bona ma tano haida lalodiai, taunimanima momo be abidadama amo gorere idia hanamoa taudia idia gavaia, badina unai taudia idia gwau Dirava abidadama henia bona guriguri amo hekwakwanai idauidau idia hanamodia diba. Unai dainai haida, bema idia be moni dekenai idia dabu, unai taudia dekenai idia lao. Danu, Africa lalonai gabani be hemarai bada gauna, unai dainai gabani hahinedia haida ese abidadama amo gorere idia hanamodia taudia edia heduru idia tahua.
Ena be hospital bona sitoa dekenai gorere idauidau hanamoa muramuradia idauidau momo herea idia noho bona doketa taudia idia hekwarahi bada gorere taudia hanamodia totona, to gorere haida idia hanamodia diba lasi. Gorere taudia haida ese moni bada herea idia haorea edia gorere hanamoa totona, to idia do gorere noho. Unai dainai idia dara doko, bena abidadama amo gorere hanamoa taudia edia heduru idia tahua!
Haida idia davaria abidadama amo gorere hanamoa tauna ta ese edia gorere ia hanamoa bona idia laloa unai kara bona Keristen ena kara be idau lasi. Unai gorere hanamoa taudia momo idia gwau Iesu ena ladana ai taunimanima idia hanamodia, unai dainai Katolik bona Protestant taudia haida danu ese edia heduru idia tahua. To, Dirava tomadiho henia tauna momokanina ese edia heduru ia tahua be namo a? (Ioane 4:23) Bema unai taudia ese haida idia hanamodia, ita gwau diba Dirava ena heduru dainai idia hanamodia a?