Iehova be Iseda Lohia!
“Dirava ai kamonai henia be namo, taunimanima ai kamonai henia be dika.”—KARA 5:29.
1, 2. Taunimanima edia ura bona Dirava ena ura idia idau neganai, Iehova ena Witness taudia be edena dala ai aposetolo taudia idia tohotohodia?
KOTA badana ta dekenai tatau 12 idia kota henidia neganai, Iehova ese ia koudia lasi. Unai be lagani 33 C.E. ai, bona Iuda taudia edia kota be Sanhedrin taudia edia vairana dekenai idia karaia. Iesu Keriso ena aposetolo taudia idia kota henidia. Mani dubu biaguna ena hereva oi kamonai! Ia gwau: “Ai ese taravatu ai atoa, umui hadibaia lasi inai ladana dekenai. To hari emui hadibaia hereva dekenai Ierusalema ibounai umui hahonua vadaeni.” Unai bamona ia hereva neganai, Petro bona aposetolo taudia idia gwau: “Dirava ai kamonai henia be namo, taunimanima ai kamonai henia be dika.” (Kara 5:27-29) Hegeregere, idia gwau: “Iehova be aiemai Lohia!”
2 Oibe, Iehova be Iesu ena hahediba taudia korikoridia edia Lohia. Unai ia hedinarai goevagoeva Bible dekenai, Aposetolo edia Kara bukana lalonai; “lalokau Luka, dogeta tauna” ese unai buka ia torea Roma dekenai, lagani 61 C.E. ai bamona. (Kolose 4:14) Aposetolo taudia hegeregeredia, hari inai nega lalonai danu, bema taunimanima edia ura bona Dirava ena ura idia idau, Iehova ena bese taudia be edia guba Lohiana ena hereva idia badinaia. To Kara bukana ena amo ma dahaka do ita diba? (Oi sibona oi stadi neganai, namona be leta idauna amo idia torea Bible siridia oi kehoa bona oi duahia.)
Iesu be Hahediba Taudia Gaukara Ia Henidia
3 Aposetolo taudia be lauma dalana dekenai goada idia abia dainai, Dirava ena kahana dekenai idia gini goada diba. Keriso be hisihisi auna dekenai ia mase, to idia diba ia toreisi lou vadaeni. (1:1-5) Dina 40 lalodiai, Iesu be tauanina idauidau dekenai “ia hedinarai mai mauri danu,” bona Basileia ena hereva momokani ia hadibaia. Danu, ia ese iena hahediba taudia ia hamaorodia Ierusalem dekenai idia naria “Lauma Helaga dekenai” bapatiso do idia abia totona. Edia gaukara badana be haroro gaukara, hari inai negai Iehova ena Witness taudia edia gaukara badana hegeregerena.—Luka 24:27, 49; Ioane 20:19–21:24.
4. Lauma helaga be Iesu murinai idia raka taudia dekenai ia mai neganai, dahaka do ia vara?
4 Lauma helaga dekenai idia do bapatiso lasi neganai, aposetolo taudia idia laloa kerere. Idia laloa tanobada dekenai do idia lohia bona Roma ena lohia dalana idia ore, bena inai henanadai idia henia: “Lohiabada e, inai negana be, basileia do oi henia lou Israela taudia dekenai, a?” (1:6-8) Iesu ia haere neganai, toana be ia gwau lasi, badina ‘unai idia diba be edia gau lasi.’ ‘Lauma helaga idia abia neganai,’ siahu do idia abia Dirava ena guba Basileia, tanobada gauna lasi, idia harorolaia totona. Do idia haroro Ierusalem, Iudea, bona Samaria dekenai, “bona tanobada ena kahana ibounai.” Lauma ena heduru amo, Iehova ena Witness taudia be hari inai dina gabediai, tanobada ena gabu ibounai unai gaukara idia karaia.
5. Iesu be edena bamona tanobada ia rakatania dalana bamona, unai dala hegeregerena do ia lou mai?
5 Iesu be unai tanobada ibounai haroro gaukarana ia hadibadia bena guba dekenai ia daekau. Ia be ena hahediba taudia amo ia daekau, bena gabeai Iesu be iena guba Lohiana ena vairana dekenai ia vareai bona lauma taudia edia gabu ai ena gaukara ia karaia. (1:9-11) Aposetolo taudia be Iesu idia raraia, bena ori ta ese ia hunia; gabeai iena tanobada tauanina ia negea. Aneru rua idia mai bona idia gwau ‘unai dala dekenai do ia lou mai.’ Bona unai bamona ia vara. Iesu ena hahediba taudia sibona idia itaia ia lao oho neganai, Iehova ena Witness taudia sibona be iena itaia lasi lou mai negana idia diba hegeregerena.
Iehova ese Ia Abia Hidi
6 Nega sisina murinai, aposetolo taudia idia giroa Ierusalem dekenai. (1:12-26) Atai daiutuna ta lalonai (reana Mareko ena sinana, Maria ena ruma dekenai), abidadama aposetolo taudia 11 idia guriguri noho Iesu ena tadikaka, iena hahediba taudia, bona iena sinana, Maria ida. (Mareko 6:3; Iakobo 1:1) To daika be Iuda ena “gaukara dagina” do ia abia? (Salamo 109:8) Dirava ese Iesu ia taotore tauna, Iuda, ena gabu ia abia tauna ta ia abia hidi neganai, aposetolo taudia edia namba be 12 ia karaia totona, hahediba taudia 120 idia noho. Do ia abia hidi tauna be hahediba tauna ta Iesu be iena hesiai gaukara ia karaia neganai, bona ia ese Iesu ena toreisi lou ia itaia. Unai tauna be Iehova ia abia dae iena Lohia Tauna. Idia guriguri murinai, nadi idia negea, unai gaukara dagina do ia abia tauna idia makaia totona, Matia eiava Iosepa Barasaba. Dirava ese Matia ia abia hidi.—Hereva Lada-isidia 16:33.
7. (a) Edena dala ai Iuda be “kara dika davana moni [amo] tano ta ia hoia”? (b) Iuda be edena dala ai ia mase?
7 Iuda Iskariota ese Iehova ia abia dae lasi iena Lohia Tauna. Ia ese Dirava ena Natuna ia hoihoilaia siliva moni 30 amo! Iuda be unai moni ia henia lou hahelaga taudia badadia dekenai, to Petro ia gwau taotore tauna be “kara dika davana moni [amo] tano ta ia hoia.” Edena bamona? Vadaeni, ia ese ‘Rara Tanona’ hoia ena badina bona ena moni ia henia. Idia gwau unai tano be Hinnom Kourana ena diho kahana dekenai. Iena turana karana iena guba Lohiana danu ia dika vadaeni dainai, Iuda be sibona “ena aiona be varo dekenai ia kwatua, au dekenai ia tauadae, ia sibona ia alaia mase.” (Mataio 27:3-10) Reana varo eiava au rigina ia makohi, bona ‘iena kwarana dekenai ia moru, bena iena bogana ia pou’ nadi mai matana dekenai ia moru neganai. Namo lasi ita ta be tadikaka koikoi ta ai ita lao!
Lauma Helaga amo Idia Honu!
8 To idia gwauhamata vadaeni do ia vara bapatisona lauma dalana dekenai be edena bamona? Unai ia vara Pentekoste 33 C.E. ai, Iesu be guba dekenai ia daekau dina 10 murinai. (2:1-4) Unai bapatiso be moale bada ia havaraia! Oi laloa edena bamona idia karaia. Atai daiutuna dekenai, hahediba taudia 120 idia noho bena “guba dekena amo karaharaga regena ta ia diho mai, lai bada ena regena hegeregere, idia helai hebou noho ruma ibounai ia hahonua.” Unai be lai korikorina ta lasi, to ena rege be unai bamona. Bena “lahi” ena malana “hegeregere” be hahediba taudia bona aposetolo iboudiai latadiai ia noho. “Idia ibounai Lauma Helaga dekenai idia honu, bona gado idauidau dekenai idia hereva.” Unai bapatiso ia vara neganai, idia be lauma helaga amo idia vara lou, Dirava ese ia horodia, bona maka idia abia guba ahuna do idia abia totona.—Ioane 3:3, 5; 2 Korinto 1:21, 22; 1 Ioane 2:20.
9. Lauma amo idia honu hahediba taudia be dahaka idia herevalaia?
9 Unai gauna ia vara neganai, Ierusalem dekenai idia noho Iuda taudia bona ‘guba henunai bese iboudiai’ taudia, Iuda tomadiho idia abia dae taudia dekenai ia be mai anina. (2:5-13) Idia hoa, bena idia henanadai: ‘Edena bamona ita ta ta iboudiai be iseda gado dekenai unai gaudia ita kamonai diba?’ Reana ia be Media (Iudea ena mairiveina kahana ai ia noho), Frugia (Asia Minor dekenai), bona Roma (Europe lalonai) ena gado idia kamonai. Hahediba taudia be gado idauidau ai idia hereva neganai, “Dirava ena hoa gaudia idia herevalaia”, bona kamonai taudia momo idia hoa, to hevaseha taudia idia gwau reana idia inuinu kekero.
Petro ese Haroro Goadana Ia Henia
10 Petro ese iena haroro ia hamatamaia bona ia gwau 9 o’clock dabai neganai, taunimanima idia inuinu kekero be hegeregere lasi. (2:14-21) To, unai gauna ia vara neganai ia ese Dirava ena gwauhamata ia hagugurua, Dirava be iena taunimanima latanai lauma helaga do ia bubua. Dirava ese Petro ia veria iseda nega ia makaia, ia be “dina dokona lalonai” bona “do idia peroveta” ena hereva ia gwauraia. (Ioel 2:28-32) Iehova be iena dina badana ia do mai lasi neganai, guba bona tanobada dekenai, toa do ia henia, bena abidadama ai iena ladana dekenai idia boiboi taudia sibona do idia roho mauri. Horoa taudia be unai bamona lauma helaga idia abia dainai, idia hegeregere, hari inai nega lalonai, mai goada bona mai diba danu idia “peroveta” totona.
11. Iuda taudia bona Dirava be dahaka idia karaia Iesu dekenai?
11 Unai murinai, Petro ese Mesia hamomokania dalana ia gwauraia. (2:22-28) Dirava ese ia hamomokania Iesu be Mesia badina siahu ia henia ia ese gaukara mai siahu, toa, bona hoa gaudia ia karaia totona. (Heberu 2:3, 4) To, Iuda taudia be “taravatu laloa lasi taudia edia imana dekenai” Iesu idia hasatauroa, idia be Dirava ena taravatu idia badinaia lasi Roma taudia. Iesu be “Dirava ena ura bona ena diba hegeregere [idia] ia henia tauna”; unai be Dirava ena ura hegeregerena. Dirava ese Iesu ia hatoreaisi lou. To, iena tanobada tauanina ia abia oho do ia bodaga lasi totona.—Salamo 16:8-11.
12. David be dahaka ia perovetalaia, bona hahemauri dalana be dahaka?
12 Petro ia haroro noho bona Mesia idia perovetalaia herevadia ia gwauraia momo. (2:29-36) Ia gwau David ese iena natuna hereana, Iesu, Mesia tauna, ena toreisi lou ia perovetalaia. Atai dekenai, Dirava ena idibana kahanai, guba lalonai, Iesu be iena Tamana ena amo ia abia lauma helagana ia bubua. (Salamo 110:1) Petro idia kamonai henia taudia be lauma helaga ena gaukara ‘idia itaia bona idia kamonai’, ia be hahediba taudia edia kwarana latanai, malana bamona ia hedinarai neganai, bona idia be gado idauidau ai idia herevahereva neganai. Danu ia hahedinaraia hahemauri idia abia diba bema Iesu idia abia dae edia Lohiabada bona Mesia.—Roma 10:9; Filipi 2:9-11.
Iehova ese Edia Namba Do Ia Habadaia
13 Kamonai taudia be Petro ena hereva ena anina idia abia momokani! (2:37-42) Ia dekenai idia kamonai taudia edia kudou ia botaia, bona mamina idia abia badina idia be Mesia hamasea dalana idia koua lasi. Unai dainai, ia hamaorodia: “Umui ibounai emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.” Iuda taudia bona unai tomadiho idia abia dae idau bese taudia idia abia dae vadaeni Iehova be edia Dirava bona iena lauma idia abia be namo. Namona be idia helalo-kerehai bona Iesu idia abia dae edia Mesia bamona, Tamana, Natuna bona lauma helaga ena ladana dekenai idia bapatiso totona (unai ladana ena dagi eiava ena siahu idia abia dae). (Mataio 28:19, 20) Unai Iuda taudia bona Iuda tomadiho idia abia dae idau bese taudia ia haroro henidia neganai, Petro be Iesu ese ia henia ki ginigunana, lauma dalana dekenai, ia gaukaralaia diba iduara ia kehoa, hereva idia abia dae Iuda taudia be guba Basileia idia vareai totona. (Mataio 16:19) Unai dina ai, taunimanima 3,000 idia bapatiso! Oi laloa sisina, Ierusalem ena teritori maragina dekenai unai taunimanima momo idia haroro be hoa gauna!
14. Badina be dahaka bona edena dala ai abidadama taudia be “gau ibounai idia abia hebou”?
14 Gabu daudau amo idia mai taudia edia kohu bona moni idia hegeregere lasi nega daudau idia noho totona, to idia ura edia abidadama matamata dekenai diba idia habadaia bona ma haida dekenai idia harorolaia. Unai dainai, lalokau dekenai, Iesu murinai idia raka taudia gunadia idia heduru heheni, hari inai negai Iehova ena Witness taudia ese idia karaia hegeregerena. (2:43-47) Nega sisina lalonai, abidadama taudia be “gau ibounai idia abia hebou.” Haida be edia tano idia hoihoilaia, bona unai moni amo idia hegeregere lasi taudia idia durudia diba. Unai ese kongregesen ia haginia namonamo bona ‘dina ibounai Iehova be abidadama taudia edia orea lalonai ia haboua.’
Gorere Tauna Ta Ia Hanamoa bona Unai Murinai Ia Vara Gauna
15 “Toa” amo Iehova ese Iesu murinai idia raka taudia ia durudia. (3:1-10) Unai dainai, Petro bona Ioane be 3.00 p.m. ai, dubu idia vareai, badina guriguri horana be hanuaboi boubou negana ai idia karaia dainai, bona ia vara dinana amo aena dika tauna ta be dubu ena iduara dekenai ia noho, unai iduara ena ladana be Namo Herea. Hari tauna ia helai bona ‘hebogahisi ena harihari gaudia’ ia noinoilaidia. Petro ia gwau: “Siliva bona golo lau dekenai be lasi, to lau dekenai ia noho gauna do lau henia oi, Iesu Keriso, Nasareta tauna, ena ladana dekenai oi toreisi, oi raka.” Maoromaoro unai tau ena gorere ia ore! Ia be dubu ia vareai neganai, “ia raka, ia roho, ia raka, ia roho, Dirava ena ladana ia hanamoa” bena taunimanima idia ‘moale bada herea.’ Reana haida be unai hereva idia laloatao: “Aena dika tauna do ia raka daekau dia bamona.”—Isaia 35:6.
16. Aposetolo taudia be edena dala ai aena dika tauna idia hanamoa diba?
16 Taunimanima idia hoa bena Solomon ena daiutu, dubu ena mairiveina kahana dekenai ia noho daiutuna mai ena guhi dekenai idia hebou. Unuseniai Petro ia haroro. (3:11-18) Ia hahedinaraia Dirava be Ia ese ia hahairaia Hesiai Tauna, Iesu Keriso, dainai, aposetolo taudia siahu ia henidia aena dika tauna idia hanamoa totona. (Isaia 52:13–53:12) Iuda taudia be unai “Helaga bona Kara Maoromaoro Tauna” idia dadaraia; to, herevana, Iehova ese ia hatoreaisi lou. Ena be unai taudia bona idia lohiadia taudia idia diba lasi Mesia idia hamasea, to Dirava be unai amo peroveta hereva ta ia hagugurua, unai hereva be “Keriso hisihisi do ia abia.”—Daniel 9:26.
17. (a) Iuda taudia be dahaka idia karaia be namo? (b) Iseda nega lalonai, ‘Keriso ia siaia’ negana amo, dahaka ia vara?
17 Idia be unai bamona Mesia idia kara henia dainai, Petro ese Iuda taudia ia hadibaia dahaka idia karaia be namo. (3:19-26) Namona be edia “lalona [idia] giroa,” eiava edia kara dika dainai idia helalo-kerehai, bena ‘edia kara idia haidaua,’ eiava dala idauna dekenai idia raka. Bema Iesu idia abidadama henia ia be Mesia, bona boubou gauna idia abia dae, Iehova ese edia lalona do ia hamatamataia bona edia kara dika do ia gwauatao. (Roma 5:6-11) Iuda taudia ia hadibaia lou idia be edia sene taudia ida Dirava ese ia karaia gwauhamatana ena natudia. Dirava be Abraham ia hamaoroa: “Tanobada ena bese ibounai be oi dainai namo do idia davaria.” Unai dainai, Dirava ese iena Mesia Hesiai Tauna ia siaia idia helalo-kerehai Iuda taudia ia hamauridia totona. ‘Keriso ia siaia’ guba Basileia ena siahu dekenai, lagani 1914 ena nega amo, Iehova ena Witness taudia edia tiokratik orea dekenai, hereva momokani momo idia hadibaia lou.—Genese 12:3; 18:18; 22:18.
Idia Hadokoa Lasi!
18 Petro bona Ioane ese Iesu ena toreisi lou idia harorolaia dainai, hahelaga taudia badadia, dubu ena biaguna, bona Sadukea taudia ese idia ruaosi idia dogoatao. (4:1-12) Sadukea taudia be toreisi lou idia abia dae lasi, to ma taunimanima momo be abidadama taudia ai idia lao, tatau sibodia edia namba be 5,000. Ierusalem ena kota badana vairanai idia henanadai henidia neganai, Petro ia gwau aena dika tauna ena gorere ia namo “Iesu Keriso, Nasareta tauna . . . iena ladana dainai”; idia hamasea to Dirava ese ia hatoreaisi lou. “Ruma haginia” Iuda “taudia” ese unai “nadi” idia dadaraia, idia ura lasi ia be “ruma ena kona nadi badana.” (Salamo 118:22) Petro ia gwau: “Hahemauri be ia sibona ese ia henia diba.”
19. Idia be haroro gaukara idia taravatua neganai, aposetolo taudia be edena bamona idia haere?
19 Haida ese unai hereva dalana idia koua toho. (4:13-22) Iena gorere idia hanamoa tauna ia noho dainai, idia gwau diba lasi unai “toa” ia vara lasi. To Petro bona Ioane idia taravatua “Iesu ena ladana taunimanima ta dekenai do idia hereva lou lasi.” Edia haere be dahaka? “Ai itaia bona ai kamonai gaudia ai hunia diba lasi, aiemai uduna ai koua diba lasi.” Idia be Iehova idia badinaia bona edia Lohia Tauna idia gwauraia unai!
Edia Guriguri ena Haere Idia Abia!
20 Iehova ena Witness taudia be hebou dekenai idia guriguri hegeregerena, aposetolo taudia be dibura ruma amo idia raka oho neganai, hahediba taudia be idia guriguri aposetolo taudia ese idia vara gaudia idia hadibadia neganai. (4:23-31) Idia be guriguri dekenai idia gwau lohia taudia, Heroda Antipas bona Pontio Pilato be Idau Bese Roma taudia bona Israel taudia danu idia hebou bona Mesia idia dagedage henia. (Salamo 2:1, 2; Luka 23:1-12) Edia guriguri ia haerelaia neganai, Iehova be lauma helaga amo hahediba taudia ia hahonudia, idia be gari lasi dekenai Dirava ena Hereva idia gwauraia totona. Edia Lohia Tauna idia noia lasi ia ese dagedage ia koua totona; to idia noia ia durudia idia be herevana dagedage idia abia, to gari lasi dekenai do idia haroro noho.
21. Banaba be daika, bona iena kara be edena bamona?
21 Abidadama taudia be edia kohu ibounai idia gaukaralaia hebou, bona ta ia dabu lasi. (4:32-37) Moni ia henia tauna ta be Levi tauna, Iosepa, Kupro motumotu tauna ta. Aposetolo taudia be ma ladana ta, Banaba idia henia, unai ladana anina be “Goada henia tauna.” Unai ladana idia henia badina sedira ia be taunimanima ia durudia bona ia be mai kudou ibounai danu ia karaia. Namona be ita ibounai be unai bamona taudia.—Kara 11:22-24.
Koikoi Taudia Idia Hahedinaraidia
22 To Anania bona iena adavana Sapira be Iehova, edia Lohia Tauna, idia dadaraia. (5:1-11) Idia be tano ta idia hoihoilaia bona moni kahana idia dogoatao, to aposetolo taudia idia hamaorodia moni ibounai idia henia. Dirava ena lauma ese Petro ia durua ia lalo-parara idia koikoi, bona unai ese edia mase ia havaraia. Satana ese taunimanima haida ia koidia do idia raka gageva totona, bona unai hereva be sisiba namona idia dekenai!—Hereva Lada-isidia 3:32; 6:16-19.
22, 23. Anania bona Sapira edia kara dika be dahaka, bona edia sivarai ese ita dahaka ia hadibaia?
23 Unai ia vara murinai, kudou kerere taudia idia gari bona hahediba taudia idia bamoa lasi. Ma haida be abidadama taudia ai idia lao. (5:12-16) Ma danu, gorere taudia bona lauma dikadia ese idia hadikaia taudia be Dirava ena siahu idia abidadama henia, bona “ibounai mauri idia abia.”
Dirava Idia Kamonai Henia be Namo to Taunimanima Idia Kamonai Henia be Namo Lasi
24 Hahelaga Tauna Badana bona Sadukea taudia idia ura lasi unai orea ia hutuma, unai dainai aposetolo taudia idia atoa dibura dekenai. (5:17-25) To unai hanuaboi ai, Dirava ena aneru ese ia ruhadia nege. Dina ia daekau neganai, idia be dubu dekenai idia haroro! Dagedage ese Iehova ena hesiai taudia edia gaukara ia koua diba lasi.
24, 25. Badina be dahaka Iuda lohia taudia ese aposetolo taudia idia dagedage henidia, to unai abidadama taudia be Iehova ena hesiai taudia iboudiai dekenai dahaka mauri ena taravatu idia havaraia?
25 To aposetolo taudia be Sanhedrin ena vairanai idia gini neganai, idia tohodia. (5:26-42) Idia hamaorodia idia haroro lasi, to idia gwau: “Dirava ai kamonai henia be namo, taunimanima ai kamonai henia be dika.” Unai be Iesu ena hahediba taudia dekenai mauri ena taravatu badana ta ia havaraia, bona hari inai negai Iehova ena Witness taudia ese unai taravatu idia do badinaia noho. Taravatu ia hadibaia tauna, Gamaliel, be sisiba ia henidia murinai, unai lohia taudia be aposetolo taudia idia dadabaia, idia hadibaia haroro idia hadokoa, bena idia siaidia lao.
26. Aposetolo taudia bona hari inai negai Iehova ena Witness taudia edia hesiai gaukara idia hahegeregeredia neganai be edena bamona?
26 Aposetolo taudia idia moale badina idia diba idia hegeregere Iesu ena ladana dainai dika idia davaria totona. “Bona dina ibounai, Dubu Helaga lalonai bona ruma lalonai, taunimanima idia hadibaia bona Iesu Keriso ena Sivarai Namona idia gwauraia, inai gaukara idia hadokoa lasi.” Oibe, idia be ruma ta ruma ta dekenai idia haroro taudia. Hari inai negai danu, Dirava ena Witness taudia be unai bamona, idia be iena lauma idia abia danu badina Ia idia badinaia bona idia gwau, “Iehova be Iseda Lohia!”
Edena Bamona Do Oi Haere?
◻ Nega gunanai bona hari inai negai danu Iesu murinai idia raka taudia be dahaka gaukara idia karaia be namo?
◻ Pentekoste 33 C.E. dinanai, dahaka ia vara?
◻ Edena negai bona edena dala ai, Petro ese Iesu ia henia ki ginigunana, lauma dalana dekenai, ia gaukaralaia?
◻ Anania bona Sapira edia sivarai amo dahaka ita diba?
◻ Edia haroro gaukara idia taravatua neganai, aposetolo taudia be Iehova ena Witness taudia iboudiai dekenai dahaka kara ena taravatu idia havaraia?
3. Iesu murinai idia raka taudia be “Lauma Helaga dekenai bapatiso [idia] abia” neganai, edia gaukara badana be dahaka?
6. Edena dala ai Iuda Iskariote ena dagi ia abia tauna idia abia hidi?
8. Iesu ena hahediba taudia be edena negai lauma helaga dekenai idia bapatiso, bona dahaka ia vara?
10. Pentekoste 33 C.E. ai ia vara gaudia ese dahaka peroveta hereva ia hagugurua, bona edena dala ai, hari inai negai, unai bamona ia vara?
13. (a) Bapatiso idia abia maoromaoro totona, namona be Iuda taudia bona Iuda tomadiho idia abia dae idau bese taudia be dahaka idia diba guna be namo? (b) Idia hida idia bapatiso, bona dahaka ia vara Ierusalem dekenai?
15. Petro bona Ioane be dubu idia vareai neganai, dahaka ia vara bona taunimanima be dahaka bamona idia karaia?
18. Iuda “ruma haginia taudia” be dahaka “nadi” idia dadaraia, bona daika sibona dekenai hahemauri ia noho?
20. Hahediba taudia be dahaka idia gurigurilaia, bona dahaka ia vara?