Iehova Garina Dekenai Oi Rakau

“[Iehova] dekenai idia gari noho, bona Lauma Helaga ese goada ia henia. Vadaeni ekalesia ia bada daekau.”​—KARA 9:31.

1, 2. (a) Dahaka ia vara Keristen kongregesen be maino negana lalonai idia vareai neganai? (b) Ena be Iehova ese dagedage ia koua lasi, dahaka ia karaia?

HAHEDIBA tauna ta be hetoho bada herea ta ia davaria. Do ia abidadama noho Dirava dekenai, eiava? Oibe! Ia be Dirava garina dekenai ia raka, ia Ia Havaraia Tauna ia gari henia, bona Iehova ena abidadama witness tauna ta ai do ia mase.

² Unai tauna, Dirava ia gari henia abidadama tauna, be Stefano, “abidadama bada bona Lauma Helaga dekenai [ia] honu tauna.” (Kara 6:5) Idia alaia mase murinai, dagedage bada ia vara, to unai murinai, Iudea, Galilea, bona Samaria dekenai, kongregesen be maino negana lalonai idia vareai bona lauma dalana dekenai idia goada. Ma danu, “[Iehova] dekenai idia gari noho, bona Lauma Helaga ese goada ia henia. Vadaeni ekalesia ia bada daekau.” (Kara 9:31) Hari inai negai, ita Iehova ena Witness taudia, ita diba Dirava ese ita do ia hanamoa, herevana maino eiava dagedage dekenai ita noho, Kara karoa 6 ia lao 12 ese ia hahedinaraia hegeregerena. Unai dainai, dagedage ita davaria neganai, namona be Dirava garina ita gari ita raka eiava dagedage sisina ia ore neganai, ita be lauma dalana dekenai, diba ita abia noho bona iseda hesiai gaukara ita habadaia.​—Deuteronomi 32:​11, 12; 33:27.

Ia Abidadama ela bona Dokona

3. Ierusalem dekenai, dahaka hekwakwanai idia hanaia, bona edena bamona idia karaia?

³ Ena be maino neganai, hekwakwanai haida idia vara, to gau iboudiai ita karaia namonamo neganai, unai hekwakwanai haida ita hanaia diba. (6:​1-7) Greek gado idia herevalaia Iuda taudia, Ierusalem dekenai, idia maumau, badina dina iboudiai aniani idia haria neganai, Heberu gado idia herevalaia abidadama Iuda taudia be aniani idia abia guna, bona Greek gado dekenai idia hereva Iuda taudia edia vabu hahinedia idia laloaboio. Aposetolo taudia be tatau 7 idia abia hidi unai “gaukara” idia naria totona, bona unai hekwakwanai idia hanaia. Unai tau ta be Stefano.

4. Stefano be edena dala ai samania koikoi herevana ia hanaia?

⁴ To, Dirava ia gari henia tauna, Stefano be hetoho ia abia. (6:​8-15) Tatau haida idia toreisi bona Stefano ida idia hepapahuahu. Idia be “Ruhaia Taudia” edia orea taudia, reana idia be Roma taudia ese idia dogoatao Iuda taudia bena gabeai idia ruhadia, eiava idia be idau bese edia hesiai taudia bena Iuda ena tomadiho idia abia dae. Idia hegeregere lasi Stefano ena aonega bona lauma ena goada idia hanaia totona, unai dainai, iena inai taudia ese idia abia lao Sanhedrin dekenai. Unuseniai witness koikoi taudia idia gwau: ‘Ai kamonai, ia gwau Iesu ese inai Dubu Helaga do ia kokia bona Mose be ai dekenai ia henia karadia do ia haidaua.’ To, iena inai taudia danu idia diba Stefano be kerere tauna lasi, to iena vairana ena toana be aneru edia toana bamona, ia diba ia be Dirava ena amo sivarai ta ia abia mai. Edia toana amo ia idau momokani, edia vairadia ia dika momokani badina idia be Satana dekenai sibodia idia henia!

5. Stefano ia haroro neganai, dahaka hereva ia gwauraia hedinarai?

⁵ Hahelaga Tauna Badana, Kaiafa ese ia henanadai henia neganai, Stefano be gari lasi dekenai ia haroro. (7:​1-53) Ia be Israel taudia edia histori ia gwauraia, bona unai ese ia hahedinaraia Dirava ena ura be Mesia ia mai neganai, Taravatu bona dubu gaukara do ia dadaraia. Stefano ia gwau Mose, Iuda taudia iboudiai ese idia hanamoa hahemauri tauna, be Iuda taudia ese idia dadaraia tauna danu, idia be harihari hahemauri badana Ia mailaia Tauna idia abia dae hegeregerena. Stefano ia gwau Dirava be taunimanima edia imana amo idia karaia rumadia lalonai ia noho lasi. Unai dainai, ia hahedinaraia dubu bona ena tomadiho dalana be do ia ore. To ia idia hahemaoro henidia taudia be Dirava idia gari henia lasi dainai, eiava Iena ura idia ura lasi idia diba dainai, Stefano ia gwau: “Umui ura dika taudia e, umui emui kudouna bona taiana be Dirava ura henia lasi taudia bamona, umui ese nega ibounai Lauma Helaga umui koua noho. Umui emui tamadia edia kara be umui danu umui karaia noho. Daika peroveta tauna umui emui sene idia dagedage henia lasi? Kara Maoromaoro Tauna ena mai sivaraina idia gwauraia guna taudia be idia aladia mase. Bona inai tau be harihari umui samania, bona umui alaia mase vadaeni.”

6. (a) Ia do mase lasi neganai, dahaka ese Stefano ena abidadama ia hagoadaia? (b) Badina be dahaka Stefano be mai ena maoro, ia gwau: “Lohiabada Iesu e, lauegu laumana oi abia dae”?

⁶ Stefano be gari lasi dekenai ia hereva dainai, idia alaia mase. (7:​54-60) Kota taudia idia badu dikadika ia ese edia kerere, Iesu idia hamasea unai, ia hahedinaraia dainai. To Stefano ena abidadama ia goada, “matana ia itaia noho guba dekenai, Dirava ena hairaina ia itaia, bona Iesu danu, Dirava ena idiba kahana dekenai ia gini noho”! Stefano be gari lasi dekenai iena inai taudia vairanai ia gini, bona ia diba ia ese Dirava ena ura ia karaia vadaeni. Ena be Iehova ena Witness taudia be mata-hanai idia abia lasi, to dagedage ita abia neganai, Dirava ena amo ia mai mainona ita abia diba. Stefano idia inai henia taudia be Ierusalem ena murimuri ai idia hodoa, bena ia boiboi: “Lohiabada Iesu e, lauegu laumana oi abia dae.” Unai be maoro badina Dirava be Iesu dekenai siahu ia henia ia be ma haida ia hatoredia isi lou totona. (Ioane 5:26; 6:40; 11:​25, 26) Stefano ia tui diho, ia boiboi: “[Iehova] e, inai kara dika ena davana oi henidia lasi.” Bena ena abidadama dainai ia mase, unai negana amo ema bona hari, ma taunimanima momo be edia abidadama dainai idia mase hegeregerena.

Dagedage Dainai Sivarai Namona Ia Lao Ma Gabu Haida Dekenai

7. Dagedage dainai, dahaka ia vara?

⁷ Stefano ia mase dainai, sivarai namona ia lao ma gabu haida dekenai. (8:​1-4) Aposetolo taudia lasi, to hahediba taudia iboudiai be, dagedage dainai, idia siri Iudea bona Samaria dekenai. Saulo ese Stefano idia alaia karana ia moalelaia, bona ia be animal dikana bamona kongregesen ia hadikaia, ruma ta ruma ta dekenai ia lao Iesu murinai idia raka taudia be dibura dekenai ia abidia lao totona. To idia luludia hahediba taudia idia haroro noho lalonai, Satana ena ura, dagedage amo Dirava idia gari henia Basileia harorolaia taudia ia koudia urana unai, ia vara lasi. Hari inai negai danu, nega momo dagedage ese sivarai namona ia habadaia ma gabu haida dekenai ia lao totona, eiava taunimanima momo vairanai Basileia harorolaia gaukarana ia hedinarai.

8. (a) Dahaka ia vara Samaria dekenai idia haroro dainai? (b) Petro be edena dala ai Iesu ia henia ki iharuana ia gaukaralaia?

⁸ Haroro tauna, Filipo, ia lao Samaria dekenai “Keriso ia haroro henidia.” (8:​5-25) Unai hanua dekenai, sivarai namona idia harorolaia neganai, moale bada idia davaria. Lauma dikadia taunimanima amo idia luludia, bona taunimanima edia gorere idia hanamoa. Ierusalem dekenai, aposetolo taudia ese Petro bona Ioane idia siaia Samaria dekenai, bena idia guriguri bona unai bapatiso taudia dekenai edia imana idia atoa murinai, unai hahediba taudia matamatadia ese lauma helaga idia abia. Guna puripuri ia karaia tauna, Simona, be bapatiso ia abia bona ia ura unai siahu ia hoia, to Petro ia gwau: “Oiemu moni be ia dika oi danu, badina be oi laloa Dirava ena harihari gauna oi abia diba moni dekenai.” Idia hamaoroa namona be ia ese Iehova ia noia ia gwauatao totona neganai, ia ese aposetolo taudia ia noidia ia totona idia guriguri. Namona be unai sivarai ese Iehova idia gari henia taudia iboudiai ia hamareredia, idia be kudou idia naria totona, bona Dirava ena heduru idia noia. (Hereva Lada-isidia 4:23) (Unai ia vara dainai, hereva ta “simony,” idia gaukaralaia. Anina be “dubu ena dagi eiava dubu ena siahu ta hoia karana.”) Petro bona Ioane be Samaria hanua momo dekenai idia haroro. Unai dainai, Samaria dekenai, Petro ese Iesu ia henia ki iharuana ia gaukaralaia guba Basileia ena diba ena iduara ia kehoa totona.​—Mataio 16:19.

9. Filipo ese ia haroro henia Etiopia tauna be daika, bona badina be dahaka unai tau ia bapatiso diba?

⁹ Dirava ena aneru ese gaukara matamatana ta Filipo ia henia. (8:​26-40) Ierusalem ia lao Gasa dalana dekenai, kariota ta lalonai, be “eunoko tauna,” dagi bada tauna, Kandake, Etiopia ena lohia hahine ena kohu ia naria tauna. Ia be eunoko ena dagi ia abia to, ia be tauanina dekenai eunoko tauna lasi badina unai taudia be Iuda tomadiho lalonai edia vareai dalana idia koua, to ia be Ierusalem dekenai ia lao ia tomadiho totona; bona ia be idau bese amo ia mai peritome tauna, Iuda tomadiho ia abia dae tauna. (Deuteronomi 23:1) Filipo be eunoko tauna ia itaia Isaia bukana amo ia duahia neganai. Ia ese Filipo ia boiria kariota dekenai ia gui neganai, Filipo ese Isaia ena peroveta hereva ia herevalaia bena “Iesu ena sivarai namona ia hadibaia.” (Isaia 53:​7, 8) Nega sisina murinai, Etiopia tauna ia boiboi: “Oi itaia, ranu be inai. Dahaka ese egu bapatiso ia koua?” Gau ta ese ia koua lasi, badina ia be Dirava ia diba bona harihari Keriso ia abidadama henia. Unai dainai, Filipo ese Etiopia tauna ia habapatisoa, bena iena dala dekenai ia lao mai ena moale danu. Gau ta ese oiemu bapatiso ia koua, a?

Dagedage Tauna Ia Laloa Lou

10, 11. Dahaka ia vara Taso tauna, Saulo, dekenai, Damaseko ena dala dekenai ia lao neganai bona unai nega sisina murinai?

¹⁰ Unai ia vara lalonai, Saulo ia ura Iesu murinai idia raka taudia ese edia abidadama idia rakatania, bena dibura eiava mase herevadia amo ia hagaridia. (9:​1-18a) Hahelaga tauna badana (sedira Kaiafa) be Damaseko edia dubu taudia ia toretore henidia, bena unai toretore ia henidia Saulo dekenai bena siahu ia henia, ‘Dala’ eiava Keriso ena mauri dalana idia badinaia tatau bona hahine, ia dogoatao bona Ierusalem dekenai ia mailaidia. To Damaseko kahirakahira ai idia mai, dina tubua bamona neganai, diari ta be guba amo ia mai bona gado ta ia gwau: “Saulo e, Saulo e, badina [be] dahaka lau dekenai oi dagedage noho?” Saulo danu idia mai taudia be “gado ta idia kamonai” to hereva ena anina idia kamonai lasi. (Kara 22:​6, 9 danu hahegeregerea.) Saulo be hairai ia abia tauna, Iesu, ia itaia sisina dainai, ia mata-kepulu, to Dirava ese hahediba tauna, Anania, ia gaukaralaia ena matana ia hanamoa totona.

¹¹ Bapatiso ia abia murinai, guna ia dagedage tauna ese dagedage mamina ia abia. (9:18b-25) Damaseko dekenai idia noho Iuda taudia idia ura Saulo idia hamasea. To hanuaboi lalonai, hahediba taudia be hanua ena haba ena matu ta dekenai hanua murimuri ai idia atoa diho; reana varo eiava au rigi maragidia amo idia karaia bosea ta lalonai idia atoa diho. (2 Korinto 11:​32, 33) Reana unai matu be hahediba tauna ta ena ruma haba badinai ia noho uindo ta lalonai. Unai bamona dagedage taudia amo idia lao siri haroro gaukara ia karaia noho totona be gari karana lasi.

12. (a) Ierusalem dekenai dahaka ia vara Saulo dekenai? (b) Kongregesen be edena bamona?

¹² Ierusalem dekenai, Banaba ese hahediba taudia ia durudia idia be, abidadama tadikaka ta bamona, Saulo idia abia dae totona. (9:​26-31) Unuseniai, Saulo be gari lasi dekenai, Greek gado idia herevalaia Iuda taudia danu ia hepapahuahu, bena idia ura idia alaia. Unai idia itaia neganai, tadikaka ese idia abia lao Kaisarea dekenai bona Taso dekenai, iena hanua Kilikia dekenai, idia siaia giroa. Iudea, Galilea, bona Samaria dekenai, kongregesen ese “maino idia abia vadaeni, bona idia goada daekau” lauma dalana dekenai. ‘Iehova garina bona lauma helaga ena heduru dekenai ia raka noho, bena ia bada ia lao.’ Unai be haheitalai namona hari idia noho kongregesen taudia iboudiai dekenai idia ese Iehova ena hahenamo idia abia totona!

Idau Bese Taudia be Abidadama Taudia Ai Idia Lao!

13. Dirava be edena bamona Petro ia durua Luda bona Iopa dekenai hoa karadia ia karaia totona?

¹³ Petro danu be mai ena gaukara bada. (9:​32-43) Luda dekenai (hari idia gwauraia Lod), Saron ena Kourana dekenai, ia ese tauanina ia mase tauna, ladana Aenea, ena gorere ia hanamoa. Unai gorere ia hanamoa dainai, taunimanima momo be Lohiabada idia tahua. Iopa dekenai, lalokau hahediba hahine, Tabita, (Doreka) ia gorere bona ia mase. Petro ia ginidae neganai, idia taitai vabu taudia be Doreka ese ia henidia dabua idia hahedinaraia. Ia ese Doreka ia hamauria lou, bona unai kara ena sivarai ia lao gabu momo dekenai, bena taunimanima momo be abidadama taudia ai idia lao. Petro be Iopa dekenai ia noho, boromakau kopina gaukaralaia tauna, ladana Simona, danu. Iena ruma be davara badinai. Boromakau kopina gaukaralaia taudia be davara dekenai animal edia kopina idia atoa bona ahu idia atoa murinai, huina idia kakasia oho. Tubutubu gaudia haida edia ranu amo idia penia bona unai kopina be leather ai idia lao.

14. (a) Korenelio be daika? (b) Korenelio ena guriguri be edena bamona?

¹⁴ Unai neganai (36 C.E.), gabu ma ta dekenai anina bada gauna ta ia vara. (10:​1-8) Kaisarea dekenai, Dirava ia laloa bada idau bese tauna, Korenelio, tatau 100 ia biagua Roma tuari tauna ta, ia noho. Ia ese “tuari orea ladana Italia” ia gunalaia, reana unai taudia be Roma hanua taudia bona idia ruhadia vadaeni Italy hesiai taudia. Ena be Korenelio ese Dirava ia gari henia, ia be Iuda tomadiho ia abia dae lasi. Mata-hanai dekenai, aneru ta ese ia hamaoroa iena guriguri bona noinoi be “Dirava dekenai idia daekau vadaeni, bona Dirava ese danu ia laloa noho.” Ena be Korenelio be Iehova dekenai ia do gwauhamata lasi, to ia be iena guriguri ena haere ia abia. To aneru ese ia hamaoroa hegeregerena, ia be Petro ia boiria.

15. Dahaka ia vara Petro be Simona ena ruma ena guhi dekenai ia guriguri neganai?

¹⁵ Unai ia vara lalonai, Simona ena ruma ena guhi dekenai ia guriguri neganai, Petro be mata-hanai ia abia. (10:​9-23) Nihi dekenai ia itaia, guba amo bosea bamona dabua badana ia diho; unai lalonai be aena-hani animal mirodia, tano dekenai idia rau gaudia, bona manu. Gado ta ese ia hamaoroa unai animal ia hamasedia bona ia anidia neganai, Petro ia gwau ia be guna unai bamona miro gaudia ta ia ania lasi. Gado ese ia hamaoroa: “Dirava ese ia hagoevaia vadaeni gaudia, oi gwauraia lasi miro.” Unai nihi dekenai Petro ia daradara, to ia ese lauma ena hakaua herevana ia badinaia. Unai dainai, ia bona Iuda tadikaka 6 be Korenelio ese ia siaia taudia ida idia lao.​—Kara 11:12.

16, 17. (a) Petro be Korenelio bona iena ruma dekenai idia hebou taudia dahaka ia hadibadia? (b) Dahaka ia vara Petro ia hereva noho lalonai?

¹⁶ Idau Bese Taudia ginigunadia be sivarai namona idia kamonai hamatamaia. (10:​24-43) Petro bona iena bamodia be Kaisarea dekenai idia ginidae neganai, Korenelio, iena varavara bona iena turadia idia naria noho. Korenelio be Petro ena aena dekenai ia tui diho, to aposetolo tauna be manau dekenai unai tomadiho karana ia koua. Ia hereva Iehova be lauma helaga bona siahu amo, Mesia ai Iesu ia horoa, bona ia hahedinaraia ia idia abidadama henia taudia iboudiai edia kara dika do idia gwauatao.

¹⁷ Unai neganai, Iehova be kara ta ia karaia. (10:​44-48) Petro ia hereva noho lalonai, Dirava be unai abidadama Idau Bese Taudia dekenai lauma helaga ia bubua. Unai neganai, bona unuseniai, Dirava ena natudia ai idia lao bona siahu idia abia gado idauidau dekenai idia hereva, Ia idia hanamoa totona. Unai dainai, idia be Iesu Keriso ena ladana dekenai bapatiso idia abia. Unai ia vara neganai, Petro ese ki ihatoina ia gaukaralaia, Dirava idia gari henia Idau Bese Taudia dekenai, guba Basileia ena diba ena iduara ia kehoa totona.​—Mataio 16:19.

18. Petro ese Iuda tadikaka ia hamaorodia Idau Bese Taudia be “lauma helaga dekenai idia bapatiso” neganai, dahaka idia gwau?

¹⁸ Gabeai, Ierusalem dekenai, peritome hahedibana idia dogoatao noho taudia be Petro danu idia hepapahuahu. (11:​1-18) To ia hereva Idau Bese Taudia be ‘lauma helaga dekenai idia bapatiso’ dainai, iena Iuda tadikakadia be hereva idia hadokoa, bena idia gwau: “Dirava ese lalona giroa ia henia vadaeni idau bese taudia dekenai, mauri do idia abia totona.” Namona be ita danu be unai bamona hereva ita badinaia Dirava ena ura be ita dekenai ia hedinarai neganai.

Idau Bese Taudia Edia Kongregesen Idia Haginia

19. Edena dala ai hahediba taudia be Keristen ena ladana idia abia?

¹⁹ Idau Bese Taudia edia kongregesen ginigunana ia vara unai. (11:​19-26) Stefano ena dagedage ia vara neganai, hahediba taudia idia lulua, haida idia lao Antioka, Suria dekenai; unai gabu be tomadiho miro karadia bona kara bodaga momo idia karaia. Idia be unuseniai idia noho Greek gado idia herevalaia taudia idia hereva henidia neganai, “[Iehova] ena imana be idia dekenai ia noho,” bona taunimanima momo be abidadama taudia ai idia lao. Lagani tamona lalonai, Banaba bona Saulo be unuseniai idia hadibaia, bona “Antioka hanua dekenai, Iesu diba tahua taudia be [Dirava ena amo ia mai siahuna dainai] ladana idia hatoa ‘Keristani.’ Inai be nega ginigunana inai ladana idia abia.” Iehova ia ura unai bamona ladana idia abia, badina Greek gado dekenai, unai hereva khre·ma·tiʹzo idia hahanaia “Dirava ena amo ladana abia” bona hanaihanai idia torea Dirava ena amo idia mai karadia idia herevalaia neganai.

20. Agabo ese dahaka ia perovetalaia, bona Antioka kongregesen be dahaka idia karaia?

²⁰ Dirava idia gari henia peroveta taudia be Ierusalem amo idia mai Antioka dekenai. (11:​27-30) Idia ta be Agabo. Ia hahedinaraia ‘lauma helaga amo,’ “hitolo bada negana do ia vara tanobada kahana ibounai dekenai.” Unai peroveta hereva ia guguru Roma pavapava Claudio (41-54 C.E.) ena lohia negana lalonai, bona histori ia torea tauna Josephus ese ia gwauraia “hitolo bada negana.” (Jewish Antiquities, XX, 51 [ii, 5]; XX, 101 [v, 2]) Lalokau dainai, Antioka kongregesen be Iudea dekenai idia dabu tadikakadia dekenai moni idia siaia.​—Ioane 13:35.

Dagedage ese Ia Koudia Lasi

21. Heroda Agripa Ginigunana be dahaka ia karaia Petro dekenai, to dahaka ia vara?

²¹ Maino negana ia ore Heroda Agripa Ginigunana be Ierusalem dekenai idia noho Iehova idia gari henia taudia ia dagedage henidia hamatamaia neganai. (12:​1-11) Heroda be tuari kaia amo, Iakobo ia hamasea, ia be ena abidadama dainai ia mase aposetolo tauna ginigunana. Ia itaia Iuda taudia idia moale neganai, Heroda ese Petro ia atoa dibura dekenai. Aposetolo ena imana ruaosi be tuari taudia rua dekenai idia kwatua, bona ma tuari taudia rua be iena dibura daiutuna idia naria. Heroda ena ura be Paseka bona hatubua gauna lasi paraoa dinadia (Nisan 14-21) murinai do ia hamasea, to nega korikori ai, kongregesen be aposetolo tauna totona idia guriguri ena haere idia abia, hegeregere iseda guriguri be nega momo, nega korikori ai haere ita abia bamona. Unai bamona ia vara Dirava ena aneru be hoa karana amo aposetolo tauna ia ruhaia neganai.

22. Dahaka ia vara Petro be Mareko ena sinana, Maria, ena ruma dekenai ia lao neganai?

²² Nega sisina murinai, Petro be Maria (Ioane Mareko ena sinana) ena ruma dekenai ia lao, sedira badina be unuseniai Keristen hebou idia karaia dainai. (12:​12-19) Ia dibura dainai, hesiai kekeni, Roda, be Petro ena gado ia kamonai, to iduara ia lokaia noho, bena ia rakatania. Reana, hahediba taudia edia lalohadai ginigunana be Dirava be aneru ta ia siaia bona Petro ena gadona dekenai ia hereva. To, iduara idia kehoa bona Petro ia vareai neganai, ia hamaorodia iena ruhaia nege sivaraina be Iakobo bona tadikaka (sedira elda taudia) idia hadibaia be namo. Bena ia ese ia rakatanidia bona ia hunia, iena hunia gabuna ia hadibaia lasi, unai amo, dika do idia davaria lasi bema ta ese ia eiava hahediba taudia idia henanadai henidia neganai. Heroda be Petro ia tahua, to ia davaria lasi, bona gadi taudia idia panisia, reana idia hamasedia.

23. Heroda Agripa Ginigunana ena lohia negana be edena bamona ia ore, bona unai sivarai amo dahaka ita diba?

²³ Lagani 44 C.E. ai, Heroda Agripa Ginigunana ena lohia negana be karaharaga ia ore, Kaisarea dekenai, iena lagani be 54 neganai. (12:​20-25) Ia ese Turo bona Sidono taudia, Foenike dekenai, ia badu henidia. Idia be iena hesiai tauna, Blasto, moni idia henia ia ese hebou ta ia haginia idia be maino idia noinoilaia totona. Idia “abia hidi dina” dekenai, (unai be Kaisara Claudio imodaia dinana danu), Heroda be pavapava ena dabua ia hahedokilaia, kota ena helai gabuna ai ia helai, bona taunimanima ia hereva henidia gwauraia. Kamonai taudia idia boiboi: “Inai be dirava ta ena gadona, tau ena gadona lasi.” Maoromaoro, Iehova ena aneru ese ia hamasea “badina be hairai ia henia lasi Dirava dekenai.” Heroda be “gaigaigaigai ese ena tauanina idia ania, vadaeni ia mase momokani.” Namona be unai haheitalai sisibana dainai, ita be Iehova garina dekenai ita raka noho, hekokoroku ita dadaraia bona ita hanamoa, ita be iena taunimanima bona iena gaukara ita karaia dainai.

24. Gabeai sivaraina ta ese dahaka do ia hahedinaraia gaukara ia bada ia lao karana dekenai?

²⁴ Ena be Heroda ese ia dagedage henidia, to “Dirava ena hereva ia tubu bona ia bada daekau.” Gabeai sivaraina ese do ia hahedinaraia hegeregerena, hahediba taudia edia gaukara do ia bada negana do idia itaia. Badina be dahaka? Badina “[Iehova] dekenai idia gari noho.”

Edena Bamona Do Oi Haere?

◻ Stefano be edena dala ai ia hahedinaraia Iehova ia gari henia, unai nega ema bona hari Dirava ena hesiai taudia momo ese idia hahedinaraia hegeregerena?

◻ Stefano ia mase neganai, Basileia harorolaia gaukarana be edena bamona, bona hari inai negai unai bamona ia vara, a?

◻ Dagedage Taso tauna, Saulo, be edena dala ai Iehova gari henia tauna ai ia lao?

◻ Abidadama Idau Bese Taudia ginigunadia be daidia?

◻ Kara karoa 12 be edena dala ai ia hahedinaraia dagedage ese Iehova idia gari henia taudia ia koudia lasi?

[Picture on page 18, 19]

Guba ena amo diari ia mai bona gado ta ia boiboi: “Saulo e, Saulo e, badina [be] dahaka lau dekenai oi dagedage noho?”