Lagani Daha ena Nega Namona Kahirakahira Ia Mai

“Helai gabudia haida lau itaia, bona idia latanai helai taudia danu lau itaia. Unai taudia dekenai Dirava ese kota biaguna ena siahu ia henia. Bona taunimanima momo edia laumadia lau itaia. Inai taudia be edia kwaradia idia utua oho, badina be Iesu ena hereva momokani, bona Dirava ena hereva idia gwauraia dainai. Idia ese dagedage gauna o iena laulauna idia tomadiho henia lasi. Bona dagedage gauna ena maka edia baguna dekenai o edia imana dekenai, idia abia lasi. Idia be mase dekena amo idia mauri lou, vadaeni Keriso danu lohia siahu idia abia, ela bona lagani 1,000 idia ore.” “[Dirava] ese matana ranu ibounai [taunimanima] edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 20:​4; 21:4.

BIBLE ena hereva be lagani daha ena nega namona ia kahirakahira mai ia perovetalaia​—unai be Iesu Keriso bona idia bamoa guba pavapava oreana edia Lagani 1,000 Lohia Negana. Reana oi ese unai peroveta herevana do oi laloa bada lasi badina oi laloa ia be do ia vara momokani gauna ta lasi. To, unai Lagani 1,000 Lohia Negana do ia vara momokani ena hamomokania herevadia idia noho!

Hereva ta be inai, bema Bible oi stadilaia neganai, do oi itaia ia ese idia ore lagani 6,000 lalodiai, taunimanima edia histori ia gwauraia hedinarai maoromaoro. Ma danu, Bible be peroveta hereva gwauraia bukana, bona ia gwauraia sivaraidia eiava ia perovetalaia herevadia momo be idia guguru vadaeni. Unai be momokani dainai, Bible ese Keriso ena Lagani 1,000 Lohia Negana do ia mai ia perovetalaia herevana do ia guguru diba danu, ani? To, reana oi ura diba Bible be dahaka ia gwau unai nega dekenai. Do ia karaia gaukarana be dahaka? Bona reana oi ura diba ia mai neganai edena bamona oiemu mauri do ia haidaua, ani?

Vara Guna Davana Ia Haboioa

Bible ese ia hahedinaraia Keriso be ena Lagani 1,000 Lohia Negana lalonai ia ese ena ‘natudia’ dekenai vara guna davana do ia henidia. To unai vara guna davana be dahaka? Bona unai ‘natudia’ be daidia? Vara guna davana ena anina be tau ta ia mase neganai, ena kohu badana be ena vara guna natuna ese ia abia. Iseda tamana ginigunana, Adam, be Dirava ia gwau-edeede henia neganai, ia ese sibona bona ena natudia ibounai​—taunimanima ibounai unai—​edia mauri hanaihanai tanobada ena paradaiso dekenai ia haboioa. Unai dainai, Adam ese ena natudia dekenai ia henia davana be kara dika, mase, bona lalohisihisi.​—Genese 3:​1-19; Roma 5:12.

Iesu be taunimanima bamona tanobada dekenai ia vara badina ia ura Adam ia haboioa gauna, vara guna davana unai, do ia hoia lou taunimanima do ia henidia totona. Unai ia karaia badina ia ese Iehova Dirava ia abidadama henia dainai, bona mai ena ura danu ena mauri ia bouboulaia taunimanima do idia mauri totona. (Ioane 3:16) Ena mauri be goevadae bona ena kara dika be lasi dainai, Iesu ese mauri hanaihanai tanobada paradaisona lalonai do ia noho diba ena gwaumaoro ia abia​—Adam ese ia haboioa gauna unai. To, Iesu be unai gwaumaoro dalana ia gaukaralaia lasi; bona ia mase bona guba dekenai ia toreisi lou neganai unai gwaumaoro ia haboioa lasi. Unai dainai, ena ‘natudia’ dekenai ia henia diba, tamana ese vara guna natuna ia henia davana hegeregerena.​—Roma 5:​18, 19.

Vara Guna Davana Abia Taudia be Keriso ena ‘Natudia’

Isaia 9:6 lalonai, peroveta herevana ese Iesu ia gwauraia “Noho Hanaihanai Tamana.” Ia ese taunimanima ibounai edia mauri dalana ia hoia lou dainai, ia be edia Noho Hanaihanai Tamana ai ia lao, bona ia be mai ena dala ia hamauria taudia dekenai, eiava ena natudia dekenai, vara guna davana ia henidia totona. (Mataio 20:28; Salamo 37:​18, 29 oi itaia danu.) Unai ia hedinarai momokani ena gwauhamata herevana dekenai, ia gwau: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.” Danu ia gwau: “Dagedage lasi taudia be idia namo, badina tanobada do idia abia.”​—Mataio 5:5; 25:34.

To, tanobada ia henia be davana namona ai ia lao totona, gau badana be tanobada toana do ia idau momokani​—goevadae gabuna do idia halaoa! Gau badana be tanobada ibounai dekenai Dirava ia havaraia mauri gaudia iboudiai be maino bona lalo-tamona dekenai do idia noho. (Isaia 11:​6-9) Gau badana be taunimanima edia kara dika ibounai, mase danu, do idia haorea vaitani. (1 Korinto 15:​25, 26) Unai anina be mase taudia do idia toreisi lou, badina idia totona danu Iesu ia mase. Unai dala amo sibona idia be mai edia dala Keriso ena natudia ai do idia lao diba!​—Ioane 5:​28, 29.

Vadaeni, Keriso ena Lagani 1,000 Lohia Negana be moale negana, bona unai nega lalonai taunimanima be sisina sisina “do ia ruhaidia dika ena bodaga dekena amo” bona mauri goevadaena do idia abia. (Roma 8:21) Bona hereva namona be inai, tanobada ena aonega taudia danu idia gwau unai be lagani daha negana ena gaukara korikorina. Webster’s Ninth New Collegiate Dictionary (1985 gauna) ena buka dekenai, ia gwau “lagani daha ta” ena anina be “moale bada negana eiava taunimanima idia goevadae negana.”

Solomon ena Lohia Negana ena Namo Ia Hanaia

Do ia mai Lagani 1,000 Lohia Negana namona be hegeregere Solomon ena lohia negana, ia ese idau negai Israel besena ia lohiaia lagani 40 dekenai, bona ena basileia ena maino bona taga be ia bada herea. (1 Hanua Pavapavadia 4:​24, 25, 29) Sieba pavapava hahinena be ia mai neganai, Pavapava Solomon ia vadivadi henia totona, ia gwau: “Egu tano ai oiemu kara bona oiemu aonega sivaraina lau kamonai bona sivarai ibounai be idia momokani. Guna lau kamonai sivaraina lau hamomokania lasi, to lau mai egu matana amo lau itaia totona; bona lau itaia sivarai kahana sibona idia gwauraia. Oiemu aonega bona taga ese idia gwauraia gauna idia hanaia momokani. Oiemu taunimanima idia moale; hanaihanai oi vairanai idia gini bona oiemu aonega hereva idia kamonai noho hesiai taudia idia moale!”​—1 Hanua Pavapavadia 10:​6-8.

Tanobada Pavapava Solomon ena lagani 40 lohia negana lalonai, maino, taga, bona aonega ia itaia neganai, Sieba pavapava hahinena ia hoa, ia gwau ena aonega bona taga be bada herea momokani, vadaeni, unai hegeregerena, Iesu ena Lagani 1,000 Lohia Negana lalonai, Pavapava Solomon ia laulaulaia guba tauna, Iesu Keriso, ena aonega bona taga do idia itaia taudia do idia hoalaia danu! Iesu ia gwau, ia be “Solomona ia hanaia.” (Mataio 12:42) Namona be tanobada oi laloa, bema tanobada dekenai gorere be lasi, mai ena taga, maino, kara maoromaoro, bona moale be bada, ita laloa unai be namo herea, to Keriso ena Lagani 1,000 Lohia Negana do ia havaraia gaudia be unai namo do ia hanaia momokani.

Lagani Daha ena Nega Ihatoina Ai Dahaka Danu Do Idia Vara?

Lagani 1914 ena nega amo, tanobada dekenai idia vara gaudia ese idia hahedinaraia ita be “tanobada dokona” lalonai ita noho. Danu, Iesu ia gwau unai peroveta hereva idia guguru idia itaia uruna be “do idia mase ore lasi neganai be inai gaudia ibounai do idia vara momokani.” Vadaeni, unai anina be, Keriso ena Lagani 1,000 Lohia Negana bona Lagani Daha ena nega ihatoina hamatamaia negana be tamona, eiava?​—Mataio 24:​3-21, 34.

Iesu ese ena hahediba taudia ia sisiba henidia idia diba lasi gaudia edia anina idia gwauraia momo lasi totona. Ia gwau: “Egu Tamana sibona ena siahu dekenai ia laloa dina bona nega, umui be diba lasi.” (Kara 1:7) Iesu ia gwau “unai dina, unai hora” dekenai do idia vara gaudia be ena Tamana, Iehova Dirava sibona ia diba. (Mataio 24:36) Unai dainai, ena be taunimanima bona orea momo idia gwau lagani 1999 ena dina dokonai, hanuaboi momokani ai tanobada dokona idia perovetalaia, to Bible ese unai bamona hereva ia hamomokania lasi.

To, hari idia vara gaudia idia hahedinaraia goevagoeva inai dibura bona kara dika tanobadana ena dokona ena negana be kahirakahira “ia ore” bona Keriso ena Lagani 1,000 Lohia Negana be “ia kahirakahira vadaeni.” (Roma 13:12) Namo lasi do ia mai ena nega bona hora ita gwauraia kava, to namona be hari Dirava ia gwauraia hahemauri dalana do ita tahua ita badinaia totona. (Ioane 17:3) Unai dala amo do oi diba dahaka do oi karaia, bona taunimanima danu oi gini bona Iesu be umui dekenai do ia gwau: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.” (Mataio 25:34) Iehova ena Witness taudia be idia ura oi idia durua bena oi danu be unai Lagani 1,000 Lohia Negana do ia havaraia hahenamo do oi abia diba.a

[Footnote]

[Blurb on page 6]

“Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui”