Keristen Taravatu Oi Laloatao
NATUNA ta be sikuli ia hamatamaia neganai, idia hadibaia gaudia ginigunadia be duahiduahi bona toretore. Unai hereva badadia amo ia hegaegae ma hereva badadia haida ia diba totona, hegeregere taunimanima edia noho daladia, saiens bona gado idauidau do ia diba unai. Bema natuna ese duahiduahi bona toretore ia diba namonamo lasi, gabeai ia stadilaia gaudia dekenai do ia hekwarahi momokani.
Edena bamona Dirava ita tomadiho henia dalana ita diba danu be unai bamona. Bible ita stadilaia neganai, ita davaria hereva momokani edia badina eiava edia taravatu momo idia noho. Unai gaudia ita lalo-pararalaia neganai, ita be dobu gaudia ma haida ita tahua diba. To bema unai taravatu ginigunadia ita diba momokani lasi bona ita lalo-parara henidia lasi, iseda tomadiho be do ia maoro momokani lasi. Ita be lalohadai maorona do ita karaia diba lasi bona iseda abidadama do ia gini auka lasi.
Bible ena taravatu badadia ita diba be auka momokani lasi. (Maua dekenai ai torea gaudia oi itaia.) To idia be taunimanima hamoaledia herevadia sibona lasi eiava taunimanima idia tahua hereva dobudia sibona lasi. Idia be mai edia mauri hereva momokanidia, bona aonega Keristen taudia ese do idia ura henidia bada herevadia. Iehova ia gwau: “Lauegu hereva oi kamonai henidia. Oiemu taiana ai do oi hakala, egu hereva oi kamonaidia. Emu vairana amo do idia boio lasi. Emu kudouna lalonai oi atodia. Badina be idia be mauri, idia davaridia taudia dekenai; idia be edia hidio ibounai hamauria gauna.”—Hereva Lada-isidia 4:20-22; Esekiel 18:19, 20, 23.
To, ena be idia be taravatu badadia, Iesu ia gwau unai taravatu dekenai haida sibona be do idia lalo-parara bona do idia badinadia. Ia gwau: “Mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.” (Mataio 7:14) Ita gwau lasi unai taravatu edia anina idia hunia dainai edia anina idia abia lasi. Lasi. To, Iehova ia ura tatau bona hahine ese unai taravatu idia badinadia bona unai amo mauri do idia abia. (2 Petero 3:9) Taunimanima momo ese Bible idia abia diba, bona Bible lalonai ia ese aonega, diba bona lalo-parara daladia ia torea. Bona iena Witness taudia ese edia dekena taudia idia hagoadadia unai hamauria sivaraina idia tahua totona. Unai dala amo, “aonega momokani be ariara dekenai ia boiboi noho.” (Hereva Lada-isidia 1:20; 2:1-9) To siahu ma haida idia gaukara noho.
Satana ese taunimanima momo ia hakepuludia taravatu momokani idia itaia lasi totona. (2 Korinto 4:4) Danu, taunimanima be sibodia edia ura idia tahua dainai, idia be Atai Siahuna idia tahua lasi. Aposetolo Paulo ena nega lalonai, haida ese taravatu badadia idia diba vadaeni to idia laloaboio. Unai dainai, ia torea: “Tau ta ese Dirava ena hereva, diba hamatamaia gaudia umui dekenai ia hadibaia lou be namo.”—Heberu 5:12.
Iesu be sisiba ia henia, ia gwau: “Unai dina ia ginidae neganai taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani?’ Oiemu ladana dekenai lauma dika ai lulua bona oiemu ladana dekenai hoa kara momo ai karaia, ani? Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ” (Mataio 7:22, 23) Dahaka dainai sibodia idia laloa Iesu dekenai idia hesiai taudia be Iesu ese do ia dadaraidia? Badina edia “hoa karadia” be Bible ena taravatu amo idia abia lasi. Hegeregere idia be tanobada sivarai eiava saiens idia stadilaia toho idia do duahiduahi diba lasi neganai. Unai dainai edia gaukara be ia maoro momokani lasi, bona hereva momokani dekenai idia gini lasi. Unai dainai, idia be “dika karaia taudia.”
Oiemu Tomadiho Karana Ia Abia Dae Diba?
Nega ta do ia mai bona Iesu be ita dekenai inai bamona do ia hereva, a? ‘Idau gabuna dekenai oi lao, dika karaia tauna?’ Bema iseda tomadiho karana be Bible ena taravatu dekenai ita haginia unai bamona do ia hereva lasi. Unai bamona ita karaia diba bema Bible, Iesu ena hereva danu, ita tahua namonamo. Iesu be mauri ena dala maragina dekenai ia raka lao—momokani, ia be ‘dala . . . hereva momokani [bona] mauri danu.’ (Ioane 14:6) Bema iena hereva ita karaia bona iena raka dalana ita badinaia namonamo, ita danu unai dala dekenai ita raka diba.—Ioane 6:68; 1 Petero 2:21.
Iesu murinai idia raka taudia danu be mauri dala maragina dekenai idia lao. Unai dainai, Iesu ia mase neganai, edia imana dekenai Dirava tomadiho henia dalana hadibaia gaukara ia henia. Ia hadibadia danu do ia giroa bona edia kara ia noho lasi neganai do ia hahemaoro henia.—Mataio 24:46; 25:14-23; 28:19, 20.
Nega ia lao murinai, sibodia idia gwau Keriso murinai idia raka taudia edia namba be milion momo ai idia lao. To idia momo edia tomadiho be Bible ena taravatu dekenai idia haginia lasi. Iesu be 1914 ai guba Pavapava ai idia halaoa bona ia ‘ginidae’ neganai, sibodia idia gwau ia murinai idia raka taudia ia hahemaoro henidia totona, dahaka ia davaria? Sibodia idia gwauraia Keristen taudia milion momo be tanobada sivarai dekenai dika rohoroho tuarina badana ta dekenai idia vareai vadaeni.
Io, “Keristen” momo edia kara be Bible ena taravatu hegeregerena lasi. To, Keristen orea korikorina ta ia noho bona idia hekwarahi toho Dirava ena taravatu badinaia totona. Unai neganai tanobada be tuari amo ia honu bona daika daika be unai taravatu badinaia sivaraina idia ura kamonai idia hadibaia danu. Unai taudia idia haboudia bona gabeai hutuma bada be lalo-tamona dekenai idia hakapua hebou. (Mataio 24:31; Apokalupo 7:4, 9, 10) Mauri ia havaraia taravatudia idia badinadia noho, Dirava ena ura idia hadibaia noho ma haida dekenai, bona seri tamona dekenai idia hebou, bona idia hekwarahi “Dirava ena ura hereadaena” idia badinaia toho totona.—Roma 12:2.
Bible ena Taravatu Badana Ta
Unai idia karaia be sisina auka. Badina unai Keristen momokani taudia be sibodia edia kara kerere ese ia koudia. Bona idia be tanobada dekenai idia noho dainai edia lalohadai bona taravatu idia idau momokani. Aposetolo Paulo ia gwau “Satani ese tanobada taudia ibounai ia gunalaia noho.” (1 Ioane 5:19) Unai dainai hari dina ai, namona be Dirava idia tomadiho henia taudia momokanidia ese Iesu ia hadibaia hereva badana ta idia laloa momo, ia gwau: “Idia [Keristen taudia] be tanobada ena lasi.”—Ioane 17:16.
Iehova ese taunimanima ia doridia lasi ia idia tomadiho henia totona, to idia ura ia idia tomadiho henia taudia be gau haida idia laloa namonamo guna. Hegeregere, namona be idia diba tanobada dekenai idia be dagi badadia taudia ai do idia lao lasi. (Mataio 24:9) Hahediba tauna Iakobo ia gwau: ‘Tanobada danu umui turana karaia neganai Dirava umui tuari henia noho.’ (Iakobo 4:4) Bona aposetolo Paulo ia gwau: “Edena bamona kara maoromaoro bona kara kerere idia turana diba?” bona “Abidadama tauna bona abidadama lasi tauna ruaosi be idia hegeregere diba, a?” Bena ia be Iehova ena hereva ia gwauraia: “Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri.”—2 Korinto 6:14-17; Efeso 5:11.
Edena bamona idia dekena amo do ita ‘parara’? Ita be tauanina dalana dekenai tanobada ita rakatania diba lasi. To ita be ‘Dirava idia abidadama henia lasi taudia danu do ita hakapua tamona lasi’ diba. Ita be ‘kara dika taudia turana karaia’ ita karaia’ lasi, badina idia ‘ese karana namona idia hadikaia’ dainai. (1 Korinto 15:33) Bona ita be tanobada ena lauma amo ita gini siri diba. Unai lauma dainai taunimanima be sibodia edia ura idia tahua, idia koikoi, tanobada gaudia idia tahua momo, bona moale karadia idia ura bada. (2 Timoteo 3:1-5) Tanobada ena hegahusi amo idia gini siri taudia dekenai kudou hagoadaia hereva namona be: “Dirava ena ura ia karaia noho tauna be do ia noho ela bona hanaihanai.”—1 Ioane 2:15-17.
Taravatu Badadia Idia Badinaia Taudia
Dala ia noho Bible ena taravatu badinaia totona bona mauri ena dala dekenai ita raka totona danu, a? Oibe, natudia danu ese idia karaia diba. Haheitalai ta be, Brazil dekenai natudia rua edia kara sikuli dekenai be namo bada dainai, tisa ese edia sinana ia boiria edia kara namo ena badina idia kikilaia totona. Sinana ese unai tisa ia hamaoroa ena badina be idia ese Bible ena taravatu idia badinaia dainai. Unai taravatu be tama sina bona siahu taudia idia matauraia bona idia kamonai taravatudia. (Efeso 6:1-3) Sikuli ia ore neganai, nega idia henidia sikuli natudia vairadiai idia hereva, unai namo edena bamona idia davaria Dirava ena dala idia badinaia dainai.
Iesu ese inai taravatu ia gwauraia: “Taunimanima edia mauri badina be kohu momo dekenai lasi, lasi momokani.” (Luka 12:15) Japan dekenai, doketa ta ena bisinesi ia heau namo. Ia ese unai taravatu ia diba neganai ia ese ia badinaia bona iena turadia idia hoa. Iena bisinesi gabuna namona ia rakatania bona ia lao hanua maragi ta dekenai, unuseniai idia noho taudia be lauma dalana dekenai ia durudia totona. Ena kohu bada ia rakatania dainai iena moale ia boio lasi. To ia bona ena adavana be ma haida dekenai mauri ena Hereva idia mailaia dainai edia moale ia bada ia lao.
Bible ia gwau: “Badina kekero tauna bona aniani momo tauna be do idia ogogami.” (Hereva Lada-isidia 23:21) Unai hereva dainai ita naria, dika unai gaudia ita ania eiava ita inua momo garina. Drag ania kerere ena dika danu ia gwauraia: “Tauanina ena kara be ita ibounai ita diba. Karadia be inai: . . . kaivakuku tomadiho henia kara, meamea [guna Greek gado dekenai, phar·ma·kiʹa anina be “muramura aukadia ania”].” (Galatia 5:19, 20) Danu, aposetolo Paulo ia gwau: “Tau-anina bona lauma hamiroa karadia ibounai do ita hadokoa.”—2 Korinto 7:1.
Kuku ania karana bona ma drag aukadia ita ania momo neganai ita be Bible ena taravatu ita utua, unai be “dika karaia” karadia. (Mataio 7:23) Bema Dirava ena hesiai tauna ta be unai gaudia amo iena tau-anina ia hamiroa, do ia davaria Dirava ese iena tomadiho karana ia abia dae diba lasi. Unai dainai, taunimanima handred handred momo be unai muramura aukadia ania karana idia rakatania, bona unai amo namo momo idia davaria lauma dalana ai bona tau-anina dalana ai. To unai miro karadia rakatania dalana be mai ena hekwarahi.
Haroro taudia haida be iena iduara dekenai idia mai neganai tau matamata ta Michigan, U.S.A. dekenai, be Dirava bona ena taravatu sivaraina ia kamonaidia. Ia kamonai gaudia ia ura henidia bada to ia diba mariuana bona kuku ia ania dainai iena tomadiho karana Iehova dekenai be hegeregere lasi. Ia gwau: “Guna lau ania muramuradia lau moalelaidia to lau rakatania neganai lau hekwarahi lasi. To kuku ania karana rakatania totona lau be hua 6 dekenai lau hekwarahi.” Iena Keristen turadia bona guriguri ese ia idia durua. Hari iena mauri ia goeva Bible ena taravatu hegeregerena. Unai dainai iena lalona ia goeva, bona Dirava dekenai ia turana karaia bona ena Keristen turadia dekenai ia moale danu. Ia gwau, ia be Keristen tauna ai ia do lao lasi neganai, ia diba lasi turana karana korikorina ena anina be dahaka.
Taravatu maoromaorodia badinaia totona be aonega dalana momokanina. Bona aonega ese golo ena davana ia hereaia. Unai dala oi rakalaia bona Iehova oi hanamoa diba bona hahenamo hanaihanai do oi abia diba.—Salamo 19:7, 10; Hereva Lada-isidia 16:16.
[Blok long pes 24]
Dala maorodia be hereva momokani badadia bona taravatu edia badina ta ta bona idia amo ma hereva momokani haida bona ma taravatu haida ita havaradia diba. Henuna ai torea gaudia be haheitalai haida:
□ “[Iehova] oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.”—Mataio 22:37.
□ “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”—Mataio 7:12.
□ ‘Tanobada danu umui turana karaia neganai Dirava umui tuari henia noho.’—Iakobo 4:4.
□ “Umui aniani o umui inuinu, o dahaka dahaka umui karaia neganai inai, gau ibounai do umui karaia Dirava hanamoa totona.”—1 Korinto 10:31.
□ “Ita abidadama goada taudia be namo manoka taudia ita durudia edia abidadama do ia gini totona. Ita sibona iseda moale do ita tahua lasi.”—Roma 15:1.
□ “Inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.”—Heberu 13:15.
□ “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”—Heberu 10:24, 25.
□ “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.”—Mataio 4:4.