Adavana Negea Karana be Maoro A?

JUNE 1986 ai, Irish Republic dekenai taunimanima ese gavamani ena taravatu adavana negea karana dekenai idia vouti karaia. Taunimanima sisina momo idia ura unai taravatu do ia noho, unai dainai Western Europe lalonai unai tano tamona sibona ese adavana negea karana ia do taravatua noho.

Ena be hari inai negai taunimanima momo ese taravatu gunadia idia laloa momo lasi, to edia bese ena noho dalana idia laloa momo dainai edia lalohadai adavana negea karana dekenai idia haidaua lasi. Ta ena bese, ena edukeisini, bona ena mauri dalana be mai anina gau ta ia lalohadailaia neganai. To, unai bamona gaudia iboudiai amo taunimanima ta ena lalona veria gauna badana be iena lalohadai tomadiho dekenai.

Adavana negea karana be edena bamona oi lalohadailaia? Bema tau ta mai ena adavana ida idia noho hebou namonamo diba lasi, bema idia lalohisihisi badina edia kara o edia lalohadai be idauidau dainai, edia headava idia hadokoa be maoro a? Unai henanadai be edena bamona do oi haerelaia? Gau badana be inai, emu haere ena badina be dahaka?

Lalohadai Idauidau

Roman Katolik tomadiho oreana ena taravatu idia badinaia taudia milion momo idia diba edia adavana idia negea diba lasi. The Catholic Encyclopedia ia gwau: “Headava matamata taudia idia mahuta hebou murinai, edia Keristen headavana idia hadokoa vaitani diba lasi [bena dala ia noho do idia headava lou totona].” To, nega momo Roman Katolik Dubu ese gwaumaoro ia henia ena orea taudia dekenai edia headava do idia hadokoa totona. April 1986 ai, niuspepa ta, The Denver Post ia gwau: “Iniseniai idia noho Katolik taudia momo herea ese gwaumaoro idia tahua edia headava hadokoa totona, unai dainai Denver Archdiocese ese K250,000 ia negea gaukara taudia bona kompiuta ia abidia inai gaukara karaia totona.” Ma ia gwau: “Denver Archdiocese lalonai, lagani toi lalodiai taunimanima 700 ese gwaumaoro idia tahua, to gaukara be momo dainai unai gwaumaoro idia do naria noho.”

Tanobada hegegemadai idia noho Protestant tomadiho oreadia idauidau be mai edia taravatu idauidau adavana negea karana dekenai. To, Protestant tomadiho oreadia idia gunalaia taudia momo idia gwau bema kerere badana ia vara edia headava idia hadokoa diba. To dubu idauidau edia lalohadai kerere badana dekenai be idauidau. Idia momo idia gwau, bema ta ena adavana ia heudahanai, o ia dagedage henia, o ia rakatania, edia headava idia hadokoa diba, to ma badina haida danu idia abia dae. Tomadiho oreadia haida ese headava hadokoa heboudia idia karaia, ane idia abia bona idia guriguri, headava heboudia ai idia karaia bamona. Niuspepa ta, The New York Times lalonai unai bamona hebou ta be inai bamona idia gwauraia: “Edia headava ena gwauhamata idia negea. Edia rini, headava rinidia unai, be haroro tauna dekenai idia henia. Hebou dokonai, haroro tauna ia gwau edia headava ia doko, bena tau bona hahine ese edia imadia idia udeudea.”

Iuda taudia be mai edia taravatu, unai taravatu be edia tomadiho ena kota ese idia atoa. Rabbi edia taravatu be, bema tau bona hahine idia ura edia headava do idia hadokoa, eiava bema idia ta ena tauanina o lalona ia dika o ta ese ta ena kara ia haheaukalaia diba lasi, edia headava idia hadokoa diba. Edia headava idia hadokoa momokani tau ese headava hadokoa pepana ia henia neganai, bona nega haida unai idia hepapahuahulaia. Tatau haida idia badu dainai idia gwau hadokoa pepana do idia henia lasi, eiava idia gwau do idia henia lasi ela bona edia ura gaudia haida idia abia guna. Rabbi taudia, loia taudia, bona ma haida idia hebou bena New York City Council ena President, Andrew Stein ese ia hereva henidia; ia gwau: “Inai hekwakwanai ese Iuda tomadiho idia badinaia hahinedia momo edia mauri ia hadikaia momokani.” State of Israel ai, bema tau ese hadokoa pepana ia henia lasi to ena hahine ia headava lou, gavamani vairanai ia headava lasi bona bema natuna ia havaraia do idia gwauraia ariara natuna.

Tomadiho ta idia badinaia lasi taudia idia gwau gavamani ena taravatu idia badinaia, to idia danu ese hekwakwanai haida idia davaria, badina headava hadokoa ena taravatu be idauidau tano idauidau ai bona gabu idauidau ai tano tamona lalonai. Diba tauna ta ia gwau, United States ena gabu idauidau ai, badina idauidau 50 dainai gavamani ese tau bona hahine edia headava do ia hadokoa. Unai badina haida be inai: “kara dika rohoroho,” “dala be lasi edia headava do idia hanamoa,” bona “hahine ia gwau ena adavana ida inai state dekenai do ia mai lasi.” Hari inai negai, gabu haida ai, ena be ta ia kerere lasi, to edia headava idia hadokoa diba.

Idia Do Daradara Noho

Ena be idia gwau unai taravatu idauidau headava hadokoa karana dekenai edia badina be Bible, to headava idia hagoadaia eiava taunimanima edia moale idia habadaia a? Haere be inai amo ia hedinarai: Taunimanima momo ese edia headava idia hadokoa​—⁠tano haida lalodiai headava rua rua amo ta ta idia hadokoa. Unai taravatu ese headava idia hagoadaia lasi, to unai sibona lasi, taunimanima milion momo edia lalohisihisi idia habadaia.

Unai dainai, namona be kara maoromaoro idia ura henia taudia ese Bible idia tahua ena hereva maorona headava hadokoa karana dekenai do idia dibaia totona.