Basileia Haroro Ripoti

Kathmandu Dekenai Lalo-Parara Idia Davaria

BRITTANY, France dekenai, laulau ia karaia hahine ta be, 1980 lalonai, hereva momokani ia tahua hamatamaia. Ia be Pentecostal misini taudia ida ia herevahereva bona East kahana tomadiho ia stadilaidia, to ia laloa idia hegeregere lasi. Bena ia be Iehova ena Witness taudia ida ia herevahereva sisina to unai kara ia rakatania. Murinai, ia be laulau ia karaia tauna ta ia davaria bona ia danu idia noho bona idia gaukara hebou.

Unai nega sisina murinai, unai headava lasi to idia noho hebou taudia ruaosi idia laloa Nepal do idia vadivadi henia. Idia be unai tano ena hairai bona ena maino dainai idia hoa bada mai moale, to unai gabu dekenai taunimanima be idia parara iduhu idauidau dainai dika idauidau idia vara. Unai dainai idia lalo-hisihisi.

France dekenai idia giroa neganai, unai hahine be ena tau ia hamaoroa idia be Bible idia stadilaia hebou be namo; ia hoa badina tau ia ura unai bamona idia karaia. Lagani rua gunanai ia danu idia herevahereva sisina Witness tauna idia tahua. Stadi idia hamatamaia neganai, Bible sibona idia gaukaralaia, to gabeai idia be Mauri Hanaihanai Ia Lao Henia Hereva Momokanina buka bona Mauri Hanaihanai Paradaiso Lalonai Oi Abia Diba buka idia gaukaralaia. Lagani tamona murinai, idia be drag ania kava karana idia rakatania.

Idia be hua rua lalonai Nepal idia vadivadi henia lou bena France dekenai idia giroa bona idia stadi noho. Idia be kuku ania karana, inuinu gabudia bona klab gabudia lao henia karana idia rakatania, bona Iehova ena Witness taudia edia hebou idia lao henia hamatamaia. To, idia be Mauri Hanaihanai bukana idia stadilaia ore neganai, idia be stadi idia rakatania.

Idia be Nepal dekenai ma idia giroa lao bona Himalaya Ororodia ena henuna ai ruma ta lalonai idia noho. Dina ta, tau burukana ta, coat bona tie ia hahedokilaia tauna, be edia iduara dekenai ia pidipidi. Unai hahine be sibona ia noho ruma lalonai, bona ia laloa unai be edia laulau ia hoia gwauraia tauna ta ia mai. Ia hoa badina ia be Witness ta, bona unai tau buruka ia gwau France dekenai idia danu ia stadi Witness tauna ese ia siaia. Nega sisina murinai, iena tau ia giroa, bona hora rua lalonai idia herevahereva.

Dina haida murinai, Kathmandu dekenai, unai tau bona hahine be Iehova ena Witness taudia edia hebou dekenai idia lao bona idia hoa bada badina idia mai taudia iboudiai edia toana idia goeva. France dekenai tadikaka ese idia hahedinaraia lalokau bona moale be unai gabu dekenai idia itaia danu. Idia itaia danu, unai hebou dekenai, herevana idia be iduhu idauidau amo, to idia noho Nepal taudia danu idia lalo-tamona. Unai neganai, idia lalo-parara unai be Iehova ena orea.

Hua tamona murinai, France dekenai idia giroa lao bona Bible stadi bona hebou lao henia karana idia hamatamaia lou. Dala maorona dekenai idia headava, haroro gaukara idia hamatamaia, bona idia bapatiso. Hari, unai tau be hesiai tauna ta, bona iena hahine be hanaihanai heduru pioneer gaukara ia karaia. Momokani, kudou-maoro taudia be Iehova ena heduru do idia abia idia goada idia lao bona ia idia tomadiho henia taudia ai idia lao totona.​—Apokalupo 7:​15-17.

[Box/Map on page 9]

NEPAL

Taunimanima - 17,712,221

1990 Pablisa Edia Namba Ia Daekau Lao - 63

Ratio, Pablisa Tamona Inai Namba Dekenai - 281,146

Averes Pioneer Pablisa - 10

Kongregesen Iboudiai - 1

Averes Bible Stadi - 107

Memorial Dekenai Idia Mai Taudia - 220

[Map]

(For fully formatted text, see publication)

NEPAL

INDIA

[Picture on page 9]

Kathmandu, Nepal ena maketi gabuna ta