Paradaiso ena Vara Lou Dalana Ia Kehoa

“[Iesu] be ia dekenai ia gwau: ‘Momokani hari dina oi lau hamaoroa, Oi be lau danu Paradaiso dekenai do ita noho.’ ”​—Luka 23:​43, NW.

TAUNIMANIMA ginigunadia be Paradaiso dekenai idia vara. Bible ena buka ginigunana lalonai taunimanima idia vara dalana ia herevalaia, ia gwau: “Iehova Dirava ese taunimanima tano ena kahu amo ia karaia, bona mauri ena laga ena udu baubau lalonai ia hiriria vareai, vadaeni taunimanima be mauri tauna ia karaia vadaeni. Iehova Dirava ese uma ta dina ia daekau kahana dekenai ia karaia, ladana Eden, bona unai gabu dekenai ia karaia vadaeni tauna ia atoa, unuseni ia noho.” (Genese 2:​7, 8) Unai ladana “Eden” ena anina be “Moale,” unai dainai Eden umana be moale gabuna, ena kahana ibounai be hairai bada herea.

² Unai hereva “paradaiso” be Greek gado amo, bona unai gado dekenai ena anina be uma mai hairaina ta. Greek gado ai paradaiso idia gwauraia pa·raʹdei·sos, Heberu gado ai idia gwauraia gan, bona ena anina be “uma.” Keristen Grik Revarevadia, Mataio ia lao Apokalupo dekenai, be gunaguna idia torea Greek gado dekenai, bona Nisan 14, lagani 33 C.E. ai, Kwara Koukouna Gabuna (Calvary) dekenai Lohiabada Iesu Keriso be au ta dekenai idia hamasea bona hisihisi ia ania noho neganai, ia herevalaia gaudia idia torea neganai, idia ese unai hereva paradaiso idia torea.

Iesu ese Paradaiso Gwauhamatana Ia Henia Kara Dika Tauna Ta Dekenai

³ Unai nega lalonai, kara dika taudia rua be Iesu danu idia hasatauroa. Henao tauna ta be Iesu ia gwauraia dika karana ia hadokoa, to Iesu ena kahana ma ta dekenai idia hasatauroa henao tauna be Iesu ia gwauraia dika noho. Iesu ia hebogahisi henia henao tauna be Iesu dekenai ia giroa bona ia gwau: “Iesu e, oiemu Basileia do oi abia neganai, do oi laloa lau.” Unai bamona ia hereva neganai ia hahedinaraia ia be mai ena abidadama Iesu dekenai, ena be ia badinai idia hasatauroa, to ia diba gabeai basileia ta do ia abia. (Luka 23:42; Mareko 15:32) Unai bamona ia hereva neganai reana Lohiabada Iesu ena kudouna ia hamoalea momokani! Unai henao tauna ena kudouna be ia namo, ia diba Iesu Keriso be kara dika tauna ta lasi, bona taunimanima vairanai au dekenai idia hasatauroa hemarai dekenai do ia mase totona, be hahemaoro kererena. (Luka 23:41) Ia henanadailaia gauna ese ia hahedinaraia ia be mai ena abidadama Iesu be mase amo do ia toreisi lou diba bona ena basileia ta do ia abia. Danu unai henao tauna be mai ena abidadama do ia toreisi lou, bona ia diba Iesu ese mase amo do ia hatorea isi lou bena tanobada dekenai do ia mauri lou diba.

⁴ Iesu be ia dekenai ia gwau: “Momokani hari dina oi lau hamaoroa, Oi be lau danu Paradaiso dekenai do ita noho.” Unai ia herevalaia neganai ia ese unai kudou-namo henao tauna do ia toreisi lou neganai ia gwauraia. Ena be unai kara dika tauna ese hisihisi ia ania, to ia be mai ena abidadama dainai ia goada momokani unai hereva ia kamonai neganai. Unai tau do ia toreisi lou totona, anina be Iesu do ia toreisi lou guna. Bena, taunimanima hatoreaisi lou siahuna Dirava ena amo ia abia neganai, Iesu ese unai kara dika tauna be mase amo do ia boiria mai, taunimanima edia toreisi lou ena dina korikori dekenai.​—Luka 23:​43, NW; Ioane 5:​28, 29; 1 Korinto 15:​20, 23; Heberu 9:15.

⁵ Iesu be edena gado dekenai unai gwauhamata herevana ia gaukaralaia? Badina unai nega lalonai gado idauidau idia gaukaralaia. Ita diba edena gado ia gwauraia badina Gavana Pontio Pilato ena hereva dainai, ia ese revareva ta ia torea bona Iesu Keriso be au ta dekenai idia hasatauroa neganai, ena kwarana atai gabuna dekenai unai revareva idia kokoa kau, idia raka hanai taudia ibounai idia duahia totona. Unai sivarai idia torea Ioane 19:​19 bona 20 dekenai, ia gwau: “Pilato ese revareva ia torea, satauro ena ataiai ia atoa. Ia torea revarevana be inai, ‘Iesu, Nasareta tauna, Iuda taudia edia King.’ Iuda taudia momo ese unai revareva idia duahia, badina be Iesu idia hasatauroa gabuna bona hanua badana ena padana be ia daudau lasi, bona unai revareva be Heberu gado dekenai bona Roma gado dekenai bona Helene gado dekenai ia torea.”

⁶ Iesu be Betelehem dekenai ia vara, bona ena sinana Maria be rami hebou Heberu kekenina, unai dainai Iesu be Iuda bese ena tauna ta. Unai dainai, lagani toi mai kahana dekenai ia vara tanona dekenai haroro gaukara ia karaia, bona Iuda taudia edia Heberu gado dekenai ia haroro. Vadaeni, hagoadaia herevana be unai henao tauna dekenai ia henia neganai, reana Heberu gado dekenai ia hereva. Bena ia dekenai Paradaiso ia herevalaia neganai, unai Heberu hereva gan (uma) ia gwauraia​—unai hereva be idia torea Genese 2:8 dekenai. Unai siri lalonai, Greek Septuagint ena Buka Helaga lalonai unai hereva gan idia hahanaia neganai pa·raʹdei·sos idia torea.

⁷ Iesu idia hasatauroa murinai, ena dina ihatoina dekenai ia be mase amo ia toreisi lou, unai be Nisan 16, Heberu taudia edia kalenda dekenai. Bena dina 40 murinai ia be guba dekenai ia giroa lao, unai be iena noho gabuna korikorina unai, to ia giroa lao neganai dagi badana ia abia. (Kara 5:​30, 31; Filipi 2:9) Hari ia be mase diba lasi maurina ia abia, iena guba Tamana ena mauri hegeregerena. Ema bona Sunday, Nisan 16 dekenai, Iesu be mase amo ia do toreisi lou lasi neganai, Iehova Dirava mo sibona be mase diba lasi maurina ia abia.​—Roma 6:9; 1 Timoteo 6:​15, 16.

Davana Ia Henia Karana ese Dala Ia Kehoa

⁸ Unai kara ibounai idia vara badina Dirava ia ura tanobada ibounai be hairai gabunai do ia lao, oibe, ia ura tanobada ibounai be paradaiso gabunai do ia halaoa. (Genese 1:28; Isaia 55:​10, 11) Korinto Ginigunana 15:​45 dekenai, aposetolo Paulo ese Iesu ia gwauraia “Adam dokona.” Unai ese ia hahedinaraia Dirava be ena ura inai tanobada dekenai ia laloaboio lasi, bona badina Adam ese iena ura ia hagugurua lasi dainai ma tau ta ia tahua iena ura do ia hagugurua totona.

⁹ Paulo ia gwau, Iesu ese “iena mauri ia henia, taunimanima ibounai hamauria totona.” (1 Timoteo 2:6) Iesu Keriso danu ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia henia, taunimanima ibounai hamauria totona.” Unai ia karaia dainai, dala ia kehoa Iesu Keriso idia abidadama henia taudia be mauri hanaihanai do idia abia totona.​—Mataio 20:28; Ioane 3:16.

¹⁰ Iesu be mase amo ia toreisi lou bona guba dekenai ia daekau neganai, ena mauri ia bouboulaia ena davana be Dirava dekenai ia henia taunimanima ibounai hamauria totona. To, iena guba Tamana, Iehova Dirava, ena ura be tanobada besedia amo “bese ta ia abia hidi, iena ladana idia abia” totona. (Kara 15:14) Apokalupo 7:4 bona Apok 14:​1-4 edia hereva hegeregerena, unai taudia edia namba be 144,000 sibona, unai “orea maragi” taudia ia boiria Dirava ena Basileia dekenai idia vareai totona. (Luka 12:32) Iehova Dirava ese ia hanamoa bada taudia haboua gaukarana ia matamaia negana be Iesu Keriso ena aposetolo taudia 12 ia abia hidi neganai. (Mataio 10:​2-4; Kara 1:​23-26) Iena kongregesen ena du bamona taudia dekenai Iesu ia gwau: “Umui ese lau umui abia hidi lasi. Lau ese umui lau abia hidi.” (Ioane 15:16) Unai taudia ese Basileia henunai tanobada ibounai dekenai Paradaiso do ia vara ena sivarai harorolaia gaukarana do idia gunalaia.

Basileia Do Ia Mai ena Nega

¹¹ Hari inai nega lalonai, Lohiabada Iesu Keriso ena ladana dekenai ita ese Iehova ita guriguri henia noho Iena Basileia do ia mai totona. (Mataio 6:​9, 10; Ioane 14:​13, 14) Mesia ena Basileia be “idau bese edia nega do ia ore” neganai do ia haginia. (Luka 21:24) Unai Idau Bese taudia edia nega be idia ore lagani 1914 dekenai.a

¹² Unai lagani lalonai tanobada ibounai tuarina ginigunana ia vara, guna unai bamona tuari ta ia vara lasi. Unai ese Iesu ena peroveta herevana ia hagugurua, ia gwau hoa karadia do idia vara bena taunimanima do idia diba ia giroa mai vadaeni bona Basileia siahuna amo tanobada do ia lohiaia. Iena hahediba taudia be inai henanadai idia henia, idia gwau: “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?” Iesu be idia ia haere henia, ia gwau: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere. To unai be hisihisi nega ena hamatamaia sibona, natuna havaraia ena hisihisi bamona. Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”​—Mataio 24:​3, 7, 8, 14; Mareko 13:10.

¹³ Iehova ena Basileia ena sivarai namona be tano idauidau 212 lalonai idia harorolaia, bona dala idia tahua ma tano haida dekenai idia harorolaia totona. Unai be tanobada ibounai ena gavamani, gabeai do ia mai gauna, ena sivarai lasi, to unai be basileia ia mai vadaeni sivaraina, ia lohia vadaeni ena sivarai idia harorolaia. Unai Basileia be lagani 1914 dekenai ia lohia matamaia. Lagani 1,900 gunanai Iesu ese ena hahediba taudia ia hadibaia unai Basileia totona do idia guriguri. Unai nega amo ia mai hari taunimanima be unai guriguri idia gwauraia unai Basileia Havaraia Diravana dekenai, badina unai gavamani ena Pavapava ese ena hahediba taudia dekenai unai guriguri ia hadibaia dainai. Unai dainai Basileia hegaegaelaia Diravana be edia guriguri Basileia totona, be idau nega amo ia kamonai henia noho. Unai nega daudau lalonai iena witness taudia tanobada dekenai be unai guriguri idia gwauraia dainai ia moale, badina unai ese ia hahedinaraia idia be mai edia abidadama unai Basileia do ia mai totona. Edia ‘Tamana guba dekenai’ idia guriguri henia noho, unai kara idia hesikulaia lasi.​—Mataio 6:​9, 10.

¹⁴ Iehova ena Witness taudia be unai Basileia idia abia dae bona lagani 1914 dekenai guba lalonai ia haginia vadaeni sivaraina idia harorolaia, to unai Basileia ena sivarai namona idia do harorolaia noho. Unai bamona idia karaia badina unai Basileia ena siahu be inai tanobada dekenai ia do mai lasi, to inai tanobada ena basileia ibounai dekenai siahu ia do kokia lasi, bona idia be tanobada ena bese bona iduhu idauidau idia do lohiaia noho. (Roma 13:1) Basileia be do ia mai momokani bena unai neganai unai Basileia sibona ese tanobada ibounai do ia biagua.​—Daniel 2:44.

¹⁵ Ena be idia gwau unai Basileia ena Pavapava be Iesu, to ia mo sibona ia pavapava lasi, to Iehova Dirava ese iena Natuna murinai idia raka taudia 144,000 ia abia hidi idia be Iesu danu Mesia ena Basileia dekenai ia danu do idia pavapava hebou totona. (Daniel 7:22) Idau negai, hahelaga tauna badana ese Israel ena pavapava idia horoa helaga dehorona amo, bona unai hegeregerena, Pentekoste 33 C.E. ena dina amo, Iehova ese Iesu Keriso danu do idia pavapava hebou 144,000 taudia be Iena lauma helaga amo idia ia horoa, unai amo idia ia abia hidi lauma maurina guba dekenai do idia abia totona, bona “King ibounai edia King, bona lohia ibounai edia Lohia” danu do idia lohia hebou totona.​—Apokalupo 19:16; 1 Hanua Pavapavadia 1:39 itaia danu.

“Adam Dokona” ese Paradaiso Do Ia Havaraia Lou

¹⁶ Lagani 33 C.E. ai, Iesu be au ta dekenai idia hasatauroa neganai, toana be basileia ta do ia abia diba lasi. To ia ese Dirava ena Basileia ia harorolaia bona ia harorolaia sivaraina be koikoi lasi. Au dekenai idia hasatauroa murinai, dina ihatoina dekenai, unai Basileia Havaraia Diravana ese dala ia kehoa dainai, Iesu ena hahediba taudia ese unai gavamani do ia mai gurigurina idia gurigurilaia kava lasi. Iehova be Iena ura do ia karaia Tauna be mase amo ia hatoreaisi lou, bona mase diba lasi maurina ia henia idia gurigurilaia Basileiana dekenai do ia lohia totona.

¹⁷ Iesu ia diba tanobada ena Paradaiso ginigunana ia Havaraia Diravana be maduna do ia henia ia ese Paradaiso do ia havaraia lou totona, bona unai tanobada ibounai ena uma dekenai taunimanima do idia hahonua totona. Korinto Ginigunana 15:​45 bona 47 dekenai, ia gwau: “Buka Helaga lalonai ia torea, ia gwau, ‘Tau ginigunana, Adam, be Dirava ese ia karaia, taunimanima edia mauri ia abia.’ To Adam dokona, gabeai ia mai tauna be mauri hanaihanai ia henia Laumana. Lauma ena mauri be guna lasi, to tauanina ena mauri be guna.” Adam iharuana be guba dekena amo ia diho mai tauna bona Iehova ese ia abia hidi tanobada dekenai Paradaiso do ia havaraia lou totona. Unai dainai Lohiabada Iesu ese mai ena hebogahisi danu kara dika tauna inai bamona ia hamaoroa diba: “Oi be lau danu Paradaiso dekenai do ita noho.” (Luka 23:​43, NW) Unai hereva amo ita diba Paradaiso be inai tanobada dekenai do ia vara lou, dagi bada ia abia tauna, Iesu Keriso, “Adam dokona” unai, be guba Basileia ena pavapava siahuna amo do ia havaraia.

¹⁸ Lagani 1914 amo tanobada dekenai idia vara karadia ese Iesu Keriso ia perovetalaia herevana idia hagugurua, bona unai nega amo Iesu be Pavapava siahuna ia abia idia hamomokania. Idia ore lagani 70 bona ma haida lalonai idia noho taudia, lagani 1914 dekena amo idia mauri noho taudia unai, ese Iesu ia perovetalaia gaudia Mataio karoa 24 dekenai idia guguru idia itaia vadaeni. Unai dainai, Iesu ia gwauraia negana be kahirakahira do ia ore, bona tanobada dekenai Paradaiso havaraia lou negana be do ia ginidae.​—Mataio 24:​32-35; Salamo 90:10 itaia danu.

Tanobada Matamata Namona be Ia Kahirakahira

¹⁹ Iehova be Aramagedono tuarina dekenai ia ese ena lohia dalana ena maoro do ia hamomokania vaitani murinai, idia lalokau henia taudia ibounai be tanobada matamatana dekenai do idia noho bona unai mauri do idia hesikulaia lasi. Unai neganai Mesia Pavapavana, Iesu, Dirava ena Natuna ese tanobada besedia ibounai do ia lohiaia namonamo, bona unai nega do idia moalelaia bada. Unai nega lalonai gaukara namona idauidau do idia karaia diba! Iehova ena guba tuari orea bona kara dika orea ibounai edia tuari amo ia havaraia momoruna be tanobada dekena amo do idia kokia. Gau ta do ia noho lasi.

²⁰ To kara dika taudia idia mase neganai idia gaukaralaia tuari kohudia be edena bamona? Unai kohu be bada herea dainai Bible ese haheitalai amo ia hahedinaraia unai gaudia haorea totona nega be do ia daudau, unai dainai ita diba idia be momo herea. (Esekiel 39:​8-10) Aramagedono amo do idia roho mauri taudia be reana unai tuari kohu haida do idia haidaua gaukara namona dekenai idia gaukaralaia totona.​—Isaia 2:​2-4.

²¹ Noa bona ena ruma bese taudia be hoa dalana amo tanobada dekenai ia vara utu-utuna dekena amo idia roho mauri, bona tanobada matamatana idia itaia bamona, hari inai nega lalonai danu taunimanima be dika amo do idia roho mauri diba bona nega matamatana lalonai do idia vareai. To, unai neganai Satana Diabolo bona ena demoni oreana be tanobada ena itaia diba lasi gubana dekenai do idia noho lasi, bona taunimanima do idia hadikaia lasi, ela bona lagani 1,000 do idia ore. (Apokalupo 20:​1-3) Aramagedono amo do idia roho mauri taudia edia maduna badana be tanobada do idia hagoevaia, badina “Siahu Ibounai Diravana ena Dina Badana” murinai unai gaukara do ia bada.​—Apokalupo 16:14.

²² Aramagedono ena tuari amo do idia roho mauri taudia be do idia momo momokani lasi, bona hahegani do idia abia neganai tanobada ibounai dekenai Paradaiso gabuna ai do idia halaoa totona, reana oi laloa do idia daradara diba, badina unai be maduna bona gaukara badana momokani. To do idia daradara lasi, do idia moale bada herea, bona mai goada danu unai hahegani do idia badinaia bona unai gaukara do idia hamatamaia. Idia diba vadaeni, inai tanobada be Dirava ena aena atoa gabuna bamona, bona idia ura dikadika inai tanobada toana do ia namo bona do ia hairai herea, badina unai neganai iena aena do ia atoa be hemarai gauna ta lasi.

²³ To hagoadaia bona moale gauna badana be inai, tanobada hanamoa totona Dirava ese idia dekenai hahegani do ia henia, bona unai hahegani hagugurua totona unai moale gaukarana do idia hamatamaia, to idia sibona do idia karaia lasi. (Isaia 65:​17, 21-24 oi itaia.) Paradaiso do ia vara lou ena gwauhamata ia karaia Tauna dekena amo heduru do idia abia, unai tau be guba dekenai ia daekau dinana dekenai, ia gwau: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) Ia dekenai unai siahu ia do noho, bona ia ese mai ena hebogahisi kara dika tauna dekenai ia gwauhamatalaia herevana do ia hagugurua diba. Murina sivarai dekenai unai hereva do ita kikilaia.

[Footnotes]

Henanadai Riviulaia Totona

◻ Kwara Koukouna Gabuna (Calvary) dekenai Iesu ia gwauraia gwauhamatana ena anina be dahaka taunimanima ibounai dekenai, bona unai kara dika tauna ta dekenai danu?

◻ Paradaiso do ia vara lou diba ena dala be dahaka?

◻ Adam ginigunana ese dahaka ia karaia lasi, to “Adam dokona” ese dahaka do ia karaia?

◻ Aramagedono murinai, Iehova idia lalokau henia taudia be edeseniai do ia hakaudia vareai?

[Study Questions]

1, 2. (a) Unai hereva “paradaiso” ena anina be dahaka, bona Eden umana ena toana be edena bamona? (b) Keristen Grik Revarevadia dekenai unai Heberu hereva gan o “uma” be edena bamona idia hahanaia?

3. (a) Iesu dekenai ia hebogahisi kara dika tauna ena henanadai be dahaka? (b) Kara dika tauna ena henanadai ese ena abidadama Iesu dekenai edena bamona ia hahedinaraia?

4. Iesu ese unai kara dika tauna edena bamona ia haere henia, bona unai hereva ena anina be dahaka?

5, 6. (a) Iesu be au ta dekenai idia hasatauroa neganai Gavana Pontio Pilato be Iesu Keriso ena kwarana ataiai dahaka revareva ia torea? (b) Reana Iesu be edena gado amo kara dika tauna ia hereva henia?

7. Mase amo ia toreisi lou neganai, Iesu be dahaka hahenamo hairaina ia abia?

8. Iehova ena ura inai tanobada dekenai be dahaka, bona dahaka ese ia hahedinaraia iena ura do ia hagugurua?

9. Iesu ese dahaka ia karaia Paradaiso havaraia lou dalana ia kehoa totona?

10. (a) Dirava ia hanamoa bada “orea maragi” taudia dekenai ena ura be dahaka? (b) “Orea maragi” abia hidi gaukarana be edena negai ia matamaia, bona daika ese idia ia abia hidi?

11. Mesia ena Basileia be edena negai idia haginia?

12. Iesu ia perovetalaia hegeregerena, lagani 1914 ai dahaka hoa gaudia idia vara dainai ita diba ia giroa mai vadaeni?

13. (a) Dahaka dainai ita gwau Dirava ena Basileia ita harorolaia sivaraina be sivarai namona? (b) Edena nega amo Dirava ena Basileia do ia mai totona idia gurigurilaia, bona iena witness taudia tanobada dekenai be unai guriguri karana idia hesikulaia, a?

14. Dahaka dainai Iehova ena Witness taudia be Dirava ena Basileia ena sivarai namona idia do harorolaia noho bona idia hadokoa lasi?

15. Israel ena pavapava be dehoro amo idia horodia, to Pentekoste 33 C.E. ena nega amo unai kara ia hanaia gaukarana be dahaka?

16. Iesu be au ta dekenai idia hasatauroa neganai, toana be Basileia ta do ia abia diba lasi, to dahaka dainai ia harorolaia sivaraina be ia koikoi lasi?

17, 18. (a) Iesu idia gwauraia “Adam dokona” ena anina be dahaka? (b) Lagani 1914 amo tanobada dekenai idia vara karadia ese dahaka idia hahedinaraia?

19, 20. (a) Aramagedono murinai, Iehova idia lalokau henia taudia be edeseniai do ia hakaua vareai? (b) Namona be Aramagedono murinai kara haraga be dahaka do idia karaia?

21. Utu-utu amo idia roho mauri taudia hegeregerena, Aramagedono amo do idia roho mauri taudia be dahaka lalonai do idia vareai, to ena idau be dahaka?

22. Aramagedono amo do idia roho mauri taudia be tanobada ibounai dekenai Paradaiso do idia halaoa ena gaukara idia abia neganai, dahaka do idia laloa?

23. Daika ese Aramagedono amo do idia roho mauri taudia do ia durudia, Paradaiso havaraia lou gaukarana idia karaia guguru totona?

[Picture on page 14]

Magasin ta ladana “The World Magazine” August 30, 1914 ese Iehova ena Witness taudia (Millenial Dawners) ese Basileia be lagani 1914 ai ia gini idia harorolaia sivaraina idia torea