Oi ese Sisiba Oi Badinaia, A?

VAIA ena kara, lalokau tamana ese ena natudia do ia sisiba henidia, edia mauri lalonai do idia kwalimu totona bona do idia bada neganai do idia moale totona. Bona edia tamana bona sinana idia lalokau henia bona idia matauraia natudia ese unai sisiba do idia abia dae, badina idia diba unai sisiba amo namo do idia davaria. Unai hegeregerena, iseda lalokau guba Tamana, Iehova, ese hakaua herevana be ena hesiai taudia ia henidia, bona unai ese kwalimu bona moale edia mauri lalonai ia havaraia. Unai dainai, gau badana be Dirava be ena Hereva, Bible, amo bona ena tanobada oreana amo ita ia henia sisibana ita badinaia.

Ruma Bese Lalonai

Sisiba ita abia gau idauidau dekenai. Unai gau ta be ruma bese ena mauri. Dirava ese headava bona ruma bese ia havaraia. Bible ia gwau Dirava ese tau bona hahine ginigunadia edia headava ia karaia bona ia hamaorodia natudia do idia havaraia. (Genese 1:​27, 28; 2:​22-24) Havaraia Tauna ese hahegani ia henia ruma bese taudia iboudiai totona, edia maduna idauidau dekenai. Hegeregere, headava tauna bona tamana be ena ruma bese ena kwarana. Anina be, ia be mai ena maduna sisiba, aniani, dabua bona ruma do ia henia bona ruma bese taudia do ia naridia bona do ia matahakani henidia. Danu, gau badadia dekenai ena ruma bese do idia badinaia dalana ia abia hidi. Ia be headava tauna dainai, ena adavana ia laloa bona ena tauanina ia goada herea lasi dainai ia matauraia be namo. (Efeso 5:​22, 23; 1 Timoteo 5:8; 1 Petero 3:7) Namona be hahine be ena tau henunai ia noho, ena tau ia matauraia bada, ena gaukara ia durua bona tau ia bamoa be namo. Bona Bible ia hahedinaraia gau badana be natudia ese edia tamana bona sinana idia kamonai henia.​—Genese 2:18; Efeso 6:​1-3; 1 Petero 3:​1, 2.

Unai hahegani idia badinaia lasi neganai, dahaka ia vara? Tatau ese edia hahine idia laloa lasi neganai, bona hahine ese edia tau ena kwarana dagina idia matauraia momokani lasi neganai, hepapahuahu bona heai idia vara. Momokani, unai kara dainai headava taudia momo idia parara. Tama sina momo idia lalohisihisi badina edia natudia ese idia kamonai henidia lasi dainai bona idia gwau-edeede dainai. Nega momo, tama sina idia kerere bada, badina edia natudia idia tubu daekau neganai matahakani maorona idia henia lasi, bona unai dainai edia natudia idia habadudia.​—Efeso 6:4.

Ena be taunimanima durua taudia, lalona stadilaia taudia, bona ma taunimanima haida ese sisiba idauidau momo idia henia ruma bese edia hekwakwanai hanaia dalana idia hahedinaraia totona, to ruma bese ia Havaraia Tauna ena sisiba Bible lalonai ese ma sisiba iboudiai ia hereaia, bona ruma bese taudia ia durua momokani. Unai sisiba idia badinaia neganai, ruma bese taudia ese moale bona lalo-namo idia davaria.​—Salamo 19:​7-9.

Kongregesen Lalonai

Keristen kongregesen ena Kwarana tauna ese hahegani be ita ia henia ena “hesiai tauna mai ena kamonai bona mai ena kara maoromaoro” amo. Unai “hesiai tauna” amo Iesu ese Dirava ena tanobada oreana ia hakaua. Iesu be unai orea amo ia henia haheganidia ita badinaia be gau badana. (Mataio 24:​45-47; Efeso 5:23) Maino bona lalo-tamona be kongregesen lalonai idia noho totona, kongregesen ena memba taudia iboudiai ese unai hahegani idia badinaia be gau badana. Haheitalai ta be inai: Kongregesen taudia hadibaia gaukarana bona ma taunimanima haida durua karana idia gunalaia taudia ese Iehova ena orea amo idia abia haheganidia idia badinaia be gau badana. Unai bamona idia karaia neganai, unai ese idia do ia durua edia gaukara amo anina idia havaraia totona. Reana sisiba do idia abia inai gau dekenai: Haroro gaukara karaia dalana; kongregesen lalonai idia vara hekwakwanaidia hanaia dalana; sisiba henia bona lalona hagoadaia dalana; noho dika taudia edia lalona hagoadaia dalana, bona ma gau haida danu. Danu, kongregesen heboudia namodia hegaegaelaia dalana dekenai sisiba idia abia, unai hebou ese Keristen kongregesen lalonai idia noho taudia iboudiai idia hadibaia namonamo bona edia lalona idia hagoadaia totona.​—Kara 20:20; Roma 12:​6-8; Galatia 6:1; 1 Tesalonika 3:​1-3.

Kongregesen ena elda taudia, naria taudia unai, ese haheitalai namona unai gau dekenai idia hahedinaraia be gau badana. Hakaua Oreana ese hahegani ia halasia; namona be elda taudia ese unai hahegani idia badinaia namonamo mai edia kamonai ida. Namona be edia kongregesen ena noho hegeregerena, unai hahegani idia gaukaralaidia edia gabu dekenai idia hegeregere totona bona idia badinaia. Namona be ita laloaboio lasi Keristen kongregesen ia hakaua tauna be Iesu Keriso. Dala goevadaena amo ita diba namonamo, tanobada ibounai lalonai idia noho kongregesen iboudiai ese dahaka heduru idia abia be namo, bona ia ese lalona hagoadaia gaudia bona heduru gaudia ia henidia. Unai dainai, namona be elda taudia idia daradara lasi, to kara haraga Dirava ena tiokratik oreana amo idia abia haheganidia iboudiai idia badinaia. Unai amo kongregesen ta ta iboudiai lalonai haheitalai namona do idia hahedinaraia tadikaka iboudiai dekenai, bona kongregesen taudia do idia durudia edia kongregesen taudia bona edia tadikaka taihu tanobada ibounai lalonai danu do idia lalo-tamona totona.​—Kara 15:​1-31; Heberu 13:7; Apokalupo 5:6.

Moale Ia Havaraia

Ruma haginia tauna ese ruma badana ia haginia neganai, palani torea taudia edia palani ia badinaia namonamo, ia haginia gauna do ia noho daudau totona. Abata Badana ia do mai lasi neganai, taunimanima momo idia dagedage. Unai neganai, Dirava ese Noa ia hamaoroa lagatoi badana ia haginia totona. Noa ia hamaoroa edena dala ai do ia haginia bona edena taunimanima bona edena animal be unai lagatoi lalonai do ia hakaua vareai Abata amo do idia roho mauri totona. Noa be edena bamona ia karaia? Bible ia gwau: “Noa be inai bamona ia karaia, Dirava ena hereva ibounai hegeregere.” Noa bona ia danu idia noho taudia sibona be Abata amo idia roho mauri. (Genese 6:​5, 13-22; 7:23) Hari ita noholaia negana be Noa ena nega bamona, bona unai badina dainai Dirava ese kara dika taudia iboudiai do ia hadikaia ore. Bible ese ita ia hamaoroa, dahaka kara ita karaia be gau badana do ita roho mauri totona.​—Mataio 24:​37-39; 2 Petero 3:​5-7, 11.

Unai dainai, namona be mai eda momokani ida Iehova be ena Hereva amo bona ena tanobada oreana amo ia henia sisibana ita abia dae bona ita badinaia. Unai bamona ita karaia neganai, do ita kwalimu bona do ita moale bona do ita roho mauri.