Dirava Ia Lohiadia​—Dala Namo Hereana

INAI tanobada gavamani edia sivarai ibounai ese ia hahedinaraia taunimanima be ma taunimanima haida idia biagudia namonamo diba lasi. Lord Acton be England tauna, ia gwau: “Tau ta be siahu ia abia neganai unai siahu ese ia hadikaia diba bona siahu bada ia abia neganai unai siahu ese ia hadikaia bada herea.” Bona, Bible ia hereva hegeregerena: “Taunimanima haida ese edia bamodia idia biagudia bona idia hahisidia.”​—Kohelete 8:9.

Matamana neganai, Iehova ese gwaumaoro ia henia taunimanima dekenai animal ibounai idia biagudia totona, to gwaumaoro ia henia lasi taunimanima idia biagudia totona. Dirava ese ena vara guna Natuna guba dekenai ia hamaoroa, ia gwau: “Taunimanima ita karaia, iseda laulau hegeregere, bona ita sibona bamona, bona idia ese davara ena gwarume bona guba ena roho manudia bona animal iboudiai bona tanobada ibounai bona tanobada dekenai idia marere gaudia iboudiai idia henunai do idia noho.” (Genese 1:26) Taunimanima ia Havaraia Diravana be edia Lohia Diravana danu. Edena bamona unai ia idau?

Taunimanima be Eden umana dekenai idia gwau-edeede neganai, idia ese edia Lohia Diravana idia dadaraia, bona unai nega amo ema bona hari taunimanima ese Dirava ena lohia siahuna idia dadaraia. (Genese, karoa 3) Guna, Israel dekenai be unai bamona idia karaia, Dirava ese unai bese ia abia hidi iena bese ai ia halaoa totona. To, Israel bese taudia be idia ura pavapava tauna ta do idia abia hidi neganai, Iehova ese ena peroveta tauna Samuel ia hamaoroa, ia gwau: “Idia ese oi idia dadaraia lasi, to idia ese lau idia dadaraia; idia ura lasi lau idia abiahidi, edia pavapava ai lau lao totona.”​—1 Samuel 8:7.

Dirava ese Israel bese ia lohiaia neganai ia ese heduru bada bona hebogahisi bada herea ia hahedinaraia idia dekenai. Ia be mai ena lalokau bada dainai ia ese ena hereva gwauraia tauna Mose dekenai taravatu ia henia idia ia naria totona. Unai taravatu ese idia ia naria gorere dikadia idia abia lasi totona, bona ia haganidia buruka taudia, vabu, bona tamana bona sinana lasi natudia do idia naridia totona. Unai taravatu ese hahegani ia gwauraia taunimanima haida edia kohu idia matauraia bona bisinesi dekenai idia koikoi lasi. Taravatu ese taunimanima haida ura henidia bada bona haida ura henidia maragi karana, hereva koikoi karana, bona haida koia karadia ia taravatulaia. Dirava ena lohia dalana be momokani bona maoromaoro.

Iehova be ia gwauhamata Israel bese sibona do ia lohiaia totona lasi, to tanobada besedia iboudiai danu. Ia ese mai edia kara dika taunimanima dekena amo lohia siahuna do ia kokia bona do ia henia ena vara guna Natuna dekenai. Unai ia perovetalaia neganai, Iehova ese Esekiel ia hamaoroa, ia gwau: “Bona inai gau danu tau ta ese do ia abia lasi ela bona biaguna korikorina ia mai, bena ia dekenai do lau henia.”​—Esekiel 21:27.

Iehova ese gwaumaoro ia henia Iesu Keriso dekenai taunimanima do ia lohiaia ena tamana ena lohia siahuna hahedinaraia totona. Keriso dekena amo Dirava ena Basileia be dala namo herea taunimanima lohiaia totona, bona Keriso ese ena kamonai taudia ia hadibaia do idia gurigurilaia inai bamona: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”​—Mataio 6:​9, 10.

Iesu ena kara taunimanima dekenai ese ia hahedinaraia ia be edena bamona lohia tauna ta ai do ia lao. Keriso be momokani mai ena hebogahisi, badina “ia ese taunimanima hutuma ia itaia, vadaeni ia bogahisihisi idia dekenai, badina be edia tauanina, idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Iesu ia hahedinaraia iena hahediba taudia ia lalokau henia bada, badina ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia.” (Ioane 13:34) Taunimanima ia lalokau henia bada dainai ia ese ena mauri ia henia idia ia hamauridia totona. Ena mauri ia bouboulaia unai dainai unai kara idia abia dae taudia edia kara dika, gorere, bona mase amo do ia ruhadia diba.​—1 Ioane 2:​1, 2; Apokalupo 21:​1-4.

Iesu Keriso dekena amo Dirava be momokani, kara maoromaoro, bona maino dekenai taunimanima do ia lohiaia ia perovetalaia neganai, Dirava ese peroveta tauna Isaia ia hasiahua inai bamona do ia torea totona: “Natuna ta ia vara, ita eda, natuna merona ta ia henia ita dekenai; bona gavamani be iena pagana dekenai do ia atoa. Bona iena ladana do idia hatoa, Sisiba Henia Tauna Namona, Siahu Bada Diravana, Noho Hanaihanai Tamana, Maino Lohiana. Iena lohia siahuna habadaia karana bona maino do idia doko lasi, David ena terona bona ena basileia latadiai do ia haginia bona do ia ha-aukaia totona, mai hahemaoro goevagoeva do ia haginia bona mai kara maoromaoro ida, inai nega amo ela bona hanaihanai. Inai be tuari oreadia edia Iehova ena siahu ese do ia karaia..”​—Isaia 9:​6, 7.

Dirava ena lohia siahuna tanobada dekenai idia naria taudia be hari inai nega Iesu ena lalokau hebogahisina idia hahedinaraia taudia bamona Keristen kongregesen momokani dekenai. Idia be inai haroro taudia bamodia lasi, inai tatau ese lalokau bona hebogahisi idia hahedinaraia edia mamoe orea dekenai, Iesu Keriso ia karaia bamona. Dirava ena tatau dainai, peroveta tauna Isaia ese ia torea, ia gwau: “Itaia! Pavapava ta be kara maoromaoro dekenai do ia lohia; bona lohia taudia do idia lohia kara maoromaoro dalana dekenai.” (Isaia 32:1) Dirava ena lohia siahuna idia hahedinaraia taudia be tanobada matamata dekenai do idia lohia danu.​—Salamo 45:16.

Kara Idauna Ta Kahirakahira Do ia Vara!

Dirava ena Basileia ese inai tanobada edia lohia taudia ia do hamasedia lasi neganai, kara idauna ta do ia vara guna. Unai kara idauna ese bese hapararaia karana do ia hadokoa. Taunimanima edia heiriheiri heheni gavamani iboudiai do idia ore, to guba dekenai ia noho gavamani maoromaorona ta ese taunimanima ibounai do ia hatamonaia bese tamona ta bamona, bona iboudiai be maino dekenai do idia noho hebou. Peroveta tauna Daniel ese ia torea bamona, ia gwau: “Unai pavapava edia negai guba Diravana ese basileia ta do ia haginia, nega ta ai do idia hadikaia ore diba lasi gauna. Bena ena lohia siahuna do ia hanaia lasi bese idauna ta dekenai. Unai basileia iboudiai [taunimanima edia gavamani] do ia hamakohidia maragimaragi bona do ia haoredia, bena ia sibona do ia gini ela bona hanaihanai.”​—Daniel 2:44.

Dirava ena lohia dalana sibona ese, hari inai negai gavamani taudia bona taunimanima ese idia davaria hekwakwanai ibounai do ia haorea momokani diba. Hari, hekwakwanai idia davaria gaudia ese taunimanima idia hagaria momokani! Bona taunimanima ta ese do idia durudia diba lasi. Unai dainai, namona be mai aonega danu Bible ese hekwakwanai do ia haorea dalana ita badinaia noho, bona mai abidadama danu namona be kahirakahira iseda vairana dekenai do ia vara gauna ita laloa noho, bona kudou-maoro taudia be do idia moale Dirava ena lohia moaoromaoro dalana henunai.

[Picture on page 6]

“Pavapava ta be kara maoromaoro dekenai do ia lohia”