Dirava ese Oi Ia Boiria Maino Lalonai Do Oi Noho Totona, A?
“Bema ekalesia lasi tauna o ekalesia lasi hahine ese iena adavana, ekalesia tauna o hahine ia ura rakatania neganai, iena dala koua lasi. Inai bamona ia vara neganai ekalesia tauna o hahine be sibona edia ura dekenai idia karaia, taravatu lasi. Dirava ese umui ia boiria, maino lalonai do umui noho.”—1 KORINTO 7:15.
IEHOVA ia ura lasi taunimanima ese edia adavana do idia rakatania eiava edia headava do idia hadokoa. Ena ura be headava taudia be ‘tauanina tamona’ bamona do idia noho ela bona hanaihanai, bona edia headava ese moale, laga-ani, bona maino do ia havaraia. (Genese 2:24; Ruta 1:9) Bible ena sisiba be, headava taudia idia noho hebou be namo, herevana idia ta be Keristen kongregesen lalonai ia noho bona ta be murimuri tauna. (1 Korinto 7:12-16) Danu, bema ta ese ena adavana ia hadihoa “adavana hadihoa karana ia inai henia” Diravana ese ena kara do ia hahemaoro henia.—Malaki 2:13-16.
2 Taunimanima idia goevadae lasi dainai, bona badina ma haida dainai, nega haida Dirava ena bapatiso hesiai taudia danu ese edia adavana idia rakatania o edia headava idia hadokoa. To Keristen taudia ese headava idia laloa bada dainai, unai bamona idia do karaia lasi neganai idia hekwarahi bada edia headava idia hanamoa totona. Dirava ese haheitalai hereadaena ia karaia. Idau negai Israel besena ena “biaguna” o adavana bamona, ena orea taudia edia kara dika, edia gwau-edeede bona edia heudahanai lauma dalanai be lagani handred momo lalodiai ia haheaukalaia. (Isaia 54:1-5; Ieremia 3:14-17; Hosea 1:10, 11; 3:1-5) Iehova ese Israel besena edia kara dika ia gwauatao loulou ela bona edia kara ia dika rohoroho dainai edia kerere ia gwauatao diba lasi. Unai negana sibona dekenai Israel besena ia rakatania.—Mataio 23:37, 38.
3 Nega haida Keristen taudia ese kongregesen ena elda taudia edia heduru idia tahua, badina edia headava lalonai hekwakwanai badadia idia davaria dainai. Elda taudia ese taunimanima ta idia hadibaia ena adavana do ia rakatania o ena headava do ia hadokoa be maoro lasi, to Dirava ena Hereva unai kara dekenai idia gwauraia diba. Inai magasin ena hereva ta ese ia hahedinaraia, Bible ena hereva hegeregerena, tau bona hahine idia parara diba bema tau be mai ena dala to ena ruma bese taudia ia ubudia lasi, eiava bema idia ta ese ma ta ia botaia dikadika, eiava bema idia ta ese ena adavana ena goada lauma dalanai ia hadikaia gwauraia. Danu, ia hahedinaraia, Bible ia gwau bema ta ena adavana ia “heudahanai,” ena headava ia hadokoa diba bena adavana ma ta ia abia diba. Unai hereva “heudahanai” ena anina be sihari kava bona kara bodaga idauidau haida. (Mataio 19:9) Reana headava taudia ese maino be edia headava lalonai idia abia lou diba, unai dainai namona be edia lalona idia hadaia haraga lasi, edia adavana do idia rakatania eiava edia headava do idia hadokoa, bona reana ia kerere lasi tauna ese ena adavana ena heudahanai o kara bodaga ia gwauatao diba.—Mataio 5:31, 32; Hosea 3:1-3 itaia danu.
4 Inai magasin ena hereva ma ta ita duahia neganai, ita itaia Paulo ese headava taudia ia hamaorodia edia adavana do idia rakatania lasi. (1 Korinto 7:10-16) Paulo ena hereva dainai, bema murimuri tauna ena lalona ia hegeregere ena adavana danu do idia noho hebou, Keristen adavana be lauma dalanai ia durua toho be namo. (1 Petero 3:1-4) Bema hereva momokani lalonai ia vareai, unai ese ena ruma be maino bona laga-ani gabuna ai do ia halaoa. To, bema murimuri tauna ese ena Keristen adavana ena tomadiho ia inai henia bada dainai ia ura do ia rakatania, ena Keristen adavana ese dahaka ia karaia diba? Bema Keristen tauna ese ena murimuri adavana ia doria toho ia ida do idia noho totona, reana unai ese edia noho do ia hadikaia momokani, bena Keristen tauna ena maino ibounai do ia boio. Unai dainai, maino do ia vara totona, bema murimuri tauna ia ura ena Keristen adavana do ia rakatania, Keristen adavana ese ena dala do ia koua lasi. (Mataio 5:9) Murimuri tauna ese ena adavana ia rakatania negana sibona ai, ita gwau diba: “Dirava ese umui ia boiria maino lalonai do umui noho.” Bema badina maragidia dainai, eiava Bible ena hereva hegeregerena lasi dainai Keristen tauna ta mai ena adavana idia parara, unai hereva idia gwauraia be maoro lasi.
5 Headava taudia idia parara eiava edia headava idia hadokoa ena badina be idauidau, bona unai kara idia karaia negadia iboudiai dekenai “taravatu” tamona be ita atoa diba lasi. To ena adavana ida idia noho hebou lasi Keristen tauna o edia headava ia hadokoa Keristen tauna ese dahaka hekwakwanai do ia davaria reana? Dahaka ia karaia diba, unai hekwakwanai do ia hanaia totona? Bona taunimanima ma haida ese dahaka heduru idia henia diba?
Lalona bona Tauanina edia Ura
6 Bema ta be Bible ena hereva hegeregerena ena adavana ia rakatania eiava ena headava ia hadokoa, ena hekwakwanai haida do ia kokia. To edia gabu dekenai hekwakwanai ma haida do ia abia. Hegeregere, ena headava ia hadokoa taihuna ta ia gwau: “Iehova lau tanikiu henia badina maino lau davaria vadaeni.” To ma ia gwau: “Lau sibona ese egu natudia lau naridia be auka. Bona nega haida lau lalohisihisi sibona lau noho dainai. Danu, egu tauanina ena ura lau koua be auka. Egu mauri ibounai lau haidaua dainai, lau hekwarahi mauri dalana idauna ta do lau manadalaia totona.”
7 Unai dainai bema dala ia noho, namona be Keristen tauna ia laloa namonamo guna, dahaka hekwakwanai idia vara diba, bema ena adavana ia rakatania eiava edia headava ia hadokoa. Hegeregere, namona be ena lalona ena ura ia laloa. Reana hahine ia ura tau ta ese ia tura henia. (Genese 3:16 oi itaia danu.) Reana ena headava ia hadokoa hahinena ia ura dikadika do ia headava lou. Edia headava ia dika dainai, haida idia ura edia headava do idia hadokoa, to idia abia dae vadaeni, reana do idia headava lou diba lasi, a?
8 Paulo ia gwau: “Bema ia rakatania, ia be headava lasi do ia noho, eiava do ia giroa lou iena adavana dekenai.” (1 Korinto 7:11) Bema ia hekwarahi bada, reana hahine ese ena tau dekenai maino do ia karaia diba, ia dekenai do ia “giroa lou.” Unai dainai, bema Keristen headava taudia idia parara vadaeni, namona be edia adavana dekenai giroa lou karana idia laloa namonamo bona idia gurigurilaia momo. Danu, namona be idia laloatao edia tauanina ena ura dainai idia moru diba. Dirava be edena bamona do ia lalodia, bema idia noho hebou lasi dainai, idia ta ia sihari kava? Ia bapatiso hahinena ta ena ekspiriens ese unai hekwakwanai ia haheitalaia. Ena headava ia hadokoa murinai, murimuri tauna ta ia tura henia, nega sisina murinai ia rogorogo, bena kongregesen murimurinai idia atoa. Ena be gabeai ia helalo-kerehai bona kongregesen ese ia abia dae lou, to ena ekspiriens ese ia hahedinaraia, gau badana be ita naria namonamo bona Iehova ita guriguri henia bona ita tabekau henia, ‘Dirava ena vairana dekenai do ita kara dika’ garina. (Genese 39:7-12) Danu, ia hedinarai goevagoeva, bema tau o hahine ta ia laloa ena adavana do ia rakatania eiava ena headava do ia hadokoa, namona be ena lalona ena ura bona ena tauanina ena ura ia laloa namonamo.
Lalohisihisi Hamaragia Dalana
9 Bema dala tamona be, tau bona hahine idia parara eiava edia headava idia hadokoa, unai kara dainai idia davaria hekwakwanai do idia haheaukalaia be namo. Hegeregere, edia adavana idia rakatania Keristen taudia haida bona edia headava idia hadokoa Keristen taudia haida edia hekwakwanai badana be, sibona idia noho dainai idia lalohisihisi. Taunimanima ma haida be edena bamona idia heduru diba? Kongregesen ena elda taudia bona tadikaka bona taihu ma haida ese unai tadikaka bona taihu be lauma dalanai idia durudia diba edia lalona do idia hagoadaia totona. (Tesalonika Ginigunana 5:14 oi itaia danu.) Reana nega ta ta ai unai tadikaka bona taihu mai edia natudia do ita boiridia diba iseda ruma dekenai aniani sisina bona kiki namodia be iseda ruma bese ida do idia moalelaia totona. Aniani idauidau momo ita henidia be gau badana lasi, badina “lalokau ia noho gabuna dekenai uma aniani sibona ania be namo, to badu ia noho gabuna dekenai boromakau namona ania be dika.” (Hereva Lada-isidia 15:17) Reana unai nega ai haroro gaukara lalonai umui davaria ekspiriens namodia umui kikilaia diba, eiava stadi do umui karaia hebou, Keristen hebouna ta do umui hegaegaelaia totona.
10 Bema ena adavana danu idia noho hebou lasi eiava edia headava ia hadokoa Keristen tauna mai ena natudia oi boiridia oi bona emu ruma bese taudia ida haroro gaukara do umui karaia hebou totona, unai ese ia durudia diba sibona idia noho dainai do idia lalohisihisi bada lasi totona. Momokani, kongregesen taudia ese tamana o sinana korikorina ena gabu idia abia diba lasi, to ena headava ia doko taihuna ta ia gwau: “Edia tamana ia noho lasi dainai, lau sibona ese egu natudia lau naridia be auka, to elda bona hesiai taudia edia heduru dainai egu hekwakwanai be momo lasi. Dala idia tahua, heduru karadia idauidau do idia karaia totona.”
11 To, namona be ita naria namonamo. Taihu ta ia gwau: “Egu natu merona ena tamana be lasi dainai, tadikaka ta ese lau ia durua bada. . . . Lau itaia egu natuna ia kara namo henia bona gau momo ia henia, bena ura dikadia be egu lalona ai idia vara. Unai be David ena kara hegeregerena, ia ura dikadika gau ta ia abia, to ia abia be maoro lasi.” (2 Samuel 11:1-4) Ena be ia sihari kava lasi, to ena lalohadai dikadia bona ena lebulebu karadia dainai ia hemarai, Iehova ia noia ena kerere do ia gwauatao, bona unai tadikaka ia tura henia lasi. Unai ese ia hahedinaraia goevagoeva ura dikadia ita dadaraia bona ‘dika ibounai ita rakatania’ be gau badana!—1 Tesalonika 5:22; Galatia 5:24.
12 Bema taunimanima ma haida idia durudia, reana sibona idia noho dainai idia davaria lalohisihisina idia hamaragia diba. Ena headava ia doko taihuna ta ia gwau: “Bema ita gaukara goadagoada bona dala ita tahua taunimanima ma haida durudia toho totona, ita be nega lasi ita lalo-metau bona sibona ita noho dainai do ita lalohisihisi lasi.” Reana ena headava ia doko o ia be ena adavana danu idia noho hebou lasi tauna ta ese ruma bese ta be ena ruma dekenai ia boiria mai diba, lauma dalana ai do idia hagoadaia heheni totona. Bema unai bamona oi karaia momo diba lasi, emu moni ia hegeregere lasi dainai eiava badina ma ta dainai, reana gorere taudia o taunimanima ma haida oi vadivadi henia diba oi hagoadaia totona. Reana buruka taudia oi durua diba danu; edia ura gaudia be sitoa amo oi abia diba eiava edia ruma gaukara haida oi karaia diba. Namona be emu nega bona goada be unai bamona oi negea, bena do oi itaia, “henia kara ena moale be bada, abia karana ena moale be maragi.”—Kara 20:35.
13 Sibona oi noho dainai ena lalohisihisi oi hamaragia dalana ta be ma Keristen taudia haida ida Basileia harorolaia gaukarana umui karaia hebou. Taihu ta ia gwau: “Nega haida lau be adavana lasi dainai lau lalohisihisi, to egu nega bada be haroro gaukarana lalonai lau negea diba dainai, bona tadikaka bona taihu lau bamoa momo diba dainai, lau lalohisihisi momo lasi bona egu lalohisihisi ia noho daudau lasi.” Bema ruma ta ruma ta gaukara oi karaia momo reana lou-henia bona Bible stadi be kamonai taudia ida oi karaia diba, bona idia haida be reana do idia gwauhamata Iehova dekenai bona ena hesiai gaukara do idia karaia. Momokani, haroro gaukara ita karaia ena badina be lalohisihisi hamaragia totona lasi, to reana unai moale gaukarana bona hahenamo ia havaraia gaukarana ita karaia dainai, iseda lalohisihisi do ia ore.—Hereva Lada-isidia 10:22.
14 Iehova ena hesiai taudia iboudiai be lauma dalanai do idia goada, haroro gaukara idia karaia neganai, kongregesen ena hebou lalonai idia haere neganai, bona ‘Basileia idia tahua guna’ neganai. (Mataio 6:33) Unai gaukara namodia ese Iehova ena hesiai taudia iboudiai idia durudia; vadaeni, edia headava idia hadokoa eiava edia adavana danu idia noho hebou lasi Keristen taudia be lauma dalanai idia hagoadaia diba danu. Unai kara ese edia hekwakwanai iboudiai do idia kokidia lasi, to edia lalona do idia hagoadaia.
Guriguri be Gau Badana
15 Keristen taihuna ta be headava lasi kekenina bamona ia noho lou neganai, heduru ia davaria, badina “haroro gaukara ia karaia momo dainai . . . bona gorere taudia, buruka taudia, bona lauma dalanai idia manoka taudia ia vadivadi henia dainai.” To ma ia gwau: “Lau sibona lau noho dainai lau lalohisihisi neganai, ma haida lau vadivadi henia bona Iehova lau noia, lau do ia hagoadaia, badina lau diba Satana ia gaukara goadagoada noho.” Oibe, Dirava do ita badinaia noho totona, gau badana be mai eda kudouna ibounai ida ita guriguri. Edia adavana danu idia noho lasi eiava edia headava idia hadokoa Keristen taudia be edia guriguri lalonai Iehova idia noia diba, ena lauma helaga bona ena huahua ta, boga-auka, do idia abia, edia tauanina do idia biagua namonamo totona. (Luka 11:13; Galatia 5:22, 23; Kolose 3:5, 6) Danu, edia adavana danu idia noho lasi eiava edia headava idia hadokoa hahinedia haida idia hekwarahi reana, badina guna edia tau ese ia naria gaudia be hari idia naria to idia hegeregere momokani lasi. Unai dainai reana namona be Dirava do idia noia do ia durudia, mai aonega ida edia dala do idia abia hidi bona mauri ena hekwakwanai do idia hanaia.—Iakobo 1:2-8.
16 Reana edia headava idia hadokoa taudia idia lalo-metau badina idia laloa kerere idia karaia. Keristen tauna ta ia gwau: “Ena be oi kerere lasi, to emu headava oi hadokoa neganai emu mamina be hegeregere oi kara kerere, bona unai mamina be dika herea.” Momokani, bema tau o hahine be mai ena dala ena maduna ena headava lalonai ia huaia namonamo to ia huaia lasi dainai ena adavana ese ia rakatania, eiava edia headava ia doko, ena lalona ai mamina ia abia hegeregere ia kerere be maoro. (1 Korinto 7:3-5) To bema ta be ia guriguri momo bona ia laloa namonamo murinai, Bible ena hereva hegeregerena ena adavana ia rakatania eiava edia headava ia hadokoa, namona be Iehova ia noia do ia durua, ena lalona ena mamina dikana do ia koua totona. Danu, namona be kongregesen ena elda taudia idia naria namonamo sisiba be Bible ena hereva hegeregerena do idia henia totona, bona tadikaka o taihu ta be Bible ena hereva hegeregerena ena adavana ia rakatania eiava ena headava ia hadokoa neganai, namona be idia naria namonamo ena lalona do idia hadikaia garina.
“Dirava ena Maino” ese Ia Naridia
17 Edia adavana danu idia noho lasi eiava edia headava idia hadokoa Keristen taudia edia hekwakwanai be nega momo idia idau. To, gau haida dekenai, iseda “ekalesia varavara tanobada kahana ibounai dekenai, be hisihisi inai bamona idia abia noho.” (1 Petero 5:6-11) Hegeregere, Iehova ena hesiai taudia iboudiai ese dagedage idia davaria, bona idia momo be moni dekenai idia dabu, eiava idia gorere, eiava idia lalohisihisi, eiava hedibagani o hekwakwanai ma haida idia davaria. Unai dainai, namona be edia adavana danu idia noho lasi eiava edia headava idia hadokoa Keristen taudia be lauma dalana ai do idia goada noho totona, Bible idia stadilaia, hebou iboudiai dekenai idia lao, haroro gaukara idia karaia goadagoada, hesiai gaukaradia iboudiai idia karaia, bona Iehova kahirakahira dekenai do idia noho totona idia guriguri momo, Iehova ena Witness taudia ma iboudiai ese idia karaia hegeregerena. (Mataio 5:3) Bema unai bamona idia karaia lasi, Keristen taudia iboudiai be lauma dalanai idia manoka idia lao diba, to inai hekwakwanai negana ai ‘Basileia tahua guna’ karana ese moale bona noho namona be kamonai Witness taudia iboudiai ia henidia.
18 Dirava ena Hereva ita badinaia neganai, lauma dalana ai do ita goada. Unai dainai bema oi be Keristen tauna ta o hahinena ta bona emu adavana danu be Dirava dekenai ia gwauhamata vadaeni, Paulo ena sisiba 1 Korinto 7:10-16 dekenai oi badinaia, a? Bema nega daudau lalonai umui noho hebou lasi, namona be do umui noho hebou lou dalana oi gurigurilaia goadagoada. Danu namona be sibona oi nanadaia: Lau headava dainai Iehova ena ura lau dekenai be dahaka? Keristen headava taudia ese edia mauri lalonai Iehova ena taravatu headava dekenai idia badinaia be namo, ani? Iehova ena hahenamo ita abia lasi badina be ita headava neganai ita karaia gwauhamatadia be ita hagugurua lasi, a? Namona be oi laloa dahaka gau namodia do idia vara bema mai manau ida umui kiki hebou, bona umui guriguri, bona umui gaukara goadagoada emui mauri lalonai Dirava ena Hereva do umui badinaia totona. Namona be umui ruaosi ese emui hekwakwanai emui headava lalonai umui hamaoromaoroa bona laga-ani bona maino rumana ai umui noho hebou lou!
19 Iehova ena kamonai hesiai taudia iboudiai ese inai gau hereadaena idia abia be namo bona idia abia diba—“Dirava ena maino . . . taunimanima edia diba ia hanaia momokani” gauna. Ita be Keristen taudia dainai bema Paulo ena hereva ita badinaia, unai maino namona ita abia diba. Ia gwau: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.”—Filipi 4:6, 7.
20 Unai maino be Dirava ese ia henia lalo-mainona, herevana hekwakwanai be momo. Ena badina be, Iehova ita tura henia bona ita diba eda kara ese ena kudouna idia hamoalea. “Dirava ena maino” idia abia taudia ese dala idia kehoa ena lauma helaga ese ia hasiahudia totona, bona idia lalo-hekwarahi bada lasi. Dahaka dainai? Badina idia diba bema Dirava ese dala ia koua, gau ta be idia dekenai ia vara diba lasi. (Efeso 4:30; Kara 11:26 itaia danu.) Unai dainai, herevana ita headava o ita headava lasi, namona be “Dirava ena maino” ita laloa bada. Bona namona be David ena abidadama ita tohotohoa, ia gwau: “Maino dekenai do lau hekure diho bona do lau mahuta, badina Iehova e, oi sibona ese lau oi gimaia dainai gari lasi dekenai lau noho.”—Salamo 4:8.
Emu Haere be Dahaka?
◻ Edena negai ita hereva diba: “Dirava ese umui ia boiria, maino lalonai do umui noho”?
◻ Sibona idia noho dainai idia davaria lalohisihisina be edena bamona idia hamaragia diba?
◻ Ena adavana danu idia noho hebou lasi eiava edia headava ia hadokoa Keristen tauna ena mauri lalonai guriguri ena namo be dahaka?
◻ Herevana idia headava, o idia headava lasi, o edia adavana danu idia noho hebou lasi, o edia headava idia hadokoa, to “Dirava ena maino” be edena bamona Iehova ena hesiai taudia edia kudouna ia naria?
[Study Questions]
1. Bible ena hereva hegeregerena, namona be headava be edena bamona ita laloa?
2. Keristen taudia ese adavana rakatania karana bona headava hadokoa karana edena bamona idia laloa?
3. (a) Bible ena hereva hegeregerena, Keristen tauna ese edena badina haida dainai ena adavana ia rakatania diba? (b) Bible ena hereva hegeregerena, headava hadokoa ena badina korikori be dahaka?
4. (a) Paulo ena sisiba headava Keristen taudia totona 1 Korinto 7:10-16 dekenai ena hereva badadia mani oi gwauraia. (b) Edena negai idia gwau diba: “Dirava ese umui ia boiria maino lalonai do umui noho”?
5. Edena henanadai ita laloa be namo?
6. Adavana rakatania karana bona headava hadokoa karana ese dahaka hekwakwanai idia havaraia?
7. Badina be dahaka Keristen tauna ese adavana rakatania karana eiava headava hadokoa karana dainai idia vara diba gaudia ia laloa namonamo guna be namo?
8. (a) Korinto Ginigunana 7:11 ena hereva dainai, namona be idia parara Keristen headava taudia ese dahaka idia gurigurilaia bona idia laloa namonamo? (b) Bema ta ia laloa ena adavana do ia rakatania eiava edia headava do ia hadokoa, dahaka ia laloa namonamo be namo?
9. Edia adavana danu idia noho hebou lasi eiava edia headava idia hadokoa Keristen taudia be edena bamona ita durua, sibona idia noho dainai do idia lalohisihisi bada lasi totona?
10, 11. (a) Ena adavana ida idia noho hebou lasi eiava edia headava ia hadokoa tadikakana o taihuna be edena dala ma ta amo ita durua diba? (b) Badina be dahaka ita naria namonamo be namo?
12. Ta ese dahaka gau namodia ia karaia diba ia sibona ia noho dainai ia davaria lalohisihisina do ia hamaragia totona?
13. Lalohisihisi hamaragia totona, heduru gauna ma ta be dahaka?
14. Dahaka kara ese edia adavana danu idia noho hebou lasi eiava edia headava idia hadokoa Keristen taudia edia lalona idia hagoadaia diba?
15. Headava lasi tauna bamona idia noho lou taudia ese guriguri amo dahaka heduru badana idia abia diba?
16. Bema ena adavana ia rakatania o ena headava ia hadokoa dainai ta ese mamina ia abia, hegeregere ia kara kerere, iena mamina be edena bamona ita lalohadailaia reana?
17. Dahaka ese Keristen taudia iboudiai idia durua diba, inai hekwakwanai negana ai moale bona noho namona do idia davaria totona?
18. Idia parara Keristen headava taudia ese dahaka henanadai bona kara idia laloa namonamo be namo?
19. Filipi 4:6, 7 ena hereva hegeregerena, dahaka gau hereadaena be Iehova ena hesiai taudia iboudiai idia moalelaia diba?
20. (a) “Dirava ena maino” be dahaka? (b) Herevana ita headava o ita headava lasi, dahaka ita karaia be namo?
[Picture on page 29]
Guriguri ese “Dirava ena maino” be kamonai Keristen taudia iboudiai ia henidia diba bona unai maino ese edia kudouna bona edia lalona ena mamina do ia naria