Edeseniai Do Oi Lao Heduru Oi Abia Totona?

NEGA TA taunimanima ese moni koikoina ta oi idia henia, a? Reana lasi, to bema ta ese oi ia hadibaia taunimanima haida ese moni koikoi idia gaukaralaia, oiemu lalohadai be dahaka? Do oi badu ia dekenai, a? Lasi momokani! Unai tau ese oi ia hadibaia dainai do oi moale, badina oi ura lasi emu moni korikori oi haboioa bona unai moni koikoina oi abia.

Nega ta ta ai ita ibounai be heduru eiava sisiba hereva ita abia. Momokani, sisiba haida ese ita idia durua bada bona sisiba haida be anina bada lasi bamona. Ena be heduru eiava sisiba hereva haida edia namo ita dekenai ita diba lasi, to namo lasi ita badu unai sisiba idia henia dainai, ani?

Momokani, nega ta ta ai taunimanima iboudiai be heduru bona sisiba idia abia be namo. Taunimanima ta lasi ese hekwakwanai iboudiai hanaia dalana ia diba. Taunimanima idia daradara badina gau ibounai edia davana ia bada ia lao bona politikol orea be idia idauidau dainai, namona be dina vairai totona iboudiai be helaro namona idia abia. Hari inai nega lalonai idia headava taudia 100 100 amo 50 50 bamona edia headava idia hadokoa, kekeni momo herea idia rogorogo kava, bona sihari kava karana amo taunimanima momo herea ese gorere dikadia idia abia, unai dainai gau badana be taunimanima do idia laloa namonamo, bona heduru do idia tahua. Inai heiriheiri tanobadana lalonai namona be tama bona sina ese heduru idia abia, bena do idia diba edena bamona natudia do idia hadibaia idia daradara lasi totona. Memero bona kekeni edia lalohadai be idauidau bona edia lalo-metau be idauidau, bona hamaoromaoroa dalana reana idia diba lasi, unai dainai heduru idia abia be gau badana. Hari inai tanobada lalonai taunimanima ese henaohenao, sihari kava, bona dagedage karadia idia manadalaia, unai dainai gau badana be heduru idia abia mauri ena kara goeva idia diba totona.

Unai heduru be edeseniai do oi abia diba? Iseda mauri durua sisiba namona be Bible lalonai, Dirava ena lauma helaga ese ia torea Herevana. Idau negai salamo ia torea tauna ia gwau: “Emu hereva be egu aena ena lamepa, bona egu dala ena diari.” (Salamo 119:105) Dirava ena Hereva idia duahia bona idia badinaia taudia be hari inai nega lalonai idia vara hekwakwanai momo idia davaria lasi. Unai dainai lagani ta ta iboudiai, Iehova ena Witness taudia be hora milion momo idia negea edia dekena taudia idia vadivadi henidia Bible ena sivarai idia kikilaia hebou totona. To, taunimanima momo ese edia hereva idia kamonai henia lasi, haida idia badu henidia. Dahaka dainai?

Lalona Idia Koua​—Dahaka Dainai?

Vaia, taunimanima momo be idia ura lasi sisiba idia kamonai, tomadiho dekenai sisiba idia abia be idia ura lasi momokani. Dubu dekenai idia lao taudia be nega momo idia ura lasi edia haroro tauna amo sisiba idia abia. England ena haroro tauna ta be mai lalohisihisi danu ia gwau: “Ta ta iboudiai be mai edia lalohadai bona idia laloa edia lalohadai ena namo be haroro tauna ena lalohadai ena namo hegeregerena.” Unai dainai, idia diba lasi taudia be edia iduara dekenai idia mai neganai, edia hereva idia ura lasi kamonai be hoa gauna ta lasi.

Ma danu, ena be daradara negana lalonai ita noho, to taunimanima momo herea be edia dubu idia do laloa noho. Encyclopedia buka ta lalonai ia gwau “tomadiho karana ese taunimanima momo herea edia kudouna ia hamarerea diba.” Reana unai taudia be idau tomadiho tauna ta danu Bible idia kikilaia lasi bona unai bamona idia karaia idia laloa bada lasi. Ena be hekwakwanai hanaia dalana idia kikilaia, to Bible dekenai do idia lao lasi heduru abia totona.

Ma haida be Bible ena hereva idia ura kikilaia lasi, badina tomadiho orea lalonai koikoi bona kara dika karadia momo idia itaia dainai. Idia badu badina tomadiho gunalaia taudia haida idia gwau sihari kava karana be ia dika momokani lasi, eiava idia hemarai badina televisen dekenai idia haroro taudia ese moni bada idia mataganigani henia dainai. Reana tomadiho orea idia ura henia lasi badina politikol orea rua idia hepapahuahu neganai, haroro tauna ese ena dagi ia gaukaralaia ia ura henia politikol orea ia durua totona. Idia laloa, tomadiho orea ese hekwakwanai haida idia hamaoromaoroa, to hekwakwanai momo idia havaraia danu.

Unai taunimanima idia maumauraia gaudia idia vara momokani. Tomadiho orea dekenai, koikoi karana idia vara, hegeregere “moni koikoi” idia gaukaralaia bamona. Koikoi karana dainai Bible ena heduru idia dadaraia be namo lasi, unai be hegeregere moni namona oi dadaraia moni koikoi idia gaukaralaia dainai!

Bona ita kikilaia vadaeni hegeregerena, inai tanobada ena kara ese ita idia hadikaia dainai, gau badana be ita ibounai be sisiba ita abia dala maorona ita abia hidi totona. Edena bamona sisiba ita abia dae to ita badu lasi? Idau tomadiho orea tauna ida Bible kikilaia hebou karana be anina bada lasi eiava unai be ia dika, a? Iseda lalona ita kehoa diba sisiba namona ita abia totona bona sisiba koikoina ita dadaraia totona, a? Bible ena sisiba inai hereva dekenai be dahaka?